2 Timothy 4

Shan

← Chapter 3 Jump to:

1ၵဝ်ထွၵ်ႈလူၺ်ႈ ၶိင်ႇၵႃႇလႃႉ တၢင်းဢၼ်မၼ်းၸဝ်ႈ တၵ်းပေႃႇမႃးလႄႈ မိူင်းၸဝ်ႈတၵ်းထၢင်ႇသႃးၼၼ်ႉလႄႈ ပၼ်သဵတ်ႈၸႃႇတီႈမႂ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢိၵ်ႇတင်းၵႃႈတီႈၽၢႆႇၼႃႈ ယေႇသူႉၶရိၸ်ႈ ဢၼ်တၵ်းၸႅတ်ႈထၢမ်ၸီႇယၢင်ႇ ၶဝ်ၸိူဝ်းဢၼ် ဢသၢၵ်ႈလိပ်း တင်းၶဝ်ၸိူဝ်းဢၼ်တၢႆၼၼ်ႉၸမ်ႉ၊-

2ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈတႃႉ။ ၶိင်ႇမီးသေဢမ်ႇဝႃႈ၊ ဢမ်ႇမီးသေဢမ်ႇဝႃႈ၊ ဢဝ်ႁႅင်းၵျူဝ်းၸႃးႁဵတ်းတႃႉ။ ၽုၺ်ႇဢွၵ်ႇ ၼႄပျႃး ဢပႅတ်ႈတႃႉ။ ႁဵတ်းတၢင်းဢၼ်သင်ႇသွၼ်သုင်းမႃႉတႃႉ။ မီးတၢင်းၸႂ်ဢၼ်ယႂ်ႇဢၼ်ယၢဝ်း ၼႃႇလူင်လၢင် ပၼ်ဢေႃးဝႃႇတႃႉ ၵူႈၸိူဝ်ႉၵူႈပိူင်လႄႈ တိုၵ်းယူင်းၸူဝ်းဢဝ်တႃႉ။-

3လွင်ႈမၼ်းၸမ်ႉ ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉ ၵူၼ်းတင်းလၢႆ ယင်းဢမ်ႇၶၢမ်ႇဢမ်ႇဢဝ် ဢေႃးဝႃႇတႃႉဢၼ်ၶၢဝ်ၸၢင်ႇၼၼ်ႉလႄႈ မီးႁူဢၼ် ၸၢင်ႈၶူမ်းၸၢင်ႈၵၢႆးသေယဝ်ႉ၊ တၵ်းၸွမ်းၽၢႆႇလင်သြႃႇ ဢၼ်ၼမ်ၼႃႇၵႂႃႇၵႃႈၼင်ႇတၢင်းဢၼ် တူဝ်ၸဝ်ႈၵဝ်ႇၸွႆးၸပ်းၼၼ်ႉဢေႃႈ။-

4ၶဝ်ယင်းဢမ်ႇထွမ်ႇဢမ်ႇဢဝ် သမ်ႇမႃႇတြႃးလႄႈ တၵ်းထွမ်ႇဢဝ် ၵႂၢမ်းတၢၼ်ႇတႃႇရီႇသေလႄႈ ပိူင်ႈတၢင်းၵႂႃႇဢေႃႈ။

5မႂ်းၸမ်ႉ၊ မီးသမ်ႇမႃႇသတီႉ ၼႂ်းၵူႈၸိူဝ်ႉၵူႈပိူင်တႃႉ။ ၶၢမ်ႇတုၵ်ႉၶႃႉတၢင်းၽၢၼ်တႃႉ။ ပွင်ႁဵတ်းဢမူႉ ဢၼ်သြႃႇပွင်သႃႇသၼႃႇ တၵ်းလႆႈ ပွင်ႁဵတ်းၼၼ်ႉတႃႉ။ ႁဵတ်းဝၢတ်ႈတၢင်းဢၼ် ၶၢၼ်းဝႆႉၼႂ်းဢရႃႇထမ်ႇမႃႉသြႃႇၼၼ်ႉ တင်းသဵင်ႈတင်းမူတ်းတႃႉ။-

6လွင်ႈမၼ်းၸမ်ႉ တေႃႈလဵဝ်ၼႆႉၵဝ်ၸမ်ႉ၊ တၵ်းလႆႈၶၢမ်ႇတၢင်းဢၼ်ဢဝ်ထွၵ်ႇသႂ်ႇ ၵႃႈၼိူဝ်ယိတ်ႈယဝ်ႉ။ ၶိင်ႇဢၼ်ၵဝ်တၵ်းလၢႆႈၸၢတ်ႈလၢႆႈပၢၼ်ၼၼ်ႉ ႁွတ်ႈထိုင်ယဝ်ႉ။-

7ၵဝ်ႁဵတ်းတၢင်းဢၼ်တိုၵ်းဢၼ်တေႃး ဢၼ်လီဢၼ်ငၢမ်းယဝ်ႉယဝ်ႉ။ ၵဝ်ၶုၼ်ႇလႅၼ်ႈသဵၼ်ႈတၢင်းဢၼ် ၵဝ်တၵ်းလႆႈ ၶုၼ်ႇလႅၼ်ႈၼၼ်ႉ တေႃႇထိုင်ႁွတ်ႈတီႈသုတ်းတီႈၵွႆယဝ်ႉယဝ်ႉ။ ၵဝ်ပႂ်ႉၸွမ်းတြႃးတၢင်းဢၼ် ယုမ်ႇမၢတ်ႈယဝ်ႉယဝ်ႉ။-

8ၸႃႉၸဵမ်တေႃႈလဵဝ်ၼႆႉလႄႈ ထမ်ႇမႃႉသရၽူႇသိမ်းဝႆႉမီးယူႇပုၼ်ႈၵဝ်ယဝ်ႉဢေႃႈ။ သရၽူႇၼၼ်ႉၸိုင်၊ ၵေႃႉဢၼ်ၸီႇယၢင်ႇၸွမ်းၼင်ႇ တြႃးဢၼ်ဝႃႈ ၸဝ်ႈၽြႃးၼၼ်ႉ တၵ်းဢၢပ်ႈပၼ်တီႈၵဝ်ၼႂ်းဝၼ်းၼၼ်ႉဢေႃႈ။ တၵ်းပၼ်တီႈၵဝ်ၵူၺ်းဢမ်ႇၵႃး၊ တၵ်းပၼ်တီႈၶဝ်ၸိူဝ်းဢၼ် တူၵ်းဢၢင်ႈ တၢင်းဢၼ်မၼ်းၸဝ်ႈ တၵ်းပေႃႇမႃးၼၼ်ႉ တင်းသဵင်ႈတင်းလူင်ၼၼ်ႉဢေႃႈ။

9ၵျူဝ်းၸႃးႁႂ်ႈလႆႈမႃးၸူးၵႃႈတီႈၵဝ်ဝႆးဝႆးတႃႉ။-

10လွင်ႈမၼ်းၸမ်ႉ တေႇမႃႉ ပႅတ်ႈဝႆႉၵဝ်ၵွပ်ႈပိူဝ်ႈဢၼ်မၼ်း မီးၸႂ်ဢၼ်ႁၵ်ႉပႅင်း ၽဝႃႉၼႆႉၼၼ်ႉလႄႈ ၵႂႃႇၵႃႈတီႈဝဵင်း ထိတ်ႉသႃႇလေႃးၼိၵ်ႈ ပုၼ်ႉယဝ်ႉ။ ၵရိတ်ႉၵေႇ ၵႂႃႇၵႃႈတီႈမိူင်း ၵလႃႇတီႉ လႄႈ တီႉတူႉ ၵႂႃႇၵႃႈတီႈမိူင်း တႃႇလမႃႇတီႉ ယဝ်ႉ။-

