Amos 9

Romani Ursari 2018 (Biblia Ande Chib Romani)

← Chapter 8 Jump to:

1Dikhlem e Devle kai saia pasa o altar, ta phenda mange: Perav e direkura llik kana ka peren, te dermonpe e udara, ¡te peren pe kotora pe llene! Gola kai ka achen llunde, ka mundarav len jarnienchar, te nasena, ni iek lendar ni ka achel llundo.

2Te guruduna andre ande phuv, kotar ka ikanav len, te likena llik kai o miloso, kotar ka cherav te fulien.

3Te guruduna pe rig mai vazdino katar o burdo Karmelo, incha ka llav te anav len, ta te guruduna mandar chak telal katar e mora, ka bichalav e sapa ta ka dandaren len,

4a lenge dusmanura te inllarena len phangle ande aver phuv, inchate ka bichalav o jarni te mundarel len. ¡Me ka thovav me akha pe lende te zatriv len, na te blagosiv len, suako drom ka aven angla me akha!

5O Del kai si le sa e zor, dodil e phuv ta e phuv bilaol ta e llene roven. E phuv vazdiniaol ta fuliel, sargo e paia katar o Nilo.

6O Del thoda pi soba ando miloso ta o putardipe pe phuv. Vou ikharel e paien katar e mora ta chudel len pe phuv. Vou si o Del, kai leko anav si baro.

7Gia phenel o Del: Israelitura, mange sa e llene si sargo iek. Isto gia sar andem tumen katar o Ejipto, andem katar e Kreta e filisteonen, ta katar o Kir andem e arameonen.

8O Del dikhel pe iek charoina bilachi, ta phenel: Me ka zatriv len katar e phuv, a ka braduiv e porodo katar o Jakob. Me o Del phenav le.

9Me ka cherav te chiston e Israele isto gia sar chiston o lliu ta ni iek lliu ni perel pe phuv.

10Sa e llene kai cheren o bilachipe ande mo foro ka mundaren len e jarniea, sa gola kai phenen kai ni ka nakhel niso, ta kai e zatrania ni ka resel lende.

11Kana ka avel o llive, me ka vazdav pale e chara katar o David kai akana si peradini. Ka lacharav e zidura phage ta ka vazdav len pale katar e zatrania. Ka vazdav le gia sar cherdem le omanglal,

12te sai len so achel katar o Edom ta sa e phuvia gola kai ikharen man. Gia phenda le o Del, ta gia ka cherel le.

13Aven e llivesa, phenel o Del, kai e llene kai putaren e phuv ka resen ogolen kai chiden e septelie, ta gola kai ustaven e drakha ka resen ogolen kai thoven e simicha e drakhaki, ta sa e burdura ka bilaon.

14Ondaka ka anav me foro o Israel kai si phanglo ande aver phuv, ta von ka vazden pale e forura kai achile zatrime, ta pale ka zivin andre. Ka bariaren vostanura drakhake, ta lendar ka pien e mol. Ka bariaren vostanura, ta lendar ka jan e septelie.

15Me ka thovav len ande lengi phuv, ta nikada ios ni ka chuden len kotar, soke me diemla lenge. Gia phenda le o Del.

← Chapter 8 Jump to: