Revelation 15

Romani Sinte 2024 (O Debleskro Lab 2024 (Sinte-Manouche))

← Chapter 14 Jump to: Chapter 16 →

1Oun me dikom i vavar baro koova an o bolepen. Kova his baro oun dareno. Kote his efta bolepangre, kay anenn efta kope i bari phagi pral i phoub. Pal koy eftati phagi vell bouder kek phagi. Palle hi o Devel bouder gar rhoyedo.

2Oun me dikom čomone har i baro pani. Kova his djoudjo har i vali. Oun yag his koy dren. Oun pash o baro pani dikom me kolen, kay zorleder his har ko firho oun har ko firho, hoy i menshendar kerdo vas. Yon moukan vitar gar, te vas o firheskro lab ap lende činlo. Oun len his bashepangre, hoy kharenna harfe. Kolen das lende o Devel an lengre vasta.

3Oun yon givan koy gili, hoy o Debleskro boudepaskro, o Mose, givas. Yon givan lat o terno bakreske, oun penan: Baro oun shoukar hi halauter, hoy tou kral, maro ray, tou zorelo Devel! Mishto oun čačo hi tire dromma, baro ray pral i tsele themma!

4Toutar darella hakeno, tiro labestar penenn le: Har baro oun shoukar hi lo! Maro ray, o baro Devel hal tou. Kek vavar hi yaake har tou. I raya venna dran hake themma; glan toute vitsrenn le pen tele, te sharenn le tout. Lauter dikan, har pal o čačepen tou djal, har tou i menshende lengri phagi dal.

5Oun pal kova dikom, har koy kouč isema pre kerdo vas an o Debleskro kheer an o bolepen.

6Oun kol efta bolepangre, kay efta kope i bari phagi pral i phoub anenna, kolla van dran o Debleskro kheer vin. Len his djoudje parne ripya ap pende, oun troul lengro beč bourhle sonakangre dorya.

7Kote his ninna kol star zorele bolepangre tardo. Oun yek lendar das kol efta bolepangren efta sonakangre čare an lengre vasta. An kol čare his i rholi o Deblestar, kay djivell kanna oun hako tsireske.

8Oun o Debleskro kheer his pherdo tampa, hoy vas dran o Debleskro raylepen oun zoor. Oun kek nay djas kote an o Debleskro kheer dren, bis te anan kol efta bolepangre efta kope i bari phagi pral i phoub.

← Chapter 14 Jump to: Chapter 16 →