Matthew 21 — Shan

1မိူဝ်ႈဢၼ် ၶဝ်ႁွတ်ႈၸမ် ဝဵင်း ယေႇရူႉသလႅမ်ႇ တီႈဝၢၼ်ႈ ပႅတ်ႉၽႃႇၵေး ၵႃႈတီႈ လွႆသၢၼ်ႇလုၼ်ႇ ၼၼ်ႉၸိုင်၊ ယေႇသူႉ ပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈ သင်ႇလၢတ်ႈဝႃႈ၊-

2ၵႂႃႇၵႃႈတီႈဝၢၼ်ႈဢၼ်မီးပႃႈၼႃႈသူပုၼ်ႉတႃႉ။ သူတၵ်းထူပ်းႁၼ်လီႈမႄႈ ဢၼ်မတ်ႉဝႆႉဢိၵ်ႇတင်းလီႈဢွၼ်ႇဢၼ်မီးလူၺ်ႈၵၼ်တင်းမၼ်းၼၼ်ႉၵမ်းလဵဝ်ဢေႃႈ။ ၵႄႈလႄႈဢဝ်မႃးတီႈၵဝ်တႃႉ။-

3ပေႃးပိူၼ်ႈဝႃႈတီႈသူသေၸိူဝ်ႉသေပိူင်ၸိုင် ၶိုၼ်းလၢတ်ႈလႄႈဝႃႈ၊ ၸဝ်ႈမီးဢလူဝ်ႇ၊ ဝႃႈၼင်ႇၼႆတႃႉ။ ၵေႃႉၼၼ်ႉတၵ်းပၼ်မႃးၵမ်းလဵဝ်ဢေႃႈ၊ ဝႃႈၼင်ႇၼႆဢေႃႈ။

4လွင်ႈတၢင်းၼႆႉၸမ်ႉ၊ ၼင်ႇႁိုဝ်ၵႂၢမ်းဢၼ်ဢွၵ်ႇသူပ်းပရေႃးၽႅတ်ႈၼၼ်ႉ တၵ်းပျေႉၸုမ်ႇၸိုင်၊ ၸင်ႇပဵၼ်ဢေႃႈ။-

5ၵႂၢမ်းၼၼ်ႉၸမ်ႉ၊ တူၺ်းလူး၊ လၢတ်ႈတီႈလုၵ်ႈယိင်းသၢဝ် ၸီႉဢုၼ်ႇ လႄႈဝႃႈ၊ ၶုၼ်လူင်မႂ်းၼၼ်ႉ မီးတင်းၸႂ်ဢၼ်ဢူၼ်ႈဢၼ်ဢွၼ်ႇ ၶီႇလီႈတင်းလီႈဢွၼ်ႇလႄႈ မႃးၵႃႈတီႈမႂ်းဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

6တပႄးၸဝ်ႈၸိူဝ်းၼၼ်ႉၵႂႃႇလႄႈႁဵတ်းၸွမ်းၵႃႈၼင်ႇဢၼ် မၼ်းၸဝ်ႈသင်ႇလၢတ်ႈၼၼ်ႉသေယဝ်ႉ၊-

7ဢဝ်လီႈတင်းလီႈဢွၼ်ႇမႃးလႄႈ ဢဝ်ၶူဝ်းၼုင်ႈၶဝ် တၢင်ႇၵႃႈၼိူဝ်လင်လီႈယဝ်ႉၸင်ႇ၊ မၼ်းၸဝ်ႈၼင်ႈၵႃႈၼိူဝ်ၼၼ်ႉဢေႃႈ။-

8ၵူၼ်းဢၼ်ၸူႉဢၼ်တုမ်ၼမ်ၼႃႇ ဢဝ်ၶူဝ်းၼုင်ႈၶဝ်သိူဝ်ႇဝႆႉပူဝႆႉ ၵႃႈၼႂ်းသဵၼ်ႈတၢင်းဢေႃႈ။ ၵမ်ႈၽွင်ႈၵေႃႈ ၽၼ်းၵိင်ႇမႆႉၶူဝ်ႈမႆႉသေလႄႈ သိူဝ်ႇဝႆႉပူဝႆႉၵႃႈၼႂ်းသဵၼ်ႈတၢင်းဢေႃႈ။-

9ၵူၼ်းဢၼ်ၸူႉဢၼ်တုမ်ဢၼ်ၵႂႃႇပႃႈၼႃႈလႂ်၊ ဢၼ်ၸွမ်းပႃႈလင်လႂ် ၸိူဝ်းၼၼ်ႉၵေႃႈ ႁွင်ႉသႅၼ်ႇလႄႈဝႃႈ၊ ႁႂ်ႈပဵၼ် ႁူဝ်းသၼ်ႇၼႃႉ တီႈလုၵ်ႈ တႃႇဝိတ်ႈ ၼႆႉသေၵမ်းလူၺ်ႈ။ ႁႂ်ႈၸဝ်ႈဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈမႃးၼႆႉ မီးမင်ႇၵလႃႇသေၵမ်းလူၺ်ႈ။ ႁႂ်ႈပဵၼ် ႁူဝ်းသၼ်ႇၼႃႉ ၵႃႈၼိူဝ်ၸိၵ်းၸွမ်ၵၢင်ႁၢဝ်ပုၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

10မိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉၸိုင်၊ တင်းဝဵင်း ပဵၼ်တၢင်းဢၼ်မေႃးမႄးဢူၼ်ဢဵၼ် ၵႂင်ၸႂ်ယုင်ႈၸႂ်လႄႈ တွင်ႈထၢမ်လႄႈဝႃႈ၊ ၵေႃႉၼႆႉပဵၼ်ၽူႈလႂ်၊ ဝႃႈၼင်ႇၼႆယဝ်ႉၸင်ႇ၊-

11ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၵေႃႈ လၢတ်ႈလႄႈဝႃႈ၊ ၵေႃႉၼႆႉပဵၼ်ပရေႃးၽႅတ်ႈ ယေႇသူႉ ဢၼ်ပေႃႇပႂၢင်ႉမႃး ၵႃႈၼႂ်းဝဵင်း ၼႃႇၸရႅတ်ႈ မိူင်း ၵႃႇလီႉလႄး ၼၼ်ႉဢေႃႈ၊ ဝႃႈၼင်ႇၼႆဢေႃႈ။

12ယေႇသူႉ ၶဝ်ႈၵႃႈၼႂ်းပိၵ်ႈမၢၼ်ႇၽြႃးပဵၼ်ၸဝ်ႈသေယဝ်ႉ၊ ႁေႃႈၶဝ်ၸိူဝ်းဢၼ်သိုဝ်ႉဢၼ်ၶၢႆ ၵႃႈၼႂ်းပိၵ်ႈမၢၼ်ႇၸဝ်ႈတင်းလၢႆၼၼ်ႉဢွၵ်ႇပႅတ်ႈလႄႈ ဢီးလူမ်ႉၶူင်ႇၶဝ်ၸိူဝ်းဢၼ် လႅၵ်ႈငိုၼ်း ဢိၵ်ႇတင်းတီႈၼင်ႈၶဝ်ၸိူဝ်းဢၼ် ၶၢႆၼူၵ်ႉတူႈၸိူဝ်းၼၼ်ႉပႅတ်ႈသေလႄႈဝႃႈ၊-

13ႁိူၼ်းၵဝ်ၸိုင် တၵ်းလႆႈၶၢမ်ႇတၢင်းဢၼ် ႁွင်ႉႁဵၵ်ႈႁိူၼ်းတီႈဢၼ်သူးတွင်းဢေႃႈ။ ၼႂ်းဝႃႈၼၼ်သေၵေႃႈ သူဢွၼ်ၵၼ်ႁႂ်ႈမၼ်းပဵၼ် ထမ်ႈၸူၼ်ယူႇလူင်ပႄႇဝႃႈၼႆ၊ တႅမ်ႈဝႆႉၼႂ်းၵျၢမ်းလိၵ်ႈၸိူဝ်ႉၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

14မိူဝ်ႈၼၼ်ႉ ၶဝ်ၸိူဝ်းဢၼ်တႃမွတ်ႇ ဢိၵ်ႇတင်းၶဝ်ၸိူဝ်းဢၼ် တိၼ်ဢမ်ႇလီတင်းလၢႆ မႃးတီႈမၼ်းၸဝ်ႈ ၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉလႄႈ မၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ၼၼ်ႉႁၢႆဢေႃႈ။-

