bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Ursari 2018 (Biblia Ande Chib Romani)
/
Amos 5
Amos 5
Romani Ursari 2018 (Biblia Ande Chib Romani)
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 6 →
1
Asunen tumen israelitura, asunen e alava zalosne kai phenav tumenge:
2
E chei katar o Israel pelitar, pelitar ta ni ka ustel ios. Achili inzardi pe pi phuv, ta inai ko te vazdel la.
3
Gia phenel o Del e israelitonenge: Te si kai iek foro bichalel milia murusen po maripe, samo stotina lendar ka achen llunde, a te si kai iek foro bichalel stotina murusen, samo des ka achen llunde.
4
Gia phenel o Del e llenenge katar o Israel: Aven mande ta ka zivin.
5
Na llan ando Betel, na llan ando Gilgal ta na nakhen ando Berseba, soke e Gilgale ka inllaren le phanglo ande aver phuv ta o Betel ka avel sa zatrime.
6
Roden e Devle ta ka zivin, soke te na, vou ka cherel te perel iag po Israel, ta ni ka achel niko ando Betel te mundarel e iag.
7
¡Tesko tumenge kai bolden e kris orta ando cherkipe ta chuden pe phuv o chachipe!
8
O Del kai cherda o Plellades ta o Orion, kai boldel e riat ando llive ta o llive ando truniariko sargo e riat, kai ikharel e paien katar e mora ta chudel len pe phuv. Vou si o Del, kai leko anav si baro,
9
kai del zor gole kai vazdel mai but neko o zuralo, ta cherel te avel po cher marimako gole kai vazdel.
10
¡Tesko tumenge kai murzin po lleno kai mangel so si orta, ta kana chinen e kris murzin po lleno chacho!
11
Goleke, soke ustaven e chorren ta mangen lendar love pala o lliu tumen ni ka zivin ande tumare chera barrustune kai cherden, ta ni ka pien e mol katar tumare vostanura drakhengo.
12
Me pinllarav tumare but ezgode bilache ezgode bilache kai inai len son: ustaven e chorren, len love kojaimaia ta kana chinen e kris cheren te na dobil o chorro.
13
Goleke o lleno bizai ni phenel niso, soke o vreme inai sukar.
14
Roden te cheren o lachipe ta na o bilachipe, ta ka zivin. Gia ka avel chachipe so phenen tumen: kai o Del kai si le sa e zor si tumenchar.
15
¡Murzisaren po bilachipe! ¡Volisaren o lachipe! Chinen kris orta, ta gia sai te avel kai o Del kai si le sa e zor, ka avel leke zao katar o porodo e Joseeko kai achel.
16
Gia phenel o Del kai si le sa e zor: Ka roven pe plase, ta pe suako drom ka avel urkipe dukhatar. Ka ikharen e llenen kai radin e phuv te roven, ta e llenen kai llanen llilia zalosne ta llilaben.
17
Ande suako vostano drakhako ka roven kana me ka avav te pativ tumen. Gia phenda le o Del.
18
¡Tesko tumenge kai mangen te avel o llive e Gazdako! ¿Llanen sar ka avel tumenge gua llive? Ka avel truniariko ta na villelo.
19
Ka avel sargo kana iek nasel katar o liono ta malavel e melledoia, ta sargo kana iek lleno ande po cher thovel po va po zido, ta dandarel le iek sap.
20
Ea, ando llive e Gazdako ka avel truniariko ta ni ka avel, gachin truniariko kai niso ni ka dikhol.
21
Murziv pe tumare slave kai cheren mange, inai mange drago kana tumen chidiniaon te blagosin man.
22
Ni kamam tumare kurbanura phabarde kai cheren te den man liubao, ta inai mange drago tumare ofrende katar e septelie. Ni ka lav tumare zivirinie thule ta e kurbanura pala e pas.
23
¡Na llilaben mange! ¡Ni kamam te asunav tumare arpe!
24
Mai preche si mange te llal e kris orta sargo o pai, ta o chachipe sargo iek bari len
25
Israelitura, kana tumen sena po pusto saranda burs, ¿dien mange kurbanura ta ofrende?
26
Tumen inllarena e chara katar tumaro Molok ta o Kiun kai sea tumare dela, e cherain katar tumare slike kai cherden.
27
Goleke me ka cherav te inllaren tumen mai dur neko o Damasko. Gia phenda le o Del kai si le sa e zor.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 6 →
All chapters:
1
2
3
4
5
6
7
8
9