1 Samuel 26 — Shan NCL

1ၵူၼ်းဝဵင်း ၸိၽႃႉ၊ ၵမ်ႈၽွင်ႈမႃးၸူးတီႈ သေႃးလု၊ တီႈဝဵင်း ၵိပႃႉ၊ သေလႄႈလဝ်ႈလၢတ်ႈဝႃႈ၊ “ တႃႇဝိတ်ႈ၊ တဵတ်ႇမႅပ်းယူႇၵႃႈတီႈလွႆ ႁၶိလႃႉ၊ ၽၢႆႇပွတ်းဝၼ်းဢွၵ်ႇ ယေႇသိမုၼ်ႇ၊ ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-

2ပိူဝ်ႈၼႆလႄႈ သေႃးလု၊ ပႃးဢဝ်ၵူၼ်းသိုၵ်းဢၼ်ၵတ်ႉဢၼ်ၶႅၼ်ႇသေပိူၼ်ႈၵႃႈၼႂ်းမဵဝ်း ဢိသရေး၊ သၢမ်ႁဵင်သေလႄႈၵႂႃႇၸူးတီႈထိူၼ်ႇ ၸိၽႃႉ၊ ၵမ်းလဵဝ်ႁႂ်ႈလႆႈသွၵ်ႈႁႃ တႃႇဝိတ်ႈ၊ ဢေႃႈ။-

3မၼ်းၵႂႃႇၶျႃးပၢင်တပ်ႉၵႃႈႁိမ်းသဵၼ်ႈတၢင်းတီႈလွႆ ႁၶိလႃႉ၊ ဢေႃႈ။ တႃႇဝိတ်ႈ၊ ယင်းမီးယူႇၵႃႈၼႂ်းထိူၼ်ႇၼၼ်ႉယူႇလႄႈမိူဝ်ႈဢၼ်ငိၼ်းလွင်ႈ သေႃးလု၊ ႁွတ်ႈထိုင်မႃးသွၵ်ႈႁႃမၼ်းယူႇၼၼ်ႉၸိုင်၊-

4မၼ်းပွႆႇၸႂ်ႉၵူၼ်းသွပ်ႇၶၢဝ်ႇၵႂႃႇလူလွမ်တူၺ်းလႄႈႁုႁၼ်လွင်ႈဢၼ် သေႃးလု၊ ႁွတ်ႈထိုင်မႃးယူႇၵႃႈတီႈၼၼ်ႈတႄႉယဝ်ႉၼၼ်ႉဢေႃႈ။-

5မိူဝ်ႈၼၼ်ႉ တႃႇဝိတ်ႈ၊ ၵႂႃႇၵမ်းလဵဝ်လႄႈလူတူၺ်းတီႈဢၼ် သေႃးလု၊ ဢိၵ်ႇတင်းၸဝ်ႈၵွၼ်းတပ်ႉသိုၵ်းလူင်မၼ်း ဢပ်ႉပၼႃး၊ လုၵ်ႈၸၢႆး ၼေးရႃႉ၊ ၼွၼ်းၼၼ်ႉဢေႃႈ။ သေႃးလု၊ ၼွၼ်းၵႃႈၼႂ်းၵၢင်ပၢင်တပ်ႉယူႇသေလႄႈၵူၼ်းသိုၵ်းမၼ်းၶျႃးပၢင်တပ်ႉလွမ်ႉႁွပ်ႈမၼ်းယူႇဢေႃႈ။

6တႃႇဝိတ်ႈ၊ ထၢမ်တီႈ ဢႁိမလႅၵ်ႉ၊ ၵူၼ်းမဵဝ်း ႁိတ်ႉတိ၊ တင်း ဢၽိသေး၊ ၼွင်ႉၸၢႆး ယွႃႇၽႃႉ၊ ဢၼ်မႄႈၶဝ်ပဵၼ် ၸေႇရုယႃႇ၊ ၼၼ်ႉလႄႈဝႃႈ၊ “ၼႂ်းသူသွင်ၵေႃႉၼႆႉၵေႃႉလႂ်တေၸွမ်းၵဝ်ၶဝ်ႈၸူးတီႈ သေႃးလု၊ ၵႃႈၼႂ်းပၢင်တပ်ႉၼၼ်ႉ၊” ဝႃႈၼင်ႇၼႆလႄႈ။ ဢၽိသေး၊ လဝ်ႈလၢတ်ႈလႄႈဝႃႈ၊ “ၶႃႈၸဝ်ႈတေၸွမ်းၶႃႈဢေႃႈ၊” ဝႃႈၼင်ႇၼႆဢေႃႈ။