15မိူဝ်ႈဢၼ်ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းထုတ်ႇၵျၢမ်းတင်းလၢႆ ႁူႉႁၼ်လွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းၸိူဝ်းၼၼ်ႉ ဢိၵ်ႇတင်းလွင်ႈဢၼ် လုၵ်ႈဢွၼ်ႇတင်းလၢႆႁွင်ႉသႅၼ်ႇၵႃႈၼႂ်း ပိၵ်ႈမၢၼ်ႇၸဝ်ႈလႄႈဝႃႈ၊ ႁႂ်ႈပဵၼ် ႁူဝ်းသၼ်ႇၼႃႉ တီႈလုၵ်ႈ တႃႇဝိတ်ႈ သေၵမ်းလူၺ်ႈ၊ ဝႃႈၼင်ႇၼႆၼၼ်ႉၸိုင်၊ ၶဝ်ၸႂ်မႆႈၶႆႈၸႃႉလႄႈ ထၢမ်တီႈမၼ်းၸဝ်ႈလႄႈဝႃႈ၊-

16လွင်ႈဢၼ်ၶဝ်လၢတ်ႈဝႃႈ ၸိူဝ်ႉၼင်ႇႁိုဝ်ၼၼ်ႉၸိုင် ငိၼ်းႁိုဝ်။ ဝႃႈၼင်ႇၼႆဢေႃႈ။ ယေႇသူႉ ၵေႃႈလၢတ်ႈလႄႈဝႃႈ၊ ၸႂ်ႈယဝ်ႉ။ သူဢမ်ႇယၢမ်ႈလႆႈၽတ်းၵႂၢမ်းဢၼ်မီးမႃးလႄႈဝႃႈ၊ ၸဝ်ႈႁဝ်းမႄးဝႆႉတၢင်းဢၼ် ယွင်ႈယေႃးၵႃႈၼႂ်းသူပ်းလုၵ်ႈဢွၼ်ႇတင်းၶဝ်ၸိူဝ်းဢၼ် ၵိၼ်ၼူမ်းတင်းလၢႆၼၼ်ႉၶႃႈဢေႃႈ၊ ဝႃႈၼင်ႇၼႆၼၼ်ႉႁိုဝ်။ ဝႃႈၼင်ႇၼႆဢေႃႈ။-

17မိူဝ်ႈၼၼ်ႉ မၼ်းၸဝ်ႈပႅတ်ႈဝႆႉၶဝ်ၼၼ်ႉသေလႄႈ ဢွၵ်ႇၵႂႃႇၵႃႈၼွၵ်ႈဝဵင်းယဝ်ႉၸင်ႇ၊ ႁွတ်ႈထိုင်ၵႃႈတီႈဝၢၼ်ႈ ပေႇထၼီႉ ပုၼ်ႉလႄႈ ၵိင်းၼွၼ်းယူႇၵႃႈတီႈၼၼ်ႈဢေႃႈ။

18ၶိင်ႇၵၢင်ၼႂ်၊ ၼႂ်းမိူဝ်ႈဢၼ်မၼ်းၸဝ်ႈ ယင်းတိုၵ်ႉၶိုၼ်းမိူဝ်းၵႃႈတီႈဝဵင်းယူႇၼၼ်ႉၸိုင် မၼ်းၸဝ်ႈတွင်ႉမႆႈဢေႃႈ။-

19မၼ်းၸဝ်ႈႁၼ်တူၼ်ႈမၢၵ်ႇလိူဝ်ႇသၢင်းၽေႃးတူၼ်ႈၼိုင်ႈ ၵႃႈတီႈႁိမ်းတၢင်းၼၼ်ႉသေယဝ်ႉ၊ ၵႂႃႇၵႃႈတီႈတူၼ်ႈၼၼ်ႉလႄႈ ထူပ်းႁၼ်မႂ်မၼ်းၵူၺ်းၵူၺ်းယဝ်ႉၸင်ႇ၊ လၢတ်ႈလႄႈဝႃႈ၊ ၸႃႉၸဵမ်မိူဝ်ႈလဵဝ်ၼႆႉလႄႈ ယႃႇႁႂ်ႈမႂ်းလႆႈမၢၵ်ႇမၢၵ်ႇသေပွၵ်ႈ၊ မိူဝ်ႈဢၼ်ဝႃႈၼင်ႇၼႆယဝ်ႉၼၼ်ႉ၊ တူၼ်ႈၼၼ်ႉ ႁဵဝ်ႇႁႅင်ႈၵႂႃႇၵမ်းလဵဝ်ဢေႃႈ။-

