Hosea 9

Romani Ursari 2018 (Biblia Ande Chib Romani)

← Chapter 8 Jump to: Chapter 10 →

1Na veselisao Israel na jute veselimatar sargo ogola forura, soke kurvisailan kana muklan che Devle. Drago chuke te le o pochindipe kai den e kurvichkenge ande thana kai chiden o lliu.

2E foro katar o Israel ni ka avel le lliu ta mol, leko mol nevo ni ka resel.

3O Efrain ka irilpe karing o Ejipto, ta ande Asiria ka jal jape pogano. Ni ka zivin ios ande phuv e Devleki.

4Ni ka den ofrenda moliaki e Devleke ta ni ka den kote kurbanura. O marrno kai ka jan ka avel sargo marrno zalbako, ka meliarel sogo llene kai ka jal le. Ka jan katar gua marrno, a nasti ka inllaren le ando cher e Devleko.

5¿So ka cheren ando llive but preche, ta ando llive kai si slava e Devleke?

6Von nasle katar e zatrania, o Ejipto ka lel len, ta ando Menfis ka prajon len. Lengo rup ka pherdol katar e chiknite, ta ando lengo pero ka barion e karrne.

7¡Avile e llivesa katar e patnia! ¡Avile e llivesa kana si te pochinen! ¡O Israel ka pinllarel gola llivesa! Tumen ka phenen: O profeta ni llanel niso. O lleno pherdo katar o duo si dilo. A phenen le soke tumen sen bilache ta tumari murzania si bari.

8O Efrain si boñiko e Devleko kai arakhel, a tumen thoven solo pe lenge porrne, murzania ando cher e Devleko.

9Murisaile sa sargo ande llivesa katar o Gabaa. A o Del ka delpe golli katar lengo bilachipe ta ka dukhavel len.

10Gia phenel o Del: Kana maladem e Israele saia sargo drak po pusto. Tumare purane sea angla me akha sargo e maslinke terne. A kana llele kai o Baal peor thodepe te blagosin avere delen, ta cherdile gado sargo e delen kai blagosina.

11E dragostia katar o Efrain ka fuliel sargo chirikli, ni ka biandon ios minone, ni ka aven ios diskinie khamne.

12Ta te bariona lenge chave me ka lav lendar ta ni ka mukav lenge ni iek. ¡Tesko lenge kana ka mukav len!

13O Efrain si sargo o Tiro vazdino po than sukar, a ka ikanel pe chaven te mundaren len.

14¡Devla, de len so si te de len! ¡De len diskinie kai nasti achen khamne kai lenge kolina si suke!

15Sa lengo bilachipe saia ando Gilgal, kote thodem man te murziv pe lende, pala lenge ezgode bilache ka chudav len katar mo cher, ni ka voliv len ios soke sa lenge gazda ni kanden man.

16O Efrain si ranime, vou si sargo kas suko kai ni del ios septelie. Makar te avena len chave me ka cherav te meren.

17Gava foro ni kamla de kandel, goleke mo Del ka chudel len soke ni asunde le, ta ka llan phuvia phuviatar.

← Chapter 8 Jump to: Chapter 10 →