Revelation 10

Romani Sinte 2024 (O Debleskro Lab 2024 (Sinte-Manouche))

← Chapter 9 Jump to: Chapter 11 →

1Oun me dikom i vavar zorelo bolepaskres dran o bolepen tele te vell. I folka his troul leste har i ripen. Oun i brishineskro bogo his ap leskro shero. Leskro mouy his har o kham, oun leskre herya har dran yag.

2Oun les his i liil an peskro vast, hoy pre his. Oun yob čivas peskri čači heri ap o baro pani, oun i servi heri ap i phoub.

3Oun yob das zoreles gole, har i bari divyi margodja zoreles gole della. Oun har yob gole das, shounom efta zorele golya dran o bolepen.

4Har me kamom kol laba, hoy shounom, pre te činell, penas yek dran o bolepen ap mande: “Ma čin ko bolepaskro rakepen pre, te djinell les kek!”

5Oun ko bolepaskres, kay dikom ap o baro pani oun ap i phoub tardo, kova hadas peskro čačo vast pre an o bolepen,

6oun das pes sovel pash koleste, kay djivella kanna oun hako tsiro, kova hoy o bolepen kras, oun lauter, hoy an leste hi, ninna i phoub oun lauter, hoy ap late hi, oun ninna o baro pani, oun lauter, hoy an leste hi. Oun o bolepaskro penas: “O tsiro hi trouyel.”

7An kol divessa, kay o eftato bolepaskro rakrella, oun an peskri phourdepaskri phourdella, hi lauter kerdo, hoy o Debles an o dji his, te kras lo les yaake har yob ap peskre boudepangre penas, te vell kova.

8Oun kova, kay dran o bolepen ap mande rakras, rakras pale mantsa, oun penas ap mande: “Dja pash ko bolepaskro, kay ap o baro pani oun ap i phoub tardo hi! Oun le o liil dran leskro vast!”

9Oun me djom koy, oun penom ap leste: “Mangau tout, de man ko liil!” Oun yob penas ap mande: “Le les, oun rha les pre! O liil vell touke phares an tiro per čiddo, ninna te hi lo goudlo har o gvin an tiro mouy.”

10Oun me lom ko liil dran leskro vast, oun rhom les pre. Oun an miro mouy his lo goudlo har gvin. Oun har rhom les pre, his lo mange phares an o per čiddo.

11Oun yon penan ap mande: “Tou hounte rakress pale pral kova, hoy vella pral i menshende oun lengre rayende, kay djivenna an boud themma, kay venna dran boud natsyone, oun rakrenna boud vavar rakepen.”

← Chapter 9 Jump to: Chapter 11 →