2 Kings 25

Sidamo

← Chapter 24 Jump to:

1Sedeqiyaasi moohihunni honsikki diro tonnikki aganira, tonnikki barra Nabukadanatsoori olantosi baala adhe daye Yerusaalame qasara doyisse amadi. Olantosino katama gaangeessite huxxu qooxeessira bushsha duuntu.

2Kunni garinni Sedeqiyaasi moohihunni tonaa mitikki diri geeshsha doyissite keeshshitu.

3Hakko diro shoolki aganira, honsikki barra mannaho itannori goofeenna hude batidhu.

4Hakkunni gedensaanni katamu huxxi dhooheenna, Yihudu olanto hashsha fulte ba'u. Baabilooni olanto agarte heedheennanni, lamenka huxxa xaadisanno waalchi widoonni mootete gati muleenni higge Yordaanoosi Lagichi widira higge xooqqu.

5Ikkollana Baabilooni olanto Sedeqiyaasi shorrite Iyyaarko mule noo xawira amaddu. Gaaddosi baalanti iso hunte xooqqu.

6Iso qafadde Ribila yinanni katamira noohuwa Nabukadanatsooriwa haadhe massitu. Isino Sedeqiyaasi bunshe egensiisi.

7Sedeqiyaasi illesinni la"anni hee'reenna oososi shini. Hakkunni gedensaanni Nabukadanatsoori lamenta illesi giddonni fushshine hunnanni gede assi. Angasinna lekkasino camote cagaagenni usurre Baabilooni haa'ne ha'ni.

8Nabukadanatsoori moohihunni tonaa honsikki diro, ontikki aganira lamalki barra, mootete mini agaraasine roorrichi Nabuzardaani Yerusaalame ei.

9Qullaawa Mine, mootete minenna Yerusaalamete minna baalate giira qasi; wole umo umo ikkitino minnano giire huni.

10Nabuzardaani olantono Yerusaalamete huxxa diiggu.

11Nabuzardaani katamaho gatte noorenna woloota, hattono gobbansa gibbe Baabiloonootu hale ikkitinore qafade haa're ha'ri.

12Horo buxxinore kayinni hakkiicho dargaho agurino. Insa woyinete kaashsho shuquntanno gedenna baatto loossanno gede assino.

13Baabiloonootu Qullaawa Mine noore camotenni seekkinoonni mokkollo, uduunne aanaho worrannire lekka afi'rinorenna Baaraho yinannita waa worrannita jawa gawate hiiqqaqqitu. Camo baala kayinni Baabilooni haadhe hadhu.

14Camotenni seekkinoonni kerra, qarabba, buluulo fushshinannire, xiltaame saannanna mooqquwa, qoleno camotenni seekkinoonniha Qullaawu Mini hajora ikkanno uduunne baala adhite hadhu.

15Culkunninna birrunni seekkinoonnire xiltaame saannanna hixaana giirranni bacce baala adhite hadhu.

16Moote Selemooni Kaaliiqi Minira ikkanno gede seekkisiisino uduunni: Lame mokkollo, uduunne aanaho worranniha lekka afi'rinore, Baaraho yinanni gawate baala seekkinoonni camo lowota ikkitino daafira keena didandiinanni.

17Lamenti mokkollo mittu suudinni seekkinoonnite; mittu mittunku mokkollichi seendille 18 cigileeti. Mokkollote camotenni seekkinoonni guuto noonsa; mitte mittenti guuto hojja 3 cigileeti. Mitte mittente guuto laayyora shaffo lawanno shuri noose.

18Nabuzardaani qeesootu roorricha Seerayanna isi hoodeha qeesicha Soffooniyaasinna wole 3 Qullaawu Mini roorroota amade haa're ha'ri.

19Hatte yanna geeshsha katamaho keeshshitinore gaaddote hajajaancho, 5 mootete amaalaasine, manna olaho filannoha olantote hajo borreessannohanna wole 60 jajjabba manna haa're ha'ri.

20Konne manna baala Hamaati Gobbara Ribila Katamira noohuwa Baabilooni mootewa haa're massi.

21Mooteno insa hakkiicho shiishiishi. Kunni garinni Yihudu manni gobbansanni qafadame ha'ri.

22Nabukadanatsoori Saafaani beetti Ahiqaami ilinohu Gedaaliya Yihudaho gatino manna gashshanno gede wori.

23Anga uyitinokkiri olu hajajaanonna olanto konne coye macciishshite Mitsipha noohuwa Gedaaliyawa hadhu. Hadhinori olu hajajaano: Naataaniya beetti Ismaeeli, Qaareha beetti Yohanaani, Nexofa Katami manchi Tanihumeeti beetti Seerayanna Maaka ilaminohu Yaizaaniyaati.

24Gedaaliyano olantote hajajaanoranna olantote, «Baabilooni gashshaano la'ine waajjitinannikki gede seekke kuleemmo'ne; tenne gobbara loosidhine heedhe; Baabilooni mooterano giwire baatte; hatto assitiniro baalunku coyi qinaanno'ne» yiinsa.

25Ikkollana kayinni hakko dironni lamalki aganira mootete fiixa ikkinohu Elishamai beetti Naataaniya ilinohu Ismaeeli 10 manna anga adhe Mitsipha mare Gedaaliya shii. Gedaaliya ledo noore Yihudunna Baabilooni mannano shee gudi.

26Kunnira Baabilooni manna waajjitino daafira, Yihudu manni aja akkala yinikkinni baalunku olu hajajaano ledo Gibitse xooqi.

27Moote Ewili-Merodaaki Baabilooni moohi yannara, Yoakiini qafadamihunni sajjiina lamalki diro, tonaa layinki aganira lemiina lamalki barra usurunni tirisi.

28Ewili-Merodaaki Yoakiinira dancha coye assino. Isi gede qafadante Baabilooni heedhino mootoolla baalantenni roore ayirrado darga uyinosi.

29Yoakiinino usuru mini imaana soorri're, reya geeshsha mootete ledo itanno gede assinisi.

30Lubbotenni hee'ri geeshsha barru barrunkunni hasiisannosire baala uyinannasi hee'rino.

← Chapter 24 Jump to: