Matthew 15

Shan

← Chapter 14 Jump to: Chapter 16 →

1မိူဝ်ႈၼၼ်ႉ ၽႃႇရီႉသႄး ဢိၵ်ႇတင်းၵူၼ်းထုတ်ႇၵျၢမ်းတင်းလၢႆ လုၵ်ႉသေၵႃႈတီႈဝဵင်း ယေႇရူႉသလႅမ်ႇ မႃးတီႈ ယေႇသူႉ လႄႈ၊-

2လဝ်ႊလၢတ်ႈလႄႈဝႃႈ၊ ႁဵတ်းသင်လႄႈ တပႄးၸဝ်ႈႁဝ်းတင်းလၢႆ ပူၼ်ႉလိူဝ်ၼႄးဢူႉပတေႇ ဢၼ်သိုပ်ႇလူင်းမႃးၵႃႈတီႈၵူၼ်း မိူဝ်ႈၵွၼ်ႇတင်းလၢႆၼၼ်ႉၼင်ႇႁိုဝ်။ ၶဝ်ၼၼ်ႉမိူဝ်ႈဢၼ်ၵိၼ်တၢင်းၵိၼ်ၸိုင် ဢမ်ႇသုၵ်ႈမိုဝ်းလူင်ပႄႇ၊ ဝႃႈၼင်ႇၼႆသေယဝ်ႉ၊-

3မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ႁဵတ်းသင်လႄႈ သူပူၼ်ႉလိူဝ်ပိင်းၺၢပ်ႈၽြႃးပဵၼ်ၸဝ်ႈ ၵွပ်ႈပိူဝ်ႈၼႄးဢူႉပတေႇမိူဝ်ႈၵွၼ်ႇဢၼ်သိုပ်ႇသိုပ်ႇတၢမ်းတၢမ်းၼၼ်ႉၼင်ႇႁိုဝ်။-

4ၽြႃးပဵၼ်ၸဝ်ႈပိင်းၺၢပ်ႈလႄႈဝႃႈဝႆႉၸမ်ႉ၊ ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ။ ႁႂ်ႈၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ ၶၢမ်ႇတၢင်းဢၼ်ဢဝ်တၢႆတႃႉ ဝႃႈၼႆ၊ မီးမႃးၼင်ႇၼႆဢေႃႈ။-

5ဢၼ်သူဝႃႈၸမ်ႉ၊ ၽူႈလႂ်သေဢမ်ႇဝႃႈ၊ ၵေႃႉဢၼ်လၢတ်ႈတီႈပေႃႈမႄႈမၼ်းလႄႈဝႃႈ၊ ႁႂ်ႈဢုၵ်ႉၸႃႇၵဝ်ၵႃႈဢၼ်သူဢဝ်သုင်းဢဝ်သွင်ႇလႆႈၼၼ်ႉပဵၼ်တႃႇၼႃႉတၢင်းလူႇတႃႉ၊ ဝႃႈၼင်ႇၼႆၼၼ်ႉ၊ ၵေႃႉၼၼ်ႉ ဢမ်ႇလႆႈႁဵတ်းရူဝ်ႇသေႇၵူဝ်ယမ်ပေႃႈမႄႈမၼ်း၊ ဝႃႈၼင်ႇၼႆဢေႃႈ။-

6သူပႄႇပႅတ်ႈပိင်းၺၢပ်ႈၽြႃးပဵၼ်ၸဝ်ႈၵွပ်ႈပိူဝ်ႈၼႄးဢူႉပတေႇ မိူဝ်ႈၵွၼ်ႇဢၼ်သိုပ်ႇသိုပ်ႇတၢမ်းတၢမ်းၼၼ်ႉဢေႃႈ။

7သူၸိူဝ်းဢၼ်ၸၢင်ႈထိမ်ႇၸၢင်ႈမႅပ်းတင်းလၢႆၼႆႉဢိူၺ်း၊ ဢၼ် ဢီႉသႃႇယႃႉ ႁေႃးလၢတ်ႈလွင်ႈသူလီလီငၢမ်းငၢမ်းဝႆႉလႄႈဝႃႈၸမ်ႉ၊-

8ၵူၼ်းမဵဝ်းၼႆႉ ဢဝ်တင်းသူပ်းရူဝ်ႇသေႇၵူဝ်ယမ်ၵဝ်ဢေႃႈ။ ၵူၺ်းၵႃႈ ႁူဝ်ၸႂ်ၶဝ်ၵႆၵၼ်တင်းၵဝ်ဢေႃႈ။-

