Zechariah 13

Quechuan QXO (Biblia en Quechua del sur de Conchucos)

← Chapter 12 Jump to: Chapter 14 →

1«Tsay witsanmi pukyupita pashtamuq yakuwan mayllaqnö Davidpita miraqkunapa y Jerusalénchö täkuqkunapa jutsankunata perdonashä».

2Llapanta mandaq Tayta Diosmi nin: «Tsay witsanmi entëru kay nacionchö ïdulukunata ushakätsishä. Tsaymi qepa yuriqkuna tsay ïdulukunapa jutinkunatapis musyayanqanatsu. Tsaynöllam llulla profëtakunatapis y llutanta yarpätsiq supaykunatapis ushakätsishä.

3Noqapa jutïchö pipis llullakur willakuptinqa kikinkunapa papänin y mamanmi niyanqa: «¡Qamqa wanunkim! ¡Kikikipa yarpayllaykipitam Tayta Diospa willakuyninta willakuykanki!» Tsaynö nirmi llutanta willakuykaqta kikinpa mamanwan papänin tuksiyanqa.

4«Tsay witsanmi llapan llulla profëtakuna llullakur willakuyanqanpita pasaypa penqakuyanqa. Tsaymi profëtakuna jatikuyänan qaratsapita rurashqa mantunta imaypis jatikuyanqanatsu ni profëta tukuyanqanatsu.

5Tsaypa rantinmi niyanqa: «Noqaqa manam profëtatsu kä. Común runalla karmi wamra kanqäpita chakrallachö wiñarqü».

6Pipis «¿imanirtä cuerpuyki roqushqa kaykan?» nir tapuptinmi niyanqa: «Tsaytaqa amïgükunapa wayinchö arurmi malograkurqü».

7Llapanta mandaq Tayta Diosmi nin: «Espäda, üshata mitsinanpä churanqä amïgüpa contran tikray. Üsha mitsiqta wanuskatsiptïmi üshankuna wakpa kaypa mashtakar aywakuyanqa. Ashkashkunatapis ushakätsishämi.

8Tsaymi kay nacionchö täraqkunaqa pullanpita mas wanuyanqa. Sobraq kaqllanam kawaykar quëdayanqa.

9Kawaykar quëdaqkunataqa jutsaynaq kayänanpämi purificatsishä. Qellayta ninawan fundiqnö y qorita ninawan qanranta jipiqnömi paykunata purificashä. Paykuna mañakayämaptinmi wiyashä. Tsaymi nishä: «Qamkunaqa kuyanqä wamräkunam kayanki». Paykunanam niyämanqa: «Noqakunapa Diosnïqa qammi kanki».

← Chapter 12 Jump to: Chapter 14 →