Luke 5

Shan

← Chapter 4 Jump to: Chapter 6 →

1ၼႂ်းမိူဝ်ႈဢၼ်မၼ်းၸဝ်ႈၸုၵ်းယူႇၵႃႈတီႈႁိမ်းၼွင် ၵိၼ်ႇၼီႇသရႅတ်ႉ လႄႈ ၵူၼ်းဢၼ်ၸူႉဢၼ်တုမ်တင်းလၢႆၽိုတ်ႉဢီးၸူးမၼ်းၸဝ်ႈ ႁႂ်ႈလႆႈထွမ်ႇလႆႈငိၼ်းၼုၵ်ႈၵပၢတ်ႈတြႃးၽြႃးပဵၼ်ၸဝ်ႈယူႇၼၼ်ႉၸိုင်၊-

2မၼ်းၸဝ်ႈႁၼ်ႁိူဝ်းဢၼ်သိူၵ်ႈဝႆႉၵႃႈတီႈၽင်ႇၼမ်ႉၼၼ်ႉသွင်လမ်းဢေႃႈ။ တမ်ႇငႃႈတင်းလၢႆ ဢွၵ်ႇသေၵႃႈၼႂ်းႁိူဝ်းၼၼ်ႉယဝ်ႉလႄႈသုၵ်ႈလွႆးၶႄၶဝ်ယူႇဢေႃႈ။-

3ၼႂ်းႁိူဝ်းၸိူဝ်းၼၼ်ႉ၊မၼ်းၸဝ်ႈၶဝ်ႈၵႃႈၼႂ်းႁိူဝ်း သီႉမုၼ်ႇ ယဝ်ႉၸင်ႇ၊ ယွၼ်းဢၶႂၢင်ႉတီႈ သီႉမုၼ်ႇ ႁႂ်ႈဢဝ်ႁိူဝ်းၽၢတ်ႇယၢၼ်ဢွၵ်ႇသေၵႃႈတီႈၽင်ႇၼမ်ႉဢိတ်းၼိုင်ႈဢေႃႈ။ မၼ်းၸဝ်ႈၼင်ႈယူႇၵႃႈၼိူဝ်ႁိူဝ်းၼၼ်ႉလႄႈ သင်ႇသွၼ်သုင်းမႃႉပၼ်တီႈၵူၼ်းဢၼ်ၸူႉဢၼ်တုမ်တင်းလၢႆၸိူဝ်းၼၼ်ႉဢေႃႈ။

4မိူဝ်ႈဢၼ်ၵႂၢမ်းမၼ်းၸဝ်ႈထၢတ်ႇၸိုင် မၼ်းၸဝ်ႈလၢတ်ႈတီႈ သီႉမုၼ်ႇ လႄႈဝႃႈ၊ ၶၢႆႉၵႂႃႇၵႃႈတီႈဢၼ်ၼမ်ႉလိုၵ်ႉပုၼ်ႉလူးၵွၼ်ႇတႃႉ။ ဝၢၼ်ႇၶႄသူတူၵ်းႁႂ်ႈလႆႈပႃတႃႉ၊ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်၊-

5သီႉမုၼ်ႇ ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပိၵ်ႉသမ်ႉႁဝ်းၶႃႈလႆႈၵျူဝ်းၸႃးယဝ်ႉတင်းၶိုၼ်းသေၵေႃႈ ဢမ်ႇလႆႈသေတူဝ်ၶႃႈ။ ၼႂ်းဝႃႈၼၼ်သေၵေႃႈ၊ပေႃးၸဝ်ႈႁဝ်းမီးဢမိင်ႉၸိုင် တၵ်းဝၢၼ်ႇၶႄတူၵ်းၶႃႈဢေႃႈ၊ ဝႃႈၼင်ႇၼႆဢေႃႈ။-

6ၶဝ်ၼၼ်ႉဝၢၼ်ႇတူၵ်းၸိူဝ်ႉၼင်ႇၼၼ်သေယဝ်ႉ၊ ႁူမ်ႇမႅၼ်ႈပႃၼမ်ၼႃႇလႄႈ၊ ၶႄၶဝ်ၸႃႉသိၵ်ႇၸႃႉလူႉမႃးဢေႃႈ။-

7ၶဝ်ႁဵတ်းလၢၵ်ႈၶၼႃႇၼႄတီႈၵေႃႉသေႈဢၼ်မီးၼႂ်းႁိူဝ်းတၢင်ႇလမ်းၸိူဝ်းၼၼ်ႉ ႁႂ်ႈမႃးၸွႆႈၵမ်ႉၸွႆႈထႅမ်လႄႈ၊ ၶဝ်ၸိူဝ်းၼၼ်ႉၵေႃႈမႃးလႄႈ ႁႂ်ႈႁိူဝ်းတင်းသွင်လမ်းတဵမ်ဝႆႉတင်းပႃထၼ်ႈပေႃးၸမ်တၵ်းၸူမ်ဢေႃႈ။-

8သီႉမုၼ်ႇပေႇတရူႉ ႁၼ်ၸိူဝ်ႉၼင်ႇၼၼ်သေယဝ်ႉ၊ ၶုပ်ႉမူပ်ႇၵႃႈတီႈႁူဝ်ၶဝ်ႇ ယေႇသူႉ သေလႄႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပိူဝ်ႈဢၼ်ၵဝ်ၶႃႈပဵၼ်ၵေႃႉဢၼ်ဢပႅတ်ႈၼမ်ၼႃႇလႄႈ ၸဝ်ႈႁဝ်းဢွၵ်ႇၵႂႃႇသေၵႃႈတီႈၵဝ်ၶႃႈၼႆႉသေၵမ်းၶႃႈ၊ ဝႃႈၼင်ႇၼႆဢေႃႈ။-

9ႁဵတ်းႁိုဝ်လႄႈလဝ်ႊလၢတ်ႈၸိူဝ်ႉၼင်ႇၼႆၸမ်ႉ၊ ပိူဝ်ႈဢၼ်ၶႆႈၸႂ်လွင်ႈဢၼ်ႁူမ်ႇမႅၼ်ႈပႃၼၼ်ႉလႄႈ သီႉမုၼ်ႇ တင်းၵႃႈဢၼ်ပႃးလူၺ်ႈၵၼ်တင်းမၼ်းတင်းသဵင်ႈတင်းလူင်၊-

10ဢိၵ်ႇတင်း ယႃႇၵုပ်ႈ တင်း ယူဝ်းႁၢၼ်ႇ လုၵ်ႈၸၢႆး ၸေႇပေႇတႄး ဢၼ်ၽေႃႇၽၢၵ်ႈႁူမ်ႈၵၼ်တင်း သီႉမုၼ်ႇ ၸိူဝ်းၼၼ်ႉ မီးတၢင်းဢၼ်ၵႂင်ၸႂ်ယုင်ႈၸႂ်ယူႇဢေႃႈ။ ယေႇသူႉ ၵေႃႈလၢတ်ႈတီႈ သီႉမုၼ်ႇ လႄႈဝႃႈ၊ ယႃႇပေၵူဝ်ပေႁႄ။ မႂ်းၼႆႉ ၸႃႉၸဵမ်တေႃႈလဵဝ်ၼႆႉလႄႈ တၵ်းပဵၼ်ၵေႃႉဢၼ်တီႉဢဝ်ၵူၼ်းဢေႃႈ၊ ဝႃႈၼင်ႇၼႆဢေႃႈ။-

11မိူဝ်ႈဢၼ်သိူၵ်ႈႁိူဝ်းၵႃႈတီႈၽင်ႇၼမ်ႉၼၼ်ႉယဝ်ႉၸိုင်၊ ၶဝ်ၼၼ်ႉၸုၼ်ႉပႅတ်ႈသေၵႃႈဢၼ်မီးတင်းသဵင်ႈတင်းလူင်ၼၼ်ႉလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။

12ၼႂ်းမိူဝ်ႈဢၼ်မၼ်းၸဝ်ႈမီးယူႇၵႃႈၼႂ်းဝဵင်းဝဵင်းၼိုင်ႈၼၼ်ႉၸိုင်၊ ၵူၼ်းဢၼ်ပဵၼ်တုတ်ႈတင်းတူဝ်တင်းၶိင်းၵေႃႉၼိုင်ႈထူပ်းႁၼ်မၼ်းၸဝ်ႈသေယဝ်ႉ၊ ၶုပ်ႉမူပ်ႇလႄႈတွင်းပၢၼ်ႇလႄႈဝႃႈ၊ ၸဝ်ႈႁဝ်း၊ ပေႃးၸဝ်ႈႁဝ်းမီးဢလူဝ်ႇၸိုင်၊ ႁႂ်ႈၵဝ်ၶႃႈမူတ်းသႂ်လႆႈယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

13မၼ်းၸဝ်ႈၵေႃႈယိုၼ်ႈမိုဝ်းမၼ်းၸဝ်ႈတိူဝ်ႉၵေႃႉၼၼ်ႉသေလႄႈလၢတ်ႈလႄႈဝႃႈ၊ ၵဝ်မီးဢလူဝ်ႇယူႇဢေႃႈ။ ႁႂ်ႈမူတ်းသႂ်တႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ တုတ်ႈမၼ်းၼၼ်ႉႁၢႆၵမ်းလဵဝ်ဢေႃႈ။-

14မၼ်းၸဝ်ႈၵေႃႈလၢတ်ႈလႄႈဝႃႈ၊ လွင်ႈၼႆႉၸိုင် ယႃႇပေလၢတ်ႈတီႈၽူႈလႂ်သေၵေႃႉသေၵူၼ်း။ ၵူၺ်းၵႃႈ ၵႂႃႇၼႄပျႃးတူဝ်ၸဝ်ႈၵဝ်ႇတီႈယိတ်ႈပရေႃးႁဵၵ်ႈပုၼ်ႉတႃႉ။ ၼင်ႇႁိုဝ်တၵ်းပဵၼ်သၢၵ်ႈသေႇတီႈပိူၼ်ႈတၢင်ႇၵေႃႉၸိုင်၊ ၵွပ်ႈပိူဝ်ႈဢၼ်ႁွတ်ႈထိုင်တၢင်းဢၼ်မူတ်းသႂ်လႄႈ သၢၵ်ႈၵၢပ်ႈတၢင်းပုၵ်ႈၸေႃႇဢၼ် မူဝ်းသေႇ ၸီႇယၢင်ႇသင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။

15ၼႂ်းဝႃႈၼၼ်သေၵေႃႈ သတၢင်းသဵင်ၶၢဝ်ႇမၼ်းၸဝ်ႈၼၼ်ႉယဵင်ႈၶႅၼ်းၸွတ်ႇသႃႈႁူင်ႁၢင်းလႄႈ ၵူၼ်းၼမ်ၼႃႇတင်းသဵင်ႈတင်းလူင် ဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈမၼ်းၸဝ်ႈ ႁႂ်ႈလႆႈထွမ်ႇလႆႈငိၼ်းတြႃးဢိၵ်ႇတင်း ႁႂ်ႈလႆႈၶၢမ်ႇတၢင်းဢၼ်ႁႂ်ႈတၢင်းၶႆႈတၢင်းပဵၼ်ႁၢႆဢေႃႈ။-

16မၼ်းၸဝ်ႈယၢမ်ႈၵႂႃႇၵႃႈၼႂ်းထိူၼ်ႇၼႂ်းၶိူဝ်းသေလႄႈ သူးတွင်းဢေႃႈ။

17ဝၼ်းၼိုင်ႈ ၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ်ယူႇၼၼ်ႉၸိုင်၊ ၽႃႇရီႉသႄး တင်းလၢႆ ဢိၵ်ႇတင်းသြႃႇဢၼ်သွၼ်ပၼ်တြႃးၸဝ်ႈတင်းလၢႆ ဢၼ်လုၵ်ႉသေၵႃႈတီႈဝၢၼ်ႈတီႈဝဵင်းဢၼ်မီးၼႂ်းမိူင်း ၵႃႇလီႉလႄး မိူင်း ယူႉတႃႉ တင်းဝဵင်း ယေႇရူႉသလႅမ်ႇ တင်းသဵင်ႈတင်းလူင်မႃးၼၼ်ႉဢွၼ်ၵၼ်ၼင်ႈယူႇၵႃႈတီႈႁိမ်းမၼ်းၸဝ်ႈလႄႈ၊ ပုၼ်ႈဢၼ်တၵ်းႁႂ်ႈတၢင်းၶႆႈတၢင်းပဵၼ်ႁၢႆၸိုင်၊ တၼ်းၶူဝ်းၸဝ်ႈၽြႃးမီးယူႇၵႃႈတီႈမၼ်းၸဝ်ႈဢေႃႈ။-

18မိူဝ်ႈၼၼ်ႉ ၵူၼ်းတင်းလၢႆဢဝ်ၵူၼ်းဢၼ်တိၼ်တၢႆမိုဝ်းတၢႆၵေႃႉၼိုင်ႈပႃးၵႃႈၼိူဝ်တီႈၼွၼ်းမၼ်းမႃးလႄႈ ၵျၢမ်ႇႁႃႁႂ်ႈလႆႈဢဝ်ၶဝ်ႈၸူးလႄႈ သႂ်ႇဝႆႉၵႃႈတီႈၽၢႆႇၼႃႈမၼ်းၸဝ်ႈဢေႃႈ။-

19ၵွပ်ႈပိူဝ်ႈဢၼ် မီးၵူၼ်းဢၼ်ၸူႉဢၼ်တုမ်ၼမ်ၼႃႇလႄႈ ၶဝ်ဢမ်ႇထူပ်းတၢင်းဢၼ်တၵ်းလႆႈၶဝ်ႈၸူးလႄႈ ၶိုၼ်ႈၵႂႃႇၵႃႈၼိူဝ်မုင်းႁိူၼ်းသေလႄႈ ယႃႉဢုတ်ႇဢၼ်မုင်းဝႆႉၼၼ်ႉယဝ်ႉၸင်ႇ၊ ဢဝ်မၼ်းတင်းတီႈၼွၼ်းမၼ်းယွၼ်ႇတူၵ်းၵူပ်ႉၵၼ်ၼႂ်းၵၢင်ၵူၼ်း ၵႃႈတီႈၽၢႆႇၼႃႈ ယေႇသူႉ ဢေႃႈ။-

20မၼ်းၸဝ်ႈႁၼ်တၢင်းဢၼ်ယုမ်ႇမၢတ်ႈၶဝ်ၼၼ်ႉသေယဝ်ႉ၊ လၢတ်ႈတီႈၵေႃႉၼၼ်ႉလႄႈဝႃႈၸမ်ႉ၊ ၵူၼ်းၵေႃႉၼႆႉဢိူၺ်း၊ ဢပႅတ်ႈမႂ်းၸိုင်ပွႆႇလွတ်ႈယဝ်ႉ၊ ဝႃႈၼင်ႇၼႆဢေႃႈ။-

21ၵူၼ်းထုတ်ႇၵျၢမ်းတင်းလၢႆဢိၵ်ႇတင်း ၽႃႇရီႉသႄး တင်းလၢႆထၢင်ႇလႄႈဝႃႈ၊ ၵေႃႉဢၼ်လၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈၼႆႉၸမ်ႉ၊ ပဵၼ်ၽူႈလႂ်။ လိူဝ်သေၽြႃးပဵၼ်ၸဝ်ႈၵူၺ်း ၽူႈလႂ်ၸၢင်ႈပွႆႇလွတ်ႈဢပႅတ်ႈလႆႈ၊ ဝႃႈၼင်ႇၼႆဢေႃႈ။-