11တီႈၵဝ်ၼႆႉမီး လူႉၵႃႇ ၵေႃႉလဵဝ်ၵူၺ်းဢေႃႈ။ ႁွင်ႉဢဝ် မႃႇၵူႉ မႃးလူၺ်ႈၵၼ်တင်းမႂ်းတႃႉ။ ၵဝ်မီးဢၵျူဝ်းၼႂ်းလွင်ႈတၢင်းဢၼ် မၼ်း ပွင်ႁဵတ်းဢမူႉသြႃႇၼၼ်ႉဢေႃႈ။-

12တူႉၶိတ်ႈ ၵေႃႈ ၵဝ်လႆႈပွႆႇၸႂ်ႉၵႂႃႇ ၵႃႈတီႈဝဵင်း ဢေးၽႅတ်ႈ ပုၼ်ႉယဝ်ႉ။

13မိူဝ်ႈဢၼ်မႂ်းမႃးၼၼ်ႉၸိုင်၊ ဢဝ်သိူဝ်ႈၼုင်ႈလူင် ဢၼ်ၵဝ်ဝႆႉၵႃႈၼႂ်းမိုဝ်း ၵႃႇပူႉ ၼႂ်းဝဵင်း တရေႃး ၼၼ်ႉ ဢိၵ်ႇတင်းၽိုၼ်လိၵ်ႈတင်းလၢႆ တင်းလိၵ်ႈၼင်တူဝ် ဢၼ်ၵဝ်ယဵင်ႈၶႅၼ်းၶႂ်ႈလႆႈၼၼ်ႉမႃးတႃႉ။

14ၸၢင်ႈၶမ်း ဢႃႇလေႇၸၼ်ႇတရူႉ ၼၼ်ႉ ႁဵတ်းဢမူႉဢၼ်ဢမ်ႇလီတီႈၵဝ် ၼမ်ၼႃႇဢေႃႈ။ ႁႂ်ႈၸဝ်ႈၽြႃးတႅၼ်းပၼ် ဢၵျူဝ်း ဢပႅတ်ႈ တၢင်းၵမ်တၢင်းၵျၢင်ႉ ဢၼ်ၵေႃႉၼၼ်ႉၵမ်ၵျၢင်ႉၼၼ်ႉ သေၵမ်းလူၺ်ႈ။-

15ႁဵတ်းသတီႉလွင်ႈမၼ်းတႃႉ။ မၼ်းထဵင်ပႅတ်ႈၵႂၢမ်းႁဝ်းၼႃႇလူင်လၢင်တႄႉတႄႉယဝ်ႉ။

16မိူဝ်ႈဢၼ်ၵဝ်လႆႈဢၶႂၢင်ႉ ဢၼ်လႆႈလၢတ်ႈၵႂၢမ်းၽေႇဢပႅတ်ႈ ၶိင်ႇပထမႃႉၼၼ်ႉၸိုင် ၽူႈလႂ်ဢမ်ႇယူႇၽၢႆႇၵဝ်၊ ၵူၼ်းတင်းသဵင်ႈတင်းလူင် ပႅတ်ႈၵဝ်ဝႆႉဢေႃႈ။ ယႃႇပေႁႂ်ႈမၼ်းၸဝ်ႈ တၢင်ႇဢပႅတ်ႈၵႃႈတီႈၶဝ်ၼၼ်ႉ သေၵမ်းလူၺ်ႈ။-

