Luke 15

Shan

← Chapter 14 Jump to: Chapter 16 →

1ၵူၼ်းၵဵပ်းၶွၼ်ႇဢိၵ်ႇတင်းၵူၼ်းႁၢႆႉတင်းသဵင်ႈတင်းလူင် သုတ်ႉၸမ်တီႈမၼ်းၸဝ်ႈႁႂ်ႈလႆႈထွမ်ႇလႆႈငိၼ်းလႄႈ၊-

2ၽႃႇရီႉသႄး ဢိၵ်ႇတင်း ၵူၼ်းထုတ်ႇၵျၢမ်းတင်းလၢႆၵေႃႈသႄႉသွမ်းတၢင်ႇဢပႅတ်ႈလႄႈဝႃႈ၊ ၵေႃႉၼႆႉႁပ်ႉတုင်းဢဝ်ၵူၼ်းႁၢႆႉတင်းလၢႆလႄႈ ၵိၼ်ၶူပ်းလူၺ်ႈၵၼ်တင်းၶဝ်လူင်ပႄႇ၊ ဝႃႈၼင်ႇၼႆဢေႃႈ။

3မိူဝ်ႈၼၼ်ႉ မၼ်းၸဝ်ႈလၢတ်ႈၵႂၢမ်းဢူႉပမႃႇတီႈၶဝ်ၼၼ်ႉလႄႈဝႃႈၸမ်ႉ၊-

4ၼႂ်းသူၼႆႉ၊ တီႈသေၵေႃႉသေၵူၼ်းမီးသူဝ်းပၢၵ်ႇၼိုင်ႈလႄႈ၊ ပေႃးသူဝ်းတူဝ်ၼိုင်ႈႁၢႆၵႂႃႇၸိုင်၊ ယင်းဢမ်ႇပႅတ်ႈဝႆႉသူဝ်း ၵဝ်ႈသိပ်းပၢႆၵဝ်ႈတူဝ်ၼၼ်ႉၵႃႈၼႂ်းထိူၼ်ႇသေလႄႈ ၵႂႃႇႁႃသူဝ်းတူဝ်ၼိုင်ႈဢၼ်ႁၢႆၵႂႃႇၼၼ်ႉ တေႃႇထိုင်ႁွတ်ႈႁႂ်ႈထၼ်ႈပေႃးထူပ်းပေႃးႁၼ်လႄႈ တၵ်းယူႇႁိုဝ်။-

5မၼ်းထူပ်းႁၼ်သေယဝ်ႉ၊ မီးၸႂ်ဢၼ်သိူဝ်းဢၼ်ၸူမ်းႁၢပ်ႇတၢင်ႇၵႃႈၼိူဝ်ႁူဝ်ဝႃႇမႃးလႄႈ၊-

6မိူဝ်ႈဢၼ်ႁွတ်ႈထိုင်ၵႃႈတီႈႁိူၼ်းမၼ်းၸိုင်၊ မၼ်းၸၢင်ႈႁွင်ႉဢဝ်ပီႈၼွင်ႉၸိူဝ်ႉၶိူဝ်းမၼ်း ဢိၵ်ႇတင်းၵူၼ်းႁိူၼ်းၸမ်ၵၼ်တင်းလၢႆမႃးလႄႈလၢတ်ႈဝႃႈ၊ ၵဝ်ထူပ်းႁၼ်သူဝ်းဢၼ်ႁၢႆၵႂႃႇၼၼ်ႉယဝ်ႉ။ သိူဝ်းပျေႃႇလူၺ်ႈၵၼ်တင်းၵဝ်တႃႉ၊ ဝႃႈၼင်ႇၼႆ ဢမ်ႇၸႂ်ႈႁိုဝ်။-

7ၵဝ်ဝႃႈတီႈသူၸမ်ႉ၊ ၼႂ်းမိူင်းၵၢင်ႁၢဝ်ပုၼ်ႉ တၢင်းဢၼ်သိူဝ်းပျေႃႇ လူၺ်ႈလွင်ႈၵူၼ်းႁၢႆႉဢၼ်လႆႈတၢင်းဢၼ်ၶုၵ်းၸႂ်လႆႈမႆႈၸႂ်ၵေႃႉၼိုင်ႈၼၼ်ႉ ယဵင်ႈၶႅၼ်းတၵ်းမီးၼႃႇသေတၢင်းဢၼ်သိူဝ်းပျေႃႇ လူၺ်ႈလွင်ႈၵူၼ်းသိုဝ်ႈတေႃႇ ၵဝ်ႈသိပ်းပၢႆၵဝ်ႈၵေႃႉဢၼ်ဢမ်ႇမီးလွင်ႈတၢင်းဢၼ်တၵ်းၶုၵ်းၸႂ်လႆႈမႆႈၸႂ်ၼၼ်ႉဢေႃႈ။

