Philippians 3

Shan

← Chapter 2 Jump to: Chapter 4 →

1ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်ႉ၊ ပီႈၼွင်ႉၵဝ်တင်းလၢႆဢိူၺ်း၊ မီးတၢင်းဢၼ်သိူဝ်းပျေႃႇၼႂ်းၸဝ်ႈၽြႃးတႃႉ။ ပိၵ်ႉသမ်ႉၵဝ်တႅမ်ႈပၼ်ၵႂႃႇ ၶိူဝ်းၶိူဝ်းယႂ်းယႂ်းသေၵေႃႈ၊ တီႈၵဝ်ဢမ်ႇမီးတၢင်းဢၼ်ယၢပ်ႇၸႂ်ၽိုတ်ႇၸႂ်။ တီႈသူၸမ်ႉ၊ မီးတၢင်းဢၼ်မၼ်ႈၶိူင်ႇယူႇဢေႃႈ။

2ဝႄႈပႅတ်ႈသေ မႃတင်းလၢႆတႃႉ။ ဝႄႈပႅတ်ႈသေၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ဢမ်ႇလီဢမ်ႇငၢမ်းၼၼ်ႉတႃႉ။ ဝႄႈပႅတ်ႈသေၶဝ်ၸိူဝ်းဢၼ်ႁဵတ်းတၢင်းဢၼ်ထိူဝ်ၶၢတ်ႇတႅပ်းၶၢတ်ႇၼၼ်ႉတႃႉ။-

3ႁဝ်းၸိူဝ်းဢၼ်ပႃးတင်းၸႂ်ဝီႉၺိၺ်ႇၵူဝ်းၵႂၢႆႇ ၽြႃးပဵၼ်ၸဝ်ႈလႄႈ ယင်းဢမ်ႇမီးတၢင်းဢၼ်ဢိင်ပိုင်ႈၸႃႇတီႉ ဢုပ်ႇဝၢဝ်းသိူဝ်းပျေႃႇ ၼႂ်း ယေႇသူႉၶရိၸ်ႈ ၵူၺ်းၼႆႉ ပဵၼ်ၵေႃႉဢၼ် ၶၢမ်ႇတၢင်းဢၼ်ထိူဝ်ႁိမ်း ဢၼ်မၢၼ်ႇဢၼ်မႅၼ်ႈဢေႃႈ။-

4ၵူၺ်းၵႃႈ သင်ပဵၼ်ၵဝ်ၸိုင်၊ မီးလွင်ႈဢၼ်တၵ်းဢိင်ပိုင်ႈၸႃႇတီႉဢေႃႈ။ ပေႃးတၢင်ႇၵေႃႉထၢင်ႇမၼ်းမီးလွင်ႈဢၼ်တၵ်းဢိင်ပိုင်ႈၸႃႇတီႉၸိုင်၊ ၵဝ်ၸမ်ႉယဵင်ႈၶႅၼ်းမီးဢေႃႈ။-

5ၵဝ်ၼႆႉ၊ ၼႂ်းဝၼ်းဢၼ် ထူၼ်ႈထိုင်ပႅတ်ႇဝၼ်းၼၼ်ႉ လႆႈၶၢမ်ႇတၢင်းဢၼ် ထိူဝ်ႁိမ်းဢေႃႈ။ ပဵၼ်မဵဝ်း ဢီႉသရေႇလႃႉ ၊ ၶိူဝ်း ပိၼ်ႇယႃႇမိၼ်ႇ ဢေႃႈ။ ပဵၼ်ၵူၼ်း ႁေႇပြႄး ၸႅတ်ႈၸႅတ်ႈ ဢၼ်သိုပ်ႇလူင်းမႃး ၵႃႈတီႈၵူၼ်း ႁေႇပြႄး ဢေႃႈ။-

6ၸွမ်းလူၺ်ႈတြႃးလႄႈ ပဵၼ် ၽႃႇရီႉသႄး ဢေႃႈ။ ၸွမ်းၼင်ႇတၢင်းဢၼ်ႁူဝ်ၸႂ်ႁႅင်းယႂ်ႇၼႃႇၼၼ်ႉပဵၼ်ၵေႃႉဢၼ်ၼိၵ်ႈၸၢၵ်ႈငႅၼ်းသႄးၸိူဝ်းၸဝ်ႈဢေႃႈ။ ၸွမ်းၼင်ႇတၢင်းဢၼ်သိုဝ်ႈတေႃႇ၊ ဢၼ်လႆႈၵွပ်ႈပိူဝ်ႈ ပိင်းၺၢပ်ႈတြႃးၼၼ်ႉ၊ ပဵၼ်ၵေႃႉဢၼ်ၵၢင်းလွတ်ႈတၢင်းတီႈတၢင်ႇဢပႅတ်ႈဢေႃႈ။

7ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈၸဝ်ႈၶရိၸ်ႈလႄႈ ၵဝ်မၢတ်ႈလွင်ႈတၢင်းဢၼ် ပွင်ႁဵတ်းဢၵျူဝ်း ၸီးပႂႃးၵဝ် ၵႃႈမီး တင်းသဵင်ႈတင်းလူင်ၼၼ်ႉ ပဵၼ်ၸိူဝ်ႉၼင်ႇ လွင်ႈတၢင်းဢၼ်သုမ်းဢေႃႈ။-

8လိူဝ်သေၼၼ်ႉဢမ်ႇၵႃး၊ ၵဝ်ထွၵ်ႈလူၺ်ႈလွင်ႈဢၼ်ပိင်ႇၺႃႇဢၼ်ႁူႉၸၵ်းၸဝ်ႈၵဝ် ယေႇသူႉၶရိၸ်ႈ ၼၼ်ႉ မျၢတ်ႈလီၼႃႇ ထၢၼ်ႇလႂ်ၼၼ်ႉသေလႄႈ ၵဝ်မၢတ်ႈလွင်ႈတၢင်း ၵႃႈမီးတင်းသဵင်ႈတင်းလူင်ၼၼ်ႉ ပဵၼ်ၸိူဝ်ႉၼင်ႇ လွင်ႈတၢင်းဢၼ်သုမ်းဢေႃႈ။ ၵွပ်ႈပိူဝ်ႈၸဝ်ႈၼၼ်ႉလႄႈ ၵဝ်လႆႈၶၢမ်ႇလွင်ႈတၢင်း ၵႃႈမီးတင်းသဵင်ႈတင်းလူင်ၼၼ်ႉသုမ်းယဝ်ႉ။-

9လွင်ႈၼင်ႇႁိုဝ် ၵဝ်တၵ်းယင်းဢမ်ႇဢိင်ပိုင်ႈ တၢင်းဢၼ်သိုဝ်ႈတေႃႇတူဝ်ၸဝ်ႈၵဝ်ႇ ဢၼ်လႆႈၵွပ်ႈပိူဝ်ႈ ပိင်းၺၢပ်ႈတြႃးဢိင်ပိုင်ႈတၢင်းဢၼ်သိုဝ်ႈတေႃႇ ဢၼ်လႆႈၵွပ်ႈပိူဝ်ႈတၢင်းဢၼ် ယုမ်ႇမၢတ်ႈဢၼ်ဝႃႈ တၢင်းဢၼ်သိုဝ်ႈတေႃႇ ဢၼ်ၽြႃးပဵၼ်ၸဝ်ႈ ပၼ်ပုၼ်ႈ တၢင်းယုမ်ႇမၢတ်ႈၼၼ်ႉယူႇသေလႄႈ လႆႈဢၼ်မျၢတ်ႈၸဝ်ႈၶရိၸ်ႈလႄႈ ပႃးၼႂ်းၸဝ်ႈၼၼ်ႉ၊-

10ဢိၵ်ႇတင်းလွင်ႈၼင်ႇႁိုဝ်ပေႃးၵဝ်ထုၵ်ႇၶိုတ်းထိုင် ဢၶႂၢင်ႉတၢင်းဢၼ် လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉလႆႈ၊-

11ၵဝ်တၵ်းႁူႉၸၵ်းၸဝ်ႈၼၼ်ႉဢိၵ်ႇတင်း တၼ်းၶူဝ်းတၢင်းဢၼ်မၼ်းၸဝ်ႈ လုၵ်ႉၶိုၼ်းၼၼ်ႉတင်း တၢင်းဢၼ်သိူၵ်ႈသမ်ႇၵၼ်တင်း တၢင်းဢၼ်ယၢၵ်ႈဢၼ်ၽၢၼ်လူၺ်ႈၵၼ်တင်း မၼ်းၸဝ်ႈလႄႈ ၶၢမ်ႇတၢႆမိူၼ်ၸိူဝ်ႉၼင်ႇဢၼ်မၼ်းၸဝ်ႈၶၢမ်ႇတၢႆၼၼ်ႉၸိုင်၊ ၵဝ်မၢတ်ႈလွင်ႈတၢင်း ၵႃႈမီးတင်းသဵင်ႈတင်းလူင်ၼၼ်ႉ ပဵၼ်ၸိူဝ်ႉၼင်ႇလွင်ႈတၢင်းဢၼ်ၵူဝ်ႈဢၼ်ၵိူၵ်ႇဢေႃႈ။

12မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ လႆႈၶၢမ်ႇဢၵျူဝ်းယဝ်ႉ၊ လႆႈႁွတ်ႈထိုင်တၢင်းဢၼ်ၸေးၸုမ်ႇယဝ်ႉဝႃႈၼႆ၊ ၵဝ်ဢမ်ႇၶႂ်ႈဝႃႈ။ ပဵၼ်ဢၵျူဝ်းဢၼ်လႂ်သေဢမ်ႇဝႃႈ၊ လွင်ႈၼင်ႇႁိုဝ်ၵဝ်တၵ်းလႆႈယိပ်းၵမ်ဢဝ် လွင်ႈတၢင်းဢၼ်ၵဝ်လႆႈၶၢမ်ႇတၢင်းဢၼ် ယေႇသူႉၶရိၸ်ႈ တီႉယိပ်းဢဝ်ၵဝ်ၼၼ်ႉၸိုင်၊ ၵဝ်ယင်းတိုၵ်ႉလႅၼ်ႈၸွမ်းယူႇဢေႃႈ။-

13ပီႈၼွင်ႉၶဝ်ဢိူၺ်း၊ ပိၵ်ႉသမ်ႉၵဝ်တူဝ်ၸဝ်ႈၵဝ်ႇ ဢမ်ႇထၢင်ႇၵဝ်ယိပ်းၵမ်ဢဝ်မႅၼ်ႈယဝ်ႉသေၵေႃႈ၊ လွင်ႈတၢင်းဢၼ်ၵဝ်ႁဵတ်းဢၼ်ၼိုင်ႈၼႆႉၸမ်ႉ၊ ၵဝ်ယင်းဢမ်ႇမၢတ်ႈတွင်းလွင်ႈတၢင်းဢၼ် တူၵ်းလိုၼ်းၸိူဝ်းၼၼ်ႉလႄႈယိုၼ်ႈ ဢဝ်လွင်ႈတၢင်းဢၼ်မီး ၵႃႈတီႈၽၢႆႇၼႃႈၸိူဝ်းၼၼ်ႉယူႇသေလႄႈ၊-

14ၶုၼ်ႇလႅၼ်ႈၸွမ်းၵႂႃႇၵႃႈတီႈသဝ်ပၢၼ်းတုင်း ပုၼ်ႉႁႂ်ႈလႆႈသူး ဢၼ်ၸၢပ်ႈသႅင်ႇၵၼ်တင်း တၢင်းဢၼ်ၽြႃးပဵၼ်ၸဝ်ႈ ယူႇၵႃႈတီႈၼိူဝ်ႁွင်ႉဢဝ် ၵွပ်ႈပိူဝ်ႈ ယေႇသူႉၶရိၸ်ႈ ၼၼ်ႉဢေႃႈ။

15ပိူဝ်ႈၼႆလႄႈ ၶဝ်ၸိူဝ်းဢၼ်ၸေးၸုမ်ႇၵႃႈမီးတင်းသဵင်ႈတင်းလူင်ၼၼ်ႉ တၵ်းလႆႈမီးၸႂ်ဢၼ်ၸပ်းဢၼ်ၸွႆးၸိူဝ်ႉၼင်ႇၼႆ ဢေႃႈ။ ပေႃးသူမီးၸႂ်သၽေႃးဢၼ်ပႅၵ်ႇပိူင်ႈၵၼ် ၼႂ်းသေၸိူဝ်ႉသေပိူင်ၸိုင်၊ လွင်ႈတၢင်းၼၼ်ႉၵေႃႈၽြႃးပဵၼ်ၸဝ်ႈ တၵ်းၽုၺ်ႇ ဢွၵ်ႇၼႄပျႃးဢေႃႈ။-

16ဢမ်ႇၼၼ်ၵေႃႈ ႁဝ်းတၵ်းလႆႈၵမ်ၵျၢင်ႉၼႄးလဵဝ်ၵၼ် ၵႃႈၼင်ႇဢၼ်ႁဝ်းၶိုတ်းထိုင်တေႃႈလဵဝ်ၼႆႉၼၼ်ႉဢေႃႈ။

