Lamentations 5

Kirundi (Bibliya Yera 1951, 1967 (Burundi))

← Chapter 4 Jump to:

1Uhoraho we, ibuka ivyatubayeko: Itegereze urābe ukuntu dutukwa.

2Ishamvu yacu yegukiwe n’ abanyamahanga, N’amazu yacu yegukiwe n’ab’ akavantara,

3Tur’ impfuvyi ntitukigira ba data, Ba mama bameze nk’abapfakazi.

4Tunywa amazi tuyaguze; Inkwi tuzironka ku biguzi.

5Abaduhīga batuguye ku gakanu: Turarushe, ntitugira akito ko kuruhuka.

6Twakomeye amashi Abanyegiputa, N’Abashuri kugira ngo turonke utwo kurya two kwisama.

7Ba data bakoze ivyaha, kandi ntibakiriho; Natwe twasubiweko n’ibigabitanyo vyabo.

8Abagurano ni bo basigaye batuganza: Nta wuriho wo kuturokora ngw atugobotore mu maboko yabo.

9Ivyo kurya tubironka duhevye amagara, Kubg’ inkota itegeye mu bugaragwa.

10Urukoba rwacu rusigaye rwirabura nk’inkono, Bitewe n’umuriro w’inzara.

11Bafata abagore bo muri Siyoni ku kagōbēro, N’inkumi zo mu bisagara vy’i Buyuda.

12Abaganwa bāmanitswe babasungaje ukuboko kumwe: N’abatāma ntibābagirira udusoni.

13Imisore isigaye ikorerwa insyo, N’abana banyikizwa n’imbambo z’inkwi.

14Abatāma bāhevye kwicara ku nama, N’imisore ntikiruha icuraranga.

15Umunezero wo mu mitima yacu urashize; Imvyino zacu zahindutse amaborogo.

16Ibitsibo vyo ku mitwe yacu birakorotse: Tubonye ibara, kuko twakoze ivyaha.

17Ni co gituma imitima yacu ihondobera, Ivyo ni vyo bituma duhwera mu kajisho;

18Bitewe n’uk’ umusozi Siyoni ucitse amatongo: Imbgebge zisigaye zihatambatamba.

19Weho, Uhoraho, wamah’ ibihe bidashira; Intebe yawe ihoraho uk’ urunganwe rugenda rukurikirana.

20N’iki catumye utwibagira ibihe vyose, Kand’ ukaduheba kumara igihe kirekire kingana girtyo?

21N’utwigarukanire, Uhoraho we, natwe turakugarukira; Dukomōrere imisi yacu nk’ iyo twahoranye ubga mbere,

22Shiti waradutaye ruhebga, Ukaturakira birenze urugero.

← Chapter 4 Jump to: