2 Kings 13

Romani Sinte 2024 (O Debleskro Lab 2024 (Sinte-Manouche))

← Chapter 12 Jump to: Chapter 14 →

1Har o Yoash, koleskro dad o Ahasya his, an o biish-te-triinto bersh o baro ray pral o them Youda his, vas o Yoakaz, koleskro dad o Yehou his, baro ray pral o them Israel. O Yoakaz his 17 (deesh-te-efta) bersha baro ray. An ko tsiro djivas lo an o foro Samaria.

2Yob kras, hoy glan o baro Debleskre yaka djoungeles his yaake har o Yerobeam kras, koleskro dad o Nebat his. O Yerobeam anas o Israel o Debleskro dromestar tele, oun kras, te mangan le vavar deblen an. Oun o Yoakaz moukas len kova ninna te krell.

3Oun ko tselo tsiro, har o Yoakaz baro ray his, vas o baro Debleskri rholi pale te pale pral i Israelende. Oun yob das len an o vast o baro rayestar Hasael oun leskro čavestar Ben-Hadad. O Hasael his o baro ray pral o them Syria.

4Palle mangas o Yoakaz o baro Debles i ropaskri golyah, oun o baro Devel shounas les. Yob dikas, har o Israel tele rikedo vas, oun har o baro ray pral o them Syria lenge o djipen phares kras.

5Oun o baro Devel bičras i Israelenge yekes, kay len vin las dran i čilače vasta i menshendar dran o them Syria, te nay djivenn i Israelitarya pale an pengre khera, yaake har glan ko tsiro his.

6Ninna te dikan le, hoy o baro Devel lauter lenge kras, moukan le gar tele ko čilačo dromestar, kay o kheer Yerobeam len pre anas, oun mangan doureder i vavar deblen an. Ninna moukan le koy kashteni debletsa, i Ashera, an o foro Samaria tardo.

7Yaake ačan o rayeske Yoakaz kek lourde pral, har kokres 50 (paash-sheel) klissepangre, deesh kourepangre vourdya oun 10.000 (deesh-zerya) pirengre lourde; Kol tsele vavar maras o baro ray pral o them Syria oun kras, te van le har i phoubyakri čik ap o drom.

8Ko tselo vavar koova, hoy pral o Yoakaz penepaske hi, lauter, hoy lo kras, oun leskro baro koova, kova hi činlo an i familyakro liil i bare rayendar pral o Israel.

9Oun o Yoakaz meras oun vas paskedo pash peskre phourende an o foro Samaria. Oun leskro čavo, o Yoash, vas baro ray pal leste.

10Har o Yoash an o 37. (triyanda-te-eftato) bersh ko baro ray pral o them Youda his, vas o Yoash, koleskro dad o Yoakaz his, o baro ray pral Israel. Yob his 16 (deesh-te-shob) bersha baro ray oun djivas an ko tsiro an o foro Samaria.

11Yob kras, hoy djoungeles his glan o baro Debleskre yaka, oun moukas gar ko čilačo drom, hoy o Yerobeam djas, koleskro dad o Nebat his. O Yerobeam anas o Israel o Debleskro dromestar tele oun kras te mangan le vavar deblen an. Oun o Yoash kras kova ninna.

12Ko tselo vavar koova, hoy pral o Yoash penepaske hi, lauter, hoy lo kras oun leskro baro koova, har kouras pes lo o baro rayeha pral Youda – koleskro lab hi Amazya – kova hi činlo an i familyakro liil i bare rayendar pral o Israel.

13Oun o Yoash meras oun vas paskedo an Samaria pash peskre phourende, kol bare rayende pral o them Israel. Oun o Yerobeam, vas baro ray pal leste.

14Har o Elisa an i nasslepen čiddo his, ap kova lo ninna hounte meras, vas o Yoash, ko baro ray pral o them Israel, pash leste tele, oun rovas glan leste oun penas: “Miro dad, miro dad! Tou baro kourepaskro i Israelenge!”

15O Elisa penas ap leste: “Le tiro bogo oun tire fayle!” Oun har lo peskro bogo oun i fayle las,

16penas o Elisa ap leste: “Tserde o bogo tiro vasteha!” Oun yob tserdas les peskro vasteha. Oun o Elisa čivas peskro vast ap o baro rayeskro vast,

17oun penas: “Kre i vorhni pre kote, kay o kham pre djala!” Oun yob kras i vorhni pre. Oun o Elisa penas: “De karye!” Oun yob das karye. Oun o Elisa penas: “Ko faylo hi i sikepen, kay krell men o baro Devel zoreles, zorleder har i Syrarya! Ava, tou koureh tout lentsa oun deh len pash Afek, bis te lauter moulo hi.”

18Palle penas o Elisa: “Le i fayle!” Oun har lo len las, penas o Elisa ap leste: “De ap i phoub!” Oun yob das triin kope ap i phoub, oun moukas tele.

19Kote vas o Debleskro morsh rhoyedo ap leste oun penas: “Dals panč, shob kope ap i phoub, dals i Syrarya yaake, te vans le lauter moulo. Kanna nay deh len gar boudeder har triin kope.”

20Oun o Elisa meras oun vas paskedo. Hako bersh peran i Moabarya an o them.

21Oun i dives vas, kay paskran i Israelitarya i morshes, kote dikan le kourepangre dran o them Moab. Sik lan le ko morshes oun vitsran les an o moulengro kheer pash o Elisa, oun nashan penge. Oun har ko moulo morsh ap i kokale o Elisestar peras, vas lo djido oun stas pre.

22O baro ray pral o them Syria, o Hasael, phagas pale te pale an o them Israel dren an ko tselo tsiro, kay o Yoakaz djivas.

23Oun o baro Devel his lačo ap i Israelende oun kras peskro dji lenge pre oun dikas kamles ap lende, yaake har yob peskro lab das o Abrahameste, o Isaakeste oun o Yakobeste. Oun yob das len gar an o merepen oun vitsras len gar pestar krik bis ap kava dives.

24Oun o Hasael, ko baro ray pral o them Syria meras. Oun leskro čavo Ben-Hadad vas baro ray pal leste.

25O Yoash las kol forya an o kourepen pale pale dran o vast o baro rayestar Ben-Hadad, koleskro dad o Hasael his, – kol forya, kay o Hasael an o kourepen o Yoasheskro dadestar Yoakaz krik las. Triin kope das les o Yoash oun las yaake kol Israeleskre forya pale pale.

← Chapter 12 Jump to: Chapter 14 →