Luke 1

Romani Ursari 2018 (Biblia Ande Chib Romani)

Jump to: Chapter 2 →

1But llene mangle te phenen ando Pisipe sa e ezgode kai o Del cherda maskar amende,

2isto gia sar phendelen amenge gola kai ande gua vreme sea kote ta kai pomozisarde te phendol e poroka.

3Glamno Teofilo, i me rodiem sa prezomaia sar kana lie te llan angle gala ezgode ta avila mange sukar te pisiv len chuke isto gia sar nakhle,

4te sai pinllare o chachipe katar so sikade tut.

5Kana o Erodes saia charo katar e Judea, saia iek popo kai ikhardola Zakarias, kai saia iek katar e llene e Abdiaseke. Leki rromi ikhardola Elisabet, ta i voi saia katar e vicha e Aaronoki.

6E li dui sea chache angla o Del ta cherena sa prema e zakonura ta niko nasti dosarela len katar niso.

7A len ni saia len minone, soke e Elisabet nasti achela phari, ta e dui sea but phure.

8Iek llive kana avilo o vreme te cheren po rado angla o Del e llene kai sea popura e Zakariaseke,

9Ta gia sar sea sikade e popura, esvirisarde maskar pete ta likisto o Zakarias te del ando santuario katar o cher e Devleko te phabarel o taimano.

10Ta kana phabola o taimano, sa e llene molinape avri.

11Ondaka sikadilo e Zakariaske iek suecho e Devleko, pe porrne, pe rig e chachi katar o than kai phabardola o taimano.

12Kana dikhla e suecho, o Zakarias ni llangla so te cherel ta darailo but.

13A o suecho phenda leke: Zakarias, na dara, soke o Del asunda cho molipe, ta chi rromi e Elisabet ka avel la iek minono, ta ka thove leko anav Juan.

14Ka ave but veselo, ta but llene ka veselinpe kana ka biandol,

15soke cho chaurro ka avel baro angla o Gazda. Ni ka piel mol ni rachia, ta mai anglal te biandol ia ka avel pherdo katar o Santo Duo.

16Ka cherel te irinpe kai o Gazda lengo Del but llene katar o Israel.

17Gava Juan ka llal angla o Gazda, ta ka avel le o Duo ta e zor katar o profeta o Elias, te sai thovel e daden ande veselia pe chaurrenchar, ta e llene kai ni kanden te sikon te kanden. Gia ka sikavel e llenen te len e Devle.

18O Zakarias puchla e suecho: ¿Sar sai llanav chachimaia gava? Soke me sem but phuro ta i mi rromi.

19O suecho phenda: Me sem o Gabriel, ta radiu e Devleke. Vou bichalda man te dav tuia orba ta te dav tut gala lache viaste.

20A akana sar ni pachaian so phendem chuke ka ache nemao ta nasti ka de orba lligo ni ka avel o vreme te cherdon sa gala ezgode.

21A llene sea avri ta aduricharena e Zakariase ta chudinape soke ni likela katar o cher e Devleko.

22Kana o Zakarias likisto, nasti dela lenchar orba. Ondaka acharde kai dikhlaia vareso ando cher e Devleko ta dela lenchar orba e vastenchar soke achiloia nemao.

23Kana nakhle e llivesa kai o Zakarias saia te radil ando cher e Devleko llelotar kai po cher.

24Mapalal leki rromi e Elisabet achili khamni, ta panch chon ni likisti katar po cher ta mislilape:

25O Del cherda mange gava akana te na den man ios ando lallao e llene.

26Pala e sou chon o Del bichalda e suecho o Gabriel ande iek foro katar e Galilea kai ikhardol Nazaret,

27kote zivila iek diskinia kai ikhardola Maria. Voi saia mangli te zinilpe pala o Jose kai saia katar e vicha katar o charo o David.

28O suecho dia kote kai saia voi ta phenda lake: ¡But blagosime san! O Del si tuia.

29A kana voi dikhla e suecho chudisaili katar leke alava ta puchlape soke dela laia orba gia.

30Ondaka o suecho phenda lake: Maria na dara, soke maladan dragostia angla o Del.

31Akana ka ache khamni ta ka avel tut iek minono ta ka thove leko anav Jesus.

32Vou ka avel but pinllardo, ka ikharen le chavo katar o Del e milosoko ta o Del o Gazda, ka cherel le charo, sargo e Davide kai saia katar leki vicha,

33te gazdaril ostade po foro katar o Jakob, ta leko gazdaripe ni ka merel nikada.

34Ondaka e Maria phenda e suechoke: ¿Sar sai avelpe gava, kana me ni sem zinime?

35O suecho phenda lake: O Santo Duo ka avel upral pe tute ta e zor katar o Del e milosoko ka ucharel tut sargo iek oblako. Goleke o minono kai ka biandol ka avel Santo Chavo e Devleko.

