Matthew 9

Shan

← Chapter 8 Jump to: Chapter 10 →

1မိူဝ်ႈၼၼ်ႉ မၼ်းၸဝ်ႈ ၸင်ႇၶီႇႁိူဝ်းလႄႈ ၶိုၼ်းၶၢမ်ႈၵႂႃႇသေယဝ်ႉ၊ ႁွတ်ႈထိုင်ၵႃႈတီႈဝဵင်းတူဝ်ၸဝ်ႈၵဝ်ႇပုၼ်ႉဢေႃႈ။-

2ၶဝ်ဢဝ်ၵူၼ်းဢၼ်တိၼ်တၢႆမိုဝ်းတၢႆလႄႈ ၼွၼ်းယူႇၵႃႈၼိူဝ်တီႈၼွၼ်းၼၼ်ႉၵေႃႉၼိုင်ႈ မႃးသူင်ႇၵႃႈတီႈမၼ်းၸဝ်ႈဢေႃႈ။ ယေႇသူႉ ႁၼ် တၢင်းဢၼ်ယုမ်ႇမၢတ်ႈၶဝ်သေယဝ်ႉ၊ လၢတ်ႈတီႈၵေႃႉဢၼ်တိၼ်တၢႆမိုဝ်းတၢႆၼၼ်ႉလႄႈဝႃႈ၊ လုၵ်ႈၵဝ်ဢိူၺ်း၊ ယႃႇပေမႆႈၸႂ်။ ဢပႅတ်ႈမႂ်းၸိုင်ပွႆႇလွတ်ႈယဝ်ႉ၊ ဝႃႈၼင်ႇၼႆဢေႃႈ။-

3ၵူၼ်းထုတ်ႇၵျၢမ်းၵမ်ႈၽွင်ႈ ထၢင်ႇၼႂ်းၸႂ်လႄႈဝႃႈ၊ ၵေႃႉၼႆႉ လၢတ်ႈပူၼ်ႉလၢတ်ႈလိူဝ် ၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။-

4ယေႇသူႉ ႁူႉႁၼ်တၢင်းၵျၢမ်ႇတၢင်းပွင်ၶဝ်သေယဝ်ႉ၊ လၢတ်ႈလႄႈဝႃႈ၊ ၼႂ်းၸႂ်သူႁဵတ်းသင်လႄႈ ၵျၢမ်ႇပွင်ဢၼ်ဢမ်ႇလီၼင်ႇႁိုဝ်။-

5ၵႂၢမ်းဢၼ်လႂ်ယဵင်ႈၶႅၼ်းလၢတ်ႈငၢႆႈ။ ဢပႅတ်ႈမႂ်းၸိုင်ပွႆႇလွတ်ႈယဝ်ႉ၊ ဢၼ်ဝႃႈၼင်ႇၼႆၼၼ်ႉ လၢတ်ႈငၢႆႈႁိုဝ်။ မႂ်းလုၵ်ႉလႄႈပႆတၢင်းၵႂႃႇတႃႉ၊ ဢၼ်ဝႃႈၼင်ႇၼႆၼၼ်ႉ လၢတ်ႈငၢႆႈႁိုဝ်။-

6ၼင်ႇႁိုဝ်သူတၵ်းႁူႉလွင်ႈဢၼ် လုၵ်ႈၵူၼ်းပိူင်ႇပွႆႇလွတ်ႈဢပႅတ်ႈ ၵႃႈၼိူဝ်လိၼ်မိူင်း ဝႃႈၼႆ၊ မၼ်းၸဝ်ႈသမ်ႉလၢတ်ႈတီႈၵေႃႉဢၼ် တိၼ်တၢႆမိုဝ်းတၢႆၼၼ်ႉထႅင်ႈလႄႈဝႃႈ၊ လုၵ်ႉဢဝ်တီႈၼွၼ်းမႂ်းလႄႈ မိူဝ်းၵႂႃႇၵႃႈတီႈႁိူၼ်းမႂ်းပုၼ်ႉတႃႉ၊ ဝႃႈၼင်ႇၼႆဢေႃႈ။-