22ယေႇသူႉ ႁူႉႁၼ် လွင်ႈဢၼ်ၶဝ်ထၢင်ႇၼႂ်းၸႂ်လႄႈဝႃႈၼၼ်ႉသေယဝ်ႉ၊ လၢတ်ႈတီႈၶဝ်လႄႈဝႃႈ၊ ၼႂ်းၸႂ်သူထၢင်ႇဝႃႈၸိူဝ်ႉၼင်ႇႁိုဝ်။-

23ၵႂၢမ်းဢၼ်လႂ်ယဵင်ႈၶႅၼ်းလၢတ်ႈငၢႆႈ။ ဢပႅတ်ႈမႂ်းၸိုင်ပွႆႇလွတ်ႈယဝ်ႉ၊ ဢၼ်ဝႃႈၼင်ႇၼႆၼၼ်ႉလၢတ်ႈငၢႆႈႁိုဝ်။ မႂ်းလုၵ်ႉလႄႈပႆတၢင်းၵႂႃႇတႃႉ၊ ဢၼ်ဝႃႈၼင်ႇၼႆၼၼ်ႉ လၢတ်ႈငၢႆႈႁိုဝ်။-

24ၼင်ႇႁိုဝ်သူတၵ်းႁူႉလွင်ႈဢၼ်လုၵ်ႈၵူၼ်း ပိူင်ႇပွႆႇလွတ်ႈဢပႅတ်ႈၵႃႈၼိူဝ်လိၼ်မိူင်းၼႆႉဝႃႈၼႆ၊ မၼ်းၸဝ်ႈသမ်ႉလၢတ်ႈတီႈၵေႃႉဢၼ်တိၼ်တၢႆမိုဝ်းတၢႆၼၼ်ႉထႅင်ႈလႄႈဝႃႈ၊ ၵဝ်ဝႃႈတီႈမႂ်း၊ လုၵ်ႉဢဝ်တီႈၼွၼ်းမႂ်းလႄႈ မိူဝ်းၵႂႃႇၵႃႈတီႈႁိူၼ်းမႂ်းပုၼ်ႉတႃႉ၊ ဝႃႈၼင်ႇၼႆဢေႃႈ။-

25ၵေႃႉၼၼ်ႉၵေႃႈလုၵ်ႉၵမ်းလဵဝ်ၵႃႈတီႈၽၢႆႇၼႃႈၶဝ်လႄႈ ဢဝ်တီႈၼွၼ်းမၼ်းယဝ်ႉၸင်ႇ၊ယွင်ႈယေႃးၽြႃးပဵၼ်ၸဝ်ႈယူႇသေလႄႈ မိူဝ်းၵႂႃႇၵႃႈတီႈႁိူၼ်းမၼ်းပုၼ်ႉဢေႃႈ။-

26ၶဝ်တင်းသဵင်ႈတင်းလူင် ၵႂင်ၸႂ်ယုင်ႈၸႂ်လႄႈဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈယူႇသေလႄႈ မီးတၢင်းဢၼ်ၵူဝ်ဢၼ်ႁႄၼမ်ၼႃႇလူင်လၢင်လႄႈလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ႁဝ်းလႆႈႁၼ်လွင်ႈဢၼ်လီဢၢမ်းၼႃႇဢေႃႈ၊ ဝႃႈၼင်ႇၼႆဢေႃႈ။

27လိုၼ်းၼၼ်ႉ မၼ်းၸဝ်ႈဢွၵ်ႇၵႂႃႇလႄႈထူပ်းႁၼ်ၵူၼ်းၵဵပ်းၶွၼ်ႇၵေႃႉၼိုင်ႈ ဢၼ်လႆႈၸိုဝ်ႈ လေႇဝီႉ ၼၼ်ႉ ၼင်ႈယူႇၵႃႈတီႈသုမ်ႉထဵင်ၵဵပ်းၶွၼ်ႇသေယဝ်ႉ၊ လၢတ်ႈတီႈမၼ်းလႄႈဝႃႈ၊ ၸွမ်းပႃႈလင်ၵဝ်တႃႉ၊ ဝႃႈၼင်ႇၼႆသေယဝ်ႉ၊-

