Philippians 1

Shan

Jump to: Chapter 2 →

1ၵဝ် ပေႃးလူႉ ဢိၵ်ႇတင်းၼွင်ႉၵဝ် တီႉမေႃးသေႇ ဢၼ်ပဵၼ်ၶႃႈ ယေႇသူႉၶရိၸ်ႈ ၼၼ်ႉၸိူဝ်းၼႆႉ၊ ပၼ်ငိၼ်းၵႂႃႇၵႃႈတီႈၸႃႉၸဵမ် ၵူၼ်းဢုပ်ႉၸိူဝ်းၸဝ်ႈ ဢိၵ်ႇတင်းၵူၼ်းပွင်ၸိူဝ်းၸဝ်ႈတင်းလၢႆ တင်း ၵူၼ်းမူတ်းၸၢင်ႇ ယေႇသူႉၶရိၸ်ႈ ၵႃႈဢၼ်မီးၵႃႈၼႂ်းဝဵင်း ၽီႉလိပ်ႉပီႉ ၊ တင်းသဵင်ႈတင်းလူင်ဢေႃႈ။-

2ႁႂ်ႈသူႉၵျေးၸူးဢိၵ်ႇတင်း တၢင်းၼိမ် ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈ ဢိၵ်ႇတင်းၸဝ်ႈ ယေႇသူႉၶရိၸ်ႈ ၼၼ်ႉမီးၼိူဝ်သူသေၵမ်းလူၺ်ႈ။

3မိူဝ်ႈဢၼ်ၵဝ်ႁဵတ်းသူးတွင်းပထၼႃႇၵူႈပွၵ်ႈၼၼ်ႉ၊-

4ၵဝ်မီးတင်းၸႂ်ဢၼ်သိူဝ်းပျေႃႇ ႁဵတ်းသူးတွင်းပထၼႃႇပုၼ်ႈသူ၊တင်းသဵင်ႈတင်းလူင်ယူႇ၊-

5မိူဝ်ႈဢၼ်ၵဝ်ၶုၵ်းၸႂ်လႆႈၶႆႈၸႂ်ထူပ်းသူၵူႈပွၵ်ႈၼၼ်ႉ၊ ၵဝ်ထွၵ်ႈလူၺ်ႈလွင်ႈဢၼ်သူသိူၵ်ႈသမ်ႇလႄႈ ၸၢမ်ႇၸႃးတြႃးသတၢင်းသိူဝ်းပျေႃႇ ၸႃႉၸဵမ်ဝၼ်းဢွၼ်တၢင်းၼၼ်ႉ တေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉယူႇသေလႄႈ ယွင်ႈယေႃးၵျေးၸူးၸဝ်ႈယူႇၶႃႈဢေႃႈ။-

6ၵဝ်တူၵ်းၵၢင်ၸႂ်လွင်ႈဢၼ်ၵေႃႉဢၼ်ၸႃႉႁဵတ်းလွင်ႈ၊တၢင်းဢၼ်လီဢၼ်ငၢမ်းၵႃႈၼႂ်းသူၼၼ်ႉ တၵ်းႁဵတ်းႁႂ်ႈယဝ်ႉႁႂ်ႈတူဝ်ႈတေႃႇထိုင်ႁွတ်ႈဝၼ်း ယေႇသူႉၶရိၸ်ႈ ပုၼ်ႉၼၼ်ႉယူႇဢေႃႈ။-

7ၼႂ်းလွင်ႈတၢင်းဢၼ် ၸၢပ်ႈသႅင်ႇၵၼ်တင်းသူ ၵႃႈမီးတင်းသဵင်ႈတင်းလူင်ၼၼ်ႉၸိုင်၊ ၵဝ်ထုၵ်ႇလီဢဝ်ၸိူဝ်ႉၼင်ႇၼႆဢေႃႈ။ လွင်ႈမၼ်းၸမ်ႉ ၵဝ်ၶုၵ်းၸႂ်လႆႈၶႆႈၸႂ်ထူပ်းသူ ၵွပ်ႈပိူဝ်ႈဢၼ်သူတင်းသဵင်ႈတင်းလူင် သိူၵ်ႈသမ်ႇၵၼ်တင်းၵျေးၸူးၸဝ်ႈလူၺ်ႈၵၼ်တင်းၵဝ် ၼႂ်းတၢင်းဢၼ်ၵဝ်လႆႈၶၢမ်ႇတူၵ်းၵႅၼ်းဢိၵ်ႇတင်း ၼႂ်းတၢင်းဢၼ်ၵဝ်ၶၢမ်ႇသၢၵ်ႈသေႇ ၽၢႆႇတြႃးသတၢင်းသိူဝ်းပျေႃႇလႄႈ ႁႂ်ႈတြႃးၼၼ်ႉတႄႇယူႇၼၼ်ႉဢေႃႈ။-