8ၼႄးၼိုင်ႈၸမ်ႉ၊ တီႈမႄႈယိင်းသေၵေႃႉသေၵူၼ်းမီးငိုၼ်းသိပ်းၶႅပ်းလႄႈ၊ ပေႃးၶႅပ်းၼိုင်ႈႁၢႆၵႂႃႇၸိုင်၊ မၼ်းယင်းဢမ်ႇတႆႈဝၢၼ်ႇၽႆးတဵၼ်းသေလႄႈ ပတ်းၽဵဝ်ႈႁိူၼ်းတင်းႁိူၼ်းႁႃၸေးၸေးၸွတ်ႇၸွတ်ႇတေႃႇထိုင်ႁွတ်ႈႁႂ်ႈထၼ်ႈပေႃးထူပ်းပေႃးႁၼ်လႄႈ တၵ်းယူႇႁိုဝ်။-

9မိူဝ်ႈဢၼ်ထူပ်းႁၼ်ယဝ်ႉၸိုင်၊ မၼ်းၸၢင်ႈႁွင်ႉဢဝ်ပီႈၼွင်ႉၸိူဝ်ႉၶိူဝ်းမၼ်း ဢိၵ်ႇတင်းၵူၼ်းႁိူၼ်းၸမ်ၵၼ်တင်းလၢႆမႃးလႄႈလၢတ်ႈဝႃႈ၊ ၵဝ်ထူပ်းငိုၼ်းဢၼ်ႁၢႆၼၼ်ႉယဝ်ႉ။ သိူဝ်းပျေႃႇလူၺ်ႈၵၼ်တင်းၵဝ်တႃႉ၊ ဝႃႈၼင်ႇၼႆဢမ်ႇၸႂ်ႈႁိုဝ်။-

10မိူၼ်ၼင်ႇၼၼ် ၵဝ်ဝႃႈတီႈသူၸမ်ႉ၊ ၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆၼၼ်ႉ၊ မီးတၢင်းဢၼ်သိူဝ်းပျေႃႇလူၺ်ႈလွင်ႈၵူၼ်းႁၢႆႉဢၼ်လႆႈတၢင်းဢၼ်ၶုၵ်းၸႂ်လႆႈမႆႈၸႂ်ၵေႃႉၼိုင်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

11မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈၸမ်ႉ၊ တီႈသေၵေႃႉသေၵူၼ်းမီးလုၵ်ႈၸၢႆးသွင်ၵေႃႉဢေႃႈ။-

12လုၵ်ႈၸၢႆးၵေႃႉလဵၵ်ႉလၢတ်ႈတီႈပေႃႈမၼ်းလႄႈဝႃႈ၊ ပေႃႈဢိူၺ်း၊ ပၼ်ဢုၵ်ႉၸႃႇၶူဝ်းလဵင်းပုၼ်ႈဢၼ်ၵဝ်ၶႃႈထုၵ်ႇလႆႈၼၼ်ႉတီႈၵဝ်ၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ပေႃႈမၼ်းၽႄလႄႈ မႅင်ႇပၼ်ဢုၵ်ႉၸႃႇၶူဝ်းလဵင်းတင်းလၢႆတီႈၶဝ်ၼၼ်ႉဢေႃႈ။-

13လိုၼ်းၼၼ်ႉဢမ်ႇပေႃးႁိုင်၊ လုၵ်ႈၸၢႆးၵေႃႉလဵၵ်ႉၼၼ်ႉ၊ သိမ်းဢဝ်ဢုၵ်ႉၸႃႇၶူဝ်းလဵင်းမၼ်းသေလႄႈ ၵႂႃႇၵႃႈတီႈမိူင်းဢၼ်ၵႆၼႃႇၼၼ်ႉသေယဝ်ႉ၊ ႁဵတ်းလူၺ်ႈၵႃႇမၵုင်ႇပူၼ်ႉလိူဝ်လႄႈ ဢဝ်ဢုၵ်ႉၸႃႇၶူဝ်းလဵင်းမၼ်းသုမ်းၸွမ်းပႅတ်ႈၵႃႈတီႈမိူင်းၼၼ်ႉဢေႃႈ။-

