Matthew 18

Shan

← Chapter 17 Jump to: Chapter 19 →

1မိူဝ်ႈၼၼ်ႉ တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးတီႈ ယေႇသူႉ လႄႈလဝ်ႊထၢမ်ဝႃႈ၊ ၽူႈလႂ်တၵ်းယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈ ၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

2မၼ်းၸဝ်ႈႁွင်ႉဢဝ်လုၵ်ႈဢွၼ်ႇၵေႃႉၼိုင်ႈမႃးလႄႈ ဝႆႉၵႃႈၼႂ်းၵၢင်ၶဝ်ယဝ်ႉၸင်ႇ လၢတ်ႈလႄႈဝႃႈ၊-

3ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ပေႃးသူဢမ်ႇၶၢႆႉပုတ်ႈသေလႄႈ ပဵၼ်ၸိူဝ်ႉၼင်ႇလုၵ်ႈဢွၼ်ႇၼႆႉၸိုင်၊ သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉ။-

4ပိူဝ်ႈၼႆလႄႈ ၽူႈလႂ်သေဢမ်ႇဝႃႈ၊ ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉ၊ ၵေႃႉၼၼ်ႉတၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇသေပိူၼ်ႈ ၵႃႈၼႂ်းမိူင်းၵၢင်ႁၢဝ်ၸဝ်ႈဢေႃႈ။-

5ၽူႈလႂ်သေဢမ်ႇဝႃႈ၊ ၵေႃႉဢၼ်ဢိင်ပိုင်ႈၸိုဝ်ႈသဵင်ၵဝ်သေလႄႈ ႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆသေၵေႃႉသေၵူၼ်းၼၼ်ႉ၊ ၵေႃႉၼၼ်ႉ ႁပ်ႉတုင်းဢဝ်ၵဝ်ဢေႃႈ။

6ၽူႈလႂ်သေဢမ်ႇဝႃႈ၊ ၵေႃႉဢၼ်ႁႂ်ႈလုၵ်ႈဢွၼ်ႇဢၼ်ယုမ်ႇမၢတ်ႈၵဝ်သေၵေႃႉသေၵူၼ်းၼႆႉ ၶီႈလိုတ်းလႄႈလူမ်ႉၼၼ်ႉ၊ တီႈၵေႃႉၼၼ်ႉ၊ ပေႃးမၼ်းလႆႈၶၢမ်ႇတၢင်းဢၼ် ဢဝ်မၢၵ်ႇႁိၼ်လူၺ်ႁွႆႈသႂ်ႇၵႃႈတီႈၶေႃႈသေလႄႈ ပွႆႇၸူမ်လူင်းၵႃႈၼႂ်းၼမ်ႉပၢင်ႇလၢႆႇ တီႈဢၼ်လိုၵ်ႉၼၼ်ႉၸိုင်၊ ယဵင်ႈၶႅၼ်းတၵ်းလီဢေႃႈ။

7ၵွပ်ႈပိူဝ်ႈဢၼ်မီးလွင်ႈတၢင်းဢၼ်ၶီႈလိုတ်းလႄႈ လူမ်ႉၼမ်ၼႃႇလႄႈ လေႃးၵႃႉၼႆႉ မီးဢႃႉမင်ႇၵလႃႇဢေႃႈ။ လွင်ႈတၢင်းဢၼ် ၶီႈလိုတ်းလႄႈလူမ်ႉၼမ်ၼႃႇၼၼ်ႉ တၵ်းလႆႈမီးဢေႃႈ။ ၼႂ်းဝႃႈၼၼ်သေၵေႃႈ ၵေႃႉဢၼ်ႁႂ်ႈလွင်ႈတၢင်းဢၼ်ၶီႈလိုတ်းလႄႈလူမ်ႉပိၼ်ႈၼၼ်ႉ မီးဢႃႉမင်ႇၵလႃႇဢေႃႈ။

8တိၼ်မႂ်းမိုဝ်းမႂ်းၼၼ်ႉ၊ ပေႃးႁႂ်ႈမႂ်းၶီႈလိုတ်းလႄႈလူမ်ႉၸိုင်၊ တႅပ်းပႅတ်ႈသေတႃႉ။ တၢင်းဢၼ်တိၼ်မိုဝ်းလူႉလႄႈ လႆႈၶဝ်ႈၵႃႈၼႂ်းတၢင်းဢၼ် ဢသၢၵ်ႈလိပ်းပုၼ်ႉၼၼ်ႉ ယဵင်ႈၶႅၼ်းတၵ်းလီသေတၢင်းဢၼ် မီးတိၼ်သွင်ၶွၼ် မိုဝ်းသွင်ၶွၼ်လႄႈလႆႈၶၢမ်ႇတၢင်းဢၼ်ၶျႃးတူၵ်းသႂ်ႇ ၵႃႈၼႂ်းၽႆးထႃႇဝရႃႉပုၼ်ႉဢေႃႈ။-

9မၢၵ်ႇတႃမႂ်းၵေႃႈ ပေႃးႁႂ်ႈမႂ်းၶီႈလိုတ်းလႄႈလူမ်ႉၸိုင်၊ ၶွၵ်းဢွၵ်ႇပႅတ်ႈသေတႃႉ။ တၢင်းဢၼ်မီးတႃၶွၼ်ၼိုင်ႈလႄႈ လႆႈၶဝ်ႈၵႃႈၼႂ်းတၢင်းဢၼ် ဢသၢၵ်ႈလိပ်းပုၼ်ႉၼၼ်ႉ၊ ယဵင်ႈၶႅၼ်းတၵ်းလီသေတၢင်းဢၼ် မီးတႃသွင်ၶွၼ်လႄႈ လႆႈၶၢမ်ႇတၢင်းဢၼ်ၶျႃးတူၵ်းသႂ်ႇ ၵႃႈၼႂ်းၽႆးငရၢႆးပုၼ်ႉဢေႃႈ။

10လွင်ႈၼင်ႇႁိုဝ် သူတၵ်းဢမ်ႇႁဵတ်းဢမ်ႇပေႃးၼင်ႇႁိုဝ်တီႈလုၵ်ႈဢွၼ်ႇ ၸိူဝ်းၼႆႉသေၵေႃႉသေၵူၼ်းၸိုင်၊ ႁဵတ်းသတီႉတႃႉ။ ၵဝ်ဝႃႈတီႈသူၸမ်ႉ၊ တမၢၼ်ႇၵၢင်ႁၢဝ်လုၵ်ႈဢွၼ်ႇတင်းလၢႆၸိူဝ်းၼႆႉ လႆႈတူၺ်းလႆႈႁၼ်ၼႃႈပေႃႈၵဝ် ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉယူႇတႃႇသေႇဢမ်ႇထၢတ်ႇဢေႃႈ။-

11လွင်ႈမၼ်းၸမ်ႉ လုၵ်ႈၵူၼ်းမႃးႁႂ်ႈလႆႈၵႄႇၶျွတ်ႈဢဝ် ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ။

12သူထၢင်ႇၸိူဝ်ႉၼင်ႇႁိုဝ်။ တီႈၵေႃႉဢၼ်မီးသူဝ်းပၢၵ်ႇၼိုင်ႈၼၼ်ႉ၊ ပေႃးတူဝ်ၼိုင်ႈၽိတ်းတၢင်းလႄႈႁၢႆၵႂႃႇၸိုင်၊ မၼ်းၸၢင်ႈဢဝ်သူဝ်းၵဝ်ႈသိပ်းပၢႆၵဝ်ႈတူဝ် ဝႆႉၵႃႈၼိူဝ်လွႆယဝ်ႉၸင်ႇ၊ ၵႂႃႇႁႃသူဝ်းဢၼ်ၽိတ်းတၢင်းလႄႈႁၢႆၵႂႃႇ တူဝ်ၼိုင်ႈၼၼ်ႉ ဢမ်ႇၸႂ်ႈႁိုဝ်။-

13ပေႃးထူပ်းႁၼ်ယဝ်ႉၸိုင်၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ မၼ်းယဵင်ႈၶႅၼ်းသိူဝ်းၸူမ်းလွင်ႈတူဝ်ၼၼ်ႉ ၼႃႇသေလွင်ႈသူဝ်းဢၼ်ဢမ်ႇၽိတ်းတၢင်းလႄႈ ဢမ်ႇႁၢႆၵႂႃႇၵဝ်ႈသိပ်းပၢႆၵဝ်ႈတူဝ်ၸိူဝ်းၼၼ်ႉဢေႃႈ။-