8ၵဝ်မီးတင်းမႅတ်ႈတႃႇၵရူႉၼႃႇ ယေႇသူႉၶရိၸ်ႈ သေလႄႈ ၸႂ်ထိုင်သူတင်းသဵင်ႈတင်းလူင်ထၢၼ်ႇႁိုဝ်ဝႃႈၼႆ၊ ၽြႃးပဵၼ်ၸဝ်ႈပဵၼ်သၢၵ်ႈသေႇၽၢႆႇၵဝ်ဢေႃႈ။

9ၵဝ်သူးတွင်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လွင်ႈၼင်ႇႁိုဝ်မႅတ်ႈတႃႇပႃႇရမီႇသူ တၵ်းယႂ်ႇမႃး ပျေႉၸုမ်ႇၼႂ်းၺၢၼ်ႇပိင်ႇၺႃႇ ၵူႈၸိူဝ်ႉၵူႈပိူင်၊-

10ႁႂ်ႈသူလႆႈၸၵ်းၽႄႁူႉလွင်ႈတၢင်းဢၼ်ပႅၵ်ႇပိူင်ႈၵၼ်ၸိူဝ်းၼၼ်ႉယူႇ၊-

11ဢိၵ်ႇတင်းလွင်ႈၼင်ႇႁိုဝ်သူတၵ်းပျေႉၸုမ်ႇတင်း တၢင်းၵမ်တၢင်းၵျၢင်ႉ၊ တၢင်းဢၼ်သိုဝ်ႈတေႃႇ ဢၼ်ၸၢင်ႈႁႂ်ႈမုၼ်သရေႇၽြႃးပဵၼ်ၸဝ်ႈ ထၢင်ႇသႃးၵွပ်ႈပိူဝ်ႈ ယေႇသူႉၶရိၸ်ႈ ၼၼ်ႉယူႇသေလႄႈ မီးႁူဝ်ၸႂ်ဢၼ်ၶၢဝ်ၸၢင်ႇလႄႈ ၵၢင်းလွတ်ႈတင်း လွင်ႈတၢင်းဢၼ် တၵ်းတိူဝ်ႉမႅၼ်ႈလႄႈလူမ်ႉၼၼ်ႉ တေႃႇထိုင်ႁွတ်ႈ ဝၼ်းၸဝ်ႈၶရိၸ်ႈပုၼ်ႉၸိုင်၊ ၵဝ်ႁဵတ်းသူးတွင်းပထၼႃႇယူႇဢေႃႈ။

12ပီႈၼွင်ႉၶဝ်ဢိူၺ်း၊ ၵဝ်မီးဢလူဝ်ႇၶႂ်ႈႁႂ်ႈသူႁူႉ၊ လွင်ႈဢၼ်ဢမူႉလွင်ႈတၢင်းဢၼ် ႁွတ်ႈမႃးၵႃႈၼိူဝ်ၵဝ်ၸိူဝ်းၼၼ်ႉ ဢမ်ႇႁႄႉ ဢမ်ႇၶႅၼ်တြႃးသတၢင်းသိူဝ်းပျေႃႇယဝ်ႉဢမ်ႇၵႃး၊ ပဵၼ်လွင်ႈတၢင်းဢၼ်ပွင်ႁဵတ်းၼၼ်ႉဢေႃႈ။-

13ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ ဢမူႉတၢင်းဢၼ်မတ်ႉဢၼ်ၽုၵ်ႇ ဢၼ်ၵဝ်လႆႈၶၢမ်ႇၵွပ်ႈပိူဝ်ႈၸဝ်ႈၶရိၸ်ႈၼၼ်ႉထၢင်ႇသႃးၸွတ်ႇၸႅတ်ႇ ၵႃႈၼႂ်းႁေႃၶမ်းယဝ်ႉဢမ်ႇၵႃး ထၢင်ႇသႃးၵူႈတီႈၵူႈလႅၼ်ယူႇဢေႃႈ။-

