2 Timothy 1

Shan

Jump to: Chapter 2 →

1ၵဝ် ပေႃးလူႉ ဢၼ်ပဵၼ်တမၢၼ်ႇၸဝ်ႈ ယေႇသူႉၶရိၸ်ႈ မႅၼ်ႈၼင်ႇဢလူဝ်ႇၽြႃးပဵၼ်ၸဝ်ႈ ၵႃႈၼင်ႇၵတီႉၸဝ်ႈဢၼ်ဝႃႈ တၵ်းပၼ်ဢသၢၵ်ႈ ဢၼ်တႄႇယူႇၼႂ်း ယေႇသူႉၶရိၸ်ႈ ဢေႃႈ၊ ဝႃႈၼင်ႇၼႆၼၼ်ႉၼႆႉ၊-

2ပၼ်ငိၼ်းၵႂႃႇတီႈ တီႉမေႃးသေႇ ဢၼ်ပဵၼ်လုၵ်ႈၸၢႆး ဢၼ်ၵဝ်ႁၵ်ႉၼႃႇၶႃႈဢေႃႈ။ ႁႂ်ႈသူႉၵျေးၸူးဢိၵ်ႇတင်းၵရူႉၼႃႇ တင်း တၢင်းၼိမ်ဢၼ်ပဵၼ်မႃး ၵႃႈတီႈၽြႃးပေႃႈၸဝ်ႈ တင်းၸဝ်ႈႁဝ်း ယေႇသူႉၶရိၸ်ႈ ၼၼ်ႉ မီးသေၵမ်းလူၺ်ႈ။

3ၵဝ်ယွင်ႈယေႃးၵျေးၸူးၽြႃးပဵၼ်ၸဝ်ႈ ဢၼ်ၵဝ်မီးတင်း တၢင်းဢၼ်ၸႂ်ဢၼ်ႁူႉတူဝ်ၸဝ်ႈၵဝ်ႇ ၶၢဝ်ၸၢင်ႇၼၼ်ႉသေလႄႈ ၵူဝ်းၵႂၢႆႇၸွမ်းၼင်ႇဢၼ်ပူႇမွၼ်ႇၵဝ်ၵူဝ်းၵႂၢႆႇၼၼ်ႉ ၵွပ်ႈပိူဝ်ႈဢၼ်ၵဝ်ၶုၵ်းၸႂ်လႆႈၶႆႈၸႂ်ထူပ်းမႂ်းယူႇတႃႇသေႇဢမ်ႇထၢတ်ႇ ၼႂ်းလွင်ႈတၢင်းဢၼ်ၵဝ်ႁဵတ်းသူးတွင်းပထၼႃႇ ၵူႈဝၼ်းၵူႈၶိုၼ်းသေႇသေႇလႄႈ ၸႂ်ထိုင်ၶႂ်ႈႁၼ်မႂ်းၼႃႇလူင်လၢင်ယူႇ၊-

4ၶုၵ်းၸႂ်လႆႈၶႆႈၸႂ်ထူပ်းၼမ်ႉတႃမႂ်း ႁႂ်ႈၵဝ်လႆႈပျေႉၸုမ်ႇတင်းတၢင်းဢၼ်သိူဝ်းပျေႃႇၼၼ်ႉယူႇ၊-

5တွင်းဝႆႉတၢင်းဢၼ်ယုမ်ႇမၢတ်ႈ ဢၼ်တႄႇယူႇၼႂ်းမႂ်းဢၼ်ဝႃႈ တၢင်းဢၼ်ယုမ်ႇမၢတ်ႈဢၼ်တႄႇဝႆႉၵႃႈၼႂ်းၼၢႆးမႂ်း လေႃးဢီႉ ဢိၵ်ႇတင်းမႄႈမႂ်း ဢူႉၼိၵ်ႉ ယဝ်ႉဢွၼ်တၢင်းဢၼ် ၵႃႈၼင်ႇဢၼ်ၵဝ်တူၵ်းၵၢင်ၸႂ်ၼၼ်ႉ၊ တႄႇဝႆႉမီးယူႇၵႃႈၼႂ်းမႂ်းၼၼ်ႉဢေႃႈ။

6ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ ၼင်ႇႁိုဝ်မႂ်းတၵ်းတိုၵ်းယူင်းသူႉဢၼ်ၽြႃးပဵၼ်ၸဝ်ႈပၼ်တီႈမႂ်း ၵွပ်ႈပိူဝ်ႈတၢင်းဢၼ် ၵဝ်ဢဝ်မိုဝ်းတၢင်ႇၼၼ်ႉၸိုင်ၵဝ်ပၼ်သတီႉတီႈမႂ်းဢေႃႈ။-

