Numbers 19

Romani Ursari 2018 (Biblia Ande Chib Romani)

← Chapter 18 Jump to: Chapter 20 →

1O Del dia orba e Moisesea ta e Aaronoia ta phenda lenge:

2Me o Del, si kai phenav te cheren gala ezgode: Phen e israelenge te anen chuke iek guruvmi te avel lake bal lole, te na avel nasuali ta kai nikada ni thode pe late o llugo.

3Ta ka den la kai o Eleazar o popo ta vou ka ikanel la avri katar o pero ta ka cherel te mundaren la angla le.

4O popo Eleazar ka lel cherricha rat pe po nai ta ka pechal e ratea efta droma karing e chara kai chidiniaon.

5Mapalal ka phabaren e guruvmia angla le, laki morchi lako mas ta lako rat ta lako khul.

6O popo ka lel oma iek kas katar o sedro ta iek grangorro cherdo e patrendar ta chiti lolo ta ka chudel len sa ande iag kai phabol e guruvmi.

7Mapalal ka jalavel pe patave ta ka jalavel isto vou pe e paiea, ta mapalal sai ka del ando pero ta ka achel pokalime o popo llik kana ka perel e riat.

8Isto gia ko phabarda la ka jalavel pe patave e paiea ta e paiea ka jalavel pi esnaga ta ka achel pokalipe llik kana ka perel e riat.

9Ta iek lleno chisto ka chidel o prajo katar e guruvmi ta ka thovel len avri katar o pero pe iek rik chisti ta o foro ka guruvel gua prajo e paieke katar o chistope sa gava si iek kurbano pala o bilachipe.

10Ko chidia o prajo, ka jalavel pe patave ta ka achel pokalime llik kana ka perel e riat. Gava si iek zakono ostade, kai mol pe gachin tumenge e israelita ta i e llenenge kai aven katar aver phuv ta kai zivin maskar tumende.

11Kor dodila varesavi esnaga muleki, ka achel pokalime efta llive.

12Pala o trito llive ta o eftato morabi te chistol pe e paiea katar o jaladipe ta ka achel chisto. A te na chistolape pala o trito llive o e eftato llive, ni ka achel chisto.

13Vareko te dodila iek esnaga katar iek lleno mulo ta ni jalavelape, cherel te achel pokalime o santuario e Devleko. Ta pala gua so cherda gua lleno nasti ka zivil maskar e israelitura, soke ni thode pe lete o pai katar o chistope, goleke vou si pokalime.

14Gava si o zakono kana iek lleno merel ande iek chara: Sa gola kai si ande chara ta gola kai den, ka achen pokalime efta llive.

15Suako vasija putardi kai lako kapako inai phanglo sukar, ka achel pokalime.

16A ande umalia ko dodila iek esnaga katar iek lleno kai mundarde le o kai mulo pala aver ezgoda, o dodila kokala manusenge, o iek limori, efta llive ka achel pokalime.

17Kana nakhena gala ezgode, ka len cherricha katar o prajo katar e guruvmi kai dia kurbano pala o bilachipe ta ka thodol ande iek vasija te sai toven upral pai katar e len.

18Mapalal iek lleno kai si chisto ka lel iek grango patrenchar ta chingarel la e paiea ta kole grangoia ka chingarel e chara, e vasije ta e llenen kai sea kote ta i e llene kai dodisarda e kokala o dodisarda e llene kai mundarde o kai dodisarde iekhe llene kai mula katar fiso o dodisarda iek limori.

19O lleno kai si chisto ka chingarel e llene kai si pokalime ando llive trito ta ando eftato llive gua lleno ia chistosarda le. Ondaka o lleno pokalime ka jalavel pe patave ta ka jalavel isto vou pe e paiea, ta ka achel pokalime ligo ni ka perel e riat.

20A o lleno kai si pokalime te na chistolape, gua lleno morabi te avel tradino maskar po foro, soke pokalil o santuario e Devleko. Soke ni chingarde le e paiea katar o chistope, goleke achel pokalime.

21Gava si iek zakono ostade. O lleno kai chingarela avere e paiea katar o chistope, morabi te jalavel pe patave. Ko dodila o pai katar o chistope ka achel pokalime lligo ni ka perel e riat.

22Sa e ezgode kai dodila o lleno kai si pokalime gola ezgode ka achen pokalime, a ko dodila iekhe llene kai si pokalime i vou ka achel pokalime lligo ni ka perel e riat.

← Chapter 18 Jump to: Chapter 20 →