20တပႄးၸဝ်ႈတင်းလၢႆႁၼ်သေယဝ်ႉ၊ ဢွၼ်ၵၼ်ဢၢမ်းလႄႈဝႃႈ၊ တူၼ်ႈမၢၵ်ႇလိူဝ်ႇသၢင်းၽေႃးၼၼ်ႉ ႁဵဝ်ႇႁႅင်ႈၵႂႃႇၵမ်းလဵဝ်ယဝ်ႉၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

21ယေႇသူႉ ၵေႃႈ ၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ပေႃးသူမီးတၢင်းယုမ်ႇမၢတ်ႈလႄႈ ၵၢင်းလွတ်ႈတင်း တၢင်းဢၼ်ယုမ်ႇၶိုင်ႈၼိုင်ႈ ဢမ်ႇယုမ်ႇၶိုင်ႈၼိုင်ႈၸိုင်၊ သူႁဵတ်းၸိူဝ်ႉၼင်ႇဢၼ် ႁဵတ်းတီႈတူၼ်ႈမၢၵ်ႇလိူဝ်ႇသၢင်းၽေႃးၼၼ်ႉလႆႈဢမ်ႇၵႃး၊ ပေႃးလၢတ်ႈတီႈလွႆၼႆႉလႄႈဝႃႈ၊ ၶၢႆႉတီႈမႂ်းတႃႉ။ တူၵ်းၵႃႈၼႂ်းပၢင်ႇလၢႆႇပုၼ်ႉတႃႉ၊ ဝႃႈၼင်ႇၼႆၸိုင်၊ တၵ်းပဵၼ်ဢေႃႈ။-

22ၵႃႈဢၼ်သူမီးတၢင်းဢၼ်ယုမ်ႇမၢတ်ႈသေလႄႈ သူးတွင်းယွၼ်းတင်းသဵင်ႈတင်းလူင်ၼၼ်ႉၸိုင် သူတၵ်းလႆႈဢေႃႈ၊ ဝႃႈၼင်ႇၼႆဢေႃႈ။

23မိူဝ်ႈဢၼ်မၼ်းၸဝ်ႈၶိုၼ်းၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈလႄႈ သင်ႇသွၼ်သုင်းမႃႉပၼ်ယူႇၼၼ်ႉၸိုင်၊ ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ လဝ်ႊထၢမ်လႄႈဝႃႈ၊ ၸဝ်ႈႁဝ်းဢဝ်တင်းဢၶႂၢင်ႉဢၼ်လႂ် ႁဵတ်းလွင်ႈတၢင်းၸိူဝ်းၼႆႉၶႃႈ။ ၽူႈလႂ်ပၼ်ဢၶႂၢင်ႉၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်။-

24ယေႇသူႉ ၵေႃႈၶိုၼ်းလၢတ်ႈလႄႈဝႃႈ၊ ၵဝ်တၵ်းထၢမ်သေၸိူဝ်ႉသေပိူင်တီႈသူလူးၵွၼ်ႇဢေႃႈ။ ပေႃးသူၶိုၼ်းလၢတ်ႈပၼ်ၸိုင်၊ ၵဝ်တၵ်းလၢတ်ႈပၼ် လွင်ႈဢၼ်ၵဝ်ဢဝ်တင်းဢၶႂၢင်ႉ ဢၼ်လႂ်ႁဵတ်းလွင်ႈတၢင်းၸိူဝ်းၼႆႉၼၼ်ႉတီႈသူဢေႃႈ။-