7ၵေႃႉၼၼ်ႉၵေႃႈ လုၵ်ႉလႄႈမိူဝ်းၵႂႃႇ ၵႃႈတီႈႁိူၼ်းမၼ်းပုၼ်ႉသေဢေႃႈ။-

8ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ၊ မိူဝ်ႈဢၼ်ႁၼ် ၸိူဝ်ႉၼင်ႇၼၼ် ၼၼ်ႉၸိုင်၊ ဢၢမ်းၼႃႇလူင်လၢင်လႄႈ ယွင်ႈယေႃးၽြႃးပဵၼ်ၸဝ်ႈ ဢၼ်ဢဝ်တၼ်းၶူဝ်းၸိူဝ်ႉၼင်ႇၼၼ် ဢၢပ်ႈပၼ် တီႈၵူၼ်းၼၼ်ႉဢေႃႈ။

9ယေႇသူႉ ၼၼ်ႉ မိူဝ်ႈဢၼ်လုၵ်ႉသေ ၵႃႈတီႈၼၼ်ႈၵႂႃႇၼၼ်ႉၸိုင်၊ ထူပ်းႁၼ်ၵေႃႉၼိုင်ႈ ဢၼ်လႆႈႁွင်ႉႁဵၵ်ႈၸိုဝ်ႈ မၢတ်ႈထႄႇ ၼၼ်ႉ ၼင်ႈယူႇၵႃႈတီႈသုမ်ႉထဵင်ၵဵပ်းၶွၼ်ႇလႄႈလၢတ်ႈတီႈမၼ်းၼၼ်ႉလႄႈဝႃႈ၊ ၸွမ်းပႃႈလင်ၵဝ်တႃႉ၊ ဝႃႈၼင်ႇၼႆယဝ်ႉၸင်ႇ၊ ၵေႃႉၼၼ်ႉၵေႃႈ လုၵ်ႉၸွမ်းပႃႈလင်မၼ်းၸဝ်ႈဢေႃႈ။

10လိုၼ်းၼၼ်ႉၸင်ႇ၊ ၼႂ်းမိူဝ်ႈဢၼ်မၼ်းၸဝ်ႈဢိင်ယူႇ ႁိမ်းတီႈၵိၼ်ၵႃႈၼႂ်းႁိူၼ်းယူႇၼၼ်ႉၸိုင်၊ ၵူၼ်းၵဵပ်းၶွၼ်ႇတင်းၵူၼ်းႁၢႆႉၼမ်ၼႃႇ မႃးလႄႈဢိင်လူၺ်ႈၵၼ်တင်းမၼ်းၸဝ်ႈဢိၵ်ႇတင်း တပႄးၸဝ်ႈတင်းလၢႆ ၵႃႈႁိမ်းတီႈၵိၼ်ၼၼ်ႉဢေႃႈ။-

11ၽႃႇရီႉသႄး ၸိူဝ်းၼၼ်ႉႁၼ်သေယဝ်ႉ၊ လၢတ်ႈတီႈတပႄးၸဝ်ႈတင်းလၢႆ လႄႈဝႃႈ၊ ႁဵတ်းႁိုဝ်လႄႈသြႃႇသူ ၵိၼ်လူၺ်ႈၵၼ်တင်းၵူၼ်းၵဵပ်းၶွၼ်ႇတင်း ၵူၼ်းႁၢႆႉတင်းလၢႆယူႇၼင်ႇႁိုဝ်။ ဝႃႈၼင်ႇၼႆဢေႃႈ၊-

12မၼ်းၸဝ်ႈၼၼ်ႉ မိူဝ်ႈဢၼ်ငိၼ်းၸိုင်လၢတ်ႈလႄႈဝႃႈ၊ ၶဝ်ၸိူဝ်းဢၼ် ယူႇလီၼၼ်ႉ ဢမ်ႇလူဝ်ႇမေႃယႃ။ ၶဝ်ၸိူဝ်းဢၼ်မီး တၢင်းၶႆႈတၢင်းပဵၼ်ၼၼ်ႉၵူၺ်း လူဝ်ႇမေႃယႃဢေႃႈ။-

13ၼင်ႇႁိုဝ်သူတၵ်း ႁူႉလွင်ႈဢၼ်ၵႂၢမ်းၵျၢမ်းလိၵ်ႈဢၼ်ဝႃႈ ၵဝ်ၵျိူၵ်ႈ တၢင်းႁၵ်ႉၵရူႉၼႃႇ လိူဝ်တွၼ်းသေ တၢင်းဢၼ်ပုၵ်ႈၸေႃႇယိတ်ႈဢေႃႈ၊ ဝႃႈၼင်ႇၼႆၼၼ်ႉ ပဵၼ်ၸိူဝ်ႉၼင်ႇႁိုဝ်ၼၼ်ႉၸိုင်၊ သူၵႂႃႇလႄႈ သွၼ်ဢဝ်တႃႉ။ ၵဝ်မႃးႁႂ်ႈလႆႈ ႁွင်ႉဢဝ် ၵူၼ်းသိုဝ်ႈတေႃႇတင်းလၢႆ ဢမ်ႇၸႂ်ႈ။ ၵဝ်မႃးႁႂ်ႈလႆႈႁွင်ႉဢဝ်ၵူၼ်းႁၢႆႉတင်းလၢႆဢေႃႈ၊ ဝႃႈၼင်ႇၼႆဢေႃႈ။