7လွင်ႈမၼ်းၸမ်ႉ ၽြႃးပဵၼ်ၸဝ်ႈပၼ် ၸႂ်သၽေႃးဢၼ်ၸၢင်ႈၵူဝ်ၸၢင်ႈႁႄၼၼ်ႉ တီႈႁဝ်းဢမ်ႇၸႂ်ႈ။ ပၼ်ၸႂ်ဢၼ်ပႃးတၼ်းၶူဝ်း၊ ၸႂ်ဢၼ် ၸၢင်ႈႁၵ်ႉၸၢင်ႈပႅင်း၊ ဢိၵ်ႇတင်းၸႂ်သၽေႃးဢၼ်လူင်ႉဢၼ်လႅင်းဢေႃႈ။

8ပိူဝ်ႈၼႆလႄႈ ယႃႇပေမီးတၢင်းဢၼ်ဢူၵ်းဢၼ်ဢၢႆ လူၺ်ႈလွင်ႈသၢၵ်ႈသေႇၸဝ်ႈၽြႃးႁဝ်းဢိၵ်ႇတင်း ၵဝ်ဢၼ်ပဵၼ်ၵေႃႉဢၼ် လႆႈၶၢမ်ႇတူၵ်းၵိၼ်း ၵွပ်ႈပိူဝ်ႈၸဝ်ႈၼၼ်ႉၼႆႉ သိူၵ်ႈသမ်ႇၵၼ်တင်းတြႃးသတၢင်းသိူဝ်းပျေႃႇသေလႄႈ ၶၢမ်ႇတုၵ်ႉၶႃႉတၢင်းၽၢၼ် လူၺ်ႈၵၼ်တင်းၵဝ် ၸွမ်းၵႃႈၼင်ႇဢၼ်လႆႈတၼ်းၶူဝ်း ဢၼ်ၽြႃးပဵၼ်ၸဝ်ႈပၼ်ၼၼ်ႉတႃႉ။-

9မၼ်းၸဝ်ႈၼၼ်ႉ ယင်းဢမ်ႇထွၵ်ႈလူၺ်ႈတၢင်းၵမ်တၢင်းၵျၢင်ႉႁဝ်း ၸွမ်းၼင်ႇတၢင်းဢၼ် တူဝ်မၼ်းၸဝ်ႈၵျၢမ်ႇပွင်ဢိၵ်ႇတင်း ၵျေးၸူးၸဝ်ႈဢၼ်မၼ်းၸဝ်ႈပၼ်တီႈႁဝ်း ၼႂ်း ယေႇသူႉၶရိၸ်ႈ ၸဵမ်မိူဝ်ႈၸူဝ်ႈဢၼ်ၵၢပ်ႈၵႃႇလႃႉထႃႇဝရႃႉ ဢွၼ်တၢင်း မိူဝ်ႈၼၼ်ႉဢမ်ႇပႆႇပဵၼ်ၼၼ်ႉသေလႄႈ၊ ၵႄႇၶျွတ်ႈဢဝ်ႁဝ်းလႄႈႁွင်ႉသႂၢင်းၼႂ်းဢရႃႇဢၼ်မူတ်းၸၢင်ႇဢေႃႈ။-

10ၵျေးၸူးၸဝ်ႈၼၼ်ႉၸမ်ႉ၊ တေႃႈလဵဝ်ၼႆႉထၢင်ႇသႃးယူႇၼႂ်း လွင်ႈတၢင်းဢၼ် ၸဝ်ႈဢၼ်ၵႄႇၶျွတ်ႈဢဝ်ဢပႅတ်ႈႁဝ်း ဢၼ်ဝႃႈ ယေႇသူႉၶရိၸ်ႈ ၼၼ်ႉပေႃႇမႃးၼၼ်ႉဢေႃႈ။ ၸဝ်ႈၼၼ်ႉ ပႄႇပႅတ်ႈလွင်ႈတၢင်းဢၼ်တၢႆသေလႄႈ ႁႂ်ႈလွင်ႈတၢင်းဢၼ်ဢသၢၵ်ႈလိပ်းဢိၵ်ႇတင်း လွင်ႈတၢင်းဢၼ်ဢမ်ႇၽွၵ်ႈဢမ်ႇပျၢၼ်ႇၼၼ်ႉထၢင်ႇသႃး ၵွပ်ႈပိူဝ်ႈတြႃးသတၢင်းသိူဝ်းပျေႃႇယဝ်ႉ။-

11မၼ်းၸဝ်ႈၶၢၼ်းၵဝ်ဝႆႉၼႂ်း ဢရႃႇဢၼ်ႁေႃးလၢတ်ႈတြႃး၊ ၼႂ်းဢရႃႇတမၢၼ်ႇၸဝ်ႈ၊ ၼႂ်းဢရႃႇသြႃႇၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆၼၼ်ႉယဝ်ႉ။-

12ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၼႆႉဢေႃႈ။ ၼႂ်းဝႃႈၼၼ်သေၵေႃႈ ၵဝ်ဢမ်ႇမီးတၢင်းဢူၵ်းတၢင်းဢၢႆ။ ၵဝ်ယုမ်ႇမၢတ်ႈၽူႈလႂ်ဝႃႈၼႆ ၵဝ်ႁူႉယူႇဢေႃႈ။ လွင်ႈတၢင်းဢၼ်ၵဝ်ဢၢပ်ႈဝႆႉ တီႈမၼ်းၸဝ်ႈၼၼ်ႉၵေႃႈ၊ မၼ်းၸဝ်ႈပႂ်ႉတေႃႇထိုင်ႁွတ်ႈဝၼ်းၼၼ်ႉလႆႈယူႇဢေႃႈဝႃႈၼႆ ၵဝ်တူၵ်းၵၢင်ၸႂ်ဝႆႉယဝ်ႉ။

13မီးတင်းတၢင်းဢၼ်ယုမ်ႇမၢတ်ႈ ဢိၵ်ႇတင်း တၢင်းႁၵ်ႉဢၼ်မီးၼႂ်း ယေႇသူႉၶရိၸ်ႈ ၼၼ်ႉသေလႄႈ ၸွႆးၸပ်းဢၼ်ႁူမ်ႇလူမ်ႈၵႂၢမ်းတြႃး ဢၼ်ၶၢဝ်ၸၢင်ႇ ဢၼ်လႆႈငိၼ်းတီႈၵဝ်ယဝ်ႉၼၼ်ႉတႃႉ။-

14လွင်ႈတၢင်းဢၼ်မျၢတ်ႈ ဢၼ်ဢၢပ်ႈဝႆႉတီႈမႂ်းၼၼ်ႉၸိုင်၊ ဢိင်ဝီႉၺိၺ်ႇဢၼ်မူတ်းၸၢင်ႇၸဝ်ႈ ဢၼ်ၵိင်းဝၢပ်ႈယူႇၼႂ်းႁဝ်းၼၼ်ႉသေလႄႈ ပႂ်ႉယူႇတႃႉ။

15မႂ်းလႆႈႁူႉလႆႈငိၼ်းလွင်ႈဢၼ် ၶဝ်ၸိူဝ်းဢၼ် ယူႇၼႂ်းမိူင်း ဢႃႇသီႉ ၵႃႈမီးတင်းသဵင်ႈတင်းလူင်ၼၼ်ႉ ပႄႇပႅတ်ႈၵဝ်ယဝ်ႉၼၼ်ႉယူႇဢေႃႈ။ ၼႂ်းၶဝ်ၼၼ်ႉ ၽူႉၵႄႇလူႉ တင်း ႁေႇရမေႃးၵိၼ်ႇ ၵေႃႈပႃးဢေႃႈ။-

16ႁႂ်ႈၵရူႉၼႃႇထႃႇဝရႃႉၽြႃး ႁွတ်ႈထိုင်ၵႃႈၼိူဝ်ႁိူၼ်း ဢေႃးၼေႇသီႉၽေႃး သေၵမ်းလူၺ်ႈ။ မၼ်းၼၼ်ႉ ႁႂ်ႈၵဝ်သၢၵ်ႈသႃႇ ၶိူဝ်းၶိူဝ်းယႂ်းယႂ်းယဝ်ႉ။ ပိၵ်ႉသမ်ႉ ၸိူၵ်ႈလဵၵ်းမတ်ႉၽုၵ်ႇၵဝ်ယူႇသေၵေႃႈ၊ မၼ်းဢမ်ႇမီးတၢင်းဢၼ်ဢူၵ်းဢၼ်ဢၢႆ။-

17မိူဝ်ႈဢၼ်မၼ်းႁွတ်ႈထိုင်ဝဵင်း ရူဝ်းမႃႉ ၼၼ်ႉၸိုင်၊ မၼ်းယဵင်ႈၶႅၼ်းၵျူဝ်းၸႃးႁႃၵဝ်လႄႈ ထူပ်းႁၼ်ဢေႃႈ။-

18ႁႂ်ႈထႃႇဝရႃႉၽြႃးဢဵတ်းလူပၼ် ႁႂ်ႈမၼ်းလႆႈၶၢမ်ႇၵရူႉၼႃႇၼႂ်းမိုဝ်းၸဝ်ႈၽြႃး မိူဝ်ႈဝၼ်းၼၼ်ႉသေၵမ်းလူၺ်ႈ။ ၵႃႈၼႂ်းဝဵင်း ဢေးၽႅတ်ႈ ၼၼ်ႉၵေႃႈ၊ မၼ်းလုမ်းလႃးၵဝ်ၼမ်ၼႃႇ ထၢၼ်ႇလႂ်ဝႃႈၼႆ မႂ်းႁူႉယူႇဢမၢၼ်ႇၶၼ်ပဵၼ်ဢေႃႈ။

Jump to: Chapter 2 →