Luke 1 — Shan

1ၵွပ်ႈပိူဝ်ႈဢၼ်ၵူၼ်းၼမ်ၼႃႇၸီႇယၢင်ႇတႅမ်ႈဝႆႉ လိၵ်ႈဢၼ်မၢတ်ႈမၢႆဝႆႉလွင်ႈတၢင်းဢထုၵ်ႉပတ်ႈတီႉ ဢၼ်လႆႈပဵၼ်မႃးယဝ်ႉထၢင်ႇထၢင်ႇသႃးသႃးၵႃႈၼႂ်းႁဝ်းလႄႈ၊-

2ၵႃႈၼင်ႇဢၼ်ၶဝ်ၸိူဝ်းဢၼ်ပဵၼ်သၢၵ်ႈသေႇ လွင်ႈတၢင်းဢၼ်တူဝ်ၸဝ်ႈၵဝ်ႇလႆႈႁၼ်ၸႃႉၸဵမ်မိူဝ်ႈၸႃႉမၼ်းလႄႈ ပွင်ႁဵတ်းဢမူႉၼုၵ်ႈၵပၢတ်ႈၸဝ်ႈၸိူဝ်းၼၼ်ႉလၢတ်ႈပၼ်တီႈႁဝ်းၼၼ်ႉၸိုင်၊-

3ၵဝ်ၵေႃႈၸွမ်းႁႃၸႅတ်ႈတူၺ်း ဢထုၵ်ႉပတ်ႈတီႉၵႃႈမီးတင်းသဵင်ႈတင်းလူင် ၸႃႉၸဵမ်ငဝ်ႈႁၢၵ်ႈမၼ်းၸေးၸေးၸွတ်ႇၸွတ်ႇယဝ်ႉၸင်ႇ၊ ထေႃးၽီႉလူႉ ဢၼ်မျၢတ်ႈၼႃႇၶႃႈဢိူၺ်း၊-

4ၼင်ႇႁိုဝ်ၸဝ်ႈႁဝ်းတၵ်းႁူႉလွင်ႈတၢင်းဢၼ်ၸဝ်ႈႁဝ်းသွၼ်ဢဝ်ယဝ်ႉၼၼ်ႉ ပဵၼ်ဢၼ်ၸိုဝ်ႈဢၼ်ၸႂ်ႈၸိုင် မီးတၢင်းၵျၢမ်ႇတၢင်းပွင်တၵ်းတႅမ်ႈၸွမ်းၸႅၼ်ႇတၢမ်းၵၼ်လႄႈ ပၼ်ငိၼ်းၵႂႃႇၶႃႈဢေႃႈ။

5ၼႂ်းၸူဝ်ႈပၢၼ်ၶုၼ်လူင် ႁေႇရူတ်ႈ ဢၼ်ဢုပ်ႉပိူင်ႇမိူင်း ယူႉတႃႉ ၼၼ်ႉ မီးယိတ်ႈပရေႃးႁဵၵ်ႈပႃးၼိုင်ႈဢၼ်လႆႈၸိုဝ်ႈ ၸႃႇၶရီႉ ဢၼ်ၸၢပ်ႈသႅင်ႇၵၼ်တင်းမုၵ်ႉၸိူဝ်း ဢၽီႉယႃႉ ဢေႃႈ။ မေးမၼ်းပဵၼ်ၸိူဝ်ႉၶိူဝ်း ဢႃႇရုၼ်ႇ လႄႈ လႆႈၸိုဝ်ႈ ဢေးလီႉသၽႅတ်ႈ ဢေႃႈ။-

6သွင်ၶႃၼၼ်ႉၵမ်ၵျၢင်ႉပိင်းၺၢပ်ႈဢူႉပတေႇထႃႇဝရႃႉၽြႃးၵူႈၸိူဝ်ႉၵူႈပိူင်ယူႇ၊ ၵၢင်းလွတ်ႈတင်းတီႈတၢင်ႇဢပႅတ်ႈယူႇသေလႄႈ မီးပႃႇရမီႇတၢင်းဢၼ်သိုဝ်ႈတေႃႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-

7ပိူဝ်ႈဢၼ် ဢေးလီႉသၽႅတ်ႈ ပဵၼ်မႄႈယိင်းဢၼ်မၼ်လႄႈ ၶဝ်ဢမ်ႇမီးလုၵ်ႈမီးလၢင်း သွင်ၶႃၼၼ်ႉဢသၢၵ်ႈၵႄႇထဝ်ႈၵႂႃႇဢေႃႈ။-

8ၸႃႇၶရီႉ ၼၼ်ႉ ၼႂ်းမိူဝ်ႈဢၼ်တူၵ်းလႄႉတူၵ်းၵမ်းမုၵ်ႉၸိူဝ်းတူဝ်ၸဝ်ႈၵဝ်ႇလႄႈ ပွင်ႁဵတ်းၵၢၼ်ယိတ်ႈပရေႃးႁဵၵ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈယူႇၼၼ်ႉၸိုင်၊-

9ၵႃႈၼင်ႇဢၼ်ထုင်းၸၢမ်ႇဢရႃႇယိတ်ႈပရေႃးႁဵၵ်ႈမီးၼၼ်ႉ ပိူဝ်ႈဢၼ်ၸႃႇၵွၵ်ႈတူၵ်းတီႈမၼ်းလႄႈ မၼ်းလႆႈၶဝ်ႈၵႃႈၼႂ်းႁိူၼ်းပိၵ်ႈမၢၼ်ႇထႃႇဝရႃႉၽြႃးလႄႈ ဢဝ်ၽႆးတုတ်ႇၼၢမ်ႇသႃႇဢေႃႈ။-