14မိူဝ်ႈၼၼ်ႉတပႄးၸဝ်ႈ ယူဝ်းႁၢၼ်ႇ တင်းလၢႆ မႃးတီႈမၼ်းၸဝ်ႈလႄႈ လဝ်ႊဝႃႈ၊ ႁဝ်းၶႃႈတင်း ၽႃႇရီႉသႄး တင်းလၢႆ ၵမ်တၢင်းၵိၼ် ၶိူဝ်းၶိူဝ်းယႂ်းယႂ်းယူႇဢေႃႈ။ ႁဵတ်းသင်လႄႈ တပႄးၸဝ်ႈႁဝ်းၸိူဝ်းၼႆႉ ဢမ်ႇၵမ်တၢင်းၵိၼ် ၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။-

15ယေႇသူႉ ၵေႃႈလၢတ်ႈလႄႈဝႃႈ၊ မိူဝ်ႈဢၼ်ၵေႃႉဢၼ် သွင်ႇမင်ႇၵလႃႇ မီးယူႇလူၺ်ႈၵၼ်တင်းၵေႃႉသေႈမၼ်းတင်းလၢႆၼၼ်ႉၸိုင်၊ ၶဝ်ၼၼ်ႉၸၢင်ႈမႆႈၸႂ်ၶီၸႂ်ပွင်ႉၶၢင်းႁိုဝ်။ ၶိင်ႇၵႃႇလႃႉဢၼ်တၵ်းလႆႈဢဝ်ၵေႃႉဢၼ်သွင်ႇမင်ႇၵလႃႇၼၼ်ႉ ၽၢတ်ႇၵၼ်တင်းၵေႃႉသေႈမၼ်းတင်းလၢႆၼၼ်ႉၸိုင် တၵ်းႁွတ်ႈမႃးဢေႃႈ။ ၶိင်ႇမိူဝ်ႈၼၼ်ႉ ၶဝ်တၵ်းၵမ်တၢင်းၵိၼ်ဢေႃႈ။-

16ၽူႈလႂ်ဢမ်ႇဢဝ်ၶူဝ်းမႂ်ႇ ၽုင်ၵုပ်းၶူဝ်းၵဝ်ႇ။ လွင်ႈမၼ်းၸမ်ႉ ၶူဝ်းဢၼ်ၽုင်ၵုပ်းၼၼ်ႉ တၵ်းႁုတ်ႉၸၼ် ၶူဝ်းၵဝ်ႇလႄႈ ႁူးမၼ်းယဵင်ႈၶႅၼ်းတၵ်းႁၢႆႉဢေႃႈ။-

17ပိူင်လဵဝ်ၵၼ်၊ ဢမ်ႇဢဝ်ၼမ်ႉၸပိတ်ႈ ဢၼ်မႂ်ႇသႂ်ႇၼႂ်း ထူင်ၼင်ဢၼ်ၵဝ်ႇ။ ပေႃးသႂ်ႇၸိုင်၊ ထူင်ၼင်ၼၼ်ႉ တၵ်းတႅၵ်ႇဢေႃႈ။ ၼမ်ႉၸပိတ်ႈတၵ်းႁူဝ်ႈလႄႈ ထူင်ၼင်ၵေႃႈ တၵ်းလူႉတၵ်းလႅဝ်ဢေႃႈ။ ၼမ်ႉၸပိတ်ႈ ဢၼ်မႂ်ႇၼၼ်ႉၸိုင်၊ ၸၢင်ႈသႂ်ႇၼႂ်းထူင်ၼင် ဢၼ်မႂ်ႇဢေႃႈ။ ပေႃးသႂ်ႇၸိုင်၊ တင်းသွင်ၸိူဝ်ႉသွင်ပိူင် ဢမ်ႇလူႉဢမ်ႇလႅဝ်၊ ဝႃႈၼင်ႇၼႆဢေႃႈ။