9ၶဝ်ဢဝ်ၼႄးဢူႉပတေႇဢၼ်ၵူၼ်းၸီႇယၢင်ႇဝႆႉၸိူဝ်းၼၼ်ႉ သင်ႇသွၼ်သုင်းမႃႉပၼ်ၸိူဝ်ႉၼင်ႇပိင်းၺၢပ်ႈတေႇသၼႃႇၸဝ်ႈသေလႄႈ ၵူဝ်းၵႂၢႆႇၵဝ်လၢႆလၢႆလွၵ်ႇလွၵ်ႇၵူၺ်း ဝႃႈၼႆ၊ မီးမႃးၼင်ႇၼႆဢေႃႈ၊ ဝႃႈၼင်ႇၼႆဢေႃႈ။

10မိူဝ်ႈၼၼ်ႉမၼ်းၸဝ်ႈႁွင်ႉဢဝ်ၵူၼ်းဢၼ်ၸူႉဢၼ်တုမ် မႃးတီႈမၼ်းၸဝ်ႈသေလႄႈလၢတ်ႈလႄႈဝႃႈ၊ သူထွမ်ႇငိၼ်းလႄႈႁူႉတႃႉ။-

11ဢၼ်ၶဝ်ႈၵႃႈၼႂ်းသူပ်းၼၼ်ႉ ႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ။ ဢၼ်ဢွၵ်ႇၵႃႈၼႂ်းသူပ်းၼၼ်ႉၸိုင် ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ၊ ဝႃႈၼင်ႇၼႆဢေႃႈ။

12မိူဝ်ႈၼၼ်ႉ တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးသေလႄႈ လဝ်ႊလၢတ်ႈလႄႈဝႃႈ၊ လွင်ႈဢၼ် ၽႃႇရီႉသႄး တင်းလၢႆ ၸႂ်လူႉၼႂ်းမိူဝ်ႈဢၼ်ငိၼ်းၵႂၢမ်းဢၼ်ၸဝ်ႈႁဝ်းလၢတ်ႈၼၼ်ႉၸိုင်၊ ၸဝ်ႈႁဝ်းႁူႉၶႃႈႁိုဝ်။ ဝႃႈၼင်ႇၼႆဢေႃႈ။-

13မၼ်းၸဝ်ႈၵေႃႈ ၶိုၼ်းလၢတ်ႈလႄႈဝႃႈ၊ တူၼ်ႈဢၼ်ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ ဢမ်ႇၽုၵ်ႇဢမ်ႇသွမ်ႈၵႃႈမီးတင်းသဵင်ႈတင်းလူင်ၼၼ်ႉၸိုင်၊ တၵ်းလႆႈၶၢမ်ႇတၢင်းဢၼ်ထူၺ်ႈပႅတ်ႈဢေႃႈ။-

14ယႃႇၶဝ်တႃႉ။ ၶဝ်ပဵၼ်ၵူၼ်းတႃမွတ်ႇဢၼ်ၼႄတၢင်းတီႈၵူၼ်းတႃမွတ်ႇဢေႃႈ။ ပေႃးၵူၼ်းတႃမွတ်ႇၼႄတၢင်းတီႈၵူၼ်းတႃမွတ်ႇၸိုင်၊ တင်းသွင်ၵေႃႉ တၵ်းတူၵ်းၵႃႈၼႂ်းလုၵ်းၼႂ်းၶုမ်ဢေႃႈ၊ ဝႃႈၼင်ႇၼႆဢေႃႈ။

15ပေႇတရူႉ ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၽုၺ်ႇဢူႉပမႃႇၼၼ်ႉၼႄပၼ်တီႈႁဝ်းၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16မၼ်းၸဝ်ႈၵေႃႈလၢတ်ႈလႄႈဝႃႈ၊ သူယင်းဢမ်ႇပႆႇမီးပိင်ႇၺႃႇတေႃႇထိုင်ႁွတ်ႈမိူဝ်ႈလဵဝ်ၼႆႉလူးၵွၼ်ႇႁိုဝ်။-

17လွင်ႈဢၼ်ၵႃႈဢၼ်ၶဝ်ႈၵႃႈၼႂ်းသူပ်းၼၼ်ႉ လူင်းၵႂႃႇၵႃႈၼႂ်းတွင်ႉလႄႈ ပႅတ်ႈၵႃႈၼႂ်းထၢင်ယေႇဢဵင်ႇ ၼၼ်ႉၸိုင်၊ သူဢမ်ႇပႆႇႁူႉလူးၵွၼ်ႇႁိုဝ်။-