14မိူၼ်ၼင်ႇၼၼ် ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ ဢမ်ႇမီးဢလူဝ်ႇၶႂ်ႈႁႂ်ႈလုၵ်ႈဢွၼ်ႇၸိူဝ်းၼႆႉ လူႉလႅဝ်သေၵေႃႉသေၵူၼ်း။

15ပေႃးပီႈၼွင်ႉမႂ်းၽိတ်းပိူင်ႈမႂ်းၸိုင်၊ ၵႂႃႇလႄႈ ၽုၺ်ႇဢွၵ်ႇၼႄပျႃး ဢပႅတ်ႈမၼ်း ဝူင်ႈၵၢင်မႂ်းတင်းမၼ်းၵူၺ်းတႃႉ။ ပေႃးမၼ်းထွမ်ႇမႂ်းၸိုင်၊ မႂ်းလႆႈပီႈၼွင်ႉမႂ်းယဝ်ႉ။-

16ဢမ်ႇၼၼ် ပေႃးမၼ်းဢမ်ႇထွမ်ႇမႂ်းၸိုင်၊ ႁွင်ႉဢဝ်ၵူၼ်းသွင်ၵေႃႉသၢမ်ၵေႃႉ ၵႂႃႇလူၺ်ႈၵၼ်တင်းမႂ်း ႁႂ်ႈၵႂၢမ်းၵႃႈမီးတင်းသဵင်ႈတင်းလူင် တႄႇပဵၼ်တီႈသူပ်းၵူၼ်းသွင်ၵေႃႉသၢမ်ၵေႃႉၼၼ်ႉထႅင်ႈလူးၵွၼ်ႇတႃႉ။-

17ပေႃးမၼ်းဢမ်ႇထွမ်ႇၵႂၢမ်းၶဝ်ၼၼ်ႉၸိုင်၊ လၢတ်ႈတီႈၸိူဝ်းၸဝ်ႈတႃႉ။ ပေႃးမၼ်းဢမ်ႇထွမ်ႇၸိူဝ်းၸဝ်ႈၸိုင်၊ ႁႂ်ႈမၼ်းပဵၼ်ၸိူဝ်ႉၼင်ႇၵူၼ်းသႃႇသၼႃႇပႃႉ ဢိၵ်ႇတင်းၵူၼ်းၵဵပ်းၶွၼ်ႇၼၼ်ႉတီႈမႂ်းတႃႉ။

18ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵႃႈဢၼ်သူမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉ တၵ်းမတ်ႉၽုၵ်ႇဝႆႉယူႇ ၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ၵႃႈဢၼ်သူ ပွႆႇလွတ်ႈၵႃႈၼိူဝ်လိၼ်မိူင်းၼႆႉၼၼ်ႉ တၵ်းပွႆႇလွတ်ႈယူႇ ၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။

19လႆႈသမ်ႉ ၵဝ်ဝႃႈတီႈသူထႅင်ႈၵမ်းၼိုင်ႈၸမ်ႉ၊ ၼႂ်းသူ ပေႃးသွင်ၵေႃႉၸႂ်မိူၼ်ၵၼ်ၵႃႈၼိူဝ်လိၼ်မိူင်းၼႆႉၼႂ်းလွင်ႈတၢင်းဢၼ် ၶဝ်တၵ်းယွၼ်းဢဝ်သေၸိူဝ်ႉသေပိူင်ၼၼ်ႉၸိုင်၊ ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ တၵ်းပၼ်တီႈၶဝ်ဢေႃႈ။-

20လွင်ႈမၼ်းၸမ်ႉ တီႈလႂ်တၼ်းလႂ်သေဢမ်ႇဝႃႈ၊ ပေႃးၵူၼ်း သွင်ၵေႃႉသၢမ်ၵေႃႉ ဢိင်ပိုင်ႈၸိုဝ်ႈသဵင်ၵဝ်သေလႄႈ ၸူႉၵၼ်တုမ်ၵၼ်ၸိုင်၊ ၵဝ်မီးယူႇၵႃႈၼႂ်းၵၢင်ၶဝ်ၵႃႈတီႈၼၼ်ႈဢေႃႈ၊ ဝႃႈၼင်ႇၼႆဢေႃႈ။