25ပပ်ႉတီႉၸမ်ႇယူဝ်းႁၢၼ်ႇ ၼၼ်ႉ ပဵၼ်မႃးၵႃႈတီႈလႂ်၊ ပဵၼ်မႃးၵႃႈတီႈၵၢင်ႁၢဝ်ႁိုဝ်။ ပဵၼ်မႃးၵႃႈတီႈၵူၼ်းႁိုဝ်။ ဝႃႈၼင်ႇၼႆဢေႃႈ။ ၶဝ်ၼၼ်ႉ ၼင်ႇၵၼ်ၵၼ် ၽွမ်ႉၵၼ်ၶႆႈၸႂ်လႄႈဝႃႈ၊ ပေႃးႁဝ်းဝႃႈ၊ ပဵၼ်မႃးၵႃႈတီႈၵၢင်ႁၢဝ်၊ ဝႃႈၼင်ႇၼႆၸိုင် မၼ်းၸဝ်ႈတၵ်းထၢမ်လႄႈဝႃႈ၊ ႁဵတ်းသင်လႄႈ သူဢမ်ႇယုမ်ႇမၢတ်ႈမၼ်းၼၼ်ႉ ၼင်ႇႁိုဝ်။ ဝႃႈၼင်ႇၼႆဢေႃႈ။-

26ပေႃးႁဝ်းဝႃႈ ပဵၼ်မႃးၵႃႈတီႈၵူၼ်း၊ ဝႃႈၼင်ႇၼႆၸိုင်၊ ႁဝ်းၵူဝ်ၵူၼ်း ဢၼ်ၸူႉဢၼ်တုမ်ၸိူဝ်းၼႆႉဢေႃႈ။ လွင်ႈမၼ်းၸမ်ႉ ၵူၼ်းတင်းသဵင်ႈတင်းလူင် ထၢင်ႇ ယူဝ်းႁၢၼ်ႇ ၼၼ်ႉ ပဵၼ်ၸိူဝ်ႉၼင်ႇပရေႃးၽႅတ်ႈဢေႃႈ၊ ဝႃႈၼင်ႇၼႆယဝ်ႉၸင်ႇ၊-

27ၶိုၼ်းလၢတ်ႈတီႈ ယေႇသူႉ လႄႈဝႃႈ၊ ႁဝ်းၶႃႈဢမ်ႇႁူႉၶႃႈ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ဢမ်ႇလၢတ်ႈပၼ် လွင်ႈဢၼ်ၵဝ်ဢဝ်တင်းဢၶႂၢင်ႉ ဢၼ်လႂ်ႁဵတ်းလွင်ႈတၢင်းၸိူဝ်းၼႆႉၼၼ်ႉတီႈသူ။

28သူထၢင်ႇၸိူဝ်ႉၼင်ႇႁိုဝ်။ ၵူၼ်းၵေႃႉၼိုင်ႈ မီးလုၵ်ႈၸၢႆးသွင်ၵေႃႉဢေႃႈ။ မၼ်းၵႂႃႇၵႃႈတီႈလုၵ်ႈတူၼ်ႈမၼ်းသေလႄႈဝႃႈ၊ လုၵ်ႈၸၢႆးၵဝ်ဢိူၺ်း၊ မိူဝ်ႈၼႆႉၵႂႃႇႁဵတ်းၵႂႃႇသၢင်ႈ ၵႃႈၼႂ်းသူၼ်ၸပိတ်ႈပုၼ်ႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

29ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ ၵဝ်ဢမ်ႇၵႂႃႇၵူၺ်ႉ၊ ပိၵ်ႉသမ်ႉဝႃႈၼင်ႇၼႆယဝ်ႉသေၵေႃႈ၊ လိုၼ်းၼၼ်ႉ မၼ်းၶုၵ်းၸႂ်လႆႈမႆႈၸႂ်လႄႈ ၵႂႃႇဢေႃႈ။-

30မၼ်းၼၼ်ႉ ၵႂႃႇၵႃႈတီႈလုၵ်ႈၸၢႆးမၼ်းၵေႃႉလဵၵ်ႉလႄႈလၢတ်ႈဝႃႈ ၸိူဝ်ႉၼင်ႇၵမ်းဢွၼ်တၢင်းၼၼ်ႉ ယဝ်ႉၸင်ႇ၊ ၵေႃႉၼၼ်ႉလၢတ်ႈလႄႈဝႃႈ၊ တၵ်းၵႂႃႇၶႃႈဢေႃႈၸဝ်ႈ၊ ပိၵ်ႉသမ်ႉဝႃႈၼင်ႇၼႆယဝ်ႉသေၵေႃႈ ယင်းဢမ်ႇၵႂႃႇလႄႈယူႇဢေႃႈ။-