28ၵေႃႉၼၼ်ႉၵေႃႈ ၸုၼ်ႉပႅတ်ႈၵႃႈမီးတင်းသဵင်ႈတင်းလူင်သေလႄႈ လုၵ်ႉၸွမ်းပႃႈလင်မၼ်းၸဝ်ႈၵႂႃႇဢေႃႈ။

29လိုၼ်းၼၼ်ႉၸင်ႇ၊ လေႇဝီႉ ၼၼ်ႉ ႁဵတ်းပွႆးဢၼ်ယႂ်ႇၼႃႇၵႃႈၼႂ်းႁိူၼ်းတူဝ်ၸဝ်ႈၵဝ်ႇပုၼ်ႈမၼ်းၸဝ်ႈလႄႈ၊ ၵူၼ်းၵဵပ်းၶွၼ်ႇၼမ်ၼႃႇ တင်းပိူၼ်ႈတၢင်ႇၵေႃႉဢၼ်ဢိင်ႁိမ်းတီႈၵိၼ်လူၺ်ႈၵၼ်တင်းၶဝ်ၸိူဝ်းၼၼ်ႉၵေႃႈပႃးဢေႃႈ။-

30ၵူၼ်းထုတ်ႇၵျၢမ်း ဢိၵ်ႇတင်း ၽႃႇရီႉသႄး တင်းလၢႆ၊ သႄႉသွမ်းတၢင်ႇဢပႅတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ ႁဵတ်းႁိုဝ်လႄႈသူၵိၼ်လူၺ်ႈၵၼ်တင်းၵူၼ်းၵဵပ်းၶွၼ်ႇ တင်းၵူၼ်းႁၢႆႉတင်းလၢႆၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

31ယေႇသူႉ ၵေႃႈၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊ ၶဝ်ၸိူဝ်းဢၼ်ယူႇလီၼၼ်ႉ ဢမ်ႇလူဝ်ႇမေႃယႃ။ ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၼၼ်ႉၵူၺ်း လူဝ်ႇမေႃယႃဢေႃႈ။-

32ပုၼ်ႈလွင်ႈၼင်ႇႁိုဝ်တၵ်းၶုၵ်းၸႂ်လႆႈမႆႈၸႂ်ၸိုင်၊ ၵဝ်မႃးႁႂ်ႈလႆႈႁွင်ႉဢဝ်ၵူၼ်းသိုဝ်ႈတေႃႇတင်းလၢႆဢမ်ႇၸႂ်ႈ၊ ၵဝ်မႃးႁႂ်ႈလႆႈႁွင်ႉဢဝ်ၵူၼ်းႁၢႆႉတင်းလၢႆဢေႃႈ၊ ဝႃႈၼင်ႇၼႆဢေႃႈ။

33ၶဝ်ၼၼ်ႉလဝ်ႊထၢမ်လႄႈဝႃႈ၊ တပႄး ယူဝ်းႁၢၼ်ႇ ဢိၵ်ႇတင်း ၽႃႇရီႉသႄး တင်းလၢႆ ၵမ်တၢင်းၵိၼ်လႄႈႁဵတ်းသူးတွင်းပထၼႃႇၶိူဝ်းၶိူဝ်းယႂ်းယႂ်းယူႇဢေႃႈ။ ႁဵတ်းသင်လႄႈတပႄးၸဝ်ႈႁဝ်းၸိူဝ်းၼႆႉ ၵိၼ်ၶူပ်းယူႇၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

