Luke 8 — Shan

1လိုၼ်းၼၼ်ႉ မၼ်းၸဝ်ႈတေႇသႃႉၸႃႇရီႇ လႄႇလဵပ်ႈၵူႈဝၢၼ်ႈၵူႈဝဵင်းလႄႈ ႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈဢေႃႈ။-

2ၸႃႉၸဵမ်တပႄးၸဝ်ႈသိပ်းသွင်ပႃးလႄႈ မႄႈယိင်းၸိူဝ်းဢၼ်မၼ်းၸဝ်ႈႁႂ်ႈၵၢင်းလွတ်ႈတင်းတၢင်းဢၼ်ၽီႁၢႆႉၶဝ်ႈ ဢိၵ်ႇတင်းတၢင်းၶႆႈတၢင်းပဵၼ်တင်းလၢႆၼၼ်ႉ ၵမ်ႈၽွင်ႈဢၼ်ဝႃႈ မႃႇရီႉ ဢၼ်လႆႈႁွင်ႉႁဵၵ်ႈ မႃႇၵတလႃႉ ဢၼ်ၽီႁၢႆႉၸဵတ်းၵေႃႉဢွၵ်ႇသေၵႃႈၼႂ်းမၼ်းၵႂႃႇၼၼ်ႉ၊-

3ဢိၵ်ႇတင်း ယူဝ်းႁၢၼ်ႇၼႃႉ မေး ၶူႉၸႃႉ ဢၼ်ပဵၼ် ၸတေႃႇၵႄး ၶုၼ် ႁေႇရူတ်ႈ တင်း သူႉသၼ်ႇၼႃႉ တင်းမႄႈယိင်းတၢင်ႇၵေႃႉၼမ်ၼႃႇ ဢဝ်ဢုၵ်ႉၸႃႇၶဝ်ႁဵတ်းလဵင်ႉႁဵတ်းလူမၼ်းၸဝ်ႈၸိူဝ်းၼၼ်ႉပႃးလူၺ်ႈၵၼ်တင်းမၼ်းၸဝ်ႈယူႇဢေႃႈ။

4မိူဝ်ႈဢၼ်ၵူၼ်းၼမ်ၼႃႇ လုၵ်ႉသေၵႃႈတီႈၵူႈဝၢၼ်ႈၵူႈဝဵင်းမႃးၵႃႈတီႈမၼ်းၸဝ်ႈလႄႈ ၸူႉၵၼ်တုမ်ၵၼ်ယူႇၼၼ်ႉၸိုင်၊ မၼ်းၸဝ်ႈလၢတ်ႈၵႂၢမ်းဢူႉပမႃႇလႄႈဝႃႈၸမ်ႉ၊-

5ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼၼ်ႉ ဢွၵ်ႇၵႂႃႇႁႂ်ႈလႆႈဝၢၼ်ႇၸိူဝ်ႉဝၢၼ်ႇၽၼ်းဢေႃႈ။ ၼႂ်းတၢင်းဢၼ်မၼ်းဝၢၼ်ႇၸိူဝ်ႉဝၢၼ်ႇၽၼ်းယူႇၼၼ်ႉ၊ မဵတ်ႉၵမ်ႈၽွင်ႈတူၵ်းၵႃႈတီႈႁိမ်းတၢင်းလႄႈ လႆႈၶၢမ်ႇတၢင်းဢၼ်ယဵပ်ႇဢၼ်ၶၢမ်ႈသေယဝ်ႉ၊ ၼူၵ်ႉၵၢင်ႁၢဝ်တင်းလၢႆၵဵပ်းၵိၼ်သေဢေႃႈ။-

6မဵတ်ႉၵမ်ႈၽွင်ႈတူၵ်းၵႃႈၼႂ်းမၢၵ်ႇႁိၼ်လႄႈမိူဝ်ႈဢၼ်ဢွၵ်ႇတူၼ်ႈၸိုင် ပိူဝ်ႈဢၼ်လိၼ်ဢမ်ႇယမ်းဢမ်ႇမိုၵ်းလႄႈ ႁဵဝ်ႇႁႅင်ႈၵႂႃႇသေဢေႃႈ။-

7မဵတ်ႉၵမ်ႈၽွင်ႈတူၵ်းၵႃႈၼႂ်းတူၼ်ႈၼၢမ်လႄႈ တူၼ်ႈၼၢမ်ၸိူဝ်းၼၼ်ႉဢွၵ်ႇလူၺ်ႈၵၼ်တင်းၶဝ်လႄႈ ႁူမ်ႇမုင်းငႅၼ်းသႄးယူႇသေဢေႃႈ။-

8မဵတ်ႉၵမ်ႈၽွင်ႈတူၵ်းၵႃႈၼႂ်းတီႈဢၼ်လိၼ်လီလႄႈ မၢၵ်ႇမႃးမၢၵ်ႇမၼ်းပၢၵ်ႇပုၼ်ႈဢေႃႈ၊ ဝႃႈၼင်ႇၼႆယဝ်ႉၸင်ႇ၊ႁွင်ႉသႅၼ်ႇသေလႄႈဝႃႈ၊ ၵေႃႉဢၼ်မီးႁူဢၼ်လီငိၼ်းၼၼ်ႉၸမ်ႉ၊ ႁႂ်ႈငိၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

9တပႄးၸဝ်ႈတင်းလၢႆၵေႃႈလဝ်ႊထၢမ်လႄႈဝႃႈ၊ ဢထိၵ်ႈပႄႇဢူႉပမႃႇၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

10မၼ်းၸဝ်ႈၵေႃႈလၢတ်ႈလႄႈဝႃႈ၊ သူမီးဢၶႂၢင်ႉဢၼ်တၵ်းလႆႈႁူႉလွင်ႈတၢင်းဢၼ်လိုၵ်ႉဢၼ်လမ်ႇမိူင်းၽြႃးပဵၼ်ၸဝ်ႈဢေႃႈ။ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၸမ်ႉ၊ ႁၼ်ယူႇသေၵေႃႈ ၼင်ႇႁိုဝ်တၵ်းႁၼ်တၢင်းဢမ်ႇမၢတ်ႈဢမ်ႇတွင်း၊ ၶဝ်ငိၼ်းယူႇသေၵေႃႈ ၼင်ႇႁိုဝ်တၵ်းငိၼ်းတၢင်းဢမ်ႇႁူႉဢမ်ႇၸႅင်ႈၸိုင်၊ လႆႈဢဝ်တင်းဢူႉပမႃႇႁေႃးလၢတ်ႈတီႈၶဝ်ဢေႃႈ။

11ဢထိၵ်ႈပႄႇဢူႉပမႃႇၼၼ်ႉၸမ်ႉ၊ မဵတ်ႉၽၼ်းၼၼ်ႉပဵၼ်ၵႂၢမ်းတြႃးၽြႃးပဵၼ်ၸဝ်ႈဢေႃႈ။-

12ၶဝ်ၸိူဝ်းဢၼ်မီးၵႃႈတီႈႁိမ်းတၢင်းၼၼ်ႉၸမ်ႉ၊ ပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးယဝ်ႉလႄႈ ၼင်ႇႁိုဝ်ၶဝ်တၵ်းဢမ်ႇလႆႈယုမ်ႇမၢတ်ႈလႄႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်၊ မႃႇၼၢတ်ႈမႃးလႄႈ ထူၺ်ႈဢဝ်ၵႂၢမ်းတြႃးၵႃႈၼႂ်းႁူဝ်ၸႂ်ၶဝ်ၼၼ်ႉဢွၵ်ႇပႅတ်ႈသေဢေႃႈ။-

13ၶဝ်ႈၸိူဝ်းဢၼ်မီးၵႃႈၼိူဝ်မၢၵ်ႇႁိၼ်ၼၼ်ႉၸမ်ႉ၊ ပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးယဝ်ႉလႄႈ ပိၵ်ႉသမ်ႉမီးတင်းၸႂ်ဢၼ်သိူဝ်းၸူမ်းၼႃႇႁပ်ႉတုင်းဢဝ်သေၵေႃႈ ဢမ်ႇမီးႁၢၵ်ႈမၼ်းၵႃႈၼႂ်းႁူဝ်ၸႂ်ၶဝ်လႄႈ ယုမ်ႇမၢတ်ႈၵမ်းဢွၼ်ႇၼိုင်ႈၵူၺ်းသေယဝ်ႉ၊ မိူဝ်ႈဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၸိုင်၊ ၽွၵ်ႈပျၢၼ်ႇၶိုၼ်းၵႂႃႇဢေႃႈ။-

14ၶဝ်ႈၸိူဝ်းဢၼ်မီးၼႂ်းတူၼ်ႈၼၢမ်ၼၼ်ႉၸမ်ႉ၊ ပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးယဝ်ႉလႄႈ ၸူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉ၊ လႆႈၶၢမ်ႇလွင်ႈတၢင်းဢၼ်မႆႈၸႂ်ၶီၸႂ်၊ တၢင်းဢၼ်ၸေးၸိမ်ႇလိူင်ႇၸႂ်၊ တၢင်းဢၼ်ၸၢမ်ႇၸႃးၵႃႇမၵုင်ႇၸိူဝ်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉတင်းလၢႆ ႁူမ်ႇမုင်းငႅၼ်းသႄးၶဝ်ယူႇၼၼ်ႉလႄႈ ဢမ်ႇမၢၵ်ႇမၢၵ်ႇဢၼ်လီလႆႈ။-

15ၶဝ်ႈၸိူဝ်းဢၼ်မီးၵႃႈတီႈလိၼ်ဢၼ်လီၼၼ်ႉၸမ်ႉ၊ ပဵၼ်ၶဝ်ၸိူဝ်းဢၼ်မီးၸႂ်ဢၼ်မူတ်းသႂ်လႄႈသိုဝ်ႈတေႃႇယူႇသေလႄႈ လႆႈငိၼ်းၵႂၢမ်းတြႃးယဝ်ႉၸင်ႇ၊ ၸႂ်ၸပ်းၸႂ်ၸွႆးလႄႈ မၢၵ်ႇမၢၵ်ႇမၼ်းမႃးမၼ်ႈမၼ်ႈၶိူင်ႇၶိူင်ႇဢေႃႈ။