31ၼႂ်းလုၵ်ႈၸၢႆးသွင်ၵေႃႉၼၼ်ႉ၊ ၵေႃႉလႂ်ႁဵတ်းၸွမ်းဢလူဝ်ႇပေႃႈၶဝ်၊ မိူဝ်ႈဢၼ်မၼ်းၸဝ်ႈထၢမ်ဝႃႈၸိူဝ်ႉၼင်ႇၼႆၸိုင်၊ ၶဝ်ၼၼ်ႉၵေႃႈ လဝ်ႊလၢတ်ႈလႄႈဝႃႈ၊ လုၵ်ႈတူၼ်ႈႁဵတ်းၶႃႈဢေႃႈ၊ ဝႃႈၼင်ႇၼႆဢေႃႈ။ ယေႇသူႉ ၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူၼ်းၵဵပ်းၶွၼ်ႇ ဢိၵ်ႇတင်းမႄႈမွၵ်ႇယႃႈတင်းလၢႆ ၸၢင်ႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ ဢွၼ်တၢင်းသူဢေႃႈ။-

32လွင်ႈမၼ်းၸမ်ႉ ပိၵ်ႉသမ်ႉ ယူဝ်းႁၢၼ်ႇ ၸွမ်းသဵၼ်ႈတၢင်းဢၼ်သိုဝ်ႈဢၼ်တေႃႇလႄႈ မႃးတီႈသူသေၵေႃႈ၊ သူဢမ်ႇယုမ်ႇမၢတ်ႈမၼ်း။ ၵူၼ်းၵဵပ်းၶွၼ်ႇ ဢိၵ်ႇတင်းမႄႈမွၵ်ႇယႃႈတင်းလၢႆၸမ်ႉ၊ ယုမ်ႇမၢတ်ႈမၼ်းဢေႃႈ။ ပိၵ်ႉသမ်ႉသူႁၼ်လွင်ႈတၢင်းၼၼ်ႉသေၵေႃႈ၊ လိုၼ်းသေၼၼ်ႉ သူဢမ်ႇၶုၵ်းၸႂ်လႆႈမႆႈၸႂ် ႁႂ်ႈလႆႈယုမ်ႇမၢတ်ႈ။

33ထွမ်ႇၵႂၢမ်းဢူႉပမႃႇတၢင်ႇၸိူဝ်ႉတၢင်ႇဢၼ်တႃႉ။ ၸဝ်ႈႁိူၼ်းၵေႃႉၼိုင်ႈ ၽုၵ်ႇသူၼ်မၢၵ်ႇၸပိတ်ႈလႄႈ ႁဵတ်းႁူဝ်ႉလွမ်ႉႁွပ်ႈဝႆႉ၊ ၶုတ်းႁၢင်းတီႈဢၼ်တၵ်းယဵပ်ႇမၢၵ်ႇၸပိတ်ႈလႄႈ ပူၵ်းထဵင်လၢင်းဝႆႉယဝ်ႉၸင်ႇ၊ ၶၢတ်ႈပၼ်သူၼ်ၼၼ်ႉ တီႈၶဝ်ၸိူဝ်းဢၼ်ႁဵတ်းသူၼ်တင်းလၢႆလႄႈ ၵႂႃႇတၢင်ႇဝၢၼ်ႈတၢင်ႇမိူင်းသေဢေႃႈ။-

34မိူဝ်ႈဢၼ်ၸမ်တၵ်းႁွတ်ႈထိုင်ၶိင်ႇဢၼ်မၢၵ်ႇမၼ်းမီးၼၼ်ႉၸိုင်၊ မၼ်းပွႆႇၸႂ်ႉၵူၼ်းဢွၼ်ႇတင်းလၢႆ ၵႂႃႇၵႃႈတီႈဢၼ်ၶဝ်ၸိူဝ်းဢၼ် ႁဵတ်းသူၼ်မီးၼၼ်ႉ ႁႂ်ႈလႆႈၶၢမ်ႇဢဝ်မၢၵ်ႇၸပိတ်ႈဢေႃႈ။-