14ပီႈၼွင်ႉၼႂ်းၸဝ်ႈၽြႃးၼမ်ၼႃႇၼၼ်ႉ ၵၢင်းလွတ်ႈတၢင်း ၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈ ၵွပ်ႈပိူဝ်ႈတၢင်းဢၼ် ၵဝ်လႆႈၶၢမ်ႇၼႆႉယူႇသေလႄႈ ယင်းဢမ်ႇမီးၸႂ်ဢၼ်ၵူဝ်ဢၼ်ႁႄလႄႈ ယဵင်ႈၶႅၼ်းႁတ်းႁေႃးႁတ်းလၢတ်ႈ ၼုၵ်ႈၵပၢတ်ႈတြႃးၸဝ်ႈဢေႃႈ။

15ၵူၼ်းၵမ်ႈၽွင်ႈမီးတၢင်းၸႂ်သၽေႃး ဢၼ်ၶႂ်ႈသီႈၵေႉ ႁဵတ်းတၢင်းၽိတ်းလႄႈ ႁေႃးလၢတ်ႈတြႃးၸဝ်ႈၶရိၸ်ႈဢေႃႈ။ ၵမ်ႈၽွင်ႈၵေႃႈ၊ မီးတင်းၸႂ်ၸေႇတၼႃႇသေလႄႈႁေႃးလၢတ်ႈဢေႃႈ။-

16ၶဝ်ၼႆႉၸိုင် ႁူႉလွင်ႈဢၼ်ၵဝ်ပဵၼ်ၵေႃႉဢၼ်ၶၢၼ်းဝႆႉ ပုၼ်ႈဢၼ်တၵ်းၵမ်ႉတၵ်းထွၵ်ႈတြႃးသတၢင်းသိူဝ်းပျေႃႇၼၼ်ႉလႄႈ မီးတင်းၸႂ်မႅတ်ႈတႃႇႁေႃးလၢတ်ႈတြႃးၸဝ်ႈဢေႃႈ။-

17ၶဝ်ၼၼ်ႉၸမ်ႉ၊ ဢမ်ႇမီးၸႂ်ဢၼ်ၶၢဝ်ဢၼ်ၸၢင်ႇ၊ မီးတၢင်းၵျၢမ်ႇတၢင်းပွင် ၶႂ်ႈႁႂ်ႈယဵင်ႈၶႅၼ်းယၢၵ်ႈၽၢၼ်ၶၢၼ်ၸႂ်ၼႃႇ ၼႂ်းလွင်ႈတၢင်းဢၼ်ၵဝ်လႆႈၶၢမ်ႇတၢင်းဢၼ်မတ်ႉဢၼ်ၽုၵ်ႇၼႆႉလႄႈ မီးတၢင်းၸႂ်ဢၼ်ၶႂ်ႈႁဵတ်းတၢင်းၽိတ်းသေလႄႈႁေႃးလၢတ်ႈဢေႃႈ။

18ပိူဝ်ႈၼႆလႄႈပဵၼ်ၸိူဝ်ႉၼင်ႇႁိုဝ်။ ထိမ်ႇမႅပ်းလႄႈႁေႃးလၢတ်ႈသေဢမ်ႇဝႃႈ၊ မီးသဵတ်ႈၸႃႇလႄႈႁေႃးလၢတ်ႈသေဢမ်ႇဝႃႈ၊ ႁေႃးလၢတ်ႈၸိူဝ်ႉၼင်ႇႁိုဝ်သေဢမ်ႇဝႃႈ၊ မီးတၢင်းဢၼ်ႁေႃးလၢတ်ႈတြႃးၸဝ်ႈၶရိၸ်ႈယူႇဢေႃႈ။ ၵွပ်ႈပိူဝ်ႈလွင်ႈတၢင်းၼၼ်ႉလႄႈ တေႃႈလဵဝ်ၼႆႉၵဝ်သိူဝ်းပျေႃႇဢေႃႈ။ ၵမ်းလိုၼ်းၵေႃႈၵဝ်သိူဝ်းပျေႃႇဢေႃႈ။-

19ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵဝ်ႁူႉႁၼ်လွင်ႈဢၼ် လွင်ႈတၢင်းၼႆႉ တၵ်းပဵၼ်လွင်ႈတၢင်းဢၼ် ၵႄႇၶျွတ်ႈဢဝ်ၵဝ် ၵွပ်ႈပိူဝ်ႈဢၼ်သူသူးတွင်းဢိၵ်ႇတင်းၵွပ်ႈပိူဝ်ႈဢၼ်ဝီႉၺိၺ်ႇၸဝ်ႈ ယေႇသူႉၶရိၸ်ႈ ၸွႆႈထႅမ်ၼၼ်ႉ၊-