17ပီႈၼွင်ႉၶဝ်ဢိူၺ်း၊ သူၽွမ်ႉၵၼ် ၵမ်ၵျၢင်ႉမိူၼ်ၸိူဝ်ႉၼင်ႇဢၼ်ၵဝ်ၵမ်ၵျၢင်ႉၼႆႉတႃႉ။ ၶဝ်ၸိူဝ်းဢၼ်ၵမ်ၵျၢင်ႉၸွမ်းၼင်ႇ ပုင်ႇသၢၵ်ႈသေႇ ဢၼ်ႁဝ်းပၼ်ၼၼ်ႉၵေႃႈ၊ လူတူၺ်းမၢတ်ႈတွင်းဝႆႉတႃႉ။-

18လွင်ႈမၼ်းၸမ်ႉ ၸိူဝ်ႉၼင်ႇဢၼ်ၵဝ်လၢတ်ႈဝႆႉ ၶိူဝ်းၶိူဝ်းယႂ်းယႂ်းမိူဝ်ႈဢွၼ်ၼႆႉၼၼ်ႉလႄႈ၊ တေႃႈလဵဝ်ၼႆႉၵေႃႈ၊ သမ်ႉမီးတင်း တၢင်းဢၼ် ၼမ်ႉတႃတူၵ်းယူႇသေလႄႈ လၢတ်ႈယူႇၼႆႉ ၶဝ်ၸိူဝ်းဢၼ် ႁဵတ်းရၢၼ်ႇသူႇ သဝ်လၵ်းဝႃးၵၢပ်ႈၸဝ်ႈၶရိၸ်ႈလႄႈ ၵမ်ၵျၢင်ႉ ၼၼ်ႉမီးၼမ်ၼႃႇဢေႃႈ။-

19သဵၼ်ႈတၢင်းၶဝ်ၼၼ်ႉ ၸၢင်ႈသုတ်းတိူၵ်ႈၵႃႈၼႂ်းတီႈဢၼ်လူႉဢၼ်လႅဝ်ဢေႃႈ။ ၽြႃးၶဝ်ၸမ်ႉ၊ ပဵၼ်တွင်ႉၶဝ်ဢေႃႈ။ ၶဝ်ဢုပ်ႇဝၢဝ်းၼႂ်းတၢင်းၵမ်တၢင်းၵျၢင်ႉဢၼ်ၶဝ်လီဢူၵ်းလီဢၢႆၼၼ်ႉၵူၺ်းဢေႃႈ။ မီးတၢင်းဢၼ်ၸႂ်ၸပ်းၸႂ်ၸွႆးၶိူင်ႈပိူင်လေႃးၵီႇတင်းလၢႆၵူၺ်း ဢေႃႈ။-

20တၢင်းဢၼ်ႁဝ်းၵမ်ၵျၢင်ႉၸမ်ႉ၊ ၸၢပ်ႈသႅင်ႇၵၼ်တင်းမိူင်းၵၢင်ႁၢဝ်ယူႇဢေႃႈ။ ႁဝ်းမုင်ႈထႃႈမွင်းထႃႈလွင်ႈဢၼ် ၸဝ်ႈဢၼ်ၵႄႇၶျွတ်ႈဢဝ် ဢၼ်ဝႃႈၸဝ်ႈ ယေႇသူႉၶရိၸ်ႈ ၼၼ်ႉ တၵ်းလုၵ်ႉသေၵႃႈတီႈမိူင်းၵၢင်ႁၢဝ်လူင်းမႃးၼၼ်ႉယူႇဢေႃႈ။-

21ၸဝ်ႈၼၼ်ႉ တၵ်းမႄးႁဵတ်းတူဝ်ၶၼ်ႇထႃႇႁဝ်း ဢၼ်ယုတ်ႈဢၼ်ယွမ်းၼႆႉ ႁႂ်ႈပဵၼ်ဢၼ်မႂ်ႇ ႁႂ်ႈလႆႈပဵၼ်မိူၼ်ၸိူဝ်ႉၼင်ႇ တူဝ်ၶၼ်ႇထႃႇ မၼ်းၸဝ်ႈ ဢၼ်ပျေႉၸုမ်ႇတင်းမုၼ်သရေႇၼၼ်ႉ ၸွမ်းၵႃႈၼင်ႇ တၢင်းဢၼ်မၼ်းၸဝ်ႈမႄးႁဵတ်း၊ ဢၼ်မၼ်းၸဝ်ႈဢဝ် လွင်ႈတၢင်းၵႃႈမီး တင်းသဵင်ႈတင်းလူင် ၶျႃးတူၵ်းတီႈတႅမ်ႇ ၵႃႈတႂ်ႈတိၼ်မၼ်းၸဝ်ႈလႆႈၼၼ်ႉဢေႃႈ။

← Chapter 2 Jump to: Chapter 4 →