34မၼ်းၸဝ်ႈၵေႃႈလၢတ်ႈလႄႈဝႃႈ၊ မိူဝ်ႈဢၼ် ၵေႃႉဢၼ်သွင်ႇမင်ႇၵလႃႇမီးယူႇလူၺ်ႈၵၼ်တင်းၵေႃႉသေႈမၼ်းတင်းလၢႆၼၼ်ႉၸိုင်၊ သူႁႂ်ႈၶဝ်ၼၼ်ႉၵမ်တၢင်းၵိၼ်လႆႈႁိုဝ်။-

35ၶိင်ႇၵႃႇလႃႉဢၼ်တၵ်းလႆႈဢဝ်ၵေႃႉဢၼ်သွင်ႇမင်ႇၵလႃႇၼၼ်ႉ ၽၢတ်ႇၵၼ်တင်းၵေႃႉသေႈမၼ်းတင်းလၢႆၼၼ်ႉၸိုင်၊ တၵ်းႁွတ်ႈမႃးဢေႃႈ။ ၶိင်ႇမိူဝ်ႈၼၼ်ႉ ၶဝ်တၵ်းၵမ်တၢင်းၵိၼ်ဢေႃႈ။-

36ဢူႉပမႃႇၸမ်ႉ၊ ၽူႈလႂ်ဢမ်ႇဢဝ်ၶူဝ်းမႂ်ႇ ၽုင်ၵုပ်းၶူဝ်းၵဝ်ႇ၊ ပေႃးႁဵတ်းၸိူဝ်ႉၼင်ႇၼၼ်ႉၸိုင်၊ ၶူဝ်းမႂ်ႇၸၢင်ႈႁႂ်ႈၶူဝ်းၵဝ်ႇသိၵ်ႇဢေႃႈ။ ၶူဝ်းမႂ်ႇဢၼ်ၵုပ်းၼၼ်ႉ ဢမ်ႇၸၢင်ႈထုၵ်ႇၵၼ်တင်းၶူဝ်းၵဝ်ႇ။-

37ပိူင်လဵဝ်ၵၼ်၊ ၽူႈလႂ်ဢမ်ႇဢဝ်ၼမ်ႉၸပိတ်ႈဢၼ်မႂ်ႇ သႂ်ႇၼႂ်းထူင်ၼင်ဢၼ်ၵဝ်ႇ။ ပေႃးသႂ်ႇၸိုင်၊ ၼမ်ႉၸပိတ်ႈဢၼ်မႂ်ႇၼၼ်ႉ တၵ်းႁႂ်ႈထူင်ၼင်တႅၵ်ႇဢေႃႈ။ ၼမ်ႉၸပိတ်ႈတၵ်းႁူဝ်ႈလႄႈ ထူင်ၼင်ၼၼ်ႉၵေႃႈတၵ်းလူႉတၵ်းလဵဝ်ဢေႃႈ။-

38ၼမ်ႉၸပိတ်ႈဢၼ်မႂ်ႇၼၼ်ႉၸိုင်၊ တၵ်းလႆႈသႂ်ႇၼႂ်းထူင်ၼင်ဢၼ်မႂ်ႇဢေႃႈ။ ပေႃးသႂ်ႇၸိုင် တင်းသွင်ၸိူဝ်ႉသွင်ပိူင်ဢမ်ႇလူႉဢမ်ႇလႅဝ်။-

39ၵေႃႉဢၼ်ၵိၼ်ၼမ်ႉၸပိတ်ႈဢၼ်ၵဝ်ႇၼၼ်ႉယဝ်ႉၼၼ်ႉ ဢမ်ႇၸၢင်ႈၶႂ်ႈလႆႈၼမ်ႉၸပိတ်ႈဢၼ်မႂ်ႇ။ လွင်ႈဢၼ်ၼမ်ႉၸပိတ်ႈဢၼ်ၵဝ်ၼၼ်ႉ ယဵင်ႈၶႅၼ်းလီၸိုင်မၼ်းႁူႉဢေႃႈ၊ ဝႃႈၼင်ႇၼႆဢေႃႈ။

← Chapter 4 Jump to: Chapter 6 →