18ဢၼ်ဢွၵ်ႇၵႃႈၼႂ်းသူပ်းၸမ်ႉ၊ ဢွၵ်ႇသေၵႃႈၼႂ်းႁူဝ်ၸႂ်မႃးလႄႈ ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ။-

19လွင်ႈမၼ်းၸမ်ႉ တၢင်းၵျၢမ်ႇတၢင်းပွင်ဢၼ်ဢမ်ႇလီလႂ်၊ တၢင်းဢၼ်ဢဝ်ဢသၢၵ်ႈၵူၼ်းတၢႆလႂ်၊ တၢင်းဢၼ်ၵူတ်ႉမေးပိူၼ်ႈလႂ်၊ တၢင်းဢၼ်ၽိတ်းပိူင်ႈမႄႈယိင်းဢၼ်လွတ်ႈဢၼ်လႅဝ်းလႂ်၊ တၢင်းဢၼ်လၵ်ႉဢုၵ်ႉၸႃႇၶူဝ်းလဵင်းပိူၼ်ႈလႂ်၊ တၢင်းဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈလႂ်၊ တၢင်းဢၼ်သႄႉသွမ်းၽြႃးပဵၼ်ၸဝ်ႈလႂ် ၸိူဝ်းၼၼ်ႉ ဢွၵ်ႇၵႃႈၼႂ်းႁူဝ်ၸႂ်မႃးလႄႈ၊-

20ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ။ ၵူၺ်းၵႃႈလွင်ႈဢၼ်ဢမ်ႇသုၵ်ႈမိုဝ်းလႄႈၵိၼ်တၢင်းၵိၼ်ၼၼ်ႉၸမ်ႉ၊ ႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ၊ ဝႃႈၼင်ႇၼႆဢေႃႈ။

21ယေႇသူႉ ဢွၵ်ႇသေၵႃႈတီႈၼၼ်ႈလႄႈ ၵႂႃႇၸူးၵႃႈတီႈဝၢၼ်ႈၼွၵ်ႈၼႃးပၢင်ႇ ဝဵင်း တူႉရူႉ တင်းဝဵင်း ၸီႉတုမ်ႇ ပုၼ်ႉသေယဝ်ႉ၊-

22မႄႈယိင်းၵေႃႉၼိုင်ႈ ဢၼ်ပဵၼ်ၸိူဝ်ႉၶိူဝ်းၵူၼ်း ၶႃႇၼၢၼ်ႇ ၼၼ်ႉ ဢွၵ်ႇသေၵႃႈၼႂ်းလႅၼ်လိၼ်ၼၼ်ႉမႃးလႄႈ ႁွင်ႉသႅၼ်ႇလႄႈဝႃႈ၊ ၸဝ်ႈႁဝ်း၊ လုၵ်ႈ တႃႇဝိတ်ႈ တီႈၶႃႈ၊ ဢဵတ်းလူၵဝ်ၶႃႈသေၵမ်းၶႃႈ။ လုၵ်ႈယိင်းၵဝ်ၶႃႈ လႆႈၶၢမ်ႇတၢင်းဢၼ်ၽီႁၢႆႉၶဝ်ႈၼၼ်ႉၼႃႇလူင်လၢင်ၶႃႈဢေႃႈ၊ ပိၵ်ႉသမ်ႉဝႃႈၼင်ႇၼႆသေၵေႃႈ၊-

23မၼ်းၸဝ်ႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။ တပႄးၸဝ်ႈတင်းလၢႆသုတ်ႉၸပ်းသုတ်ႉၸူး တီႈမၼ်းၸဝ်ႈသေလႄႈ တွင်းပၢၼ်ႇလဝ်ႊလၢတ်ႈလႄႈဝႃႈ၊ ႁႂ်ႈမႄႈယိင်းၼၼ်ႉ ၶိုၼ်းမိူဝ်းၵႂႃႇသေၵမ်းၶႃႈ။ မၼ်းႁွင်ႉသႅၼ်ႇလႄႈၸွမ်းပႃႈလင်ႁဝ်းၶႃႈယူႇၶႃႈဢေႃႈ၊ ဝႃႈၼင်ႇၼႆဢေႃႈ။-

24မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ လိူဝ်သေၵႃႈတီႈသူဝ်းဢၼ်ႁၢႆၵႂႃႇ ဢၼ်ဝႃႈၸိူဝ်ႉၶိူဝ်း ဢီႉသရေႇလႃႉ ၼၼ်ႉ၊ ၵဝ်ဢမ်ႇၶၢမ်ႇတၢင်းဢၼ်ပွႆႇၸႂ်ႉမႃး၊ ဝႃႈၼင်ႇၼႆဢေႃႈ။-

