Revelation 11

Romani Sinte 2024 (O Debleskro Lab 2024 (Sinte-Manouche))

← Chapter 10 Jump to: Chapter 12 →

1Oun yek das man i kasht an o vast, oun penas ap mande: “Čip kova ap o tselo Debleskro baro kheer, oun dik palla, har baro kova hi. Dik ninna palla, har baro o Debleskri rhačepaskri hi. Oun dik, kitse menshe kote o Debles sharenna!

2Oun ko kotar phoub glan o Debleskro baro kheer, kote čip ko kasht gar pre. Ko kotar phoub vell kolende dino, kay kek bibolde hi. Oun yon stakrenn o Debleskro foro khetne star-deesh-te-douy čon.

3Oun me bičrau douy rakepangren an ko foro. Kolla penenn i menshenge o čačepen pral mande. Lengre ripya hi kerdo dran gone. Deesh-te-douy-sheel-te-shob-desha (1.260) divessa penenn yon lenge mire laba.”

4Kolla douy morsha hi kol douy djeteskre rouka oun kol douy momlia, hoy hi tardo glan o Debleste, kay hi o ray pral kay phoub.

5Oun te kamell yek te doukrell lo len, palle djal i yag dran lengro mouy vin, oun rhačrell les pre. Yaake merenn lauter kolla, kay kamenn len čilačepen te krell.

6Len hi i zoor, te rikrenn le o brishin pale, yaake te dell kek brishin ap ko tsiro, kay yon o Debleskro lab penenna. Oun len hi i zoor pral o pani, te nay krenn le dran kol tsele panya rat. Ninna hi len i zoor, te nay anenn le haki bibarht pral i phoub, yaake boud kope, har yon kamenna.

7Oun te rakran yon i tsele laba, hoy o Devel lenge penas, palle vell o firho dran o telstunepen pre. Oun ko firho hi zorleder har yon, oun marell len.

8Oun kal moule morsha hi ap o drom čiddo an ko baro foro, kay ninna lengro ray ap o troushel maredo vas. Kava foro hi har o foro Sodom oun har o them Egiptia.

9Oun boud menshe dran hako them, haki natsyona, haki harmenatsyona oun hako rakepen dikenn kol moule morshen ap o drom čiddo triin divessa oun i paash dives, oun moukenn gar, te venn yon paskedo.

10I menshe ap i phoub hi barhtelo, oun givenna oun khelenna. Oun yek bičrell o vavareske shoukar koova. Yaake barhtelo hi le, te hi kol douy Debleskre rakepangre moulo, kay doukran kolen, kay ap i phoub djivenna.

11Oun me dikom: Pal kol triin-te-paash divessa kras o Devel len pale djido. Oun yon stan pre. Oun i bari daar tapras kolen, kay kova dikan.

12Oun kol douy shounan i zorelo rakepen dran o bolepen, hoy ap lende penas: “Avenn kate pre!” Oun yon djan an o bolepen pre. Oun lauter kolla, hoy rhoyedo ap lende his, dikan kova.

13Oun ap yek kopo trissas i phoub zoreles. Oun o deshto kotar ko forestar peras khetne. Oun efta zerya (7.000) menshe van maredo. Oun kol vavaren tapras i bari daar, oun yon sharan o Debles, kay an o bolepen hi.

14I douyti bibarht hi pal lende. Oun i triinti bibarht vella sik.

15Oun ko eftato bolepaskro phourdas an peskri phourdepaskri. Koy his i rakepen an o bolepen, oun boud dan bari gole, oun penan: “Kanna hi o Devel oun leskro čavo, o Yezous Kristo, i raya pral i tsele menshende ap i phoub hako tsireske.”

16Oun kol biish-te-star čačepangre phoure, kay glan o Debleste ap pengre beshepangre beshdo hi, kolla vitsran pen glan o Debleste tele, oun sharan les,

17oun penan: Mer parkrah men pash toute, maro ray. Tou hal o zorelo Devel. Tou djiveh kanna har djival an o phouro tsiro. Tou sikral tiri bari zoor, oun val o ray pral halauter.

18I tsele natsyone rhoyran pen pral toute. Doleske vas tiri rholi pral lende. Kanna hi o tsiro kay, te vell o čačepen vi-rakedo pral i moulende. Kanna vas ko tsiro, te dess tiro bravlepen kolende, kay touke boudran, kay an tiro lab rakran, lauterende, kay tire menshe hi, oun tout sharenna, oun toutar darenna, i tikne har i bare. I tsiro hi ninna kay, te maress kolen, kay i menshen ap i phoub maran.

19Oun o Debleskro kheer an o bolepen vas pre kerdo. Oun an o Debleskro kheer dikom me ko sonakaskro morhton, hoy sikrella, kay o Devel o maal peskre menshendar hi. Oun i yag das karye dran o bolepen pre te tele. Oun o bolepen das bari gole, har koy gole, hoy o bolepen della, te dell baro brishin oun te djal yag tele dran o bolepen. Oun i phoub trissas, oun das brishin har bare barra.

← Chapter 10 Jump to: Chapter 12 →