1 Thessalonians 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Pavlístyr i Siluanostyr i Ximastyr, Fiesalonikiicengire-khangirjákire skedyibnaske, savó isyn Devléskire Dadéskiro i Ráskire-Devléskiro, Isusóskiro Xristosóskiro: mek te javél bahtalypén tuménge i ramánjo (miro).

2Ame ŭsády (sak) parikirasa Devléske pal sarénde tuménde, i ripirasa tumen dro amaró mangipén Devléske,

3kiéli ame ripirasa tumen angíl amaré Devléste Dadéste pal tumarí butý pir tumaró patiaibén i patýv ke javír manušá, ame džinása pal tumaró vyrikiriben te užakiras lačhipén amaré Rástyr-Devléstyr, Isusóstyr Xristosostyr angíl amaré Devléste-Dadéste,

4ame džinása, miré dróga, so Devléske jačné dróga tumé, i Jov vykedyjá tumen,

5pal-dová so amaró rosphenyben pal bahtalý zan (zvies') sys tuménde na so jekhe lavénca, ne i zorjása i Sventoné Duhósa buté dophenybnasa, syr tumé kokoré džinéna, savé ame sámas vaš tuménge.

6I tumé lyné te kerén adiáke, syr i ame, i syr Raj Devél, i prilyné Devléskiro lav buté pharipnenca i radymása, savó dyjá tuménge Svénto Dúho (Fáno),

7adiáke, so tumé jačné primierosa (sykaibnasa) vaš saré patiaibnaskirenge ke Makiedonija i ke Ahaija.

8Pal-dová so tuméndyr jaciá džindló manušénge Devléskiro lav na dre jekh Makiedonija i Ahaija, ne tumaró patiaibén dre Devléste jaciá džindló pir saré štéty, pal-dová so aménge ni palsó na trej te rosphenén;

9pal-dová so jone kokoré rosphendlé pal aménde, syr tumé prilyné amen, kiéli ame javdiám ke tumé: i syr tumé risiné ke Devél idolendyr, sob (kaj) te kerén svénto butý džidé i čačuné Devléske,

10i te užakiren Léskire Čhavés, savó javéla Bolybnáskire Rajostyr, Saves Jov otdžidiakirdiá muléndyr, Isusós, Savó zrakhéla amen Devléskire xoliátyr, saví javéla.

Jump to: Chapter 2 →