1 John 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Dróga miré! Na patián kažnoné duhoske, a sprobinen (propatiakiren) dúhi, ci Devléstyr isyn jone, pal-dová so but xohané proróki javéna dro svéto.

2Tumé udžinena Devléskiro dúho (fáno) adiáke: kažno dúho (fáno), savó priĥaljola Isusós Xristosós, so Jov javdiá dro manušýtko loč (plot'), isyn Devléstyr;

3a kažno dúho (fáno), savó na priĥaljola Isusós Xristosós, so Jov javdiá dro manušýtko loč, nane Devléstyr, davá isyn antihristoskiro dúho (fáno), pal savéste tumé šundlé, so jov javéla i kakaná Jov uže isyn dro svéto.

4Bijatale (čhavoré)! Tumé san Devléskire i pirizorjakirde len, pal-dová so Dúho (Fáno), Savó dživéla dre tuménde, isyn zoraledýr duhóstyr, savó isyn dro svéto.

5Kadalé xohané proróki isyn svetóstyr: jone i rakiréna pal svetóskire réndy, i svéto šunéla len.

6Ame sam Devléskire: kon džinéla Devlés, odová šunéla amen; kon na Devléskiro, odová na šunéla amen. Pir davá ame udžinasa čačunó dúho (fáno) i xohanó dúho (fáno).

7Dróga miré! Javása ame te das patýv jekh jekhéske, pal-dová so pšalýtko patýv isyn Devléstyr i kažno (sváko), kon isyn lačhó ke javír, isyn Devléskiro čhavó i džinéla Devlés.

8Odová, kon isyn nálačho ke javír manúš, na džinéla Devlés, pal-dová so Devél isyn pšalýtko patýv.

9Devléskiri láska ke ame sys sykady dro dová, so Devél bičhadiá dro svéto Léskire Jekhore Čhavés, sob (kaj) ame te doresas (te dolas) viéčno džiibén pir Léste.

10Ake, dro so pšalýtko patýv isyn: davá nane, so aménge jaciá drógo Devél, a davá isyn, so Léske jaciám dróga ame i Jov bičhadiá Péskire Čhavés te stradynel (te pirilydžal pharipén) ke meribén pal amaré gréhi.

11Dróga miré! Kóli Devléske jaciám dróga ame, tedy aménge adiáke-pac' trej te das patýv jekh jekhéske.

12Nijékh manúš nijékhvar na dykhciá Devlés. Kóli ame sam lačhé jekh ke jekh, tedy Devél dživéla dro jekhipén aménca, i Léskiri láska isyn pherdý dre aménde.

13Pir davá ame udžinasa, so ame dživasa dro jekhipén Lésa, i so Jov isyn dre aménde, pal-dová so Jov dyjá aménge Péskiro Dúho (Fáno).

14I ame dykhciam i sam jakhítka (jakhale), so Dad bičhadiá Čhavés te zrakhél svéto.

15Kon priĥaljola, so Isúso isyn Devléskiro Čhavó, kodová manúš dživéla dro jekhipén Devlésa, i Devél isyn dro jekhipén lésa.

16I ame udžindiam láska i upatiandyjam, saví láska isyn Devléste ke ame. Devél isyn dre pšalýtko patýv ke javír manušá, i odová manúš, kon isyn lačhó ke javír, dživéla dro jekhipén Devlésa i Devél isyn dro jekhipén lésa.

17Pir davá jekhipén Devlésa pšalýtko patýv jačélape pherdó dre aménde, sob (kaj) aménde te javél muršypen dro dyvés, kiéli javéla séndo, pal-dová so ame dživasa dro davá svéto adiáke, syr Xristóso dživdiá.

18Kóli ame sam lačhé ke javír manušá i ame na darása ni konéstyr, pal-dová so pherdý patýv vytradela dar, a kon daréla, kodová sýrby užakiréla kára. A kodová, kon daréla, dre léste nane pherdý patýv.

19Ame sam lačhé jekh ke jekh, pal-dová so Devléske angledýr jaciám dróga ame.

20Kóli vari-kon phenéla: “Mánge isyn drógo Devél”, a kokoró nane lačhó ke péskiro pšal, odová isyn xohaibnari; pal-dová so kon nane lačhó ke péskiro pšal, savés jov dykhciá, na moginéla te del patýv Devléske, Saves jov na dykhciá?

21I davá isyn dasavo priphenybén, savó aménde isyn Xristosostyr, so odová manúš, konéske drógo isyn Devél, isyn bangó (musinela) adiáke-pac' te javél lačhó ke péskiro pšal.

← Chapter 3 Jump to: Chapter 5 →