Lamentations 2

Kirundi (Bibliya Yera 1951, 1967 (Burundi))

← Chapter 1 Jump to: Chapter 3 →

1Ewe kuntu Umwami Imana yaratse, akūbikiza igicu ku mukobga w’i Siyoni! Yatsinze hasi ubgiza bg’ Abisirayeli abuhanuye kw ijuru, Kandi ntiyibutse indava y’ ibirenge vyiwe kur’ uwo musi w’uburake bgiwe.

2Umwami Imana asanganguye amazu yose ya Yakobo ata kagongwe; Yahenuranye uburake ibihome vy’umukobga w’i Buyuda; Arabitsinda gushitsa hasi: Abami n’abaganwa babo yabahinduye ibihumane.

3Kubg’ uburake bgiwe bg’inkazi yakondoye ihembe ryose ry’Abisirayeli; Yapfunye ukuboko kwiwe kw’i buryo imbere y’abansi: Kandi yaturiye Yakobo, amumerera nk’umuriro w’ikibengebenge utongora impande zose.

4Yamufōreye umuheto nk’ umwansi, yahagaze abanguye ukuboko kw’i buryo nk’umurwanizi, Yishe abanyagikundiro bose: Yasutse ubushangashirwe bgiwe mw ihema ry’umukobga w’i Siyoni nk’umuriro.

5Umwami Imana yahindukiye i Bgisirayeli nk’umwansi, arahayongobeza; Yayongobeje ingoro zaho zose, yasanganguye ibihome vyaho: Yongerekanije akabonge n’ ugucura intimba vy’umukobga w’i Buyuda.

6Yashikuye ihema ryiwe nk’ ah’ ar’ umutara wo mu murima; Yasanganguye ahantu hiwe h’ikoraniro: Uhoraho yatumye imisi mikuru n’amasabato vyibagirana i Siyoni, Kand’ ubushangashirwe bgiwe bg’inkazi bgatumye atītūra umwami n’umuherezi wese.

7Umwami Imana yashibuye igicaniro ciwe, yazinutswe ahēra hiwe, Yagabuye mu maboko y’ abansi ibigo vy’ingoro z’i Siyoni: Bāyogoreye mu ngoro y’ Uhoraho, nko ku musi mukuru washinzwe.

8Uhoraho yagabiye gusangangura uruzitiro rw’umukobga w’i Siyoni: Yahageresheje umugozi, ntararuha apfunya ukuboko ngw areke guhonnya; Yateye igihome n’uruzitiro kuboroga; vyiheburiye hamwe.

9Amarembo yaho anyikiye mu kuzimu; ibihindizo vyaho yaravyononye, arabivunagura: Umwami waho n’abaganwa baho bari mu mahanga; nta vyagezwe bikiriho: Mber’ abavugishwa n’Uhoraho ntibakigira ivyo beretswe na we.

10Abashingantahe b’umukobga w’i Siyoni bicaye hasi, baguye mu gahwi; Biyoreye imikungugu ku mitwe; bakenyeye amagunira; Abakobga b’i Yerusalemu bajondamitse imitwe hasi.

11Amaso yanje yakobowe n’ amosozi, amara yanje aradobangana, Umutima wanje usanzariye hasi kubgo kugesezwa kw’ umukobga w’ubgoko bgacu; Kukw abana bato n’abonka barabiraniye mu nzira zo mu gisagara.

12Babaza ba nyina, bati Nta duheke na vino vyobaho? Bagaca barabiranira mu nzira zo mu gisagara nk’abakomeretse, Imitima yabo igahondoberera mu bikiriza vya ba nyina.

13Nokubarira iki? Nokugereranya n’iki, ga mukobga Yerusalemu we? Noguhwanya n’iki kugira ngo nguhūmurize ga nkumi Siyoni we? Kuk’ uruguma rwawe ari runini nk’ikiyaga: ni nde yoshobora kukuvūra?

14Ba kamenyi bawe bākurotoreye ivy’ ubusa n’ivy’ ubupfu; Kandi ntibāguseruriye ibigabitanyo vyawe, ngo ntuje mu kinyago: Ariko bākurotoreye imbūri z’ubusa, n’ibikuzanira gucibga.

15Abahita bose bakwitamba ku muvyimba bakubita amashi ku yandi; Bakavuza agahwa, bakazunguriza imitwe umukobga w’i Yerusalemu, Bati Mbeg’ iki ni ca gisagara abantu bāhora batazira, ngo Ni Nyamwiza w’agahore, ngo Ni Munezero w’isi yose?

16Abansi bawe bose barakwasamiye cane, Bavuza agahwa, bagahekenya imisaya, bati Twarahayongobeje; Bati N’ukuri uyu ni wo musi twari twiteze; none turawushitseko, turawiboneye.

17Uhoraho yakoze ico yagabiye; Yashikije ijambo ryiwe yashinze mu misi ya kera; Yagukubise hasi ata kagongwe; Yahaye umwansi kukwitamba hejuru, Yashize hejuru ihembe ry’ abarwanizi bawe.

18Umutima w’ab’ i Yerusalemu watakambiye Uhoraho; Bat’ Ewe wa ruzitiro rw’umukobga w’i Siyoni, reka amosozi asendanishe nk’ uruzi ku murango no mw ijoro; Nturuhe uruhuka na gatoya; imbone y’ijisho ryawe ntitenzekanye.

19Va hasi uboroge mw ijoro, uhereye igihe amaterama atanguye; Usuke umutima wawe nk’ amazi imbere y’Umwami Imana: Tega ibiganza umusabire ubugingo bg’abana bawe, Barambitswe n’inzara mu mayirabiri yose.

20Uhoraho we, rāba witegereze uwo wagiriye ivyo! Mbeg’ abagore borya abo bāvyaye, utwana bākuyakuya mu maboko yabo? Mbeg’ umuherezi n’ūvugishwa n’Imana bokwicirwa ahantu hēra h’Umwami Imana?

21Umusore n’umutāma barambaraye hasi mu nzira; Abigeme banje n’imisore yanje bahindikiranijwe n’ inkota; Wabatikije ku musi w’uburake bgawe; warabariritse ata kagongwe.

22Wampamagariye ibinteye ubgoba irya n’ino, nk’uko wahamagara ikoraniro ku musi mukuru washinzwe, Kandi nta warokotse canke ngw asigare kur’ uwo musi w’uburake bg’Uhoraho; Abo nakuyakuya nkabarera, umwansi wanje yarabampēkūye.

← Chapter 1 Jump to: Chapter 3 →