1 Corinthians 4

Sinhala Bile - Revised Old Version (SROV)

← Chapter 3 Jump to: Chapter 5 →

1මනුෂ්‍යයෝ අප ක්‍රිස්තුස්වහන්සේගේ සේවකයන් මෙන්ද දෙවියන්වහන්සේගේ රහස්වල ගබඩාකාරයන් මෙන්ද ගණන්ගනිත්වා.

2ඇරත් මෙහිදී ගබඩාකාරයන්ගෙන් ඕනෑකරන්නේ එක එක මනුෂ්‍යයා විශ්වාසව සිටීමය.

3නුමුත් ඔබ සැම විසින්වත් මනුෂ්‍ය විනිශ්චයෙන්වත් මා විනිශ්චයකරනු ලැබීම මට ඉතා සුළු දෙයක්ය. එසේය, මමම මා විනිශ්චය නොකරමි.

4මක්නිසාද මට විරුද්ධව කිසිවක් ඇති බව නොදනිමි; නුමුත් ඒ නිසාම නිදොස් නොවෙමි. මා විනිශ්චයකරන්නේ ස්වාමීන්වහන්සේය.

5එහෙයින් ස්වාමීන්වහන්සේ එන තුරු කාලයට පළමුවෙන් කිසිවක් විනිශ්චය නොකරන්න. උන්වහන්සේ අන්ධකාරයේ සැඟවුණු දේ එළිදරව්කොට, සිත්වල අදහස් ප්‍රකාශකරනසේක; එවිට එකිනෙකාට තම තමාගේ ප්‍රශංසාව දෙවියන්වහන්සේගෙන් ලැබෙන්නේය.

6ඉතින්, සහෝදරයෙනි, ඔබ සැම උදෙසා මේ දේ උපමාවකින් අපොල්ලොස්ටත් මටත් අදාළකොට කීමි. එසේ කරන්නේ ලියා තිබෙන දේ ඉක්මවා නොයන්ට ඔබ සැම අපෙන් ඉගෙනගන්නා පිණිසත් ඔබ සැමගෙන් කවරෙක්වත් එක්කෙනෙකු උදෙසා අනිකෙකුට විරුද්ධව උඩඟු නොවන පිණිසත්ය.

7මක්නිසාද ඔබට වෙනස් වෙන්ට සලස්වන්නේ කවුද? ඔබට ලැබුණ දේ හැර ඔබට ඇත්තේ කිමෙක්ද? ඉදින් එය ලැබුණානම් නොලැබුණාක්මෙන් පාරට්ටුකරගන්නේ මක්නිසාද?

8දැනටම ඔබ සැම පූර්ණව සිටින්නහුය. දැනටම ඔබ සැම ධනවන්තව සිටින්නහුය, අප නැතුව ඔබ සැම රජකම්කළහුය. එසේය, ඔබ සැම සමඟ අපත් රජකම්කරන පිණිස ඔබ සැම රජකම්කරවු නම් කැමැත්තෙමි.

9මක්නිසාද ප්‍රේරිතවූ අප මරණයට නියමකරනලද්දන් මෙන් අන්තිමයන් කොට දෙවියන්වහන්සේ දැක්වූසේකැයි සිතමි. මක්නිසාද, අපි ලෝකයටත් දේවදූතයන්ටත් මනුෂ්‍යයන්ටත් ප්‍රදර්ශනයක් කරනු ලබමුව.

10අපි ක්‍රිස්තුස්වහන්සේ උදෙසා මෝඩයෝය, නුමුත් ඔබ සැම ක්‍රිස්තුස්වහන්සේ තුළ ප්‍රඥාවන්තයෝය; අපි දුර්වලය, නුමුත් ඔබ සැම ශක්තිමත්ය; ඔබ සැමට ගෞරවය ඇත්තේය, නුමුත් අපට ඇත්තේ අගෞරවයය.

11මේ පැය දක්වාම ශුධාවද පිපාසායද විඳ, වස්ත්‍ර නැතුව, පහර ලැබ, නියම වාසස්ථානයක් නැතුව සිටිමුව.

12අපේම අත්වලින් වැඩකරමින් වෙහෙසෙමුව. නින්දා ලබන කල අපි ආශීර්වාදකරමුව; පීඩා ලබන කල අපි ඉවසමුව;

13අපකීර්තිය ලබන කල අපි අවවාද දෙමුව. මේ දක්වාම ලෝකයේ කුණු මෙන්ද සියලු දේවල කසළ මෙන්ද වී සිටිමුව.

14මා විසින් මේ දේ ලියන්නේ ඔබ සැම ලජ්ජාවට පමුණුවන පිණිස නොව, මාගේ ප්‍රිය දරුවන්ට මෙන් ඔබ සැමට අවවාදකරන පිණිසය.

15මක්නිසාද ක්‍රිස්තුස්වහන්සේ තුළ ඔබ සැමට දසදහසක් ගුරුවරු ඇතත් ඔබ සැමට බොහෝ පියවරු නැත. මක්නිසාද ශුභාරංචිය කරණකොටගෙන ක්‍රිස්තුස් යේසුස්වහන්සේ තුළ මම ඔබ සැම ජනිතකෙළෙමි.

16එහෙයින් ඔබ සැම මා ආදර්ශයට ගන්නන් වන ලෙස ඔබ සැමගෙන් ඉල්ලමි.

17මේ පිණිස, ස්වාමීන්වහන්සේ තුළ මාගේ ප්‍රියවූ විශ්වාස දරුවාවූ තිමෝතියස් ඔබ සැම ළඟට එවීමි. මා සියලු තැන්වල සියලු සභාවලදී උගන්වන ප්‍රකාරයට ක්‍රිස්තුස්වහන්සේ තුළ ඇත්තාවූ මාගේ මාර්ගයන් ඔහු ඔබ සැමට සිහිකරවනවා ඇත.

18නුමුත් මා ඔබ සැම ළඟට එන්නේ නැත කියා සමහරු උඩඟුව සිටිති.

19නුමුත් ස්වාමීන්වහන්සේ කැමතිසේක් නම් මම ඔබ සැම ළඟට වහාම ඇවිත්, උඩඟුවූවන්ගේ කථාව නොව ඔවුන්ගේ බලය දැනගන්නෙමි.

20මක්නිසාද දෙවියන්වහන්සේගේ රාජ්‍යය (ප්‍රකාශවන්නේ) කථාවෙන් නොව බලයෙන්ය.

21ඔබ සැම කැමති කොයි එකටද? මා ඔබ සැම ළඟට ඉපලක් රැගෙන එනවාටද? නැතහොත් ප්‍රේමෙයනුත් මෘදුකමේ ආත්මෙයනුත් යුක්තව එනවාටද?

← Chapter 3 Jump to: Chapter 5 →