Zechariah 7

Quechuan QXO (Biblia en Quechua del sur de Conchucos)

← Chapter 6 Jump to: Chapter 8 →

1Rey Darío chusku wata mandakuq kaykaptinmi profëta Zacaríasta Tayta Dios yapay parlaparqan. Tsayqa isqun kaq killachö chusku kaq junaqmi karqan. Isqun kaq killapa jutinmi Quisleu karqan.

2Tsay witsanmi Bet-el runakuna Sarezerta, Regem-melecta y wakin runakunatapis Tayta Diosta rugakuyänanpä mandayarqan.

3Tsaymi llapanta mandaq Tayta Diospa templunman chaykur sacerdötikunata y profëtakunata tapukur niyarqan: «Pitsqa kaq killachö atska watanam waqar ayunayä. ¿Tsaynöllaku ayunar sïguiyäshä?»

4Tsaynö tapuyaptinmi willanäpä llapanta mandaq Tayta Dios nimarqan:

5«Judáchö taykaq llapan runakunata y sacerdötikunata ninki: «Qamkuna qanchis chunka (70) watantin pitsqa kaq y qanchis kaq killachö ayunar waqarnin ¿munanqänötsurä ayunayarqayki?

6Qamkunaqa adorayämanqayki fiestachöpis pachaykikuna juntanallanpämi mikur upur kaykäyanki.

7Unay castaykikunapis qamkunanö kayanqantam profëtäkunawan willakatsirqä. Tsay witsan Jerusalénta manarä ushakätsiptinmi alli kawayarqan. Lädunchö kaykaq markakunachöpis runakuna juntam täyarqan. Tsaynöllam Neguev partichö y Sefelachö täraq runakunapis atskaq taykäyarqan».

8Mastam profëta Zacaríasta Tayta Dios nirqan:

9«Llapanta mandaq Tayta Dios karmi nï: «Runa mayikita juzgarqa pipapis favornin mana shäriypa juzgayay. Jukniki juknikipis kuyanakuyay.

10Viüdakunata, waktsakunata, juklä nación runakunata ni pobrikunatapis ama ñakatsiyaytsu. Runa mayikipa contran imatapis ama yarpäyaytsu.

11«Profëtäkunawan willakatsiptïpis unay castaykikunaqa manam cäsuyämarqantsu. Tsaypa rantinqa mana wiyayämänanpämi rinrinta tsapakurkur jukläpa tumaräyarqan.

12Imayka diamantinö chukru kananpämi shonqunkunatapis chukruyätsiyarqan. Tsaynö rurayarqan unay profëtakuna willakuyanqan leynïkunata y yachatsinqäkunata wiyayta mana munarmi. Profëtakuna willakuyänanpä Espïritümi tantiyatsirqan. Tsaynö kaykaptinpis mana wiyakuyaptinmi pasaypa rabyarqä.

13Tsaymi paykuna mana cäsuyämanqannölla noqapis paykunata cäsurqätsu. Llapanta mandaq Tayta Dios karmi tsaynö nï.

14Tsaypitam shukukuy vientu mashtaypa mashtar apanqannöpis mana reqiyanqan nacionkunaman wakpa kaypa paykunata mashtakätsirqä. Puntata täyanqan nacionpis tsunyaqman tikrashqa kaptinmi runakuna tsaypa päsayarqannatsu. Tsaymi kuyayllapä nacionninchö pipis täyarqannatsu».

← Chapter 6 Jump to: Chapter 8 →