25မႄႈယိင်းၼၼ်ႉၵေႃႈ သုတ်ႉၸပ်းသုတ်ႉၸူးလႄႈ ၶုပ်ႉမူပ်ႇသေယဝ်ႉ၊ လဝ်ႊလၢတ်ႈလႄႈဝႃႈ၊ ၸွႆႈထႅမ်မႃႉၸႃႉၵဝ်ၶႃႈသေၵမ်းၶႃႈ၊-

26မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ဢမ်ႇလီဢဝ်တၢင်းၵိၼ်လုၵ်ႈလၢင်းၶျႃးပၼ်တီႈမႃ၊ ဝႃႈၼင်ႇၼႆဢေႃႈ။-

27မႄႈယိင်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ။ မႃဢၼ်ဝႃႈၸမ်ႉ၊ ၸၢင်ႈၵိၼ်ဢၼ်ယွႆႈဢၼ်ယႅမ်း ဢၼ်တူၵ်းၵႃႈတီႈၶူင်ႇတီႈၵိၼ် ၸဝ်ႈၶဝ်ၼၼ်ႉၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

28ယေႇသူႉ ၵေႃႈ ၶိုၼ်းလၢတ်ႈလႄႈဝႃႈ၊ မႄႈယိင်းဢိူၺ်း၊ တၢင်းယုမ်ႇမၢတ်ႈမႂ်းယႂ်ႇၼႃႇယဝ်ႉ။ ၵႃႈၼင်ႇဢၼ်မႂ်းမီးဢလူဝ်ႇၼၼ်ႉ ႁႂ်ႈပဵၼ်တီႈမႂ်းတႃႉ၊ ဝႃႈၼင်ႇၼႆဢေႃႈ။ ၸႃႉၸဵမ်ၶိင်ႇၼႃႇရီႇၼၼ်ႉလႄႈ လုၵ်ႈယိင်းမႄႈယိင်းၼၼ်ႉ ၶႅၼ်းမႃးဢေႃႈ။

29ယေႇသူႉ ၸင်ႇလုၵ်ႉသေၵႃႈတီႈၼၼ်ႈၵႂႃႇလႄႈ ႁွတ်ႈထိုင်ၵႃႈႁိမ်းၼွင် ၵႃႇလီႉလႄး ပုၼ်ႉသေယဝ်ႉ၊ ၶိုၼ်ႈၵႃႈၼိူဝ်လွႆလႄႈ ၼင်ႈယူႇဢေႃႈ။-

30ၵူၼ်းဢၼ်ၸူႉဢၼ်တုမ်ၼမ်ၼႃႇ မႃးၵႃႈတီႈမၼ်းၸဝ်ႈလႄႈ ဢဝ်ၶဝ်ၸိူဝ်းဢၼ်တိၼ်ဢမ်ႇလီလႂ်၊ ၶဝ်ၸိူဝ်းဢၼ်တႃမွတ်ႇလႂ်၊ ၶဝ်ၸိူဝ်းဢၼ်ဢႃႉလႂ်၊ ၶဝ်ၸိူဝ်းဢၼ်ဢၢင်ႇၵႃႇလူႉလႂ်၊ ဢိၵ်ႇတင်းတၢင်ႇၵေႃႉတၢင်ႇၵူၼ်းတင်းလၢႆမႃးလႄႈ ၶျႃးဝႆႉၵႃႈတီႈႁိမ်းတိၼ်မၼ်းၸဝ်ႈဢေႃႈ။ မၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ႁၢႆဢေႃႈ။-

31ပိူဝ်ႈၼႆလႄႈ မိူဝ်ႈဢၼ်ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ႁၼ်ၶဝ်ၸိူဝ်းဢၼ် ဢႃႉလႆႈလၢတ်ႈၵႂၢမ်း၊ ၶဝ်ၸိူဝ်းဢၼ်ဢၢင်ႇၵႃႇလူႉ လႆႈလီမႃး၊ ၶဝ်ၸိူဝ်းဢၼ်တိၼ်ဢမ်ႇလီ လႆႈပႆတၢင်းၵႂႃႇ၊ ၶဝ်ၸိူဝ်းဢၼ်တႃမွတ်ႇ လႆႈႁၼ်မႃးၼၼ်ႉၸိုင်၊ ၶဝ်ဢၢမ်းၼႃႇလႄႈ ယွင်ႈယေႃးမုၼ်ၽြႃးပဵၼ်ၸဝ်ႈ ၸိူဝ်ႉၶိူဝ်း ဢီႉသရေႇလႃႉ ဢေႃႈ။

