Deuteronomy 21

Romani Ursari 2018 (Biblia Ande Chib Romani)

← Chapter 20 Jump to: Chapter 22 →

1A ande phuv kai o Del tumaro Gazda ka del tumen te avel tumari, te malavena ande umal iek esnaga muli katar iek lleno kai mundarde le ta ni llangliolpe ko mundarda le,

2E phure ta e krisaria ka mislinpe pe gachin si katar si esnaga muli ta e forura kai si mai pase.

3Ondaka e phure katar o foro kai si mai pase ka len iek guruvmi kai ni ios ni radisarda kai ni inllarda llugo,

4ka fuliaven la kai iek len kai suako drom inllaren pai ta kai nikada ni radisarde e phuv ta ni cherde kote vostano, ta isto kote ka phagen leki korr.

5Mapalal ka aven pase e popura levita, soke o Del esvirisarda len te sai von radin ta te blagosin ando anav e Devleko ta katar o lav lengo ka chindol suako joli ta suako chingar.

6Mapalal sa e phure katar o foro ka jalaven pe va pe guruvmi muli,

7ta ka phenen gala alava: Amen ni mundardam gale manuse, ta ni dikhlam sar mundarde le

8Devla, prostisar che foro Israel, kai tu braduisardan, ta na dosar len katar o meripe katar iek chacho. Ta gia gava meripe ka avel lenge prostime

9ta tumen ka cheren so si chacho angla e akha e Devleke ta ka ikanen maskar tumende e dos katar gua meripe.

10Kana ka llan te maren tumen tumare dusmanenchar ta o Del tumaro Gazda dela len ande tumare va ta phandena nesave lendar,

11a vareko tumendar te dikhela maskar lende iekhe diskinia sukar ta volila la ta le lala rromi,

12morabi te inllarel la ande po cher ta ka cherel te jaliavel po soro te chinel pe unlle,

13te ikanel pe patave kai sea pe late kana saia phangli ta te achel te zivil ande leko cher ta te rovel pala pe dada chon llive.

14A te avelape kai mapalal ni avela leke drago ka mukel la te llaltar a nasti ka bichinel la pe love o te cherel la sluga, soke vou dia la ando lallao.

15Te avela iek manus kai si le dui diskinie, ta volila iekha a ogola ni, a e dui te dena le chaurre ta o chaurro mai purano si katar e diskinia kai vou ni volil

16ta kana avela o llive kai vou fulavela so si le maskar pe chaurre, nasti ka cherel o chaurro katar e diskinia kai vou volil te del le o liubao sar chaurro mai purano, nasti ka cherel gava bilachipe e chaurreke kai si katar e diskinia kai vou ni volil, soke vou si o chaurro mai purano.

17Goleke vou morabi te phenel kai gua chaurro katar e diskinia kai ni volil si o chaurro o mai purano ta morabi te del le dui droma mai but katar so saia te del le, soke vou si o purvo katar e septelia katar leki zor ta si le sa o liubao sar chaurro mai purano.

18Vareko te avela le iek chaurro kai ni kandel ta kai ni thovel sama so phenen leke dada, ta i ka silnonpe pe lete ni kanden le,

19ondaka ka len le leko dad ta leki dei ta ka inllaren le kai e kris katar e phure e foroke,

20ta ka phenen e phurenge katar o foro: Amaro chaurro si besno ta ni kandel amen niso ta samo jal te piel.

21Ondaka sa e murusa katar o foro ka mundaren le e barrenchar. Gia tumen ka ikanen o bilachipe maskar tumende, ta sa o Israel ka asunel ta ka daral.

22Te chinena iekhe lleneke te merel umblado pe iek kas soke cherda iek baro bilachipe,

23leki esnaga ni ka muken la sorro riat umbladi po kas, ta ni ka pokali e phuv.

← Chapter 20 Jump to: Chapter 22 →