10ၼႂ်းၶိင်ႇမိူဝ်ႈဢၼ်ဢဝ်ၼၢမ်ႇသႃႇတုတ်ႇၽႆးၼၼ်ႉ၊ ၵူၼ်းတင်းသဵင်ႈတင်းလူင်သူးတွင်းယူႇၵႃႈၼွၵ်ႈဢေႃႈ။-

11မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းလႄႈ ၸုၵ်းယူႇၵႃႈတီႈၽၢႆႇၶႂႃယိတ်ႈပလၢင်ႇ ဢၼ်တုတ်ႇၽႆးၼၢမ်ႇသႃႇၼၼ်ႉဢေႃႈ။-

12ၸႃႇၶရီႉ ၼၼ်ႉ မိူဝ်ႈဢၼ်ႁၼ်ၼၼ်ႉၸိုင်၊ မီးတင်းၸႂ်ဢၼ်ဢမ်ႇတႄႇဢမ်ႇၼိမ်လႄႈ တူၵ်းၸႂ်ဢေႃႈ။-

13တမၢၼ်ႇၵၢင်ႁၢဝ်ၵေႃႈ လၢတ်ႈလႄႈဝႃႈ၊ ၸႃႇၶရီႉ ဢိူၺ်း၊ ယႃႇပေၵူဝ်ပေႁႄ။ ပထၼႃႇဢၼ်မႂ်းႁဵတ်းၼၼ်ႉၸိုင် မၼ်းၸဝ်ႈထွမ်ႇဢဝ်ယဝ်ႉ။ မေးမႂ်း ဢေးလီႉသၽႅတ်ႈ ၼၼ်ႉ တၵ်းၵိူတ်ႇလဵင်ႉလုၵ်ႈၸၢႆးမႃးဢေႃႈ၊ လုၵ်ႈၸၢႆးၼၼ်ႉၸိုင်တၵ်းလႆႈႁွင်ႉႁဵၵ်ႈၸိုဝ်ႈ ယူဝ်းႁၢၼ်ႇ ဢေႃႈ။-

14မႂ်းတၵ်းမီးတၢင်းဢၼ်ၸူမ်းသိူဝ်းလႄႈမူၼ်ႈပျေႃႇဢေႃႈ။ ၵွပ်ႈပိူဝ်ႈဢၼ်ၵိူတ်ႇလဵင်ႉမၼ်းၼၼ်ႉမႃးလႄႈ ၵူၼ်းၼမ်ၼႃႇၵေႃႈတၵ်းႁွတ်ႈထိုင်တၢင်းဢၼ်သိူဝ်းပျေႃႇဢေႃႈ။-

15လွင်ႈမၼ်းၸမ်ႉ မၼ်းၼၼ်ႉတၵ်းပဵၼ်ၵေႃႉဢၼ်ယႂ်ႇမျၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ တၵ်းဢမ်ႇၵိၼ်ၼမ်ႉၸပိတ်ႈတင်းလဝ်ႈလႄႈယူႇဢေႃႈ။ ၸႃႉၸဵမ်ၵႃႈၼႂ်းတွင်ႉမႄႈမၼ်းၼၼ်ႉလႄႈ တၵ်းပျေႉၸုမ်ႇတဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။

16တၵ်းႁႂ်ႈၵူၼ်းၸိူဝ်ႉၶိူဝ်း ဢီႉသရေႇလႃႉ ၼမ်ၼႃႇၶၢႆႉပုတ်ႈမႃးၵႃႈတီႈၽၢႆႇၽြႃးပဵၼ်ၸဝ်ႈၶဝ်ထႃႇဝရႃႉၽြႃးဢေႃႈ။-

17ၼင်ႇႁိုဝ်တၵ်းႁႂ်ႈပေႃႈတင်းလၢႆ တင်းလုၵ်ႈလၢင်းတင်းလၢႆ ထုၵ်ႇၵၼ်ႁင်းၽႂ်ႁင်းမၼ်းလႄႈ ၶဝ်ၸိူဝ်းဢၼ်ထဵင်ပႅတ်ႈၼၼ်ႉ ၶၢႆႉပုတ်ႈမႃးၵႃႈတီႈသဵၼ်ႈတၢင်းပိင်ႇၺႃႇသတီႉၵူၼ်းသိုဝ်ႈတေႃႇတင်းလၢႆလႄႈသင်၊ ၼင်ႇႁိုဝ်တၵ်းႁႂ်ႈပဵၼ်မဵဝ်းၵူၼ်းဢၼ်မႄးႁႅၼ်းဝႆႉပုၼ်ႈထႃႇဝရႃႉၽြႃးလႄႈသင်၊ မၼ်းတၵ်းပျေႉၸုမ်ႇတင်းၸႂ်ဝီႉၺိၺ်ႇ ဢိၵ်ႇတင်းတၼ်းၶူဝ်း ဢေးလီႉယႃႉ လႄႈ ၵႂႃႇၵႃႈတီႈၽၢႆႇၼႃႈထႃႇဝရႃႉၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။