21မိူဝ်ႈၼၼ်ႉ ပေႇတရူႉ ၸင်ႇသုတ်ႉၸပ်းသုတ်ႉၸူးသေလႄႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပီႈၼွင်ႉၵဝ်ၶႃႈ ၽိတ်းပိူင်ႈၵဝ်ၶႃႈလႄႈ ၵဝ်ၶႃႈတၵ်းလႆႈပွႆႇလွတ်ႈဢပႅတ်ႈမၼ်းလၢႆပွၵ်ႈၶႃႈ။ ႁႂ်ႈထိုင်ႁွတ်ႈၸဵတ်းပွၵ်ႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

22ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ဢမ်ႇဝႃႈ ႁႂ်ႈထိုင်ႁွတ်ႈၸဵတ်းပွၵ်ႈ။ ၵဝ်ဝႃႈႁႂ်ႈထိုင်ႁွတ်ႈ ၸဵတ်းသိပ်း ၸဵတ်းပွၵ်ႈဢေႃႈ။-

23ပိူဝ်ႈၼႆလႄႈ မိူင်းၵၢင်ႁၢဝ်ၸဝ်ႈ မိူၼ်ၸိူဝ်ႉၼင်ႇၶုၼ်လူင်ၵေႃႉၼိုင်ႈ ဢၼ်မီးဢလူဝ်ႇၶႂ်ႈဢဝ် ၸရၢင်းၶႃႈၵူၼ်းတူဝ်ၸဝ်ႈၵဝ်ႇတင်းလၢႆၼၼ်ႉဢေႃႈ။-

24ၼႂ်းမိူဝ်ႈဢၼ်ယင်းတိုၵ်ႉၸႃႉဢဝ်ၸရၢင်းယူႇၼၼ်ႉၸိုင်၊ ၶဝ်ဢဝ်ၵူၼ်းဢၼ်ထုၵ်ႇၼီႈ တလၢၼ်ႇတၢၼ်ႇ သႅၼ်ၼိုင်ႈၼၼ်ႉၵေႃႉၼိုင်ႈ မႃးတီႈၸဝ်ႈၼၼ်ႉဢေႃႈ။-

25ၵွပ်ႈပိူဝ်ႈဢၼ်ၵေႃႉၼၼ်ႉ ဢမ်ႇမီးတီႈဢၼ်တၵ်းတႅၼ်းၼီႈၼၼ်ႉလႄႈ၊ ၸဝ်ႈမၼ်းၸီႇယၢင်ႇႁႂ်ႈဢဝ်ၸႃႉၸဵမ်တူဝ်မၼ်း၊ လုၵ်ႈလၢင်းမၼ်း၊ မေးမၼ်း တင်းဢုၵ်ႉၸႃႇၶူဝ်းလဵင်းမၼ်း ၵႃႈမီးတင်းသဵင်ႈတင်းလူင် ၶၢႆပႅတ်ႈသေလႄႈ တႅၼ်းၼီႈၼၼ်ႉဢေႃႈ။-

26ၶႃႈၼၼ်ႉ ၶုပ်ႉမူပ်ႇၵူမ်ႈၵွမ်းယူႇသေလႄႈ လဝ်ႊလၢတ်ႈလႄႈဝႃႈ၊ ယိူၼ်ႉၶၢမ်ႇၵဝ်ၶႃႈသေၵမ်းတီႈၶႃႈ၊ ၼီႈၵႃႈမီးၼၼ်ႉၸိုင် တၵ်းတႅၼ်းယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

27ၸဝ်ႈၶႃႈၼၼ်ႉ မီးၸႂ်ဢၼ်ဢဵတ်းလူသေယဝ်ႉ၊ ပၼ်ၵတ်းယဵၼ်ၶျၢမ်းသႃႇတီႈမၼ်းလႄႈ ပွႆႇလွတ်ႈၼီႈမၼ်းၵႃႈမီးတင်းသဵင်ႈတင်းလူင်ဢေႃႈ။

28ၶႃႈၼၼ်ႉဢွၵ်ႇၵႂႃႇလႄႈ ထူပ်းႁၼ်ၶႃႈၼင်ႇၵၼ် ဢၼ်ထုၵ်ႇၼီႈတီႈမၼ်း တေႇၼႃႇရီႇ ပၢၵ်ႇၼိုင်ႈၼၼ်ႉၵေႃႉၼိုင်ႈသေယဝ်ႉ၊ ယိပ်းငႅၼ်းၶေႃးမၼ်းသေလႄႈ လၢတ်ႈလႄႈဝႃႈ၊ တႅၼ်းပၼ်ဢၼ်မႂ်းထုၵ်ႇပၼ်တီႈၵဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။-