14မိူဝ်ႈဢၼ်သဵင်ႈမူတ်း ၵႃႈဢၼ်မၼ်းမီးတင်းသဵင်ႈတင်းလူင်ၼၼ်ႉၸိုင်၊ ၵႃႈၼႂ်းမိူင်းၼၼ်ႉ ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်လႄႈ မၼ်းႁွတ်ႈထိုင်တၢင်းဢၼ်ၽၢၼ်ၼႃႇဢေႃႈ။-

15မိူဝ်ႈၼၼ်ႉ မၼ်းၵႂႃႇၵႃႈတီႈၵူၼ်းမိူင်းၼၼ်ႉၵေႃႉၼိုင်ႈသေလႄႈ ၶၢမ်ႇႁဵတ်းလုၵ်ႈလဵင်ႉလုၵ်ႈၸၢင်ႈသေယဝ်ႉ၊ ၸဝ်ႈမၼ်းပွႆႇမၼ်းၵႂႃႇၵႃႈၼႂ်းထိူၼ်ႇပုၼ်ႉ ႁႂ်ႈမၼ်းလႆႈလဵင်ႉလႆႈလူမူတင်းလၢႆလႄႈ၊-

16မၼ်းမီးဢလူဝ်ႇၶႂ်ႈႁႂ်ႈတွင်ႉမၼ်းတဵမ်ဝႆႉတင်းၽၵ်းထူဝ်ႇ ဢၼ်မူၵိၼ်ၼၼ်ႉဢေႃႈ။ ၽူႈလႂ်သေၵေႃႉသေၵူၼ်း ဢမ်ႇလဵင်ႉပၼ် တၢင်းၵိၼ်တၢင်းၶူပ်းတီႈမၼ်း။-

17မိူဝ်ႈၼၼ်ႉ မၼ်းလႆႈသတီႉသေယဝ်ႉ၊ လၢတ်ႈလႄႈဝႃႈ၊ ၶဝ်ၸိူဝ်းဢၼ်ၶၢမ်ႇႁဵတ်းလုၵ်ႈလဵင်ႉလုၵ်ႈၸၢင်ႈတီႈပေႃႈၵဝ်တင်းလၢႆၸိူဝ်းၼၼ်ႉ၊ လႆႈၵိၼ်ဢိမ်ႇၵိၼ်တဵမ်ယူႇဢေႃႈ။ ၵဝ်ၸမ်ႉ၊လႆႈၶၢမ်ႇတၢင်းဢၼ်ဢိုပ်းဢၼ်ယၢၵ်ႈ တေႃႇထိုင်ႁွတ်ႈထၼ်ႈပေႃးတၵ်းတၢႆၵႃႈတီႈၼႆႈဢေႃႈ။-

18ၵဝ်တၵ်းလုၵ်ႉလႄႈၵႂႃႇၵႃႈတီႈပေႃႈၵဝ်ပုၼ်ႉဢေႃႈ။ ၵဝ်တၵ်းလၢတ်ႈတီႈမၼ်းလႄႈဝႃႈ၊ ပေႃႈဢိူၺ်း၊ ၵဝ်ၶႃႈၼႆႉ၊ၽိတ်းပိူင်ႈမိူင်းၵၢင်ႁၢဝ်ၸဝ်ႈ ဢိၵ်ႇတင်းၵႃႈတီႈၽၢႆႇၼႃႈၸဝ်ႈႁဝ်းယဝ်ႉၶႃႈယဝ်ႉ။-

19ၸႃႉၸဵမ်မိူဝ်ႈလဵဝ်ၼႆႉလႄႈ ၵဝ်ၶႃႈဢမ်ႇထိူၵ်ႈလႆႈၶၢမ်ႇတၢင်းဢၼ်ႁွင်ႉလုၵ်ႈၸဝ်ႈႁဝ်းၶႃႈယဝ်ႉ။ ၶႅၼ်းတေႃႈႁႂ်ႈၵဝ်ၶႃႈ လႆႈပဵၼ်ၸိူဝ်ႉၼင်ႇလုၵ်ႈလဵင်ႉလုၵ်ႈၸၢင်ႈၸဝ်ႈႁဝ်းသေၵေႃႉၵေႃႉၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။

20မိူဝ်ႈၼၼ်ႉ မၼ်းလုၵ်ႉလႄႈၵႂႃႇၵႃႈတီႈပေႃႈမၼ်းပုၼ်ႉဢေႃႈ။ မိူဝ်ႈဢၼ်ၵႂႃႇလႄႈယင်းတိုၵ်ႉမီးယူႇတီႈဢၼ်ၵႆၼၼ်ႉၸိုင်၊ ပေႃႈမၼ်းႁၼ်မၼ်းသေယဝ်ႉ၊ မီးၸႂ်ဢၼ်ဢဵတ်းလူလႄႈ လႅၼ်ႈၵႂႃႇၵွတ်ႇၶေႃးမၼ်းၸုပ်ႇၼူမ်ဢေႃႈ။-

21လုၵ်ႈၸၢႆးၼၼ်ႉၵေႃႈလၢတ်ႈလႄႈဝႃႈ၊ ပေႃႈဢိူၺ်း၊ ၵဝ်ၶႃႈၼႆႉ၊ ၽိတ်းပိူင်ႈမိူင်းၵၢင်ႁၢဝ်ၸဝ်ႈ ဢိၵ်ႇတင်းၵႃႈတီႈၽၢႆႇၼႃႈၸဝ်ႈႁဝ်းယဝ်ႉၶႃႈယဝ်ႉ။ ၸႃႉၸဵမ်မိူဝ်ႈလဵဝ်ၼႆႉလႄႈ ၵဝ်ၶႃႈဢမ်ႇထိူၵ်ႈလႆႈၶၢမ်ႇတၢင်းဢၼ်ႁွင်ႉလုၵ်ႈၸဝ်ႈႁဝ်းၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

22ပေႃႈမၼ်းၵေႃႈလၢတ်ႈတီႈၵူၼ်းၸႂ်ႉၵူၼ်းသွႆတင်းလၢႆလႄႈဝႃႈ၊ ဢဝ်တၢင်းၼုင်ႈတၢင်းမႆဢၼ်မျၢတ်ႈၼၼ်ႉမႃးလႄႈ ႁႂ်ႈမၼ်းၼုင်ႈမႆတႃႉ။ ႁႂ်ႈမၼ်းတိုဝ်းၶိူင်ႈမွင်းၵူၺ်း ၵႃႈတီႈမိုဝ်းမၼ်းတႃႉ။-

23ၵႃႈတီႈတိၼ်မၼ်းၵေႃႈ ႁႂ်ႈမၼ်းတိုဝ်းၶႅပ်းတိၼ်တႃႉ။ ၵႂႃႇဢဝ်ဝူဝ်းၼုမ်ႇဢွၼ်ႇ ဢၼ်ပီးလီမၼ်းလီၼၼ်ႉမႃးလႄႈ ဢဝ်တၢႆတႃႉ။ ၵိၼ်လႄႈႁဵတ်းတၢင်းဢၼ်မူၼ်ႈဢၼ်ပျေႃႇတႃႉႁဝ်း။-

24လုၵ်ႈၸၢႆးၵဝ်ၼႆႉ၊ မိူဝ်ႈဢွၼ်တၢင်းၼၼ်ႉတၢႆၵႂႃႇဢေႃႈ။ မိူဝ်ႈလဵဝ်ၼႆႉၶိုၼ်းလိပ်းဢေႃႈ။ မိူဝ်ႈဢွၼ်တၢင်းၼၼ်ႉႁၢႆၵႂႃႇဢေႃႈ။ မိူဝ်ႈလဵဝ်ၼႆႉၶိုၼ်းထူပ်းႁၼ်ဢေႃႈ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉ ႁဵတ်းတၢင်းဢၼ်မူၼ်ႈဢၼ်ပျေႃႇဢေႃႈ။

25လုၵ်ႈၸၢႆးၵေႃႉယႂ်ႇမီးယူႇၵႃႈတီႈႁႆႊပုၼ်ႉလႄႈ၊ မိူဝ်ႈဢၼ်လုၵ်ႉသေၵႃႈတီႈၼၼ်ႈမႃးႁွတ်ႈထိုင်ၵႃႈတီႈႁိမ်းႁိူၼ်းၼၼ်ႉၸိုင်၊ ငိၼ်းသဵင်တၢင်းဢၼ်ၵႃႈဢၼ်ဝႅၼ်၊ တၢင်းဢၼ်ပဝ်ႇဢၼ်ႁႆႇၼၼ်ႉသေယဝ်ႉ၊-

26ႁွင်ႉဢဝ်ၵူၼ်းဢွၼ်ႇၵေႃႉၼိုင်ႈသေလႄႈထၢမ်လႄႈဝႃႈ၊ ပဵၼ်လွင်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ၊-

27ၵူၼ်းဢွၼ်ႇၵေႃႈလၢတ်ႈလႄႈဝႃႈ၊ ၼွင်ႉၸၢႆးၸဝ်ႈႁဝ်းႁွတ်ႈမႃးၶႃႈယဝ်ႉ။ ပိူဝ်ႈဢၼ်ပေႃႈမၼ်းထူပ်းႁၼ်မၼ်း ၵၢင်းလွတ်ႈတင်းၽေးယူႇလႄႈ ဢဝ်ဝူဝ်းၼုမ်ႇဢွၼ်ႇဢၼ်ပီးလီမၼ်းလီၼၼ်ႉတၢႆၶႃႈယဝ်ႉ၊ ဝႃႈၼင်ႇၼႆဢေႃႈ။-

