Hosea 4

Romani Ursari 2018 (Biblia Ande Chib Romani)

← Chapter 3 Jump to: Chapter 5 →

1Asunen tumen israelitura so phenel o Del. Vou dosarel e llenen kai zivin ande gaia phuv, soke kate inai chachipe maskar e llene, sa kojaven ta ni pinllaren e Devle.

2So si mai but si e sovel bange, o kojaipe o mundaripe, o choripe, o kurvaluko, o silnope, ta ni achen te mundaren.

3Goleke e phuv si zalosni, ta e llene kai zivin ande la ni ka avel lenge ios zor, ka meren e zivirinienchar dive ta e chiriklia, ta i e mache katar e mora ka meren.

4Gia phenel o Del: ¡Niko te phukavel ta te del pe avere! soke cho foro si sargo kana ni kanden e poponen.

5Tu ka pere ollivesea ta orachaia. Tuia ka perel o profeta, ta ka zatriv che da.

6Me foro inai le llanglipe goleke zatrisarde le. Ta tu popo, kai ni manglan o llanglipe, ka lav tut katar o rado e poponengo, soke bristare tut katar o sikadipe e Devleko, i me ka bristarav man katar che chave.

7E popura sea but, ta gia cherde but bilachipe angla ma, goleke ka boldav lengo baripe ando lallao.

8Jan katar o bilachipe me foroko, goleke drago lenge kana mo foro cherel o bilachipe.

9Ta o foro ka avel sargo e popura ka dukhavav len pala lengo bilachipe.

10Soke mukle te radin e Devleke, ka jan ta ni ka chalion, ka cheren o kurvaluko ta ni ka aven lenge minone.

11O kurvaluko ta e mol cheren e manuseke te diliaol.

12Mo foro puchel e delen kastune, apogodil e kastenchar, ta pala o but kurvaluko mo foro llal pe droma bange, ta mukle e Devle ta sai kurvilpe.

13Pe thana mai vazdine katar e burdura phabaren o taimano ta den kurbanura, ta i cheren le telal tala ensine, alamura ta olmura kai si len sukar senka. Goleke tumare chorra kurvinpe, ta tumare boria llan averea

14A me ka pativ tumare chorren kana ka kurvinpe, ta tumare borien kana ka llan averea, soke i tumen llan kai e kurvichke ta llan e diskinienge kai kurvinpe e delenge. ¡Ta gia jasaol o foro soke inai le llanglipe ta ka avel peradino!

15Te si kai tu Israel chere o kurvaluko, te na cherel le o Juda. ¡Na llan karing o Gilgal, na liken ando Bet aven, ta na jan sovel ando anav e Devleko!

16O Israel ni kandel sargo iek telcha divi ta gia ¿ka arakhel len o Del pe thana zelene sukar, sargo bakrorren?

17O Efrain samo llal kai e delen, muk le.

18Leko pipe kandel. Ni muken te cheren o kurvaluko lenge si mai sukar te cheren ezgode lallaimake neko o liubao.

19¡Iek balav ka inllarel len ande leke pakha, ta ka jan lallao katar lenge kurbanura!

← Chapter 3 Jump to: Chapter 5 →