17ၵူၺ်းၵႃႈ ၵွပ်ႈပိူဝ်ႈဢၼ်ၸဝ်ႈၽြႃးယူႇၽၢႆႇၵဝ်သေလႄႈ ႁႂ်ႈၵဝ်ပျေႉၸုမ်ႇတင်းႁႅင်း ႁႂ်ႈၵဝ်လႆႈႁေႃးလၢတ်ႈတေႇသၼႃႇၸဝ်ႈ တင်းသဵင်ႈတင်းမူတ်းလႄႈ ၵူၼ်းၵူႈၸိူဝ်ႉၵူႈၶိူဝ်းတင်းသဵင်ႈတင်းလူင် လႆႈႁူႉလႆႈငိၼ်းၼၼ်ႉလႄႈ၊ ၵဝ်လႆႈၵတ်းယဵၼ်ၶျၢမ်းသႃႇ တၢင်းဢၼ်ၼုၵ်ႈဢဝ် ၵႃႈၼႂ်းသူပ်းသၢင်ႇသီႈဢေႃႈ။-

18လိူဝ်သေၼၼ်ႉဢမ်ႇၵႃး၊ ၸဝ်ႈၽြႃးတၵ်းၼုၵ်ႈဢဝ်ၵဝ် ဢွၵ်ႇသေၵႃႈၼႂ်းလွင်ႈတၢင်းဢၼ် ဢမ်ႇလီဢမ်ႇငၢမ်း ၵႃႈမီးတင်းသဵင်ႈတင်းလူင်လႄႈ ၸွႆႈထႅမ်ဢဝ်ၵဝ်ၵႂႃႇသူင်ႇ ႁႂ်ႈႁွတ်ႈထိုင်ၵႃႈတီႈ မိူင်းၵၢင်ႁၢဝ်မၼ်းၸဝ်ႈပုၼ်ႉဢေႃႈ။ ႁႂ်ႈမုၼ်ၽုင်းၸဝ်ႈၼၼ်ႉ ယႂ်ႇၼႃႇၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်း သေၵမ်းလူၺ်ႈ။ ဢႃႇမိၼ်ႇ။

19တၵ်ႉလၢတ်ႈၸႃႉၸဵမ် ပျိတ်ႉၵီႉလႃႉ၊ ဢႃႇၵူႉလႃႉ ဢိၵ်ႇတင်းၵူၼ်းႁိူၼ်းၵူၼ်းယေး ဢေႃးၼေႇသီႉၽေႃး ၸိူဝ်းၼၼ်ႉတႃႉ။

20ဢေႇရတ်ႉတူႉ ယူႇၵႃႈတီႈဝဵင်း ၵေႃးရိၼ်ႇထူႉ ဢေႃႈ။ တရေႃးၽိမ်း မီးတၢင်းၶႆႈတၢင်းပဵၼ်လႄႈ ၵဝ်ဝႆႉၵိုတ်းၵႃႈတီႈ ဝဵင်း မီးလိတ်ႉ ဢေႃႈ။

21ၸူဝ်ႈဢၼ်ဢမ်ႇပႆႇထိုင် ၶိင်ႇၵတ်းၼၼ်ႉၸိုင်၊ ၵျူဝ်းၸႃးလႄႈမႃးတႃႉ။ ၸႃႉၸဵမ် ဢူႉပူႉလူႉ၊ ပူႉတေႇ၊ လီႉၼူႉ၊ ၵလေႃးတီႉ လႄႈ ပီႈၼွင်ႉတင်းသဵင်ႈတင်းလူင်ၸိူဝ်းၼႆႉတၵ်ႉၼၢႆမႂ်းဢေႃႈ။

22ႁႂ်ႈၸဝ်ႈ ယေႇသူႉၶရိၸ်ႈ မီးယူႇလူၺ်ႈၵၼ်တင်း ၸႂ်ဝီႉၺိၺ်ႇမႂ်းသေၵမ်းလူၺ်ႈ။ ႁႂ်ႈၵျေးၸူးၸဝ်ႈႁဝ်း မီးၼိူဝ်မႂ်းသေၵမ်းလူၺ်ႈ။ လိၵ်ႈဢေႃးဝႃႇတႃႉတီႉမေႃးသေႇၽိုၼ်တူႉတီႉယႃႉယဝ်ႉယဝ်ႉဢေႃႈ။

← Chapter 3 Jump to: