Revelation 20

Romani Sinte 2024 (O Debleskro Lab 2024 (Sinte-Manouche))

← Chapter 19 Jump to: Chapter 21 →

1Oun me dikom i bolepaskres dran o bolepen tele te vell. Oun koles hi i klidepaskro an o vast, te pandell lo o telstunepen pre. Ninna i sasterno shello hi an leskro vast.

2Oun yob tapras ko baro lolo sap, kova hi ko phouro sap, hoy kharella ninna Beng oun Satan, oun pandas les, oun vitsras les an o telstunepen, te ačell lo kote yek zero (1.000) bersh pandlo. Oun o bolepaskro pandas i voudar tele, hoy anell an o telstunepen, yaake te krell kek o telstunepen pale pre. Oun an ko zero bersh nay anell o beng i menshen bouder gar o Debleskro dromestar tele. Pal ko tsiro hounte vell lo i tikno tsiro vin mouklo.

4Oun me dikom kolen, kolenge o shero tele dino vas doleske, kay rikran le zoreles ap o Debleskro lab oun sikran i menshende o Yezouseskro drom. Yon mangan gar ko firhes an, vitar gar ko firhes, hoy i menshendar kerdo vas. Oun yon lan gar o firheskro lab ap pengre shere, vitar gar ap pengre vasta. Kalla lauter van kanna djido. Yon hi beshdo ap i rayengre beshepangre, oun lenn i zoor, te rakrenn le o čačepen vin pral i menshende. Khetne o Yezous Kristeha hi le raya yek zero bersh.

5Yon hi kolla, kay glanstounes i moulendar pre stan. Oun kol vavar moule venn gar djido, yaake rah har ko zero bersh gar trouyel djan.

6Barhtele hi kolla, kay hi mank kolende, kay venn glanstounes i moulendar djido. Yon hi o Debleskre menshe, oun merenn gar o douyto kopo. Yon hi i rashaya o baro Deblestar oun o Yezous Kristestar. Oun khetne leha hi le raya pral lauter yek zero bersh.

7Pal kol zero bersh vell o beng dran peskro stilepen vin mouklo.

8Oun yob djal vin, te tserdell lo i menshen ap i tseli phoub ap peskro drom. Kolla menshe kharenna Gog oun Magog. Oun yon hi yaake boud, te penell nay kek, kitse yon hi. O beng anell len khetne, te djan le an o kourepen o Debleskre menshentsa.

9Oun yon djan pral i tseli phoub, oun ačenn troul ko foro tardo, kay o Debleskre menshe djivenna. Kova hi ko foro, koles o Devel kamella o tselo djiyestar. Oun palle vell i yag dran o bolepen oun rhačrell kol tsele kourepangren pre.

10Oun o beng, kay anas len ap peskro drom, vell an i bari yag vitsedo, hoy zoreles rhačella oun khandella. Kote hi ninna o firho, oun ko rhorheno rakepaskro. Kote vell len hako tsiro bare douka.

11Oun me dikom i baro parno beshepaskro oun koles, kay pre beshdo hi. I daryatar nashas i phoub oun o bolepen glan leste krik. Oun kek dikas len bouder pale.

12Oun me dikom i moulen: i bare har i tikne. Yon his tardo glan o Debleskro beshepaskro. Oun lila van pre kerdo, kay činlo hi, hoy i menshe kran. Pale vas ko djipaskro liil pre kerdo, kay kolla dren činlo hi, kay djivenna hako tsiro. Oun o čačepen vas vi-rakedo pral kol tsele moulende yaake, har an i lila dren činlo hi.

13Oun o baro pani das peskre moulen vin, kay an leste hi. Oun o merepen oun o moulengro them dan pengre moulen vin, kay an lende hi. Oun pral lende vas o čačepen vi-rakedo yaake, har hakeno djivas ap i phoub.

14Oun o merepen oun o moulengro them van an i bari yag vitsedo, ninna hakenes, koneskro lab gar an o djipaskro liil dren činlo hi. Koon an i bari yag vitsedo vella, merell o douyto kopo.

← Chapter 19 Jump to: Chapter 21 →