18ၸႃႇၶရီႉ ၵေႃႈလဝ်ႊလၢတ်ႈတီႈတမၢၼ်ႇၵၢင်ႁၢဝ်လႄႈဝႃႈ၊ လွင်ႈဢၼ်တၵ်းပဵၼ်ၸိူဝ်ႉၼင်ႇၼၼ်ၸိုင်၊ ၵဝ်ၶႃႈတၵ်းလႆႈႁူႉၸိူဝ်ႉၼင်ႇႁိုဝ်ၶႃႈ၊ ၵဝ်ၶႃႈပဵၼ်ၵူၼ်းထဝ်ႈယဝ်ႉၶႃႈဢေႃႈ၊ မေးၵဝ်ၶႃႈၵေႃႈဢသၢၵ်ႈၵႄႇလႄႈထဝ်ႈၵႂႃႇယဝ်ႉၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

19တမၢၼ်ႇၵၢင်ႁၢဝ်ၵေႃႈၶိုၼ်းလၢတ်ႈလႄႈဝႃႈ၊ ၵဝ်ၼႆႉပဵၼ် ၵေႇပျေႇလႃႉ ဢၼ်ၸုၵ်းပႂ်ႉယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ မၼ်းၸဝ်ႈပွႆႇၸႂ်ႉၵဝ်မႃးႁႂ်ႈလႆႈတၵ်ႉလၢတ်ႈမႂ်းလႄႈမွၵ်ႇလၢတ်ႈပၼ်သတၢင်းသိူဝ်းပျေႃႇၼႆႉယဝ်ႉ။-

20တူၺ်းလူး၊ ၵွပ်ႈပိူဝ်ႈဢၼ်မႂ်းဢမ်ႇယုမ်ႇၵႂၢမ်းၵဝ် ဢၼ်တၵ်းပျေႉၸုမ်ႇမိူဝ်ႈဢၼ်ၶိင်ႇမၼ်းႁွတ်ႈထိုင်ၼၼ်ႉလႄႈ ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇထိုင်ႁွတ်ႈဝၼ်းဢၼ်တၵ်းပဵၼ်ၼၼ်ႉ မႂ်းယင်းဢမ်ႇလၢတ်ႈၵႂၢမ်းလႆႈလႄႈ တၵ်းဢႃႉလႄႈယူႇဢေႃႈ၊ ဝႃႈၼင်ႇၼႆဢေႃႈ။

21ၵူၼ်းတင်းလၢႆၼၼ်ႉ ပႂ်ႉထႃႈ ၸႃႇၶရီႉ ယူႇလႄႈဢၢမ်းလွင်ႈဢၼ်မၼ်းယူႇႁိုင်ၼႃႇၵႃႈၼႂ်းႁိူၼ်းပိၵ်ႈမၢၼ်ႇၸဝ်ႈၼၼ်ႉဢေႃႈ။-

22မိူဝ်ႈဢၼ်မၼ်းဢွၵ်ႇမႃးၼၼ်ႉၸိုင်၊ ပိူဝ်ႈဢၼ်မၼ်းဢမ်ႇလၢတ်ႈၵႂၢမ်းလႆႈလႄႈ ၶဝ်ၼၼ်ႉႁူႉလွင်ႈဢၼ်မၼ်းလႆႈႁၼ်ပျႃႇတိၵ်ႈရူႇပႃႇရူင်ႇၼႂ်းႁိူၼ်းပိၵ်ႈမၢၼ်ႇၸဝ်ႈဢေႃႈ။ ၸႃႇၶရီႉ ႁဵတ်းၼႄလၢၵ်ႈၶၼႃႇၵူၺ်းတီႈၶဝ်ၼၼ်ႉလႄႈ ဢႃႉယူႇဢေႃႈ။

23မိူဝ်ႈဢၼ်ၶိင်ႇဢၼ်ႁဵတ်းၵၢၼ်ယိတ်ႈပရေႃးႁဵၵ်ႈၼၼ်ႉသဵင်ႈယဝ်ႉၸိုင်၊ ၸႃႇၶရီႉ ၵႂႃႇၵႃႈတီႈႁိူၼ်းတူဝ်ၸဝ်ႈၵဝ်ႇသေဢေႃႈ။-

24လိုၼ်းၼၼ်ႉ မေးမၼ်း ဢေးလီႉသၽႅတ်ႈ ၼၼ်ႉ ပႃးပတိၵ်ႉသၼ်ႇထေႇလႄႈ၊ ႁႃႈလိူၼ်တဵမ်တဵမ်ထင်ယူႇၵႃႈၼႂ်းႁိူၼ်းသေလႄႈဝႃႈ၊-

25ၼႂ်းမိူဝ်ႈဢၼ်ထႃႇဝရႃႉၽြႃးလူတူၺ်းၵဝ်ႁႂ်ႈလႆႈပႄႇပႅတ်ႈလွင်ႈတၢင်းဢၼ်ၵဝ်လႆႈၶၢမ်ႇတၢင်းဢၼ်သႄႉဢၼ်သွမ်းၵႃႈၼႂ်းၵူၼ်းတင်းလၢႆၼၼ်ႉ မၼ်းၸဝ်ႈႁဵတ်းၵျေးၸူးၸိူဝ်ႉၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

26မိူဝ်ႈဢၼ်ၶဝ်ႈၼႂ်းႁူၵ်းလိူၼ်ၸိုင်၊ ၽြႃးပဵၼ်ၸဝ်ႈပွႆႇၸႂ်ႉတမၢၼ်ႇၵၢင်ႁၢဝ် ၵေႇပျေႇလႃႉ မႃးၵႃႈတီႈဝဵင်းဢၼ်လႆႈၸိုဝ်ႈ ၼႃႇၸရႅတ်ႈ ၼႂ်းမိူင်း ၵႃႇလီႉလႄး ။-

