1 John 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Pal dová, so sys anglypnástyr, pal dová, so ame šundiám, so dykhciam péskire jakhénca, so ame rozdykhasas, i so čilavenas amaré vastá, dová i ame phenasas pal Džiibnáskiro lav, –

2davá džiibén sys sykado, i ame dykhciam davá i ame sam jakhítka i ame phenása tuménge pal davá viéčno džiibén, savó sys Dadésa, i savó sys sykado aménge,

3ake, dová-pac', so ame dykhciam i šundiám, i phenása tuménge, sob (kaj) tuménde te javén khetanypen aménca, a amaró khetanypen isyn Dadésa, i Léskire čhavésa, Isusósa Xristosósa.

4I davá ame čhinasa tuménge, sob (kaj) tumarí rádyma te javél pherdý.

5I, ĥáda, pal so isyn mavlýn (malva), saví ame šundiám Čhavestyr i phenása tuménge: Devél isyn dud (svéto) i nane nisavó kalypén dre Léste.

6Kóli ame rakirasa, so aménde isyn khetanypen Lésa, a kokoré psirasa dro kalypén, tedy ame xohavasa i na psirasa pir čačipén.

7A kóli ame psirasa dro Devléskiro dud, adiáke-pac' syr Xristóso isyn dud, tedy aménde isyn khetanypen jekh jekhésa, i Isusóskiro Xristosóskiro rat, Léskire čhavéskiro, žužakirela (čystinela) amen kažnoné grehéndyr.

8Kóli ame rakirasa, so aménde nane grého, tedy ame xohavasa kokoré pes, i nane aménde čačipén.

9Kóli ame priĥaljovasa amaré gréhi angíl Devléste, tedy Jov vyžužakiréla amaró načačipén, pal-dová so Jov isyn patiaibnýtko, i čačunó.

10Kóli ame rakirasa, so ame na kerdiám gréhi, tedy ame kerása Léstyr Xohaibnaris, i nane Léskiro lav aménde.

Jump to: Chapter 2 →