7ပိူဝ်ႈၼႆလႄႈ တႃႇဝိတ်ႈ၊ တင်း ဢၽိသေး၊ ၶဝ်ႈၵႂႃႇၵႃႈၼႂ်းပၢင်တပ်ႉ သေႃးလု၊ ၼၼ်ႉၶိင်ႇၵၢင်ၶိုၼ်းလႄႈထူပ်းႁၼ် သေႃးလု၊ ၼွၼ်းလပ်းယူႇၵႃႈၼႂ်းၶိုင်ႈၵၢင်ပၢင်တပ်ႉယူႇ၊ႁွၵ်ႇၸဝ်ႈပၵ်းၵႃႈတီႈလိၼ်ဝႆႉၵႃႈႁိမ်းႁူဝ်ၼွၼ်းၸဝ်ႈယူႇဢေႃႈ။ ဢပ်ႉပၼႃး၊ ဢိၵ်ႇတင်းၵူၼ်းသိုၵ်းမၼ်းတင်းလၢႆဢွၼ်ၵၼ်ၼွၼ်းလပ်းၵႃႈတီႈလဵပ်ႈႁွပ်ႈမၼ်းယူႇဢေႃႈ။-

8ဢၽိသေး၊ ၵေႃႈလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ၽြႃးပဵၼ်ၸဝ်ႈဢဝ်ရၢၼ်ႇသူႇၸဝ်ႈႁဝ်းၼၼ်ႉဢၢပ်ႈပၼ်ၼႂ်းမိုဝ်းၸဝ်ႈႁဝ်းဝၼ်းမိူဝ်ႈၼႆႉၶႃႈယဝ်ႉ။ မိူဝ်ႈလဵဝ်ၼႆႉပၼ်ဢၶႂၢင်ႉႁႂ်ႈၶႃႈၸဝ်ႈဢဝ်ႁွၵ်ႇသႅပ်ႇတႅင်းပွၵ်ႈလဵဝ်ႁႂ်ႈမၼ်းၸပ်းလိၼ်ဝႆႉသေၵမ်း။ ၶႃႈၸဝ်ႈတၵ်းဢမ်ႇလူဝ်ႇသႅပ်ႇတႅင်းသွင်ပွၵ်ႈတီႈၶႃႈၵူၺ်း၊” ဝႃႈၼင်ႇၼႆဢေႃႈ။

9ၵူၺ်းၵႃႈ၊ တႃႇဝိတ်ႈ၊ လၢတ်ႈလႄႈဝႃႈ၊ “မႂ်းဢမ်ႇလႆႈပၼ်ၽေးတီႈမၼ်းလႃးလႃး။ ၽူႈလႂ်သေဢမ်ႇဝႃႈ၊ၵေႃႉဢၼ်ပၼ်ၽေးၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉမၼ်းၸဝ်ႈတၵ်းပၼ်တၢမ်ႇဢပျတ်ႈတီႈၵေႃႉၼၼ်ႉဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆသေယဝ်ႉ၊-

10တႃႇဝိတ်ႈ၊ သမ်ႉလၢတ်ႈလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်ႁုလွင်ႈဢၼ်တူဝ် ထႃႇဝရႃႉၽြႃး၊ တၵ်းဢဝ် သေႃးလု၊ တၢႆမိူဝ်ႈဢၼ်ဝၼ်းမၼ်းၸေးယဝ်ႉၼၼ်ႉဢမ်ႇၼၼ်ၵေႃႈ၊တၵ်းတၢႆလူၺ်ႈၽေးဢၼ်တိုၵ်းသိုၵ်းၼၼ်ႉဢေႃႈ။-

11ႁႂ်ႈ ထႃႇဝရႃႉၽြႃး၊ ႁၢမ်ႈတၢပ်ႈႁႄႉၶႅၼ်ႁႂ်ႈၵဝ်ဢမ်ႇလႆႈပၼ်ၽေးၵေႃႉဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉႁႂ်ႈပဵၼ်ၶုၼ်ႁေႃၶမ်းၼၼ်ႉသေၵမ်းလူၺ်ႈ။ ႁဝ်းဢွၼ်ၵၼ်ဢဝ်ႁွၵ်ႇၸဝ်ႈ၊ဢိၵ်ႇတင်းၼမ်ႉတဝ်ႈၸဝ်ႈၼၼ်ႉလႄႈၵႂႃႇတႃႉႁဝ်း၊” ဝႃႈၼင်ႇၼႆဢေႃႈ။-

