Amos 6

Romani Ursari 2018 (Biblia Ande Chib Romani)

← Chapter 5 Jump to: Chapter 7 →

1¡Tesko e llenenge kai ni trudinpe ando Sion! ¡Tesko e llenenge kai zivin smiro ande Samaria, e gazda katar o foro mai glamno, kai e israelitura mangen lendar te pomozin len!

2Llan karing o Kalne te dikhen, kotar llan karing o Jamat, o baro foro, mapalal llan karing o Gat katar e filisteura. ¿Sen tumen mai lache neko gala phuvia?

3Ni kamen te mislin ando llive bilacho, ta anen e charoina katar o bilachipe.

4Soven ande kervetura cherde katar o marfil, ta kana cheren baro jape jan e bakrorre ta e bakre thule,

5basalen ande tuturuge samo gia, ta ikanen basalde prema sar cherela o David,

6pien mol ande tasura bare, thoven pe tumende merisura kai si kuch, ¡ta ni chitilpe tumenge e zatrania katar e phuv!

7Tumen ka aven e purve kai ka llan phangle ande aver phuv, ta ka avel bari zalba golenge kai cherena o baro jape.

8O Gazda jala sovel isto pe pete, o Del kai si le sa e zor phenel gia: Murziv po beripe me foroko o Jakob, murziv pe leke chera bare, ka dav e foro e dusmanonenge, ta sa so si andre.

9Ondaka te achena des murusa katar iek cher, e des ka meren.

10Gia bari ka avel e dar kai kana fiko ka ustel iekhe esnaga muli, ka phenel ogoleke kai si andre ando cher: ¿Si fiko tuia? Ta o gua ka phenel: Iok. Ondaka gua kai puchla ka phenel: Na de orba, soke nasti phena o anav e Devleko.

11Soke o Del ka phenel te zatrin e chera bare ta e chera kai si pe pechine, sa ka aven zatrime.

12¿Sai te llan e gra pe pechine? ¿Sai te radin pe lende e guruva? ¡Tumen boldien e kris orta ando veneno ta e septelia lachi katar o chachipe, ando cherkipe!

13Tumen kai veselintumen pala niso, ta phenen: Isto amare zoriaia cherdam so si amen.

14Goleke thoven sama tumen israelitura, o Gazda, o Del kai si le sa e zor phenel: Me ka vazdav iek foro kai ka del pe tumen, von ka ustaven saurren, katar o drom kai den ando Jamat llik o paiorro katar o Araba.

← Chapter 5 Jump to: Chapter 7 →