20ၸွမ်းၵႃႈၼင်ႇဢၼ် ၵဝ်မုင်ႈထႃႈမွင်းထႃႈႁႅင်းယႂ်ႇၼႃႇလႄႈ တူၵ်းဢၢင်ႈလွင်ႈဢၼ်ၵဝ်ယင်းဢမ်ႇမီးတၢင်းဢၼ်လီဢူၵ်းလီဢၢႆ လႃးလႃးလႄႈ တၵ်းပျေႉၸုမ်ႇတင်း တၢင်းဢၼ်ႁတ်းဢၼ်ႁၢၼ်သေလႄႈ၊ ၵဝ်ဢသၢၵ်ႈလိပ်းသေဢမ်ႇဝႃႈ၊ ၵဝ်တၢႆသေဢမ်ႇဝႃႈ၊ တေႃႈလဵဝ်ၼႆႉ မုၼ်ၵုင်ႇသရေႇၸဝ်ႈၶရိၸ်ႈ တၵ်းထၢင်ႇသႃးယူႇၵႃႈၼႂ်းတူဝ်ၶၼ်ႇထႃႇၵဝ် မိူၼ်ၸိူဝ်ႉၼင်ႇဢၼ် လႆႈထၢင်ႇသႃးယူႇတႃႇသေႇဢမ်ႇထၢတ်ႇၼၼ်ႉယူႇဢေႃႈ။

21တၢင်းဢၼ်ၵဝ်ဢသၢၵ်ႈလိပ်းယူႇၼႆႉ ပဵၼ်ၸဝ်ႈၶရိၸ်ႈဢေႃႈ။ တၢင်းဢၼ်ၵဝ်တၢႆၸမ်ႉ၊ ယဵင်ႈၶႅၼ်းမီးဢၵျူဝ်းဢေႃႈ။-

22ပေႃးၵဝ်ဢသၢၵ်ႈလိပ်းယူႇၵႃႈၼႂ်းတူဝ်ၶၼ်ႇထႃႇၼႆႉၸိုင်၊ ဢၵျူဝ်းဢၼ်ၵဝ်ပွင်ၵဝ်ႁဵတ်းၸမ်ႉ၊ ပဵၼ်ဢၵျူဝ်းၸိူဝ်ႉၼင်ႇၼၼ်ဢေႃႈ။ ၼႂ်းဝႃႈၼၼ်သေၵေႃႈ တၵ်းလႆႈလိူၵ်ႈၵဵပ်းဢဝ်ဢၵျူဝ်းဢၼ်လႂ်ဝႃႈၼႆ၊ ၵဝ်ဢမ်ႇႁူႉ။-

23ၵဝ်လႆႈယူႇၵႃႈၼႂ်းၵႄႈဝူင်ႈၵၢင် ဢၵျူဝ်းသွင်ပႃးၼၼ်ႉၵိတ်ႇၵႅပ်ႉၼႃႇဢေႃႈ။ မီးၸႂ်ဢၼ်တူၵ်းဢၢင်ႈၶႂ်ႈလၢႆသေၸၢတ်ႈၼႆႉလႄႈ ယူႇလူၺ်ႈၵၼ်တင်းၸဝ်ႈၶရိၸ်ႈဢေႃႈ။ လွင်ႈတၢင်းၼၼ်ႉပဵၼ်ဢၵျူဝ်း ဢၼ်ယဵင်ႈၶႅၼ်းမျၢတ်ႈလီၼႃႇဢေႃႈ။-

24ၵူၺ်းၵႃႈပေႃးလႆႈယူႇၵႃႈၼႂ်းတူဝ်ၶၼ်ႇထႃႇၸိုင်၊ ယဵင်ႈၶႅၼ်းတၵ်းမီးဢၵျူဝ်းတီႈသူဢေႃႈ။-

25တၵ်းမီးၸိူဝ်ႉၼင်ႇၼၼ်ဝႃႈၼႆ ၵဝ်တူၵ်းၵၢင်ၸႂ်ယူႇသေလႄႈ ႁူႉလွင်ႈဢၼ်ၵဝ်တၵ်းလႆႈယူႇၵႃႈၼႂ်းတူဝ်ၶၼ်ႇထႃႇသေလႄႈ ႁဵတ်းၵေႃႉႁဵတ်းသေႈလူၺ်ႈၵၼ်တင်းသူၵႃႈမီးတင်းသဵင်ႈတင်းလူင် ပုၼ်ႈလွင်ႈၼင်ႇႁိုဝ်တၢင်းသိူဝ်းပျေႃႇသူ တၵ်းယႂ်ႇၵႂၢင်ႈမႃး ပျေႉၸုမ်ႇၼႂ်းတၢင်းဢၼ်ယုမ်ႇမၢတ်ႈ၊-