16ၽူႈလႂ်သေဢမ်ႇဝႃႈ၊ မိူဝ်ႈဢၼ်တႆႈဝၢၼ်ႇၽႆးတဵၼ်းယဝ်ႉၸိုင်၊ ဢမ်ႇၸၢင်ႈဢဝ်မေႃႈၵႂမ်ႈလႄႈႁူမ်ႇဝႆႉ ၵႃႈတႂ်ႈတီႈၼွၼ်းၵေႃႈဢမ်ႇၸၢင်ႈဢဝ်သႂ်ႇဝႆႉ။ ၸၢင်ႈဢဝ်တၢင်ႇဝႆႉၵႃႈၼိူဝ်ၶူင်ႇတီႈတႆႈၽႆး ႁႂ်ႈၶဝ်ၸိူဝ်းဢၼ်ၶဝ်ႈမႃးၼၼ်ႉလႆႈႁၼ်ဢၼ်လႅင်းမၼ်းဢေႃႈ။-

17လွင်ႈတၢင်းဢၼ်မီးၼႂ်းတီႈဢၼ်လပ်ႉဢၼ်သိူင်ႇဢၼ်တၵ်းဢမ်ႇထၢင်ႇဢမ်ႇသႃးမႃးၼၼ်ႉ ဢမ်ႇမီးသေၸိူဝ်ႉသေပိူင်။ လွင်ႈတၢင်းဢၼ်သိူင်ႇဝႆႉမႅပ်ႉဝႆႉ ဢၼ်တၵ်းဢမ်ႇလႆႈၶၢမ်ႇတၢင်းဢၼ်ပိုတ်ႇၼႄလႄႈထၢင်ႇသႃးမႃးၼၼ်ႉ ဢမ်ႇမီးသေၸိူဝ်ႉသေပိူင်။-

18ပိူဝ်ႈၼႆလႄႈ လွင်ႈဢၼ်သူလႆႈထွမ်ႇလႆႈငိၼ်းၸိူဝ်ႉၼင်ႇႁိုဝ်ၸိုင်၊ ႁဵတ်းသတီႉတႃႉ။ လွင်ႈမၼ်းၸမ်ႉ ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇၸၢင်ႈမီးၵႃႈသင်ၼၼ်ႉ၊ ၵႃႈတီႈၵေႃႉၼၼ်ႉ၊ တၵ်းၼုၵ်ႈဢဝ်ၵႃႈဢၼ်မၼ်းႁဵတ်းၼင်ႇႁၢင်ႈမီး တင်းသဵင်ႈတင်းလူင်ၼၼ်ႉလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။

19မိူဝ်ႈၼၼ်ႉ မႄႈၸဝ်ႈဢိၵ်ႇတင်းၼွင်ႉၸဝ်ႈတင်းလၢႆ မႃးၵႃႈတီႈမၼ်းၸဝ်ႈလႄႈ၊ ၵွပ်ႈပိူဝ်ႈၵူၼ်းဢၼ်ၸူႉၵၼ်တုမ်ၵၼ်ၼမ်ၼႃႇၼၼ်ႉ၊ ယင်းဢမ်ႇၵႂႃႇၸမ်တီႈမၼ်းၸဝ်ႈလႆႈလႄႈယူႇဢေႃႈ။-

20ၵူၼ်းၵမ်ႈၽွင်ႈၵေႃႈ လဝ်ႊလၢတ်ႈလႄႈဝႃႈ၊ မႄႈၸဝ်ႈႁဝ်းဢိၵ်ႇတင်းၼွင်ႉၸဝ်ႈႁဝ်းၸိူဝ်းၼၼ်ႉ ၶႂ်ႈထူပ်းၶႂ်ႈႁၼ်ၸဝ်ႈႁဝ်းလႄႈ ၸုၵ်းယူႇၵႃႈတီႈၼွၵ်ႈပုၼ်ႉၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

21မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ၶဝ်ၸိူဝ်းဢၼ်ထွမ်ႇဢဝ်ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈလႄႈၵမ်ၵျၢင်ႉၼၼ်ႉ ပဵၼ်မႄႈၵဝ်ဢိၵ်ႇတင်းၼွင်ႉၵဝ်ဢေႃႈ၊ ဝႃႈၼင်ႇၼႆဢေႃႈ။

22ဝၼ်းၼိုင်ႈ မၼ်းၸဝ်ႈၶဝ်ႈၵႃႈၼႂ်းႁိူဝ်းလူၺ်ႈၵၼ်တင်းတပႄးၸဝ်ႈတင်းလၢႆသေလႄႈ လၢတ်ႈလႄႈဝႃႈ၊ ၶၢမ်ႈၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉတႃႉႁဝ်း၊ ဝႃႈၼင်ႇၼႆယဝ်ႉၸင်ႇ၊ ပွႆႇႁိူဝ်းၵႂႃႇဢေႃႈ။-