12ပိူဝ်ႈၼႆလႄႈ တႃႇဝိတ်ႈ၊ ဢဝ်ႁွၵ်ႇၸဝ်ႈဢိၵ်ႇတင်းၼမ်ႉတဝ်ႈၸဝ်ႈဢၼ်မီးၵႃႈတီႈႁူဝ်ၼွၼ်း သေႃးလု၊ ၼၼ်ႉသေလႄႈၵႂႃႇဢေႃႈ။ ၽူႈလႂ်သေၵေႃႉသေၵူၼ်းဢမ်ႇႁုဢမ်ႇႁၼ်လွင်ႈတၢင်းၼၼ်ႉလႄႈၽူႈလႂ်ၵေႃႈဢမ်ႇတိုၼ်ႇသေၵေႃႉသေၵူၼ်း။ ၶဝ်တင်းသဵင်ႈတင်းလူင်ၼွၼ်းလပ်းၼွၼ်းလီယူႇၵွပ်ႈပိူဝ်ႈဢၼ် ထႃႇဝရႃႉၽြႃး၊ ႁႂ်ႈတၢင်းၼွၼ်းဢၼ်ၼူၵ်ႇၼႃႇတူၵ်းႁွတ်ႈၵႃႈၼိူဝ်ၶဝ်ဢေႃႈ။

13တႃႇဝိတ်ႈ၊ ၶၢမ်ႈႁူၺ်ႈၵႂႃႇထိုင်ၵႃႈတီႈပၢႆလွႆတၢင်ႇၽၢႆႇဢၼ်ယၢၼ်ၵႆၵၼ်တင်း သေႃးလု၊ တၢၼ်ႇတၢၼ်ႇယဝ်ႉၸင်ႇ၊-

14ႁွင်ႉသႅၼ်ႇတီႈတပ်ႉသိုၵ်း သေႃးလု၊ တင်း ဢပ်ႉပၼႃး၊ လႄႈဝႃႈ၊ “ ဢပ်ႉပၼႃး၊ ႟။ ဢိူဝ်ၵဝ်တႃႉ၊” ဝႃႈၼင်ႇၼႆဢေႃႈ။ ဢပ်ႉပၼႃး၊ ၶိုၼ်းလၢတ်ႈလႄႈဝႃႈ၊ “ၽူႈလႂ်မႃးႁွင်ႉသႅၼ်ႇယူႇႁႂ်ႈၶုၼ်ႁေႃၶမ်းတိုၼ်ႇမႃးၼၼ်ႉ၊” ဝႃႈၼင်ႇၼႆဢေႃႈ။

15တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “ ဢပ်ႉပၼႃး၊ ႟။ မႂ်းဝႃႈမႂ်းပဵၼ်ၵူၼ်းၸၢႆးႁိုဝ်း။ ၵႃႈၼႂ်းမဵဝ်း ဢိသရေး၊ ၼႆႉၽူႈလႂ်တၵ်းမိူၼ်ၵၼ်တင်းမႂ်း။ ၵွပ်ႈပိူဝ်ႈလွင်ႈတၢင်းၼႆႉလႄႈႁဵတ်းသင်လႄႈမႂ်းယင်းဢမ်ႇပႂ်ႉၸဝ်ႈမႂ်းၶုၼ်ႁေႃၶမ်းၼၼ်ႉၼင်ႇႁိုဝ်။ ၵူၼ်းၵေႃႉၼိုင်ႈၶဝ်ႈၵႂႃႇႁႂ်ႈလႆႈဢဝ်ၸဝ်ႈမႂ်းၶုၼ်ႁေႃၶမ်းၼၼ်ႉတၢႆယဝ်ႉယဝ်ႉ။-

16မႂ်းဢမ်ႇထၢမ်းႁဵတ်းပုၼ်ႈၽွၼ်းမႂ်းတဵမ်ထူၼ်ႈလူင်ပႄႇ။ ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉသူၵႃႈမီးတင်းမူတ်းထိူၵ်ႈလႆႈတၢႆၵွပ်ႈပိူဝ်ႈသူဢမ်ႇပႂ်ႉၸဝ်ႈသူၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉဢေႃႈ။ တူၺ်းလူး။ ႁွၵ်ႇၸဝ်ႈဢိၵ်ႇတင်းၼမ်ႉတဝ်ႈၸဝ်ႈဢၼ်မီးၵႃႈတီႈႁူဝ်ၼွၼ်းၸဝ်ႈၼၼ်ႉမီးယူႇၵႃႈတီႈလႂ်ယဝ်ႉ၊” ဝႃႈၼင်ႇၼႆဢေႃႈ။