18ၼႂ်းမိူဝ်ႈဢၼ် မၼ်းၸဝ်ႈလၢတ်ႈၵႂၢမ်းၼႆႉ ယူႇၼၼ်ႉၸိုင်၊ ၵူၼ်းဢၼ် ပဵၼ်ၵႄႇပဵၼ်ႁူဝ် ၵေႃႉၼိုင်ႈမႃး ၶုပ်ႉမူပ်ႇယူႇသေလႄႈ လဝ်ႊလၢတ်ႈလႄႈဝႃႈ၊ လုၵ်ႈယိင်းၵဝ်ၶႃႈၵေႃႉၼိုင်ႈ တၢႆတေႃႈလဵဝ်ၼႆႉယဝ်ႉၶႃႈဢေႃႈ။ ၼႂ်းဝႃႈၼၼ်သေၵေႃႈ ပေႃးၸဝ်ႈႁဝ်းၵႂႃႇလႄႈ ဢဝ်မိုဝ်းတၢင်ႇၵႃႈၼိူဝ်မၼ်းၸိုင်၊ ဢသၢၵ်ႈမၼ်း တၵ်းၶိုၼ်းလိပ်းမႃးၶႃႈဢေႃႈ၊ ဝႃႈၼင်ႇၼႆဢေႃႈ။-

19ယေႇသူႉ လုၵ်ႉလႄႈ ဢိၵ်ႇတင်းတပႄးၸဝ်ႈတင်းလၢႆ ၸွမ်းပႃႈလင်ၵေႃႉၼၼ်ႉၵႂႃႇဢေႃႈ။

20မိူဝ်ႈၼၼ်ႉ မႄႈယိင်းဢၼ်ၸပ်းတၢင်းပဵၼ် ဢၼ်ထွၵ်ႇလိူတ်ႈလႆႈသိပ်းသွင်ပီႊတဵမ်တဵမ် ယဝ်ႉၼၼ်ႉၵေႃႉၼိုင်ႈ မႃးၵႃႈတီႈၽၢႆႇ တၢင်းလင်မၼ်းၸဝ်ႈသေလႄႈ တိူဝ်ႉယိပ်းပူႈၶူဝ်းမၼ်းၸဝ်ႈဢေႃႈ။-

21လွင်ႈမၼ်းၸမ်ႉ မၼ်းထၢင်ႇၼႂ်းၸႂ်လႄႈဝႃႈ၊ ပေႃးၵဝ်လႆႈတိူဝ်ႉလႆႈယိပ်းၶူဝ်းလဵင်းမၼ်းၸဝ်ႈၼၼ်ႉၵူၺ်းၸိုင်၊ တၢင်းပဵၼ်တၵ်းႁၢႆဢေႃႈ၊ ဝႃႈၼင်ႇၼႆဢေႃႈ။-

22ယေႇသူႉ ဝၢႆႇတူၺ်းလႄႈ ႁၼ်မႄႈယိင်းၼၼ်ႉသေယဝ်ႉ၊ လၢတ်ႈလႄႈဝႃႈ၊ လုၵ်ႈယိင်းၵဝ်ဢိူၺ်း၊ ယႃႇပေမႆႈၸႂ်။ တၢင်းယုမ်ႇမၢတ်ႈမႂ်းႁႂ်ႈတၢင်းပဵၼ်မႂ်းႁၢႆယဝ်ႉ၊ ဝႃႈၼင်ႇၼႆဢေႃႈ။ ၸႃႉၸဵမ်ၶိင်ႇ ၼႃႇရီႇၼၼ်ႉလႄႈ မႄႈယိင်းၼၼ်ႉၶႅၼ်းမႃးဢေႃႈ။

23မိူဝ်ႈဢၼ် ယေႇသူႉ ႁွတ်ႈထိုင် ၵႃႈၼႂ်းႁိူၼ်းၵူၼ်းဢၼ် ပဵၼ်ၵႄႇပဵၼ်ႁူဝ်ၼၼ်ႉလႄႈ ႁၼ်ၶဝ်ၸိူဝ်းဢၼ် ပဝ်ႇပီႇပဝ်ႇၼႄးဢိၵ်ႇတင်း ၶဝ်ၸိူဝ်းဢၼ် ဢူၼ်ဢဵၼ်မေႃးမႄးၵၼ်ယူႇ တင်းလၢႆၸိူဝ်းၼၼ်ႉၸိုင်၊ မၼ်းၸဝ်ႈလၢတ်ႈတီႈၶဝ်ၼၼ်ႉလႄႈဝႃႈ၊-