23ၼႂ်းမိူဝ်ႈဢၼ် ၶဝ်ယင်းတိုၵ်ႉၶၢမ်ႈၼွင်ၼၼ်ႉၵႂႃႇယူႇၼၼ်ႉၸိုင်၊ မၼ်းၸဝ်ႈၵိင်းၼွၼ်းယူႇဢေႃႈ။ ၼႂ်းၼွင်ၼၼ်ႉပဵၼ်ၽူၼ်လူင်လူမ်းလူင်လႄႈ ႁိူဝ်းၼၼ်ႉၼမ်ႉယင်းတိုၵ်ႉတဵမ်ၶိုၼ်ႈမႃးယူႇလႄႈ ၸမ်တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။-

24ၶဝ်ၼၼ်ႉသုတ်ႉၸပ်းသုတ်ႉၸူးလႄႈ ပူၵ်းမၼ်းၸဝ်ႈယဝ်ႉၸင်ႇ၊ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်း၊ ႁဝ်းၶႃႈၸမ်တၵ်းႁွတ်ႈထိုင်တၢင်းလူႉတၢင်းလႅဝ်ၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊ မၼ်းၸဝ်ႈလုၵ်ႉလႄႈသင်ႇသွၼ်လူမ်းဢိၵ်ႇတင်းတၢင်းဢၼ်လႅင်းၼမ်ႉပိူပ်ႈၼမ်ႉလုၵ်ႉၶိုၼ်ႈၼၼ်ႉသေယဝ်ႉ၊လူမ်း ဢိၵ်ႇတင်းတၢင်းဢၼ်လႅင်းၼမ်ႉပိူပ်ႈၼမ်ႉၸိူဝ်းၼၼ်ႉထၢတ်ႇယဵၼ်လႄႈ ပၢင်ႇၸိုၼ်ႈၼိမ်လီမႃးဢေႃႈ။-

25မၼ်းၸဝ်ႈၵေႃႈထၢမ်လႄႈဝႃႈ၊ တၢင်းဢၼ်ယုမ်ႇမၢတ်ႈသူမီးၵႃႈလႂ်၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉၵူဝ်ၼႃႇဢၢမ်းၼႃႇလူင်လၢင်လႄႈ ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်လႄႈဝႃႈ၊ ၵေႃႉၼႆႉၸမ်ႉ၊ ပဵၼ်ၽူႈလႂ်။ မၼ်းသင်ႇသွၼ်ၼမ်ႉတင်းလူမ်းလႄႈ ၶဝ်ထွမ်ႇဢဝ်လူင်ပႄႇ၊ ဝႃႈၼင်ႇၼႆဢေႃႈ။

26ၶဝ်ၼၼ်ႉ ၶၢမ်ႈၵႂႃႇႁွတ်ႈထိုင်ၵႃႈတီႈမိူင်း ၵႃႇတရႃႉ ဢၼ်ပဵၼ်ၽင်ႇၼမ်ႉၽၢႆႇၼိုင်ႈ တင်းမိူင်း ၵႃႇလီႉလႄး ၼၼ်ႉသေယဝ်ႉ၊-

27မိူဝ်ႈဢၼ်မၼ်းၸဝ်ႈၶိုၼ်ႈၵႂႃႇၵႃႈၼိူဝ်ၵုင်းၸိုင်၊ ၵူၼ်းမိူင်းၼၼ်ႉၵေႃႉၼိုင်ႈဢၼ်ၽီႁၢႆႉၶဝ်ႈႁိုင်ၼႃႇ၊ ဢမ်ႇၼုင်ႈၶူဝ်း၊ ဢမ်ႇယူႇၼႂ်းႁိူၼ်း၊ ဢၼ်ၸၢင်ႈယူႇၵႃႈၼႂ်းသၢင်းၶႅင်းၼၼ်ႉမႃးလႄႈ ႁပ်ႉႁူဝ်တၢင်းမၼ်းၸဝ်ႈဢေႃႈ။-

28မၼ်းၼၼ်ႉ မိူဝ်ႈဢၼ်ႁၼ် ယေႇသူႉ ၸိုင်၊ ၶုပ်ႉမူပ်ႇႁွင်ႉသႅၼ်ႇသေလႄႈ ႁဵတ်းတင်းသဵင်ဢၼ်ယႂ်ႇၼႃႇ လဝ်ႊလၢတ်ႈလႄႈဝႃႈ၊ ယေႇသူႉ လုၵ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈတီႈၶႃႈ၊ ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈ ၸိူဝ်ႉၼင်ႇႁိုဝ်တီႈၶႃႈ၊ ၼင်ႇႁိုဝ်ၸဝ်ႈႁဝ်းတၵ်းဢမ်ႇၼိၵ်ႈၸၢၵ်ႈငႅၼ်းသႄးၵဝ်ၶႃႈၸိုင်၊ ၵဝ်ၶႃႈတွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

29လွင်ႈဢၼ်လဝ်ႊလၢတ်ႈၼၼ်ႉၸမ်ႉ၊ မၼ်းၸဝ်ႈလႆႈမီးဢမိင်ႉ ႁႂ်ႈၽီဢၼ်ၵူဝ်ႈၵိူၵ်ႇၼၼ်ႉဢွၵ်ႇသေၵႃႈၼႂ်းၵေႃႉၼၼ်ႉၵႂႃႇဢေႃႈ။ လွင်ႈဢမိင်ႉၸဝ်ႈၼၼ်ႉၸမ်ႉ၊ ၽီႁၢႆႉၼၼ်ႉလႆႈတီႉဢဝ်မၼ်းပွၵ်ႈၼမ်ၼႃႇယဝ်ႉ။ ပိၵ်ႉသမ်ႉဢဝ်ၸိူၵ်ႈလဵၵ်းတင်းၶူၺ်ႇတိၼ်မတ်ႉၽုၵ်ႇဝႆႉလႄႈ ႁႂ်ႈၶၢမ်ႇတူၵ်းၵႅၼ်းယူႇသေၵေႃႈ မၼ်းတိုတ်ႉၸိူၵ်ႈလဵၵ်းၶၢတ်ႇလႄႈ ၽီႁၢႆႉၼၼ်ႉႁေႃႈမၼ်းၵႂႃႇယူႇၵႃႈၼႂ်းထိူၼ်ႇဢေႃႈ။

30ယေႇသူႉ ၵေႃႈထၢမ်တီႈမၼ်းလႄႈဝႃႈ၊ မႂ်းမီးၸိုဝ်ႈသဵင်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ပိူဝ်ႈဢၼ်ၽီႁၢႆႉၼမ်ၼႃႇၶဝ်ႈၼႂ်းမၼ်းလႄႈ မၼ်းၵေႃႈလဝ်ႊလၢတ်ႈလႄႈဝႃႈ၊ ၸိုဝ်ႈသဵင်ၵဝ်ၶႃႈၸမ်ႉ၊ ပဵၼ် လေႇၵျုင်ႇ တီႈၶႃႈဢေႃႈ၊ ဝႃႈၼင်ႇၼႆယဝ်ႉၸင်ႇ၊-

31ၼင်ႇႁိုဝ်မၼ်းၸဝ်ႈတၵ်းဢမ်ႇႁေႃႈပႅတ်ႈလႄႈ ႁႂ်ႈၵႂႃႇၵႃႈတီႈဢၼ်လိုၵ်ႉဢၼ်လမ်ႇၼႃႇသေပိူၼ်ႈၼၼ်ႉၸိုင်၊ တွင်းပၢၼ်ႇဢေႃႈ။

32ၵႃႈတီႈၼၼ်ႈ မီးၽုင်မူၼမ်ၼႃႇၵိၼ်ယူႇၵႃႈၼိူဝ်လွႆဢေႃႈ။ ၽီႁၢႆႉၸိူဝ်းၼၼ်ႉသမ်ႉၶိုၼ်းတွင်းပၢၼ်ႇလႄႈဝႃႈ၊ ပၼ်ဢၶႂၢင်ႉႁႂ်ႈလႆႈၶဝ်ႈၵႃႈၼႂ်းၽုင်မူပုၼ်ႉသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈပၼ်ဢၶႂၢင်ႉဢေႃႈ။-

33ၽီႁၢႆႉၸိူဝ်းၼၼ်ႉ ဢွၵ်ႇသေၵႃႈၼႂ်းၵူၼ်းၵေႃႉၼၼ်ႉၵႂႃႇလႄႈ ၶဝ်ႈၵႃႈၼႂ်းမူၸိူဝ်းၼၼ်ႉလႄႈ ၽုင်မူၼၼ်ႉၶုၼ်ႇလႅၼ်ႈလူင်းၽင်ႇၸၼ်းလႄႈ ၵႅၼ်ႉၼမ်ႉၵႃႈၼႂ်းၼွင်ၼၼ်ႉတၢႆဢေႃႈ။-

34မိူဝ်ႈဢၼ်ၵူၼ်းလဵင်ႉမူတင်းလၢႆၼၼ်ႉ ႁၼ်လွင်ႈဢၼ်ပဵၼ်မႃးၸိူဝ်ႉၼင်ႇၼၼ်ၼၼ်ႉၸိုင်၊ ၶဝ်လႅၼ်ႈၵႂႃႇလႄႈမွၵ်ႇလၢတ်ႈသတၢင်းသဵင်ၶၢဝ်ႇ ၵႃႈၼႂ်းဝၢၼ်ႈၼႂ်းဝဵင်းၸိူဝ်းၼၼ်ႉယဝ်ႉၸင်ႇ၊-

35ၵူၼ်းၼမ်ၼႃႇဢွၵ်ႇမႃးႁႂ်ႈလႆႈတူၺ်းလႆႈႁၼ် လွင်ႈတၢင်းဢၼ်ပဵၼ်မႃးၼၼ်ႉဢေႃႈ။ မိူဝ်ႈဢၼ်ၶဝ်ၽႅဝ်ၵႃႈတီႈ ယေႇသူႉ လႄႈ လႆႈႁၼ်ၵေႃႉဢၼ်ၽီႁၢႆႉဢွၵ်ႇၵႂႃႇသေၵႃႈၼႂ်းမၼ်းၼၼ်ႉ ၼုင်ႈၶူဝ်းၼုင်ႈလဵင်းယူႇ မီးတင်းၸႂ်ဢၼ်လီဢၼ်ငၢမ်း ၼင်ႈၵႃႈတီႈႁိမ်းတိၼ် ယေႇသူႉ ယူႇၼၼ်ႉၸိုင်၊ ၶဝ်ၵူဝ်ႁႄဢေႃႈ။-

36ၶဝ်ၸိူဝ်းဢၼ်လႆႈႁူႉလႆႈႁၼ်ယဝ်ႉၼၼ်ႉသမ်ႉမွၵ်ႇလၢတ်ႈလွင်ႈဢၼ်ၵေႃႉဢၼ်ၽီႁၢႆႉၶဝ်ႈၼၼ်ႉ ပဵၼ်ၵူၼ်းလီၵူၼ်းငၢမ်းမႃးၸိူဝ်ႉၼင်ႇႁိုဝ်ၼၼ်ႉ တီႈၶဝ်ၸိူဝ်းဢၼ်မႃးတူၵ်းလိုၼ်းၼၼ်ႉယဝ်ႉၸင်ႇ၊-

37ၵူၼ်းမိူင်း ၵႃႇတရႃႉ တင်းသဵင်ႈတင်းလူင် ပိူဝ်ႈဢၼ်ၸႂ်ၸပ်းတၢင်းဢၼ်ၵူဝ်ဢၼ်ႁႄၼႃႇလူင်လၢင်လႄႈ တွင်းပၢၼ်ႇလဝ်ႊလၢတ်ႈႁႂ်ႈမၼ်းၸဝ်ႈဢွၵ်ႇၵႂႃႇသေ ၵႃႈၼႂ်းမိူင်းၶဝ်သေယဝ်ႉ၊ မၼ်းၸဝ်ႈၶဝ်ႈၵႃႈၼႂ်းႁိူဝ်းလႄႈ ၶိုၼ်းမိူဝ်းၵႂႃႇဢေႃႈ။

38ၵေႃႉဢၼ်ၽီႁၢႆႉဢွၵ်ႇၵႂႃႇသေၵႃႈၼႂ်းမၼ်းၼၼ်ႉ တွင်းပၢၼ်ႇယွၼ်းဢၶႂၢင်ႉႁႂ်ႈလႆႈမီးယူႇလူၺ်ႈၵၼ်တင်းမၼ်းၸဝ်ႈလႄႈ၊-

39ယေႇသူႉ ၵေႃႈပွႆႇမၼ်းလႄႈဝႃႈ၊ မႂ်းၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းၼၼ်ႉတႃႉ။ ၶႆႈပၼ်လၢတ်ႈပၼ်လွင်ႈဢၼ်ၽြႃးပဵၼ်ၸဝ်ႈႁဵတ်းၵျေးၸူးတီႈမႂ်းယႂ်ႇၼႃႇထၢၼ်ႇႁိုဝ်ၼၼ်ႉတီႈၶဝ်တႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉဢွၵ်ႇသေၵႃႈတီႈၼၼ်ႈၵႂႃႇလႄႈမွၵ်ႇလၢတ်ႈသတၢင်းသဵင်ၶၢဝ်ႇ လွင်ႈဢၼ် ယေႇသူႉ ႁဵတ်းၵျေးၸူးတီႈမၼ်းယႂ်ႇၼႃႇထၢၼ်ႇႁိုဝ်ၼၼ်ႉ ၵႃႈၼႂ်းဝဵင်းတင်းဝဵင်းဢေႃႈ။

40ယေႇသူႉ ၶိုၼ်းမိူဝ်းၵႂႃႇသေယဝ်ႉ၊ ၵူၼ်းဢၼ်ၸူႉဢၼ်တုမ်တင်းလၢႆ ပိူဝ်ႈဢၼ်မုင်ႈထႃႈမွင်းထႃႈမၼ်းၸဝ်ႈယူႇလႄႈ မီးတင်းၸႂ်ဢၼ်သိူဝ်းၸူမ်းၼႃႇႁပ်ႉတုင်းဢဝ်မၼ်းၸဝ်ႈဢေႃႈ။-

41မိူဝ်ႈၼၼ်ႉ ၵူၼ်းၵေႃႉၼိုင်ႈဢၼ်လႆႈၸိုဝ်ႈ ယႃႇဢီႉရူႉ ဢၼ်ပဵၼ်ၵႄႇၸရွပ်ႈႁေႃးတြႃးၼၼ်ႉမႃးလႄႈ ၶုပ်ႉမူပ်ႇၵႃႈတီႈႁိမ်းတိၼ် ယေႇသူႉ သေယဝ်ႉ၊-

42ပိူဝ်ႈဢၼ်မၼ်းမီးလုၵ်ႈယိင်းၵေႃႉလဵဝ်ၵူၺ်း ဢၼ်ဢသၢၵ်ႈလႆႈသိပ်းသွင်ပီႊလႄႈ ယင်းတိုၵ်ႉတၢႆယူႇၼၼ်ႉလႄႈ တွင်းပၢၼ်ႇႁႂ်ႈမၼ်းၸဝ်ႈၵႂႃႇၵႃႈတီႈႁိူၼ်းမၼ်းၼၼ်ႉဢေႃႈ။ ၼႂ်းမိူဝ်ႈဢၼ်မၼ်းၸဝ်ႈၵႂႃႇယူႇၼၼ်ႉၸိုင်၊ ၵူၼ်းဢၼ်ၸူႉဢၼ်တုမ်တင်းလၢႆ ဢုမ်ႇၸွမ်းၽိုတ်ႉဢီးၸူးမၼ်းၸဝ်ႈဢေႃႈ။

43ၵမ်းၼၼ်ႉ မႄႈယိင်းဢၼ်ၸပ်းတၢင်းပဵၼ်ဢၼ်ထွၵ်ႇလိူတ်ႈလႆႈသိပ်းသွင်ပီႊတဵမ်တဵမ်ယဝ်ႉလႄႈ ပၼ်ဢုၵ်ႉၸႃႇမၼ်းၵႃႈမီးတင်းသဵင်ႈတင်းလူင်တီႈမေႃယႃတင်းလၢႆ ထၼ်ႈပေႃးသဵင်ႈမူတ်းၵႂႃႇသေၵေႃႈ ဢမ်ႇၵတ်းယဵၼ်ၶျၢမ်းသႃႇၼႂ်းမိုဝ်းမေႃယႃၼၼ်ႉၵေႃႉၼိုင်ႈ၊-

44မႃးၵႃႈတီႈၽၢႆႇတၢင်းလင်မၼ်းၸဝ်ႈသေလႄႈ တိူဝ်ႉယိပ်းပူႈၶူဝ်းမၼ်းၸဝ်ႈယဝ်ႉၸင်ႇ၊ မိူဝ်ႈၼၼ်ႉၵမ်းလဵဝ် တၢင်းပဵၼ်ဢၼ်ထွၵ်ႇလိူတ်ႈမၼ်းၼၼ်ႉႁၢႆၵႂႃႇဢေႃႈ။-

45ယေႇသူႉ ၵေႃႈထၢမ်လႄႈဝႃႈ၊ ၽူႈလႂ်တိူဝ်ႉၵဝ်ယိပ်းၵဝ်၊ ဝႃႈၼင်ႇၼႆသေယဝ်ႉ၊ မိူဝ်ႈဢၼ်ၵူၼ်းတင်းသဵင်ႈတင်းလူင်ၶိုၼ်းတွပ်ႇလၢတ်ႈႁႄႉၵႂၢမ်းမၼ်းၸဝ်ႈယဝ်ႉၼၼ်ႉ၊ ပေႇတရူႉ ဢိၵ်ႇတင်းၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵူၼ်းဢၼ်ၸူႉဢၼ်တုမ်တင်းလၢႆၼႆႉ ၽိုတ်ႉၸူးဢီးၸူးၸဝ်ႈႁဝ်းယူႇလႄႈ၊ ၸဝ်ႈႁဝ်းထၢမ်လႄႈဝႃႈ၊ ၽူႈလႂ်တိူဝ်ႉၵဝ်ယိပ်းၵဝ်၊ ဝႃႈၼင်ႇၼႆလူင်ပႄႇ၊ ဝႃႈၼင်ႇၼႆဢေႃႈ။-

46ယေႇသူႉ ၵေႃႈလၢတ်ႈလႄႈဝႃႈ၊ သေၵေႃႉသေၵူၼ်းတိူဝ်ႉယိပ်းၵဝ်ယဝ်ႉ။ ၵဝ်ႁူႉလွင်ႈဢၼ်တၼ်းၶူဝ်းဢွၵ်ႇၵႃႈၼႂ်းၵဝ်ယူႇဢေႃႈ၊ ဝႃႈၼင်ႇၼႆဢေႃႈ။-

47မႄႈယိင်းၼၼ်ႉ မိူဝ်ႈဢၼ်မၼ်းႁူႉလွင်ႈဢၼ်မၼ်းဢမ်ႇတဵတ်ႇဢမ်ႇမႅပ်ႉယူႇလႆႈၼၼ်ႉၸိုင်၊ သၼ်ႇဝႆယူႇသေလႄႈမႃးတီႈမၼ်းၸဝ်ႈယဝ်ႉၸင်ႇ၊ ၶုပ်ႉမူပ်ႇလႄႈလဝ်ႊလၢတ်ႈလွင်ႈဢၼ်မၼ်းတိူဝ်ႉယိပ်းမၼ်းၸဝ်ႈ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ် ဢိၵ်ႇတင်းလွင်ႈဢၼ်တၢင်းပဵၼ်မၼ်းႁၢႆၵမ်းလဵဝ်ၼၼ်ႉ ၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။-

48မၼ်းၸဝ်ႈၵေႃႈလၢတ်ႈတီႈမၼ်းလႄႈဝႃႈ၊ လုၵ်ႈယိင်းၵဝ်ဢိူၺ်း၊ ယႃႇပေမႆႈၸႂ်။ တၢင်းယုမ်ႇမၢတ်ႈမႂ်းႁႂ်ႈတၢင်းပဵၼ်မႂ်းႁၢႆယဝ်ႉ။ ၵႂႃႇၼိမ်ၼိမ်တႃႉ၊ ဝႃႈၼင်ႇၼႆဢေႃႈ။-

49ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆယူႇၼၼ်ႉ ၵူၼ်းၵေႃႉၼိုင်ႈလုၵ်ႉသေၵႃႈတီႈႁိူၼ်းၵႄႇၸရွပ်ႈႁေႃးတြႃးၼၼ်ႉမႃးလၢတ်ႈလႄႈဝႃႈ၊ လုၵ်ႈယိင်းၸဝ်ႈႁဝ်းတၢႆယဝ်ႉၶႃႈဢေႃႈ။ ယႃႇပေယႃႉယူၵ်ႉသြႃႇသေၵမ်းၶႃႈတႃႉ၊ ဝႃႈၼင်ႇၼႆဢေႃႈ။-

50မိူဝ်ႈဢၼ် ယေႇသူႉ ငိၼ်းၵႂၢမ်းၼၼ်ႉၸိုင်၊ မၼ်းၸဝ်ႈလၢတ်ႈတီႈၵႄႇၸရွပ်ႈႁေႃးတြႃးၼၼ်ႉလႄႈဝႃႈ၊ ယႃႇပေမႆႈၸႂ်။ ႁႂ်ႈမီးၸႂ်ဢၼ်ယုမ်ႇမၢတ်ႈၵူၺ်းတႃႉ။ ပေႃးမီးၸိုင် မၼ်းတၵ်းၵၢင်းလွတ်ႈတင်းၽေးတၢင်းတၢႆဢေႃႈ၊ ဝႃႈၼင်ႇၼႆဢေႃႈ။-

51မိူဝ်ႈဢၼ်မၼ်းၸဝ်ႈႁွတ်ႈထိုင်ၵႃႈတီႈႁိူၼ်းၼၼ်ႉၸိုင်၊ လိူဝ်သေ ပေႇတရူႉ ဢိၵ်ႇတင်း ယူဝ်းႁၢၼ်ႇ တင်း ယႃႇၵုပ်ႈ တင်းပေႃႈမႄႈလုၵ်ႈဢွၼ်ႇၼၼ်ႉၵူၺ်း၊ မၼ်းၸဝ်ႈဢမ်ႇပၼ်ၽူႈလႂ်ၶဝ်ႈၵႂႃႇၵႃႈၼႂ်းသေၵေႃႉသေၵူၼ်း။-

52ၵူၼ်းတင်းသဵင်ႈတင်းလူင်ႁဵတ်းသဵင်ႁွင်ႉသဵင်ႁႆႈယူႇလႄႈ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ယႃႇပေႁွင်ႉပေႁႆႈ။ လုၵ်ႈဢွၼ်ႇၼႆႉတၢႆယဝ်ႉဢမ်ႇၸႂ်ႈ၊ မၼ်းၼွၼ်းလပ်းယူႇလႆ၊ ဝႃႈၼင်ႇၼႆယဝ်ႉၸင်ႇ၊-

53ၶဝ်ၼၼ်ႉပိူဝ်ႈဢၼ်ၶဝ်ႁူႉလွင်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉလႄႈ ဢွၼ်ၵၼ်ႁဵတ်းပျၢၵ်ႈၶူဝ်မၼ်းၸဝ်ႈသေဢေႃႈ။-

54မၼ်းၸဝ်ႈႁႂ်ႈၶဝ်ၵႃႈမီးတင်းသဵင်ႈတင်းလူင်ဢွၵ်ႇၵႂႃႇၵႃႈၼွၵ်ႈသေယဝ်ႉ၊ ယိပ်းမိုဝ်းလုၵ်ႈဢွၼ်ႇယူႇသေလႄႈႁွင်ႉလႄႈဝႃႈ၊ လုၵ်ႈယိင်းဢွၼ်ႇဢိူၺ်း၊ လုၵ်ႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

55ၸႂ်ဝီႉၺိၺ်ႇမၼ်းၶိုၼ်းမႃးလႄႈ မႄႈယိင်းဢွၼ်ႇၼၼ်ႉလုၵ်ႉၵမ်းလဵဝ်ဢေႃႈ။ မၼ်းၸဝ်ႈၵေႃႈမီးဢမိင်ႉလႄႈဝႃႈ၊ ပၼ်တၢင်းၵိၼ်တီႈမၼ်းတႃႉ၊ ဝႃႈၼင်ႇၼႆဢေႃႈ။-

56ပေႃႈမႄႈမၼ်းၵႂင်ၸႂ်ယုင်ႈၸႂ်ယူႇဢေႃႈ။ ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈတီႈႁဵင်းၼၼ်ႉတီႈၽူႈလႂ်သေၵေႃႉသေၵူၼ်းၸိုင်၊ မၼ်းၸဝ်ႈပိင်းၺၢပ်ႈဝႆႉတီႈၶဝ်ၼၼ်ႉဢေႃႈ။