27ၸူးၵႃႈတီႈၵၼ်ႇၺႃႇလုၵ်ႈယိင်းသၢဝ် ဢၼ်မၢႆၵၼ်ဝႆႉတင်းၵေႃႉဢၼ်လႆႈၸိုဝ်ႈ ယူဝ်းသႅပ်ႈ ဢၼ်ပဵၼ်ၸိူဝ်ႉၶိူဝ်း တႃႇဝိတ်ႈ ဢေႃႈ။ ၵၼ်ႇၺႃႇလုၵ်ႈယိင်းသၢဝ်ၼၼ်ႉၸမ်ႉ၊ လႆႈၸိုဝ်ႈ မႃႇရီႉ ဢေႃႈ။-

28တမၢၼ်ႇၵၢင်ႁၢဝ်ၼၼ်ႉႁွတ်ႈမႃးၵႃႈတီႈမၼ်းသေယဝ်ႉ၊ လၢတ်ႈလႄႈဝႃႈ၊ မႄႈယိင်းဢၼ်လႆႈၶၢမ်ႇၵျေးၸူးၸဝ်ႈၼႆႉဢိူၺ်း၊ ႁႂ်ႈမင်ႇၵလႃႇမီးတီႈမႂ်းသေၵမ်းလူၺ်ႈ။ ထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းဢေႃႈ။ ၼႂ်းမႄႈယိင်းတင်းလၢႆ မႂ်းၼႆႉမီးမင်ႇၵလႃႇဢၼ်မျၢတ်ႈၼႃႇဢေႃႈ၊ ဝႃႈၼင်ႇၼႆဢေႃႈ။-

29မႃႇရီႉ မီးၸႂ်ဢၼ်ဢမ်ႇတႄႇဢမ်ႇၼိမ်လႄႈ တၢင်းဢၼ်တၵ်ႉဢၼ်လၢတ်ႈၼႆႉၸမ်ႉ၊ ပဵၼ်တၢင်းဢၼ်တၵ်ႉဢၼ်လၢတ်ႈၸိူဝ်ႉၼင်ႇႁိုဝ်၊ ဝႃႈၼႆ၊ ၶႆႈၸႂ်ဝူၼ်ႉၸႂ်ယူႇဢေႃႈ။-

30တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈလႄႈဝႃႈ၊ မႃႇရီႉ ဢိူၺ်း၊ ယႃႇပေၵူဝ်ပေႁႄ၊ မႂ်းလႆႈၼႃႈလႆႈတႃၵႃႈတီႈၽၢႆႇၼႃႈၽြႃးပဵၼ်ၸဝ်ႈယဝ်ႉ။-

31မႂ်းတၵ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ တၵ်းလႆႈႁွင်ႉႁဵၵ်ႈၸိုဝ်ႈမၼ်း ယေႇသူႉ ဢေႃႈ။-

32မၼ်းၸမ်ႉ၊ တၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇဢေႃႈ။ မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလုၵ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈဢေႃႈ။ ၽြႃးပဵၼ်ၸဝ်ႈထႃႇဝရႃႉၽြႃးတၵ်းပၼ်ရႃႇၸႃႉပလၢင်ႇပေႃႈမၼ်း တႃႇဝိတ်ႈ ၼၼ်ႉတီႈမၼ်းဢေႃႈ။-

33မၼ်းတၵ်းဢုပ်ႉပိူင်ႇၸိူဝ်ႉၶိူဝ်း ယႃႇၵုပ်ႈ ယူႇတႃႇသေႇဢမ်ႇထၢတ်ႇဢေႃႈ။ မိူင်းမၼ်းၵေႃႈ တၵ်းဢမ်ႇမီးတီႈသုတ်းတီႈသဵင်ႈ၊ ဝႃႈၼင်ႇၼႆဢေႃႈ။-

34မႃႇရီႉ ၵေႃႈ ထၢမ်တီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊ ပိူဝ်ႈဢၼ်ၵဝ်ၶႃႈဢမ်ႇလႆႈတိူဝ်ႉလႆႈထုၵ်ႇၵၼ်တင်းၵူၼ်းၸၢႆးလႄႈ လွင်ႈတီႈႁဵင်းၼႆႉ တၵ်းပဵၼ်ၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

35တမၢၼ်ႇၵၢင်ႁၢဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ဝီႉၺိၺ်ႇဢၼ်မူတ်းၸၢင်ႇၸဝ်ႈတၵ်းလူင်းမႃးၵႃႈၼိူဝ်မႂ်းလႄႈ မုၼ်တၼ်းၶူဝ်းၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉ တၵ်းႁူမ်ႇလူမ်ႈမႂ်းဢေႃႈ။ ၵွပ်ႈပိူဝ်ႈလွင်ႈတီႈႁဵင်းၼႆႉလႄႈ လုၵ်ႈဢၼ်မူတ်းၸၢင်ႇၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလုၵ်ႈၽြႃးပဵၼ်ၸဝ်ႈဢေႃႈ။-

36တူၺ်းလူး၊ ဢေးလီႉသၽႅတ်ႈ ပီႈၼွင်ႉမႂ်းၼၼ်ႉပႃးပတိၵ်ႉသၼ်ႇထေႇယူႇ ၼႂ်းမိူဝ်ႈဢၼ်မၼ်းထဝ်ႈလႄႈ တေႃႈလဵဝ်ၼႆႉ ၵေႃႉဢၼ်လႆႈႁွင်ႉႁဵၵ်ႈမႄႈယိင်းဢၼ်မၼ်ၼၼ်ႉ ၶဝ်ႈၼႂ်းႁူၵ်းလိူၼ်ယဝ်ႉ။-

