1 Thessalonians 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Pšalále, kakaná ame mangasa i primangasa tumen vaš Isusóske Xristosóske, so dová, so kakaná tumé vysyklyne améndyr, syr trej te dživén i te kerén pir čačipén Devléske, sob (kaj) adiáke i duredýr te dživén.

2Tumé džinéna, savé priphenybená ame dyjam tuménge amaré Rástyr-Devléstyr Isusóstyr.

3Devél vykedéla, sob (kaj) tumé te javén svénta i te rakhénpe džiibnastyr bi sovlakiro;

4sob (kaj) kažno manúš tuméndyr te džinél, syr te zrikirel péskiro khoró nalačhé tyrdypnastyr dre svyntyma i žužypen (čystota),

5i te na poddenpe grehitkoné tyrdypnaske, syr davá keréna Náiudy, savé na džinéna Devlés,

6sob (kaj) nijékh tuméndyr te na kerél čoripén péskire pšaléske i te na barvaljol pal léskiro dopatiaiben, pal dalé gréhi Devél čhuvéla kára, syr angledýr ame rakirdiam tuménge i dophenasas.

7Devél khardiá amen na ke nažužo džiibén, ne ke čačunó.

8I kóli vari-kon na priléla davá sykliakiribén, jov priléla na, so manušés, a Devlés, Savó i dyjá tuménge Péskiro Svénto Dúho (Fáno).

9Me ginava, so pal pšalengiri patýv na trej tuménge butýr te čhinav, pal-dová so Devél sykliakirdiá tumen kokoren te sykavén patýv jekh jekhéske.

10Tumé adiáke-pac' i keréna sarénge péskire pšalénge pir sarí Makiedonija; ne ame primangasa tumen, pšalále, te kerén adiáke butedýr;

11i te pričhuvén zor te dživén štylés, te dykhén kažno péskiro réndo, i te kerén butý péskire vasténca, syr ame rakirdiam tuménge angledýr;

12te dživén patyvales adiáke, sob (kaj) manušá, savé isyn nadevlytka, te kutiakiren tumen, i sob (kaj) tumé te na javén vužle ni dro so javire manušénge.

13Pšalále, me kamám, sob (kaj) tumé te džinén saró čačipén, pal manušénde, savé myné, sob (kaj) tumé na tuginen, syr javír manušá, savénde nane nadiéia pal viéčno džiibén.

14Ne kóli ame patiása, so Isúso myjá i otdžidyjá muléndyr, tedy i manušén, savé myné patiaibnása dre Isusóste, Devél janéla pale khetané Lésa.

15Ame rakirasa davá tuménge Ráskire-Devléskire lavésa, so ame, savé javása džidé ke / žýko Xristosóskiro javiben, usajékh na javása angledýr odoléndyr, kon myjá;

16pal-dová so Raj Devél Kokoró javéla Bolybnáskire Rajostyr i Léskiro javiben sykavéla sarénge te šunén Arhangieloskiri zan, zoralý syr Devléskiro rógo (truba), i kon pérvo myjá patiaibnása dre Xristosóste, otdžidjola muléndyr;

17tén'či ame, seve javéna džidé dro dová časo, javása ĥazdyné phuvjátyr, khetané lénca pe óbloki te streninas (te pirilas) Ras-Devlés i ame saró časo javása khetané Lésa.

18Podrikiren jekh jekhés dalé lavénca.

← Chapter 3 Jump to: Chapter 5 →