Deuteronomy 28 — Romani Ursari 2018 (Biblia Ande Chib Romani)

1A chachimaia te kandena e Devle tumaro gazda ta te cherena sa leke alava kai me allive phenav chuke te chere, ondaka o Del ka thovel tut upral pe sa e forura e phuvienge.

7O Del ka dobil tumare dusmanen kai ka vazdiniaon pe tumende, katar iek drom ka liken te marenpe tumenchar a katar e efta droma ka nasen angla tumende.

8O Del ka bichalel po blagosipe pe tumare sobe kai guruven tumare septelie ta pe sa so cherea ta ka cherel tumen te zivin vesele ande phuv kai ka del tumen.

9Te kandena leke alava ta te llana pe leke droma, o Del tumaro Gazda ka phenel kai tumen sen leko foro santo, gia sar jala tumenge sovel.

10Ondaka sa e forura e phuvienge ka dikhen kai upral pe tumende ikhardol o anav e Devleko ta ka daran tumendar.

11O Del ka sikavel tumenge po volipe ta ka del tumen but chaurre, ta tumare zivirinien ta but septelie ande phuv kai tumare puranenge jala sovel kai ka del la tumenge.

12Ta o Del ka putarel po barvalipe kai si o miloso te sai del o pai kai trubul che phuvia ta ka blagosil sa cho rado. Ta tumen ka den unllile bute phuvien a tumen ni ka mange nikatar unllile.

13O Del ka thovel tumen te aven soro a na pori, ta ka aven upral pe llene a nikada tele, te kandena e alava e Devleke tumaro gazda, kai me allive phenav tumenge te kanden,

14ta te na duriu katar sa e alava kai me phenav chuke allive, ni pe chachi ni po stingo te lla pala aver dela te blagosi len.

15A te na asunena o avazi e Devleko tumaro gazda ta te na kandena sa leke alava ta leke zakonura kai me allive phenav tumenge te kanden, ka avel pe tumende sa gala armaia ta ka resel tumen.

16Ka ave proketo ando foro ta ande umal.

17Ka avel proketime tumari kotaricha ta i o than kai cheren o marrno.

18Ka aven proketime tumare chaurre tumare septelie kana ka chiden len ta e minone katar tumare guruva katar tumare bakre ta katar sa tumare zivirinie.

19Ta prokete ka aven pe sa so cherena.

20Prokete ka aven e Devletar ta ka bichalel pe tumende burkania ta duk pe sa so cherena ta but oma ka aven zatrime, soke tumen muklen e Devle pala tumare bilache ezgode kai cherden.

21O Del ka bichalen pe tumende iek muka kai ka zatril tumen ande phuv kai ka lel.

22Ta i ka bichalel pe tumende baro nasualipe kai mundarel, ka phabon nasualimatar, ta ka suvlion ta ka bichalel baro tatipe, ni ka delpeke zatrania pe tumare lliuv nasualipe kai ka llal pala tumende lligo ni ka zatril tumen.

23Incha upre, o miloso ni ka del tut po bursin, a kate tele e phuv ni ka del tut pe septelie.

24O bursin saia o Del te bichalel pe tumende a o prajo ta e chisai ka bichalel pe tumende lligo ni ka aven zatrime.

25Ta o Del ka cherel te maren tut che dusmanura, pe iek drom ka llan te maren tumen, ta pe efta droma tumen kana sen lendar ta sa e phuvia ka maren tumendar espurnia.

26E chiriklia ta e zivirinie ka jan tumare esnage mule ta niko ni ka traden len.

27O Del ka cherel te liken pe tumende phuvia sargo ando Ejipto e ller kai ka janude tut ta nasualipe kai ni ka sasto.

28O Del ka thovel pe tute dilipe, ka korrao ta ka avel tut burkania.

29Ta ka lla pipindo, sargo o korro ando truniariko. Ta niso ni kalikel tumenge sukar, ta ka ave suako drom chinio ta ka choren tut ta niko ni ka avel te pomozil tumen.

30Ka zini tut iekhe diskiniaia a aver ka sovel laia, ka vazde iek cher a nikada ni ka zivi ande lete, ka thove te barion drakha, a ni ka veseli tut katar lake septelie,

31ka mundaren che guruve angla che akha, a tu ni ka ja letar, angla che akha ka lel tutar che magarcho ta nikada ni ka irin le chuke, che bakre ka den len kai che dusmanura a tu nasti ka chere niso.

32Angla che akha che chaurre ta che chorra ka aven dine e llenenge katar aver phuvia, ta ka mange pale te dikhe len, a niso nasti ka chere.

33E septelie katar e phuv ta sa cho rado ka jal le iek foro kai tu nikada ni pinllardan. Ta suako lli ka ave chinio ta dukhado.

34Ta kana tumen ka dikhen sa gala ezgode ka diliaon.

35O Del ka cherel tumen te nakhen duk e phunienchar kai ka liken pe tumare changa ta pe tumare porrne, ta pe sa tumari esnaga ta nasti ka sastaren tumen.

36O Del ka cherel tumen ta tumare charo te inllaren tumen kai iek phuv kai ni tumen ni tumare purane ni pinllarde. Kote ka radin avere delenge cherde e kastetar ta barretar,

37ta pala tumende ka daran, ta den tumari orba ta ka maren tumendar espurnia sa e forura kai inllarel tumen o Del.

38Ka thoven but simiche ande phuv, a but cherricha septelie ka chiden soke e langosta ka jal len.