37ၵႂၢမ်းၽြႃးပဵၼ်ၸဝ်ႈဢၼ်ဢမ်ႇပႃးတၼ်းၶူဝ်းဢမ်ႇမီးသေၶေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

38မႃႇရီႉ ၵေႃႈလၢတ်ႈလႄႈဝႃႈ၊ ၵဝ်ၶႃႈၼႆႉပဵၼ်ၶႃႈၸဝ်ႈၽြႃးၶႃႈဢေႃႈ။ ၵႃႈၼင်ႇဢၼ်ၵႂၢမ်းၸဝ်ႈႁဝ်းမီးၼႆႉၼၼ်ႉ ႁႂ်ႈပဵၼ်တီႈၵဝ်ၶႃႈသေၵမ်းလူၺ်ႈ၊ ဝႃႈၼင်ႇၼႆယဝ်ႉၸင်ႇ၊ တမၢၼ်ႇၵၢင်ႁၢဝ်ဢွၵ်ႇၵႂႃႇသေၵႃႈတီႈဢၼ် မႃႇရီႉ မီးၼၼ်ႉဢေႃႈ။

39မိူဝ်ႈၼၼ်ႉ မႃႇရီႉ လုၵ်ႉလႄႈၵႂႃႇၵႃႈတီႈဢၼ်ပဵၼ်ႁူၺ်ႈပဵၼ်လွႆ ၸူးၵႃႈတီႈဝဵင်း ယူႉတႃႉ ဝဵင်းၼိုင်ႈၶၼ်ၶၼ်ၽႂ်းၽႂ်းယဝ်ႉၸင်ႇ၊-

40ၶဝ်ႈၵႃႈၼႂ်းႁိူၼ်း ၸႃႇၶရီႉ လႄႈ တၵ်ႉလၢတ်ႈ ဢေးလီႉသၽႅတ်ႈ ဢေႃႈ။-

41ၼႂ်းမိူဝ်ႈဢၼ် ဢေးလီႉသၽႅတ်ႈ ငိၼ်းၵႂၢမ်းဢၼ်တၵ်ႉလၢတ်ႈယူႇၼၼ်ႉၸိုင်၊ လုၵ်ႈဢွၼ်ႇဢၼ်မီးၼႂ်းတွင်ႉမၼ်းၼၼ်ႉၵျွၵ်းဝႅၼ်ဢေႃႈ။ ဢေးလီႉသၽႅတ်ႈ ၼၼ်ႉ ပျေႉၸုမ်ႇတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ၊-

42ႁဵတ်းတင်းသဵင်ဢၼ်ယႂ်ႇၼႃႇမွၵ်ႇလၢတ်ႈလႄႈဝႃႈ၊ ၼႂ်းမႄႈယိင်းတင်းလၢႆ၊ မႂ်းၼၢင်းၼႆႉ မီးမင်ႇၵလႃႇဢၼ်မျၢတ်ႈၼႃႇဢေႃႈ။ မၢၵ်ႇတွင်ႉမႂ်းၼၢင်းၵေႃႈ မီးမင်ႇၵလႃႇဢၼ်မျၢတ်ႈၼႃႇဢေႃႈ။-

43တၢင်းဢၼ်မႄႈၸဝ်ႈၵဝ်ၶႃႈမႃးတီႈၵဝ်ၶႃႈၼႆႉၸိုင် ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ ၵဝ်ၶႃႈလႆႈၶၢမ်ႇ။-

44တူၺ်းလူး၊ ၼႂ်းမိူဝ်ႈဢၼ်ၵဝ်ၶႃႈငိၼ်းၵႂၢမ်းဢၼ်မႂ်းၼၢင်းတၵ်ႉလၢတ်ႈယူႇၼၼ်ႉၸိုင်၊ လုၵ်ႈဢွၼ်ႇဢၼ်မီးၼႂ်းတွင်ႉၵဝ်ၶႃႈၼႆႉ မီးၸႂ်ဢၼ်သိူဝ်းၸူမ်းလႄႈၵျွၵ်းဝႅၼ်ဢေႃႈ။-

45မႄႈယိင်းဢၼ်လႆႈယုမ်ႇမၢတ်ႈလွင်ႈဢၼ်ၵႂၢမ်းဢၼ်ၸဝ်ႈၽြႃးမီးဢမိင်ႉၵႃႈတီႈမၼ်း တၵ်းပျေႉၸုမ်ႇၼၼ်ႉၼႆႉ မီးမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။

46မႃႇရီႉၵေႃႈလၢတ်ႈလႄႈဝႃႈ၊ ႁူဝ်ၸႂ်ၵဝ်ၼႆႉယွင်ႈယေႃးၸဝ်ႈၽြႃးဢေႃႈ။

47ဝီႉၺိၺ်ႇၵဝ်ၼႆႉ မီးတၢင်းဢၼ်သိူဝ်းၸူမ်းၼႂ်းၽြႃးပဵၼ်ၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ၵဝ်ၼၼ်ႉဢေႃႈ။

48လွင်ႈမၼ်းၸမ်ႉ မၼ်းၸဝ်ႈလူတူၺ်းတၢင်းဢၼ်ၶႃႈမၼ်းၸဝ်ႈပဵၼ်ဢၼ်ၶျႃးတႅမ်ႇယူႇၼႆႉယဝ်ႉ။ တူၺ်းလူး၊ ၸႃႉၸဵမ်မိူဝ်ႈလဵဝ်ၼႆႉလႄႈ ၵူၼ်းသိုပ်ႇသိုပ်ႇတၢမ်းတၢမ်းတင်းသဵင်ႈတင်းလူင် တၵ်းႁွင်ႉႁဵၵ်ႈၵဝ်ၵေႃႉဢၼ်မီးမင်ႇၵလႃႇဢေႃႈ။

