Amos 3

Romani Ursari 2018 (Biblia Ande Chib Romani)

← Chapter 2 Jump to: Chapter 4 →

1Asunen tumen israelitura, so phenel o Del e foroke kai ikanda katar o Ejipto.

2Samo tumen esvirisardem maskar sa e familia katar o sueto. Goleke ka dukhavav tumen, pala sa o bilachipe kai cherden.

3Te phirel iek averea, gua si soke achile pe iek alav.

4Te basel o liono ando vos, gua si soke malada jape. Te basel o liono minono katar o than kai gurudol, gua si soke malada vareso te jal.

5Te istardol o porrno katar iek chirikli ta te perel pe phuv, gua si soke iek lleno thoda lake o solo. Te jutel o solo, gua si soke istardilo vareso.

6Te basel e tuturuga ando foro, e llene daran. Te nakhel fiso bilacho ando foro, si soke o Del cherda le.

7O Del nikada ni cherel niso bi te phenel le pe slugenge.

8¿Ko ni daral kana o liono basel? ¿Ko ni ka poraukil kana ka del orba o Del?

9Phenen le ande bare chera katar o Asdod, ta ande bare chera katar o Ejipto: Aven karing e burdura katar e Samaria, dikhen e bari burkania kai si andre ta o silnope kai cheren kote.

10O Del phenel gia: Ni llanen te cheren so si orta, guruven pe chera so lie silnomaia.

11Goleke gia phenel o Del: Iek dusmano ka avel katar suako rig e phuviako, ta ka peravel cho cher marimako ta ka lel o barvalipe katar tumare bare chera.

12Gia phenel o Del: Sargo kana o chobano ikanel katar o mui e lionoko dui porrne o iek kotor katar o kan, gia ka nasen e israelitura kai zivin ande Samaria, gola kai si inzarde ande postelie sukar katar o Damasko.

13O Del kai si le sa e zor phenel: Asunen ta den po Jakob,

14soke kana ka dukhavav e Israele pala leko bilachipe, ka zatriv e altarura kai si ando Betel, ka chinen e singa katar o altar ta ka peren pe phuv.

15Ka zatriv o cher katar o viend ta o cher katar o milai, ni ka aven ios chera katar o marfil, ta ka peravav e bare chera sukar. Gia phenda le o Del.

← Chapter 2 Jump to: Chapter 4 →