2 Kings 24

Sidamo

← Chapter 23 Jump to: Chapter 25 →

1Iyoaaqeemi moohe noo yannara, Baabilooni moote Nabukadanatsoori Yihuda qase qeeli. Iyoaaqeemino 3 diro gabbarisihu gedensaanni isira badhe wodhi.

2Kaaliiqi soqqamaanosi himanaanote widoonni qole Yihuda hunate coyi'rino coyi wo'manno gede horritannore Baabiloonoota, Sooriyoota, Moaabootanna Amoonoota Iyoaaqeemi aana kayisi.

3Kuni coyi ikkinohuno moote Minaase loosino cubbi baalu daafira Yihudu manna albisinni hunate Kaaliiqi hajajino coyi wo'manno gedeeti.

4Minaase keeraano manna shee Yerusaalame mundee calla assino. Kunnira, Kaaliiqi hakkonne cubbo agurara dihasi'rino.

5Iyoaaqeemi assinohu wolu coyi baalu Yihudu mootoolla dhagge amadino maxaafi giddo borreessineenna no.

6Iyoaaqeemino annuwasinte gede reenna, beettisi Yoakiini isi darga moohi.

7Baabilooni moote Nabukadanatsoori Efiraaxisi Wayinni kayise Gibitsete aliyye qacce geeshsha noo gobba baala amadino daafira, hakkunni gedensaanni Gibitsete mootenna olantosi olaho difultino.

8Yoakiini moohinohu 18 dirisinniiti. Yerusaalame teesso assi're 3 agana moohino. Amasi Nehushita Yerusaalamete manchi Elinaataani ilinote.

9Isono annisi faale ganteennasi Kaaliiqi giwanno coye assino.

10Isi gashshe noo yannara Baabilooni moote Nabukadanatsooriti olu hajajaano olantote ledo dagge Yerusaalame gaangeessitu.

11Insa gaangeessite heedheenna Nabukadanatsoorino kae Yerusaalame dayi.

12Yihudu moote Yoakiini, amasi, soqqamaanosi, olu hajajaanonna ledosi gashshaano baalu Baabiloonootaho anga uyitu. Nabukadanatsoori moohihunni settikki diro Yoakiini qafade haa're ha'ri.

13Qullaawa Minenna mootete mine noo jajja baala co'o asse Baabilooni adhe ha'ri. Alba asse Kaaliiqi coyi'rinonte gede, moote Selemooni Qullaawu Minira seekkisiisinoha culku uduunne baala hiiqqaqqi.

14Nabukadanatsoori Yerusaalamete manna baala, olu hajajaanonna mootete ledo gashshaano, mitteenni 10,000 manna qafade haa're ha'rino. Insa ledo angate ogimma afidhinorenna siwiila tuntannore baala haa're ha'ri; dargaho noori nookki buxane calla gattino.

15Nabukadanatsoori Yoakiini, amasi, meentosi, ledosi gashshaanonna Yihudu ayirradda baala gamba asse Baabilooni haa're ha'ri.

16Qoleno 7,000 olantonna angate ogimmano afidhinore 1,000 siwiila tuntannore gamba asse Baabilooni haa're ha'ri. Kuri baalunku jawaatootahonna olama dandiitannoreeti.

17Nabukadanatsoori Yoakiini wosiila Maataaniya Yihudu moote asse moohise su'masi Sedeqiyaasi yee soorri.

18Sedeqiyaasi moohinohu 21 dirisinniiti. Yerusaalame teesso assi're 11 diro gashshino. Amasi Hamuxaali Libina Katami manchi Ermiyaasi ilinote.

19Sedeqiyaasino Iyoaaqeemi gede Kaaliiqi giwanno coye assino.

20Kaaliiqi Yerusaalamennihanna Yihudu manna hanqe albisinni huni. Moote Sedeqiyaasino Baabilooni moote Nabukadanatsoorira mokkookki.

← Chapter 23 Jump to: Chapter 25 →