49မၼ်းၸဝ်ႈဢၼ်ပျေႉၸုမ်ႇတင်းတၼ်းၶူဝ်းၼၼ်ႉ ႁဵတ်းပၼ်လွင်ႈတၢင်းဢၼ်ယႂ်ႇမျၢတ်ႈၼႃႇတီႈၵဝ်ယဝ်ႉ။ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉ ပဵၼ်ဢၼ်ထုၵ်ႇလီရူဝ်ႇသေႇၵူဝ်ယမ်ဢေႃႈ။

50ၵျေးၸူးတၢင်းဢၼ်မၼ်းၸဝ်ႈဢဵတ်းလူၼၼ်ႉ မီးယူႇတႃႇသေႇဢမ်ႇထၢတ်ႇ တီႈၶဝ်ၸိူဝ်းဢၼ်ၵူဝ်ႁႄမၼ်းၸဝ်ႈၼၼ်ႉဢေႃႈ။

51မၼ်းၸဝ်ႈဢဝ်တင်းၶႅၼ်မၼ်းၸဝ်ႈၼႄပျႃးတၼ်းၶူဝ်းဢေႃႈ။ မၼ်းၸဝ်ႈဢဝ်ၶဝ်ၸိူဝ်းဢၼ် မႃႇၼႃႉၸႂ်သုင်ၼၼ်ႉၸၢတ်ႇပိုၼ်ပႅတ်ႈဢေႃႈ။

52မၼ်းၸဝ်ႈဢဝ်ၶုၼ်တင်းလၢႆၶျႃးတူၵ်းၵႃႈၼိူဝ်ရႃႇၸႃႉပလၢင်ႇလႄႈ ယုၵ်ႉယွင်ႈၶဝ်ၸိူဝ်းဢၼ်ၶျႃးတႅမ်ႇၼၼ်ႉယဝ်ႉ။

53မၼ်းၸဝ်ႈလဵင်ႉလူ ၶဝ်ၸိူဝ်းဢၼ်ဢိုပ်းယၢၵ်ႈၼၼ်ႉလီလီငၢမ်းငၢမ်းလႄႈ ပွႆႇပႅတ်ႈၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီးၼၼ်ႉၵႂႃႇတိၼ်လၢႆမိုဝ်းပဝ်ႇယဝ်ႉ။

54ၵႃႈၼင်ႇဢၼ်ဝႆႉပျႃႇတိၵ်ႈၸဝ်ႈၵႃႈတီႈပူႇပေႃႈႁဝ်းၼၼ်ႉ၊

55ၼင်ႇႁိုဝ်တၵ်းလႆႈၶုၵ်းၸႂ်လႆႈၶႆႈၸႂ်ထူပ်း ႁႂ်ႈလႆႈႁဵတ်းၵျေးၸူး တၢင်းဢၼ်ဢဵတ်းလူ တီႈ ဢႃႇပြႃႇႁၢမ်ႇ တင်းၸိူဝ်ႉၶိူဝ်းမၼ်းတႃႇသေႇဢမ်ႇထၢတ်ႇၸိုင်၊ မၼ်းၸဝ်ႈၸွႆႈထႅမ်မႃႉၸႃႉၶႃႈမၼ်းၸဝ်ႈ ဢီႉသရေႇလႃႉ ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

56မႃႇရီႉ ၵေႃႈ ယူႇၵႃႈတီႈ ဢေးလီႉသၽႅတ်ႈ ၼၼ်ႉသၢမ်လိူၼ်ၸမ်ၸမ်ယဝ်ႉၸင်ႇ၊ ၶိုၼ်းမိူဝ်းၵႃႈတီႈႁိူၼ်းတူဝ်ၸဝ်ႈၵဝ်ႇဢေႃႈ။

57ဢေးလီႉသၽႅတ်ႈ ၼၼ်ႉ မိူဝ်ႈဢၼ်ထိုင်ၶိင်ႇဢၼ်မၼ်းတၵ်းလႆႈၵိူတ်ႇလဵင်ႉၸိုင်၊ ၵိူတ်ႇလဵင်ႉလုၵ်ႈၸၢႆးမႃးဢေႃႈ။-

58လွင်ႈဢၼ်ၸဝ်ႈၽြႃးႁဵတ်းတၢင်းဢၼ်ဢဵတ်းလူ ဢၼ်ယႂ်ႇၼႃႇတီႈ ဢေးလီႉသၽႅတ်ႈ ၼၼ်ႉၸိုင်၊ မိူဝ်ႈဢၼ်ၵူၼ်းႁိူၼ်းၸမ်ၵၼ်ဢိၵ်ႇတင်းၸိူဝ်ႉၶိူဝ်းမၼ်းတင်းလၢႆ လႆႈႁူႉလႆႈငိၼ်းၼၼ်ႉ၊ ၶဝ်မီးၸႂ်ဢၼ်သိူဝ်းၸူမ်းလူၺ်ႈၵၼ်တင်းမၼ်းဢေႃႈ။-

59ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ ၶဝ်ၼၼ်ႉမႃးႁႂ်ႈလႆႈပၼ်တၢင်းဢၼ်ထိူဝ်ႁိမ်း တီႈလုၵ်ႈဢွၼ်ႇၼၼ်ႉလႄႈ မိူဝ်ႈဢၼ်ဢၢင်ႈတၵ်းပၼ်ၸိုဝ်ႈ ၸႃႇၶရီႉ ဢၼ်ပဵၼ်ၸိုဝ်ႈသဵင်ပေႃႈမၼ်းၼၼ်ႉတီႈမၼ်းၸိုင်၊-

60မႄႈမၼ်းၵေႃႈၶိုၼ်းလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ၊ တၵ်းလႆႈႁွင်ႉႁဵၵ်ႈၸိုဝ်ႈမၼ်း ယူဝ်းႁၢၼ်ႇ ဢေႃႈ၊ ဝႃႈၼင်ႇၼႆသေယဝ်ႉ၊-

61ၶဝ်ၼၼ်ႉၵေႃႈလၢတ်ႈလႄႈဝႃႈ၊ ၵႃႈၼႂ်းၸိူဝ်ႉၶိူဝ်းမၼ်း ဢၼ်လႆႈႁွင်ႉႁဵၵ်ႈၸိုဝ်ႈသဵင်ၸိူဝ်ႉၼင်ႇၼႆၼၼ်ႉ၊ ဢမ်ႇမီးသေၵေႃႉသေၵူၼ်း၊ ဝႃႈၼင်ႇၼႆလႄႈ၊-

62လွင်ႈဢၼ်ပေႃႈမၼ်းတၵ်းၶႂ်ႈႁႂ်ႈႁွင်ႉႁဵၵ်ႈၸိုဝ်ႈသဵင်ၸိူဝ်ႉၼင်ႇႁိုဝ်ၸိုင်၊ ႁဵတ်းလၢၵ်ႈၶၼႃႇသေလႄႈထၢမ်ဢေႃႈ။-

63ပေႃႈမၼ်းၼၼ်ႉၵေႃႈယွၼ်းဢဝ်ပပ်ႉလႄႈ မိူဝ်ႈဢၼ်တႅမ်ႈလႄႈဝႃႈ၊ ၸိုဝ်ႈသဵင်မၼ်းၸမ်ႉ၊ ပဵၼ် ယူဝ်းႁၢၼ်ႇ ဢေႃႈ၊ ဝႃႈၼင်ႇၼႆၼၼ်ႉၸိုင်၊ ၶဝ်တင်းသဵင်ႈတင်းလူင်ဢၢမ်းၼႃႇဢေႃႈ။-

64မိူဝ်ႈၼၼ်ႉၵမ်းလဵဝ် ၸႃႇၶရီႉ မီးတၢင်းဢၼ်ၽုၺ်ႇသူပ်းမၼ်း၊ တၢင်းဢၼ်ဢဵၼ်လိၼ်ႉမၼ်းလိတ်ႈမႃးလႄႈ လၢတ်ႈၵႂၢမ်းယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။-

65ၵူၼ်းႁိူၼ်းၸမ်ၵၼ်ၵႃႈမီးတင်းသဵင်ႈတင်းလူင် မီးတၢင်းဢၼ်ၵူဝ်ဢၼ်ႁႄဢေႃႈ။ လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉ ၸွတ်ႇသႃႈႁူင်ႁၢင်းတီႈဢၼ်ပဵၼ်ႁူၺ်ႈပဵၼ်လွႆမိူင်း ယူႉတႃႉ ၼၼ်ႉဢေႃႈ။-

66ၶဝ်ၸိူဝ်းဢၼ်ငိၼ်းတင်းသဵင်ႈတင်းလူင်ၼၼ်ႉ မၢတ်ႈတွင်းဝႆႉၼႂ်းႁူဝ်ၸႂ်လႄႈဝႃႈ၊ လုၵ်ႈဢွၼ်ႇၵေႃႉၼႆႉ တၵ်းပဵၼ်ၵေႃႉၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။ မိုဝ်းထႃႇဝရႃႉၽြႃးၵေႃႈ မီးယူႇလူၺ်ႈၵၼ်တင်းမၼ်းဢေႃႈ။

67ပေႃႈမၼ်း ၸႃႇၶရီႉ ၼၼ်ႉ ပျေႉၸုမ်ႇတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ ႁဵတ်းပရေႃးၽႅတ်ႈလႄႈဝႃႈ၊-

68ႁႂ်ႈၽြႃးပဵၼ်ၸဝ်ႈၸိူဝ်ႉၶိူဝ်း ဢီႉသရေႇလႃႉ ထႃႇဝရႃႉၽြႃးမီးမင်ႇၵလႃႇသေၵမ်းလူၺ်ႈ။-

69လွင်ႈမၼ်းၸမ်ႉ မၼ်းၸဝ်ႈၼၼ်ႉ၊-

70ၵႃႈၼင်ႇဢၼ်ဢဝ်သူပ်းပရေႃးၽႅတ်ႈမၼ်းၸဝ်ႈဢၼ်မူတ်းၸၢင်ႇ ဢၼ်ပေႃႇမႃး

71ၸႃႉၸဵမ်မိူဝ်ႈၵွၼ်ႇဢွၼ်ၼႆႉတင်းလၢႆၼၼ်ႉလႄႈ ဝႆႉပျႃႇတိၵ်ႈၸဝ်ႈၼၼ်ႉ၊-

72ၼင်ႇႁိုဝ်တၵ်းလႆႈႁဵတ်းၵျေးၸူးတၢင်းဢၼ်ဢဵတ်းလူ

73တီႈပူႇပေႃႈႁဝ်းလႄႈသင်ႇ၊-

74ၼင်ႇႁိုဝ်တၵ်းလႆႈ ၶုၵ်းၸႂ်လႆႈၶႆႈၸႂ်ထူပ်း ပတီႉၺိၺ်ႇတြႃးဢၼ်မူတ်းၸၢင်ႇဢၼ်ဝႃႈ ၵတီႉၸဝ်ႈဢၼ်မၼ်းၸဝ်ႈတိူင်ႇဝႃႈ တီႈပေႃႈႁဝ်း ဢႃႇပြႃႇႁၢမ်ႇ လႄႈဝႃႈ၊-