28လုၵ်ႈၸၢႆးၵေႃႉယႂ်ႇၼၼ်ႉ ၸႂ်မႆႈၶႆႈၸႃႉလႄႈဢမ်ႇၶဝ်ႈၵႃႈၼႂ်းႁိူၼ်းလႄႈယူႇဢေႃႈ။ ပိူဝ်ႈၼႆလႄႈ ပေႃႈမၼ်းလႆႈဢွၵ်ႇၸူးတီႈမၼ်းလႄႈ ၶျေႃးဝွၼ်းမၼ်းဢေႃႈ။-

29လုၵ်ႈၸၢႆးၵေႃႉယႂ်ႇၵေႃႈၶိုၼ်းလၢတ်ႈလႄႈဝႃႈ၊ ၵဝ်ၶႃႈလႆႈၶၢမ်ႇတၢင်းၸႂ်ႉတၢင်းသွႆပေႃႈႁဝ်း ပီႊမိူင်းၼမ်ၼႃႇယဝ်ႉၶႃႈယဝ်ႉ။ ၵဝ်ၶႃႈဢမ်ႇပူၼ်ႉဢမ်ႇလိူဝ်ဢမိင်ႉပေႃႈႁဝ်းသေပွၵ်ႈၶႃႈ။ ၼႂ်းဝႃႈၼၼ်သေၵေႃႈ ပေႃႈႁဝ်းဢမ်ႇပၼ်ပႄႉဢွၼ်ႇသေတူဝ်တီႈၵဝ်ၶႃႈ ႁႂ်ႈၵဝ်ၶႃႈလႆႈႁဵတ်းတၢင်းဢၼ်မူၼ်ႈဢၼ်ပျေႃႇလူၺ်ႈၵၼ်တင်းပီႈၼွင်ႉၵေႃႉသေႈၵဝ်ၶႃႈတင်းလၢႆၼၼ်ႉသေပွၵ်ႈ။-

30ၵူၺ်းၵႃႈ မိူဝ်ႈဢၼ်လုၵ်ႈၸၢႆးၸဝ်ႈႁဝ်းဢၼ်ၵႂႃႇယူႇလူၺ်ႈၵၼ်တင်းမႄႈယိင်းႁၢႆႉလႄႈ ယႃႉဢုၵ်ႉၸႃႇၶူဝ်းလဵင်းပေႃႈႁဝ်းၼႆႉႁွတ်ႈမႃးၼၼ်ႉၸိုင်၊ ပေႃႈႁဝ်းဢဝ်ဝူဝ်းၼုမ်ႇဢွၼ်ႇဢၼ်ပီးလီမၼ်းလီၼၼ်ႉတၢႆယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

31ပေႃႈမၼ်းၵေႃႈလၢတ်ႈလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ မႂ်းၼႆႉယူႇတီႈၵဝ်တႃႇသေႇဢေႃႈ။ ဢုၵ်ႉၸႃႇၶူဝ်းလဵင်းၵဝ်ၵႃႈမီးတင်းသဵင်ႈတင်းလူင် ပဵၼ်ဢုၵ်ႉၸႃႇၶူဝ်းလဵင်းမႂ်းဢေႃႈ။-

32ၼွင်ႉၸၢႆးမႂ်းၼၼ်ႉၸမ်ႉ၊ မိူဝ်ႈဢွၼ်တၢင်းၼၼ်ႉတၢႆၵႂႃႇဢေႃႈ။ မိူဝ်ႈလဵဝ်ၼႆႉၶိုၼ်းလိပ်းဢေႃႈ။ မိူဝ်ႈဢွၼ်တၢင်းၼၼ်ႉႁၢႆၵႂႃႇဢေႃႈ။ မိူဝ်ႈလဵဝ်ၼႆႉၶိုၼ်းထူပ်းႁၼ်ဢေႃႈ။ ပိူဝ်ႈၼႆလႄႈ ထုၵ်ႇလီႁဵတ်းတၢင်းဢၼ်မူၼ်ႈဢၼ်ပျေႃႇလႄႈ မီးတၢင်းဢၼ်ၸူမ်းဢၼ်သိူဝ်းဢေႃႈ၊ ဝႃႈၼင်ႇၼႆဢေႃႈ။

← Chapter 14 Jump to: Chapter 16 →