32မိူဝ်ႈၼၼ်ႉ ယေႇသူႉ ႁွင်ႉဢဝ် တပႄးၸဝ်ႈတင်းလၢႆမႃးလႄႈဝႃႈ၊ ၵဝ်ဢဵတ်းလူၵူၼ်းဢၼ်ၸူႉဢၼ်တုမ်ၸိူဝ်းၼႆႉဢေႃႈ။ ၶဝ်မီးယူႇလူၺ်ႈၵၼ်တင်းၵဝ် လႆႈသၢမ်ဝၼ်းတဵမ်တဵမ်ယဝ်ႉ။ ၶဝ်ဢမ်ႇမီးတၢင်းၵိၼ်ၵႃႈသင်သေဢိတ်း။ ပိူဝ်ႈဢၼ်ၵူဝ်ၶဝ်တၵ်းႁိူဝ်ႉ တၵ်းဢူၼ်ႈၵႃႈတၢင်းလႄႈ၊ ၸူဝ်ႈဢၼ်ၶဝ်ဢမ်ႇပႆႇၵိၼ်တၢင်းၵိၼ်ၼၼ်ႉ၊ ၵဝ်ဢမ်ႇမီးဢလူဝ်ႇၶႂ်ႈပွႆႇၶဝ်ၵႂႃႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

33တပႄးၸဝ်ႈၸိူဝ်းၼၼ်ႉၵေႃႈ လဝ်ႊလၢတ်ႈလႄႈဝႃႈ၊ ၵႃႈတီႈၼႂ်းထိူၼ်ႇႁဝ်းၶႃႈတၵ်းလႆႈတၢင်းၵိၼ်ဢၼ် တၵ်းႁႂ်ႈၵူၼ်းၼမ်ၼႃႇထၢၼ်ႇၼႆႉ ပေႃးၵိၼ်ဢိမ်ႇၵိၼ်တဵမ်ၼၼ်ႉၵႃႈတီႈလႂ်ၶႃႈ၊ ဝႃႈၼင်ႇၼႆဢေႃႈ။-

34ယေႇသူႉ ၵေႃႈထၢမ်လႄႈဝႃႈ၊ သူမီးၶဝ်ႈမုၼ်းလၢႆႁူၺ်ႇ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ မီးၶဝ်ႈမုၼ်းၸဵတ်းႁူၺ်ႇ တင်းပႃဢွၼ်ႇဢိတ်းၼိုင်ႈၶႃႈဢေႃႈ၊ ဝႃႈၼင်ႇၼႆဢေႃႈ။-

35မိူဝ်ႈၼၼ်ႉ မၼ်းၸဝ်ႈမီးဢမိင်ႉ ႁႂ်ႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ဢိင်ယူႇၵႃႈၼိူဝ်လိၼ်ဢေႃႈ။-

36မၼ်းၸဝ်ႈ ဢဝ်ၶဝ်ႈမုၼ်းၸဵတ်းႁူၺ်ႇ တင်းပႃၼၼ်ႉ ယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းလႄႈ ပၼ်တီႈတပႄးၸဝ်ႈတင်းလၢႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈ ပၼ်တီႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉဢေႃႈ။-

37ၵူၼ်းတင်းသဵင်ႈတင်းလူင်ၵိၼ်လႄႈ ဢိမ်ႇယဝ်ႉၸင်ႇ၊ ၵဵပ်းသိမ်းဢဝ်ဢၼ်ၵိုတ်း ဢၼ်ႁၵ်းဢၼ်ႁဵၵ်းၸိူဝ်းၼၼ်ႉလႄႈ လႆႈတဵမ်ၸဵတ်းပဵတ်ႈဢေႃႈ။-

38ၵူၼ်းဢၼ်ၵိၼ်ၸိူဝ်းၼၼ်ႉၸမ်ႉ၊ မႄႈယိင်းတင်းလုၵ်ႈဢွၼ်ႇ ဢမ်ႇပႃး၊ ၵူၼ်းၸၢႆးမီးသီႇႁဵင်ဢေႃႈ။-

39မၼ်းၸဝ်ႈ ပွႆႇၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉယဝ်ႉၸင်ႇ၊ ၶီႇႁိူဝ်းလႄႈၵႂႃႇႁွတ်ႈထိုင်ၵႃႈတီႈဝၢၼ်ႈၼွၵ်ႈၼႃးပၢင်ႇ မႃႇၵတလႃႉ ပုၼ်ႉဢေႃႈ။

← Chapter 14 Jump to: Chapter 16 →