24ဝႄႈပၼ်တၢင်းတႃႉ။ မႄႈယိင်းဢွၼ်ႇၼႆႉတၢႆယဝ်ႉဢမ်ႇၸႂ်ႈ။ မၼ်းၼွၼ်းလပ်းယူႇလႆ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉ ႁဵတ်းပျၢၵ်ႈၶူဝ်မၼ်းၸဝ်ႈသေဢေႃႈ။-

25မၼ်းၸဝ်ႈႁႂ်ႈၶဝ်ၼၼ်ႉ ဢွၵ်ႇၵႂႃႇၵႃႈၼွၵ်ႈသေယဝ်ႉၸင်ႇ၊ ၶဝ်ႈၵႂႃႇၵႃႈၼႂ်းလႄႈ ယိပ်းမိုဝ်းမၼ်းသေယဝ်ႉ၊ မႄႈယိင်းဢွၼ်ႇၼၼ်ႉ လုၵ်ႉၵမ်းလဵဝ်ဢေႃႈ။-

26သတၢင်းသဵင်ၶၢဝ်ႇၼၼ်ႉ သႃႈႁူင်ၸွတ်ႇဝၢၼ်ႈၸွတ်ႇမိူင်းၵႂႃႇဢေႃႈ။

27ၼႂ်းမိူဝ်ႈဢၼ် ယေႇသူႉ လုၵ်ႉသေၵႃႈတီႈၼၼ်ႈ ၵႂႃႇယူႇၼၼ်ႉၸိုင်၊ ၵူၼ်းတႃမွတ်ႇသွင်ၵေႃႉၸွမ်းပႃႈလင်မၼ်းၸဝ်ႈသေလႄႈ ႁွင်ႉဝႃႈ၊ လုၵ်ႈ တႃႇဝိတ်ႈ ၶႃႈဢိူၺ်း၊ ဢဵတ်းလူႁဝ်းၶႃႈ သေၵမ်းၶႃႈ၊ ဝႃႈၼင်ႇၼႆဢေႃႈ။-

28မိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းႁိူၼ်းၸိုင်၊ ၵူၼ်းတႃမွတ်ႇသွင်ၵေႃႉၼၼ်ႉ သုတ်ႉၸပ်းသုတ်ႉၸူး တီႈမၼ်းၸဝ်ႈဢေႃႈ။ မၼ်းၸဝ်ႈၵေႃႈ ထၢမ်လႄႈဝႃႈ၊ လွင်ႈဢၼ်ၵဝ်တၢတ်ႈၼိူင်ႇလႆႈ တီႈႁဵင်းၼႆႉၸိုင် သူယုမ်ႇႁိုဝ်၊ ဝႃႈၼင်ႇၼႆသေယဝ်ႉ၊ ၶဝ်ၵေႃႈ လဝ်ႊလၢတ်ႈလႄႈဝႃႈ၊ ယုမ်ႇၶႃႈဢေႃႈၸဝ်ႈ၊ ဝႃႈၼင်ႇၼႆဢေႃႈ။-

29မိူဝ်ႈၼၼ်ႉ မၼ်းၸဝ်ႈတိူဝ်ႉမၢၵ်ႇတႃၶဝ်သေလႄႈဝႃႈ၊ ၵႃႈၼင်ႇဢၼ်တၢင်းယုမ်ႇမၢတ်ႈသူမီးၼႆႉ ႁႂ်ႈပဵၼ်တီႈသူတႃႉ။-

30မိူဝ်ႈဢၼ်ဝႃႈၼင်ႇၼႆၸိုင်၊ မၢၵ်ႇတႃၶဝ် ၽုၺ်ႇလႅင်းမႃးဢေႃႈ။ ယေႇသူႉ ၵေႃႈ ႁႄႉၶဝ်ႁၢမ်ႈၶဝ်လႄႈဝႃႈ၊ ႁဵတ်းသတီႉတႃႉ။ ယႃႇႁႂ်ႈၽူႈလႂ်ႁူႉ၊ ဝႃႈၼင်ႇၼႆဢေႃႈ။-

31ၼႂ်းဝႃႈၼၼ်သေၵေႃႈ ၶဝ်ၼၼ်ႉၵႂႃႇလႄႈ ႁႂ်ႈသတၢင်းသဵင်ၶၢဝ်ႇမၼ်းၸဝ်ႈသႃႈႁူင်ၸွတ်ႇၵႂႃႇတင်းဝၢၼ်ႈတင်းမိူင်းဢေႃႈ။

