Hosea 1

Romani Ursari 2018 (Biblia Ande Chib Romani)

Jump to: Chapter 2 →

1Gava si o alav e Devleko kai avilo e Oseaseke chavo katar o Beeri, ande llivesa katar e charura e Judaeke, o Uzias, o Jotam, o Ajaz ta o Ezekias, ta ande llivesa katar o charo e Israeleko o Jeroboam chavo katar o Joas.

2Mai anglal kana o Del phenda e Oseaseke, phenda leke gia: Lla ta le chuke iek kurvichka, te aven chuke minone laia. Soke e phuv katar o Israel cherdili kurvichka ta mukla man.

3Ondaka o Oseas llelo ta lia iekhe diskinia kai ikhardola Gomer, chorri katar o Diblaim, ta voi khammili ta maladila lake iek minono.

4Ta o Del phenda e Oseaseke: Thou leko anav Jezreel, soke me ka pativ e familia katar o Jeu, pala o mundaripe kai vou cherda ando Jezreel. Ta ka cherav te na avel ios e charoina katar o Israel.

5Gua llive ka phagav o arko katar o Israel ande bari umal katar o Jezreel.

6Ta pale khammili e Gomer ta malada lake iek minoni. Ta o Del phenda e Oseaseke: Thou lako anav, Lo rujama, soke pale ni ka avel mange zao katar e charoina e Israeleki.

7A ka avel mange zao katar o Juda, ta isto me lengo Del ka braduiv len. Ta ni ka braduiv len e arkoia, e jarniea, ando maripe, e grastenchar, ni llenenchar kai llan pe gra.

8Kana e Lo rujama mukla o kolin, e Gomer pale khammili ta malada lake minono.

9Ta o Del phenda e Oseaseke: Thou leko anav Lo ami, soke tumen inai sen mo foro, ta me ni sem ios tumaro Del.

10A ka avel o llive kana e israelitura ka aven sargo e chik e moraki, kai ni ka llanen gachin llene si von, ta nasti ka llinen len. Ta o Del ni ka ikharel len: Tumen inai sen mo foro, soke ka ikharel len: Tumen sen e chave katar o Del o llundo.

11Ondaka ka chidiniaon e chave katar o o Juda ta o Israel, ta ka thoven pe lende samo iekhe gazda, ta katar suako rig ka irinpe kai o Jerusalem, soke o llive katar o Jezreel ka avel baro.

Jump to: Chapter 2 →