35ၶဝ်ၼၼ်ႉ တီႉဢဝ်ၵူၼ်းဢွၼ်ႇမၼ်းၸိူဝ်းၼၼ်ႉသေလႄႈ ပေႃႉယႅၼ်ႉၵေႃႉၼိုင်ႈဢေႃႈ။ ဢဝ်တၢႆၵေႃႉၼိုင်ႈဢေႃႈ။ ဢဝ်မၢၵ်ႇႁိၼ်ထိမ်ႈၵေႃႉၼိုင်ႈဢေႃႈ။-

36လိုၼ်းၼၼ်ႉ မၼ်းပွႆႇၸႂ်ႉၵူၼ်းဢွၼ်ႇတၢင်ႇၵေႃႉ ၼမ်ၼႃႇသေၵမ်းဢွၼ်တၢင်းၼၼ်ႉၵႂႃႇသေယဝ်ႉ၊ ၶဝ်ၸိူဝ်းဢၼ်ႁဵတ်းသူၼ်ၼၼ်ႉ ႁဵတ်းၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။-

37ပွၵ်ႈလိုၼ်းလင်သုတ်း မၼ်းၵေႃႈ ပွႆႇၸႂ်ႉလုၵ်ႈၸၢႆးတူဝ်ၸဝ်ႈၵဝ်ႇၵႂႃႇလႄႈဝႃႈ၊ ၶဝ်ၼၼ်ႉတၵ်းဢႃးၼႃႇလုၵ်ႈၸၢႆးၵဝ်ဢေႃႈ၊ ဝႃႈၼင်ႇၼႆဢေႃႈ။-

38ၶဝ်ၸိူဝ်းဢၼ်ႁဵတ်းသူၼ်ၼၼ်ႉ မိူဝ်ႈဢၼ်ႁၼ်လုၵ်ႈၸၢႆးမၼ်းၼၼ်ႉမႃးၸိုင်၊ ၵေႃႉၼိုင်ႈလႄႈၵေႃႉၼိုင်ႈ တိူင်ႇပၢင်ႇလၢတ်ႈၸႃၵၼ်လႄႈဝႃႈ၊ ၵေႃႉၼႆႉပဵၼ်ၵေႃႉဢၼ်ၶၢမ်ႇဢမူၺ်ႇဢေႃႈ။ မႃးမႃးဢိူၺ်း၊ ဢဝ်မၼ်းတၢႆလႄႈ ဢဝ်ဢမူၺ်ႇမၼ်းတႃႉႁဝ်း၊ ဝႃႈၼင်ႇၼႆသေလႄႈ-

39တီႉဢဝ်မၼ်းယဝ်ႉၸင်ႇ၊ ႁေႃႈဢွၵ်ႇၵႃႈတီႈၼွၵ်ႈသူၼ်သေလႄႈ ဢဝ်တၢႆပႅတ်ႈသေဢေႃႈ။-

40ပေႃးပဵၼ်ၸိူဝ်ႉၼင်ႇၼႆၸိုင် မိူဝ်ႈဢၼ်ၸဝ်ႈသူၼ်မႃးၼၼ်ႉ မၼ်းတၵ်းႁဵတ်းတီႈၶဝ်ၸိူဝ်းဢၼ်ႁဵတ်းသူၼ်ၼၼ်ႉ ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

41ပရဵၵ်ႈသၢတ်ႈတင်းလၢႆၸိူဝ်းၼၼ်ႉၵေႃႈ လဝ်ႊလၢတ်ႈလႄႈဝႃႈ၊ မၼ်းတၵ်းႁႂ်ႈၵူၼ်းႁၢႆႉၸိူဝ်းၼၼ်ႉ ႁွတ်ႈထိုင်တၢင်းဢၼ်ယႃႉပႅတ်ႈဢၼ်ႁၢႆႉဢၼ်ႁုၵ်းၼၼ်ႉၶႃႈဢေႃႈ။ တၵ်းဢဝ်သူၼ်ၸပိတ်ႈၼၼ်ႉ ၶၢတ်ႈပၼ်တီႈၵူၼ်းတၢင်ႇၵေႃႉတင်းလၢႆ ဢၼ်တၵ်းပၼ်မၢၵ်ႇမၼ်းၼႂ်းၶိင်ႇမိူဝ်ႈဢၼ် မၼ်းမၢၵ်ႇၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