29ၵေႃႉဢၼ်ပဵၼ်ၶႃႈၼင်ႇၵၼ်ၼၼ်ႉ ၶုပ်ႉမူပ်ႇသေလႄႈတွင်းပၢၼ်ႇလႄႈဝႃႈ၊ ယိူၼ်ႉၶၢမ်ႇၵဝ်ၶႃႈသေၵမ်းၶႃႈ။ ၼီႈၵႃႈမီးၼၼ်ႉၸိုင်၊ တၵ်းတႅၼ်းယူႇၶႃႈဢေႃႈ၊ ဝႃႈၼႆ၊-

30ပိၵ်ႉသမ်ႉဝႃႈၼင်ႇၼႆသေၵေႃႈ မၼ်းယင်းဢမ်ႇထွမ်ႇလႄႈ ၵႂႃႇသေယဝ်ႉ၊ ဢဝ်မၼ်းၶင်ဝႆႉၵႃႈၼႂ်းထွင်ႇ တေႃႇထိုင်ႁွတ်ႈတႅၼ်းပၼ်ၼီႈၼၼ်ႉဢေႃႈ။-

31မိူဝ်ႈဢၼ်ၶႃႈၼင်ႇၵၼ် တၢင်ႇၵေႃႉတင်းလၢႆႁၼ်လွင်ႈတၢင်းၼၼ်ႉၸိုင်၊ ၶဝ်ၸဵပ်းၸႂ်ၼႃႇလူင်လၢင်လႄႈ ၵႂႃႇလဝ်ႊလၢတ်ႈၼႄပျႃးလွင်ႈၵႃႈဢၼ် မၼ်းႁဵတ်းတီႈၵေႃႉၼၼ်ႉ တင်းသဵင်ႈတင်းလူင်တီႈၸဝ်ႈၶဝ်ၼၼ်ႉဢေႃႈ။-

32မိူဝ်ႈၼၼ်ႉ ၸဝ်ႈမၼ်းႁွင်ႉမၼ်းမႃးသေလႄႈ လၢတ်ႈလႄႈဝႃႈ၊ ၶႃႈဢၼ်ႁၢႆႉမိူၵ်ႈၼႆႉဢိူၺ်း၊ ပိူဝ်ႈဢၼ်မႂ်းတွင်းပၢၼ်ႇၵဝ်လႄႈ ၵဝ်ပွႆႇလွတ်ႈၼီႈတီႈမႂ်းတင်းသဵင်ႈတင်းမူတ်းဢေႃႈ။-

33ၸိူဝ်ႉၼင်ႇဢၼ်ၵဝ်ဢဵတ်းလူမႂ်းၼၼ်ႉ၊ မႂ်းၵေႃႈဢမ်ႇထုၵ်ႇလီဢဵတ်းလူၵေႃႉဢၼ်ပဵၼ်ၶႃႈၼင်ႇၵၼ်ၼၼ်ႉႁိုဝ်။ ဝႃႈၼင်ႇၼႆယဝ်ႉၸင်ႇ၊-

34ၸႂ်မႆႈၶႆႈၸႃႉလႄႈ ဢဝ်မၼ်းဢၢပ်ႈပၼ်ၼႂ်းမိုဝ်းထွင်ႇမူးတင်းလၢႆ တေႃႇထိုင်ႁွတ်ႈၸူဝ်ႈဢၼ်မၼ်းဢမ်ႇပႆႇတႅၼ်းပၼ်ၼီႈတင်းသဵင်ႈတင်းမူတ်းၼၼ်ႉဢေႃႈ။-

35မိူၼ်ၼင်ႇၼၼ် ပေႃးသူဢမ်ႇပႃးႁူဝ်ၸႂ်သေလႄႈ ပွႆႇလွတ်ႈဢပႅတ်ႈတီႈပီႈၼွင်ႉၵၼ် ၵေႃႉၼိုင်ႈလႄႈၵေႃႉၼိုင်ႈၼၼ်ႉၸိုင်၊ ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ တၵ်းၸီႇယၢင်ႇသူၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။

← Chapter 17 Jump to: Chapter 19 →