39Ka thoven te barion drakha ta ka arakhen len a ni ka pien mol kai den ta ni ka chiden drakha, soke o chermo ka jan len.

40Ka avel tumen kasta maslinkenge ande sa tumari phuv, a ni ka thoven pe tumende leko zeitino soke a maslinge ka peren korkorre.

41Ka avel tumen chaurre ta i chorra, a ni ka aven tumenchar soke ka inllaren len phangle ande aver phuvia.

42Sa e kasta ta e septelie katar tumari phuv ka aven zatrime katar e langosta.

43E llene kai aven katar aver phuvia kai zivin maskar tumende sa mai but zurale ka cherdon a tumen sa mai but ka jasaren tumari zor.

44Von ka den tumen unllile a tumen ni ka avel tumen niso te de unllile, e purve thana ka aven lenge, a e mai palune ka aven tumenge.

45Sa gala armaia ka aven pe tumende ta ka llan pala tumende ta ka resen tumen lligo ni ka zatril tumen, soke ni kamlen te kanden e Devle tumaro gazda ta ni kamlem te cheren e alava ni e zakonura kai vou dia.

46Ta ka avel pe tumende te dikhol chudo pe cho porodo, ostade,

47soke ni blagosisarden e Devle tumaro gazda veselimaia ta sa tumare liea pala e but ezgode kai diaia tumen.

48Ta ka aven sluge tumare dusmanenge kai o Del ka bichalel pe tumende, ka nakhen bok, trus, ni ka avel tumen patave ta ka nakhen suako chorripe. O Del ka thovel iek llugo sastruno pe chi korr, lligo ni ka zatril tut.

49O Del ka anel pe tumende iek sueto but duratar, katar aver rig katar e phuv, kai ka furian sargo iek agila, iek sueto kai lengi chib tumen ni ka pinllaren,

50iek sueto kai lenge muia si divome, kai ni ka del liubao e phuren ta ni ka avel lenge zao katar e minone.

51Von ka jan e minonen katar tumare zivirinie ta e septelie katar tumari phuv, lligo ni ka mere, ni ka mukel chuke niso katar o lliu, ni mol, ni zeitino, ni e minone katar che zivirinie, ni e minone katar che bakre, lligo ni ka zatril tut.

52Ka thovenpe truial katar sa tumare forura lligo ni ka peren tumare zidura bare ta thule kai ande lende si tumari vera, ka thovenpe truial katar sa che forura ande phuv kai o Del tumaro Gazda dia tumen.

53Ta so von achena truial katar tumare forura, pe gachin ka avel tumari bok kai ka jan isto tumare chaurren, e chaurre ta e chorra kai o Del tumaro Gazda dia tumen.

54Llik o lleno mai lacho ta posteno maskar tumende ka dikhel bilache akhenchar pe po phlal, pe pi rromi ta pe chaurre kai achena le,

55ta ni ka mangel te fulavel o mas katar pe chaurre kai vou jala soke ni ka avel niso te jan kana tumare dusmanura ka thovenpe truial katar tumare forura kana ka cherel tumen te nakhen pe kabor patnia ande sa tumare forura.

56Llik e diskinia mai kovli ta posteni kai ni tromala porrnangi te ustavel e phuv, ka dikhel bilachimaia pe rrome ta pe chaurren

57te na fulavel lenchar e minone kai likel maskar lake porrne ta pe chaurren kai maladon, soke ka jan lel po chorial soke ni ka avel niso te jan kana tumare dusmanura ka thovenpe truial katar tumare forura.

58Te na arakhena te kanden sa gala alava kai si pisime ande gava lil, ta te na daraia katar gava baro anav katar o Del tumaro Gazda,

59vou ka bichalel bare muke darane pe tute ta pe cho porodo baro nasualipe kai ni ka lelpe.

60Ta ka anel pe tumende sa o bilachipe katar o Ejipto, kai pe gachin darana, ta ni ka muken tut.

61Ta i ka bichalel tumenge o Del aver nasualipe ta muke kai i nai pisime ande gava lil katar gava zakono lligo ni ka ave zatrime.

62Ta tu Israel kai sena pe gachin sargo e cheraia e milosoke, ka achen cherricha soke ni kandien e Devle tumaro gazda.

63Ta gia sar o Del veselilape te cherel tumenge o lachipe ta te bariarel tumen, akana ka veselilpe te zatril tumen ta ka aven ikande katar e phuv kai den te len tumenge.

64O del ka rispil tumen pasa e phuvia, katar iek rig llik pe ogoia rig katar e phuv, ta kote ka blagosin avere delen kai ni tumen ni pinllarena ni tumare purane.

65Ta so zivia ande gola phuvia ni ka aven esmiro ta ni ka achen katar tumaro rado, soke o Del ka cherel tumen te zivin pe dar ta tumare akha te aven tristome ta te aven pherdo zalba tumaro zivoto,

66tumaro zivoto ka avel umblado angla tumende, ta ka avel tumenge dar ollivesea ta orachaia ta ni ka llanen so ka avelpe katar tumaro zivoto.

67Ta pe kabor ka avel e dar kai ka avel tumen pala e ezgode kai ka dikhen kai thiarinako rano ka phenen: ¡So daba te avel orachaia!, a orachaia ka phenen: ¡So daba te avel ollivesea!

68Ta o Del phenda tumenge kai ni ka irin tumen katar o drom katar o Ejipto ka cherel tut te iri tut ando Ejipto ande llimie, ta ka aven bichinde sluge tumare dusmanenge sar sluge ta ni ka avel niko te chinen tumen.