42ယေႇသူႉ ၵေႃႈလၢတ်ႈလႄႈဝႃႈ၊ သူဢမ်ႇယၢမ်ႈလႆႈၽတ်းၵႂၢမ်းၼႂ်းၵျၢမ်းလိၵ်ႈဢၼ်ဝႃႈ၊ မၢၵ်ႇႁိၼ်ဢၼ်ၶဝ်ၸိူဝ်းဢၼ်ႁဵတ်းတိူၵ်ႈ ပႅတ်ႈဝႆႉၼၼ်ႉ ၵမ်းလိုၼ်းပဵၼ်ႁူဝ်ၸဵင်ႇတိူၵ်ႈဢေႃႈ။ လွင်ႈတီႈႁဵင်းၼႆႉ ပဵၼ်တီႈဢၼ် ထႃႇဝရႃႉၽြႃး ႁဵတ်းဝႆႉဢေႃႈ။ ၵႃႈတႂ်ႈတႃႁဝ်းၼႆႉၵေႃႈ ပဵၼ်ဢၼ်လီဢၢမ်းဢေႃႈ၊ ဝႃႈၼင်ႇၼႆၼၼ်ႉႁိုဝ်။-

43ပိူဝ်ႈၼႆလႄႈ ၵဝ်ဝႃႈတီႈသူၸမ်ႉ၊ တၵ်းၼုၵ်ႈဢဝ်မိူင်းၽြႃးပဵၼ်ၸဝ်ႈတီႈသူသေလႄႈ ပၼ်တီႈမဵဝ်းၵူၼ်းဢၼ် တၵ်းမၢၵ်ႇမၢၵ်ႇ မိူင်းၸဝ်ႈၼၼ်ႉဢေႃႈ။-

44ၽူႈလႂ်သေဢမ်ႇဝႃႈ ၵေႃႉဢၼ်တူၵ်းသႂ်ႇၵႃႈၼိူဝ်မၢၵ်ႇႁိၼ်ၼႆႉၼၼ်ႉ၊ ၵေႃႉၼၼ်ႉတၵ်းႁၵ်းဢေႃႈ။ ၵႃႈၼိူဝ်ၽူႈလႂ်သေဢမ်ႇဝႃႈ ဢၼ်မၢၵ်ႇႁိၼ်ၼႆႉတူၵ်းသႂ်ႇၼၼ်ႉ၊ ၵေႃႉၼၼ်ႉတၵ်းလႅဝ်ပဵၼ်မုၼ်ႈပဵၼ်ၽွင်ၵႂႃႇဢေႃႈ၊ ဝႃႈၼင်ႇၼႆဢေႃႈ။

45မိူဝ်ႈဢၼ်ယိတ်ႈပရေႃးႁဵၵ်ႈလူင် ဢိၵ်ႇတင်း ၽႃႇရီႉသႄး တင်းလၢႆငိၼ်းၵႂၢမ်းဢူႉပမႃႇၼၼ်ႉၸိုင် ၶဝ်ႁူႉလွင်ႈဢၼ် မၼ်းၸဝ်ႈႁေႃးလၢတ်ႈလူၺ်ႈ လွင်ႈၶဝ်ၼၼ်ႉဢေႃႈ။-

46မိူဝ်ႈဢၼ်ၶဝ်ႁႃ ႁႂ်ႈလႆႈတီႉဢဝ်မၼ်းၸဝ်ႈၼၼ်ႉၸိုင် ၶဝ်ၵူဝ်ၵူၼ်းဢၼ်ၸူႉဢၼ်တုမ်တင်းလၢႆၼၼ်ႉဢေႃႈ။ လွင်ႈမၼ်းၸမ်ႉ ၵူၼ်းတင်းလၢႆၼၼ်ႉ ထၢင်ႇမၼ်းၸဝ်ႈပဵၼ်ၸိူဝ်ႉၼင်ႇပရေႃးၽႅတ်ႈဢေႃႈ။