32ဝၢႆးလင်ၶဝ်ၼၼ်ႉဢွၵ်ႇၵႂႃႇသေယဝ်ႉ၊ ပိူၼ်ႈဢဝ်ၵူၼ်းဢႃႉ ဢၼ်ၽီႁၢႆႉၶဝ်ႈၼၼ်ႉၵေႃႉၼိုင်ႈ မႃးတီႈမၼ်းၸဝ်ႈဢေႃႈ။-

33မိူဝ်ႈဢၼ်မၼ်းၸဝ်ႈႁေႃႈၽီႁၢႆႉၼၼ်ႉ ဢွၵ်ႇပႅတ်ႈယဝ်ႉၼၼ်ႉၸိုင်၊ ၵူၼ်းဢႃႉၼၼ်ႉ လၢတ်ႈၵႂၢမ်းမႃးဢေႃႈ။ ၶဝ်ၸိူဝ်းဢၼ်ၸူႉဢၼ်တုမ်ၼၼ်ႉၵေႃႈ ဢၢမ်းလႄႈဝႃႈ၊ ၵႃႈၼႂ်းၸိူဝ်ႉၶိူဝ်း ဢီႉသရေႇလႃႉ ၼႆႉ ဢမ်ႇပႆႇတွၼ်ႉလႆႈႁၼ်ၸိူဝ်ႉၼင်ႇၼႆ၊ ဝႃႈၼင်ႇၼႆဢေႃႈ။-

34ၽႃႇရီႉသႄး တင်းလၢႆၵေႃႈလၢတ်ႈလႄႈဝႃႈ၊ မၼ်းဢိင်ပိုင်ႈ ၶုၼ်ၽီႁၢႆႉသေလႄႈ ႁေႃႈၽီႁၢႆႉတင်းလၢႆ ဢွၵ်ႇပႅတ်ႈဢေႃႈ၊ ဝႃႈၼင်ႇၼႆဢေႃႈ။

35ယေႇသူႉ တေႇသႃႉၸႃႇရီႇလႄႇလဵပ်ႈၵူႈဝၢၼ်ႈၵူႈဝဵင်း ၵႃႈမီးတင်းသဵင်ႈတင်းလူင်သေလႄႈ သင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးတင်းလၢႆယူႇ၊ ႁေႃးလၢတ်ႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်းမိူင်းၸဝ်ယူႇသေလႄႈ ႁႂ်ႈတၢင်းၶႆႈတၢင်းပဵၼ် ၵူႈၸိူဝ်ႉၵူႈပိူင်ႁၢႆယူႇဢေႃႈ။-

36မိူဝ်ႈဢၼ်မၼ်းၸဝ်ႈ ႁၼ်ၶဝ်ၸိူဝ်းဢၼ်ၸူႉဢၼ်တုမ်ၼၼ်ႉၸိုင်၊ မၼ်းၸဝ်ႈမီးၸႂ်ဢၼ်ဢဵတ်းလူၶဝ်ဢေႃႈ။ လွင်ႈမၼ်းၸမ်ႉ ၶဝ်ၼၼ်ႉ ပဵၼ်ဢၼ်ယၢပ်ႇၸႂ်ၶၢၼ်ၸႂ်လႄႈ ၶၢမ်ႇတၢင်းဢၼ်ပႅတ်ႈဝႆႉၸိူဝ်ႉၼင်ႇ သူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်လူၼၼ်ႉဢေႃႈ။-

37မိူဝ်ႈၼၼ်ႉ မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ ၶဝ်ႈဢၼ်လီပၢတ်ႇမီးၼမ်ၼႃႇဢေႃႈ။ ၵူၼ်းၸိူဝ်းဢၼ်ပၢတ်ႇၸိုင် မီးၵေႇဢေႃႈ။-

38ပိူဝ်ႈၼႆလႄႈ ၼင်ႇႁိုဝ်တၵ်းပွႆႇၸႂ်ႉၵူၼ်းၸိူဝ်းဢၼ် တၵ်းပၢတ်ႇၶဝ်ႈမႃး ပုၼ်ႈဢၼ်တၵ်းပၢတ်ႇၶဝ်ႈၼၼ်ႉၸိုင် သူးတွင်းတီႈၸဝ်ႈၶဝ်ႈတႃႉ၊ ဝႃႈၼင်ႇၼႆဢေႃႈ။

← Chapter 8 Jump to: Chapter 10 →