75တၵ်းပၼ်ဢၶႂၢင်ႉဢၼ်ႁဝ်းလႆႈၵၢင်းလွတ်ႈ ၵႃႈၼႂ်းမိုဝ်းရၢၼ်ႇသူႇႁဝ်းတင်းလၢႆလႄႈ ၸူဝ်ႈဢသၢၵ်ႈမီးတင်းပႃႇရမီႇတၢင်းဢၼ်သိုဝ်ႈတေႃႇ လႆႈႁဵတ်းဝၢတ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈႁတ်းႁတ်းႁၢၼ်ႁၢၼ်၊ ဝႃႈၼင်ႇၼႆၼၼ်ႉလႄႈသင်၊ မႃးလူမႃးတူၺ်းမဵဝ်းၵူၼ်းမၼ်းၸဝ်ႈသေယဝ်ႉ၊ ႁဵတ်းၵျေးၸူးတၢင်းဢၼ်ထုတ်ႇဢဝ်ၶဝ်ၼၼ်ႉလႄႈ ႁႂ်ႈၶဝ်လႅမ်တၢင်းဢၼ်ၵႄႇၶျွတ်ႈဢဝ်ဢၼ်ဝႃႈ တၢင်းဢၼ်ၵႄႇၶျွတ်ႈဢဝ်ႁဝ်းၵႃႈၼႂ်းမိုဝ်းရၢၼ်ႇသူႇႁဝ်းတင်းလၢႆ တင်းၶဝ်ၸိူဝ်းဢၼ်ၸင်းႁဝ်းၵႃႈမီးတင်းသဵင်ႈတင်းလူင်ၼၼ်ႉ ပေႃႇမႃးပုၼ်ႈႁဝ်း ၵႃႈၼႂ်းၸိူဝ်ႉၶိူဝ်း တႃႇဝိတ်ႈ ၶႃႈမၼ်းၸဝ်ႈဢေႃႈ။-

76လွင်ႈမၼ်းၸမ်ႉ၊ မႂ်းၼႆႉတၵ်းလႆႈၵႂႃႇၵႃႈတီႈၽၢႆႇၼႃႈထႃႇဝရႃႉၽြႃး ႁႂ်ႈလႆႈမႄးသဵၼ်ႈတၢင်းမၼ်းၸဝ်ႈဝႆႉ၊-

77လွင်ႈၼင်ႇႁိုဝ်တၵ်းလႆႈႁႂ်ႈမဵဝ်းၵူၼ်းမၼ်းၸဝ်ႈႁူႉၸႅင်ႈလွင်ႈတၢင်းဢၼ်လွတ်ႈဢပႅတ်ႈလႄႈ ႁွတ်ႈထိုင်တၢင်းဢၼ်ၵႄႇၶျွတ်ႈဢဝ် ၵွပ်ႈပိူဝ်ႈၵျေးၸူးတၢင်းဢၼ်ဢဵတ်းလူၽြႃးပဵၼ်ၸဝ်ႈႁဝ်းၼၼ်ႉဢေႃႈ။-

78ၵွပ်ႈပိူဝ်ႈၵျေးၸူးတၢင်းဢၼ်ဢဵတ်းလူၽြႃးပဵၼ်ၸဝ်ႈႁဝ်းၼၼ်ႉလႄႈ ဢႃႇရူင်ႇသၢႆဢရွင်ႇၵၢင်ဝၼ်း လုၵ်ႉသေၵႃႈတီႈၵၢင်ႁၢဝ် ၶိုၼ်းမႃးၵႃႈၼိူဝ်ႁဝ်း၊-

79ႁႂ်ႈလႆႈပၼ်ဢၼ်လႅင်းတီႈၶဝ်ၸိူဝ်းဢၼ်ယူႇၼႂ်းလပ်းသိင်ႇတီႈႁူမ်ႈတၢင်းတၢႆတင်းလၢႆၼၼ်ႉလႄႈ ၼႄပျႃးသဵၼ်ႈတၢင်းဢၼ်ၼိမ်သိမ်ႇတီႈႁဝ်းယဝ်ႉ၊ ဝႃႈၼင်ႇၼႆဢေႃႈ။

80လုၵ်ႈဢွၼ်ႇၼၼ်ႉၸမ်ႉ၊ ယႂ်ႇမႃးလႄႈ တၢင်းႁူႉတၢင်းႁၼ်ၽႄႈၵႂၢင်ႈၼမ်မႃးယူႇဢေႃႈ။ ၸူဝ်ႈဢၼ်ဢမ်ႇပႆႇထိုင်ၶိင်ႇဢၼ်ၸိုဝ်ႈဢွၵ်ႇသဵင်ဢွၵ်ႇ ၵႃႈၼႂ်းၵူၼ်း ဢီႉသရေႇလႃႉ တင်းလၢႆၼၼ်ႉၸိုင်၊ ယူႇၵႃႈတီႈၼႂ်းထိူၼ်ႇယူႇဢေႃႈ။