17သေႃးလု၊ တွင်းသဵင် တႃႇဝိတ်ႈ၊ လႄႈထၢမ်ဝႃႈ၊ “လုၵ်ႈၸၢႆးၵဝ် တႃႇဝိတ်ႈ၊ ႟။ ဢၼ်ၼႆႉပဵၼ်သဵင်မႂ်းဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ႟။ ပဵၼ်သဵင်ၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊-

18သမ်ႉလၢတ်ႈထႅင်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ႁဵတ်းသင်လႄႈၸဝ်ႈႁဝ်းယင်းတိုၵ်ႉၸွမ်းႁႃၶႃႈၸဝ်ႈယူႇၸိူဝ်ႉၼင်ႇႁိုဝ်တီႈၶႃႈ။ ၶႃႈၸဝ်ႈလႆႈႁဵတ်းမႅၼ်ႈၵႃႈသင်တီႈၶႃႈယဝ်ႉ။ ၶႃႈၸဝ်ႈၽိတ်းပိူင်ႈတုၸရိူၵ်ႈဢၼ်လႂ်တီႈၶႃႈ။-

19ၸဝ်ႈၶုၼ်လူင်တီႈၶႃႈ႟။ ၶႅၼ်းတေႃႈထွမ်ႇငိၼ်းၵႂၢမ်းဢၼ်ၶႃႈၸဝ်ႈလၢတ်ႈယူႇမိူဝ်ႈလဵဝ်ၼႆႉသေၵမ်းတီႈၶႃႈ။ ပေႃးပဵၼ်တၢင်းဢၼ် ထႃႇဝရႃႉၽြႃး၊ တိုၵ်းယူင်းၸဝ်ႈႁဝ်းႁႂ်ႈၸဝ်ႈႁဝ်းယူႇၽၢႆႇၼိုင်ႈတင်းၶႃႈၸဝ်ႈၸိုင်၊တၢင်းဢၼ်ႁဵတ်းတၢင်းလူႇတီႈမၼ်းၸဝ်ႈၼၼ်ႉၸၢင်ႈႁႂ်ႈတၢင်းၵျၢမ်ႇမၼ်းၸဝ်ႈလႅၵ်ႈလၢႆႈၶိုၼ်းလႆႈယူႇတီႈၶႃႈဢေႃႈ။ သင်သမ်ႉပဵၼ်တၢင်းဢၼ်ၵူၼ်းတိုၵ်းယူင်းၸဝ်ႈႁဝ်းၸိုင်၊ႁႂ်ႈတၢင်းဢၼ် ထႃႇဝရႃႉၽြႃး၊ ၵိၼ်ႇဝႃႈၼၼ်ႉတူၵ်းႁွတ်ႈၵႃႈၼိူဝ်ၶဝ်သေၵမ်းလူၺ်ႈ။ လွင်ႈမၼ်းၸမ်ႉ၊ၶဝ်ႁေႃႈၶႃႈၸဝ်ႈဢွၵ်ႇၵႂႃႇပႅတ်ႈသေၵႃႈတီႈလိၼ်ဢမူၺ်ႇဢၼ် ထႃႇဝရႃႉၽြႃး၊ ပၼ်ၼၼ်ႉလႄႈလၢတ်ႈဝႃႈ၊ ‘မႂ်းၵႂႃႇဝႆႈၽြႃးတၢင်ႇသူႇတၢင်ႇပႃးတႃႉ’ ဝႃႈတီႈၶႃႈၸဝ်ႈႁဝ်းၸိူဝ်ႉၼင်ႇၼႆယဝ်ႉဢေႃႈ။-

20ၶႅၼ်းတေႃႈယႃႇပေဢဝ်ၶႃႈၸဝ်ႈတၢႆၼႂ်းပႃႇၽိူင်းမိူင်းပိူၼ်ႈတီႈဢၼ်ၵႆဢၼ်ယၢၼ်ၵၼ်တင်း ထႃႇဝရႃႉၽြႃး၊ ၼႆႉသေၵမ်းတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းသွၵ်ႈႁႃမတ်းဢၼ်ပဵၼ်ၶႃႈၸဝ်ႈ၊မိူၼ်ၸိူဝ်ႉၼင်ႇၵူၼ်းဢၼ်သွၵ်ႈႁႃၼူၵ်ႉၶုမ်ႈၵႃႈတီႈၼိူဝ်လွႆၼၼ်ႉၶႃႈ၊” ဝႃႈၼင်ႇၼႆဢေႃႈ။