26ႁႂ်ႈသူလႆႈဢိင်ပိုင်ႈ ယေႇသူႉၶရိၸ်ႈ သေလႄႈ ယဵင်ႈၶႅၼ်းမီးတၢင်းဢၼ်ဢုပ်ႇဝၢဝ်းလူၺ်ႈလွင်ႈၵဝ်ၵွပ်ႈပိူဝ်ႈ ဢၼ်ၵဝ်တၵ်းသမ်ႉၶိုၼ်းႁွတ်ႈထိုင် ၵႃႈတီႈဢၼ်သူမီးၼၼ်ႉထႅင်ႈၵမ်းၼိုင်ႈၼၼ်ႉယူႇဢေႃႈ။

27ၵဝ်ႁွတ်ႈထိုင်သေလႄႈ လႆႈႁၼ်သူတႂ်ႈတႃသေဢမ်ႇဝႃႈ၊ ယၢၼ်ၵၼ်တင်းသူယူႇသေဢမ်ႇဝႃႈ၊ လွင်ႈၼင်ႇႁိုဝ် ၵဝ်တၵ်းလႆႈႁူႉ လႆႈငိၼ်း လွင်ႈတၢင်းဢၼ်သူ ယင်းဢမ်ႇၵူဝ်ဢမ်ႇသၼ်ႇၵွပ်ႈရၢၼ်ႇသူႇတင်းလၢႆလႃးလႃး၊ တႄႇယူႇၼႂ်းၸႂ်ဝီႉၺိၺ်ႇပႃးၼိုင်ႈၵူၺ်းလႄႈ ၽွမ်ႉၵၼ်ၵျူဝ်းၸႃးပုၼ်ႈ တၢင်းဢၼ်ယုမ်ႇမၢတ်ႈဢၼ်ၸၢပ်ႈသႅင်ႇၵၼ်တင်း တြႃးသတၢင်းသိူဝ်းပျေႃႇၼၼ်ႉၸိုင်၊ ႁဵတ်းဝၢတ်ႈလူင်ဝၢတ်ႈဢွၼ်ႇ ၸွမ်းၵႃႈၼင်ႇဢၼ်ထုၵ်ႇမႅၼ်ႈတင်းတြႃးသတၢင်းသိူဝ်းပျေႃႇၼၼ်ႉသေလႄႈယူႇတႃႉ။-

28လွင်ႈတၢင်းဢၼ်ဢမ်ႇၵူဝ်ဢမ်ႇသၼ်ႇၵွပ်ႈပိူဝ်ႈရၢၼ်ႇသူႇတင်းလၢႆၼၼ်ႉ ပဵၼ်ၼီႉမိၵ်ႈလၢၵ်ႈၶၼႃႇ၊တၢင်းလူႉတၢင်းလႅဝ်တီႈၶဝ်ၼၼ်ႉဢေႃႈ။ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈၸီႇယၢင်ႇၼၼ်ႉလႄႈတီႈသူၸမ်ႉ၊ ပဵၼ်ၼီႉမိၵ်ႈလၢၵ်ႈၶၼႃႇတၢင်းၵႄႇၶျွတ်ႈဢဝ်ဢေႃႈ။-

29လွင်ႈမၼ်းၸမ်ႉ သူၶၢမ်ႇမိူၼ်ၸိူဝ်ႉၼင်ႇ တၢင်းဢၼ်တိုၵ်းဢၼ်တေႃးဢၼ်ၵဝ်လႆႈၶၢမ်ႇ၊

30ဢၼ်သူလႆႈႁၼ်မိူဝ်ႈဢွၼ်ၼႆႉၼၼ်ႉ၊ တေႃႈလဵဝ်ၼႆႉၵေႃႈ ဢၼ်သူလႆႈငိၼ်းယူႇၼၼ်ႉယူႇသေလႄႈ လိူဝ်တွၼ်းသေဢၶႂၢင်ႉတၢင်းဢၼ်ယုမ်ႇမၢတ်ႈၸဝ်ႈၶရိၸ်ႈၼၼ်ႉ၊ သူလႆႈဢၶႂၢင်ႉတၢင်းဢၼ်လႆႈၶၢမ်ႇတၢင်းဢၼ်ယၢၵ်ႈဢၼ်ၽၢၼ် ပုၼ်ႈၸဝ်ႈၶရိၸ်ႈၼၼ်ႉ ၵွပ်ႈပိူဝ်ႈၵျေးၸူးၸဝ်ႈဢေႃႈ။

Jump to: Chapter 2 →