36Ta i e Elisabet kai si katar chi vicha ka avel la iek minono, isto gia sar si phuri, goia kai phenena latar kai nasti avena la minone, cherel sou chon sar kai si khamni.

37O Del sai cherel sa.

38Ondaka e Maria phenda: Me sem sluga e Gazdaki, te cherel manchar o Del isto sar phendan mange. Ta o suecho llelotar kotar.

39Ande gola llivesa e Maria lleli oma ande iek foro kai achela pe burdura katar e Judea,

40dia ando cher e Zakariaseko ta o Zakarias phenda lake sar san.

41Kana e Elisabet asunda lako avazi, o baiato miskosailo ande lako lli, ta voi pherdili katar o Santo Duo.

42Ondaka dia orba zurale, ta phenda: ¡O Del blagosisarda tut mai but neko sa e diskinien, ta blagosisarda che minone!

43¿Ko sem me te avel mande e dei katar mo Gazda?

44Samo asundem cho avazi, mo chaurro miskosailo ande mo lli.

45¡Veselime tu soke pachaian, soke ka cherdol so phenda chuke o Gazda!

46Ondaka e Maria phenda: Mo duo blagosil e Gazda.

47Mo duo veselilpe ando Del kai braduil man.

48Soke o Del dikhla pe mande, leki mai minoni sluga. Ta katar angle, e llene ka phenen mange veseli,

49soke o Del cherda mange bare ezgode ¡leko anav si Santo!

50E Devleko volipe nikada ni merel pala e llene kai blagosin le.

51O Del sikavel pi zor: achavel e llenen kai istardon

52fuliarda e zuralen katar lenge estoliche, A e llenen kai ni istardon thoda len upre.

53Pherda lachipe e llenen kai sea bokhale ta tradia e barvalen ta mukla len chuche vastenge.

54Pomozisarda e foro katar o Israel, kai si leko sluga, ta ni bristrailo te avel leke zalba letar.

55Gia dia po alav amare puranenge, e Abraameke ta golenge kai ka aven leko porodo ostade.

56E Maria achili e Elisabetaia preko trin chon, ta mapalal irisali kai po cher.

57Kana avilo o vreme te maladol e Elisabetake, avila la iek minono.

58E llene kai zivina pase ta leki familia veselisaile but soke llangle kai o Del saia gia lacho laia.

59Pala e ojto llive, llele te cheren leke e sirkunsision, ta mangena te thoven leko anav sargo leke dadeko, o Zakarias.

60A leki dei phenda: Iok. Vou si te ikhardol Juan.

61Von phende lake: Niko ni ikhardol gia ande chi familia.

62Ondaka puchle e vastenchar, e minoneke dade te llanen savo anav mangela te thovel vou.

63Ondaka o dad e minoneko mangla te pisil leko anav pe iek kotor kas, ta pisisarda: Leko anav si Juan. Ta sa chudisaile.

64Isto ondaka o Zakarias pale dia orba ta blagosila e Devle.

65Sa e llene kai zivina pase chudisaile, ta ande sa e phuv e burdonengi katar e Judea dena goia orba.

66Sa e llene kai asunena, mislinape ta puchenape: ¿Sar ka avel gava minono kana ka avel baro? Soke chachimaia o Del blagosila le.

67O Zakarias, o dad e minoneko, pherdo katar o Santo Duo dia orba sargo iek profeta, ta phenda:

68¡Blagosime te avel o Gazda, o Del katar o Israel, soke avilo te braduil pe foro!

69Bichalda amenge iek zuralo Braduimari.

70Gua si so phendaia tumenge omanglal kana dia po alav ta phenda pe santone profetananchar:

71Kai ka braduil amen katar amare dusmanura ta katar sa gola kai murzin pe amende,

72ta kai ka avel leke zalba katar amaro foro ta kai ni bristarelpe katar po Santo alav kai dia amen.

73Gia phenda o Del kana dia po alav amare dadeke o Abraam: kai ka mukel amen

74te zivi bi darako, ka tradel amendar amare dusmanonen, te radi leke bi darako,

75te zivi samo leke ta ando chachipe, ta te ava lea sa amaro zivoto.

76A tu, chaurrea, ka ikharen tut profeta katar o Del e milosoko, soke ka lla angla o Gazda ta ka lachare leke droma,

77te sai cherel te llanel leko foro kai lengo bilachipe ka avel prostime, ta kai del len o braduipe.

78Soke pala e zalba kai avila e Devleke, anel amenge upral iek Braduimari sargo kana si o kham katar iek nevo llive,

79te del villelo golen kai zivin ando mai baro truniariko, ta te inllarel amare estope po drom e lachimako.

80Ta o minono bariola ta cherdola zuralo ando Duo, ta zivisarda po pusto llik kai o llive kai sikadilo e llenenge katar o foro katar o Israel.

Jump to: Chapter 2 →