Lamentations 4

Kirundi (Bibliya Yera 1951, 1967 (Burundi))

← Chapter 3 Jump to: Chapter 5 →

1Ewe kuntu izahabu yafyirifyitiye! Ukuntu izahabu nziza yahindutse ukundi! Amabuye y’ahēra h’urusengero yasābagijwe mu mayirabiri yose.

2Abahungu b’igikundiro b’i Siyoni, abāri bameze nk’ izahabu nziza, Ewe kuntu bagereranywa n’ imibindi y’imibumbano, igikorwa c’amaboko y’umubumvyi!

3Imbgebge zo ziha ivyana vyazo amabgabga, zikavyonsa; Umukobga w’ubgoko bgacu we agira icīra, nk’ibisīga vyo mu bugaragwa vyitwa imbuni.

4Ururimi rw’umwana yonka rufatanye n’uruhekenyero, ruguye ubukagashi: Abana bato basaba utwo kurya, ariko nta wubaha.

5Abāri bamenyereye gufungura ibigemānije basigaye bagwira isari mu nzira; Abārerewe mu mpuzu z’ inyambarabami basigaye barambarara ku macukiro.

6Kukw ibigabitanyo vy’umukobga w’ubgoko bgacu bikomeye gusumba icaha c’i Sodomu, Ari ho hākomvomvowe mu kanya isase, ata kuboko kuhakozeko.

7Abaganwa biwe bāhora bakayangana kurusha shelegi, bakarusha n’amata kwera, Imibiri yabo yabonerana kurusha utubuyenge twitwa marijani, bāri basēnnye nk’ utwitwa safiro.

8Noneho mu maso habo hasigaye harusha imivyiro kwirabura; ntibakimenyekana mu nzira: Urukoba rwabo rumatanye n’ amagufa; rwārūmye nk’igiti.

9Abicwa n’inkota ni bo bapfa rwiza kuruta abicwa n’ inzara; Kukw abo bo bagenda bashirira hejuru, bakicwa no kubura utwo bokweza mu mirima.

10Abagore bāri bafise ikigongwe basigaye bafata abana bīvyariye, bakabateka, Bakaba ivyo kurya vyabo, igihe umukobga w’ubgoko bgacu yagesezwa.

11Uhoraho yashikije ubushangashirwe bgiwe, yarekuye uburake bgiwe bg’inkazi; Kandi yadometse umuriro muri Siyoni, utongora n’ amatanguriro yaho.

12Abami bo mw isi, bo n’ababa kw isi bose, nta ho bokwemeye Kw abarwanizi n’abansi bofyutse mu marembo y’i Yerusalemu.

13Vyatewe n’ivyaha vya ba kamenyi baho, n’ibigabitanyo vy’abaherezi baho, Bāvishirije amaraso y’abagororotsi hagati muri ho.

14Badandabagirana mu nzira zaho nk’impumyi, bihumanishije amaraso, Bituma abantu batagishobora gukora ku myambaro yabo.

15Barabahāniranwa, bati Ni mwīgireyo, mwa bihumane mwe! Ni mwīgireyo, ni mwīgireyo, ntimugire ico mukorako! Igihe bāhunga bayerera, abantu bo mu mahanga baravuga, bati Ntibabe bakiba hano.

16Igitsure c’Uhoraho carabashwiragije; ntagisubira kubashirak’ umutima: Na bo ntibubashe abaherezi, ntibāsoneye abatāma.

17Amaso yacu yakobowe no kurereka ugutabarwa kwacu, kand’ ata co bitumariye: Mu kurereka kwacu twiteze ihanga ridashobora gukiza.

18Baraturyamiye, bituma tudashobora guca mu nzira zacu: Iherezo ryacu riri hafi, imisi yacu irashize; ni koko iherezo ryacu rirashitse.

19Abaduhīga barusha inkukuma zo mu kirēre kunyaruka: Badukinagiza ku misozi miremire, bakaducira ibico mu bugaragwa.

20Uwar’ atubereye nk’impwemu duhumeka, uwari yararobanujwe amavuta n’Uhoraho, yakorokeye mu vyobo vyabo, Kand’ ari we twari twishimiye, ngo mu gitūtu ciwe ni ho tuzoba, uko turi hagati mu mahanga.

21Ni winezererwe, uhimbarwe, ewe mukobga, Edomu we, wibereye mu gihugu c’i Uzi! Nawe igikombe kizodōbēra kiruhe kigushikeko; uzoborerwa, ute agahuzu.

22Igihano c’ukugabitanya kwawe kirarangiye, weho mukobga, Siyoni we; Ntazokwongera kukujana kure ur’ inyagano: Ariko wewe mukobga, Edomu we, azoguhanira ibigabitanyo vyawe; Azogaragaza ivyaha vyawe.

← Chapter 3 Jump to: Chapter 5 →