21သေႃးလု၊ ၶိုၼ်းလၢတ်ႈလႄႈဝႃႈ၊ “ၵဝ်ၽိတ်းယဝ်ႉ။ လုၵ်ႈၸၢႆး တႃႇဝိတ်ႈ၊ ႟။ ၶိုၼ်းပွၵ်ႈမႃးတႃႉ။ ပိူဝ်ႈဢၼ်မႂ်းပွႆႇႁႂ်ႈၵဝ်လွတ်ႈတၢႆၼႂ်းၶိုၼ်းၼႆႉယဝ်ႉၼၼ်ႉၵဝ်တၵ်းဢမ်ႇပၼ်ၽေးမႂ်းထႅင်ႈလႃးလႃး။ ၵဝ်လႆႈႁဵတ်းမိူၵ်ႈၼႃႇလူင်လၢင်ယဝ်ႉ။ ၵဝ်လႆႈႁဵတ်းၽိတ်းပိူင်ႈၼႃႇလူင်လၢင်ယဝ်ႉ၊” ဝႃႈၼင်ႇၼႆဢေႃႈ။

22တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ႁွၵ်ႇၸဝ်ႈၼၼ်ႉမီးၵႃႈတီႈၼႆႈတီႈၶႃႈဢေႃႈ။ ၸႂ်ႉႁႂ်ႈၵူၼ်းဢွၼ်ႇၸဝ်ႈသေၵေႃႉၵေႃႉမႃးဢဝ်ၵႃႈတီႈၼႆႈတႃႉ။-

23ထႃႇဝရႃႉၽြႃး၊ တွပ်ႇတႅၼ်းပၼ်ဢၵျူဝ်းတီႈၵေႃႉဢၼ်မီးသဵတ်ႈၸႃႇလႄႈသိုဝ်ႈတေႃႇၼၼ်ႉတီႈၶႃႈဢေႃႈ။ ဝၼ်းမိူဝ်ႈၼႆႉမၼ်းၸဝ်ႈဢဝ်ၸဝ်ႈႁဝ်းဢၢပ်ႈပၼ်ၼႂ်းမိုဝ်းၶႃႈၸဝ်ႈယဝ်ႉသေၵေႃႈၶႃႈၸဝ်ႈယင်းဢမ်ႇပၼ်ၽေးၸဝ်ႈႁဝ်း၊ဢၼ် ထႃႇဝရႃႉၽြႃး၊ လိူၵ်ႈတၢင်ႇႁႂ်ႈပဵၼ်ၶုၼ်ႁေႃၶမ်းၼၼ်ႉတီႈၶႃႈ။-

24မိူၼ်ၸိူဝ်ႉၼင်ႇဢၼ်ၶႃႈၸဝ်ႈပွႆႇႁႂ်ႈၸဝ်ႈႁဝ်းလွတ်ႈတၢႆၼၼ်ႉ၊ႁႂ်ႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼၼ်တီႈၶႃႈၸဝ်ႈသေလႄႈပွႆႇႁႂ်ႈၶႃႈၸဝ်ႈလွတ်ႈၵၢင်းသေၽေးဢၼ်ႇတရေႇၵူႈၸိူဝ်ႉၵူႈပိူင်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။

25သေႃးလု၊ လၢတ်ႈတီႈ တႃႇဝိတ်ႈ လႄႈဝႃႈ၊ “လုၵ်ႈၸၢႆးၵဝ် တႃႇဝိတ်ႈ၊ ႟။ ႁႂ်ႈၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇတီႈမႂ်းသေၵမ်းလူၺ်ႈ။ မႂ်းတၵ်းဢွင်ႇမႅင်ႇၵႃႈၼႂ်းၵႃႈဢၼ်မႂ်းႁဵတ်းၼၼ်ႉတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ တႃႇဝိတ်ႈ၊ ဢွၵ်ႇၵႂႃႇသေယဝ်ႉ၊ သေႃးလု၊ ၵေႃႈၶိုၼ်းမိူဝ်းၵႂႃႇၵႃႈတီႈႁေႃပုၼ်ႉသေဢေႃႈ။