Ecclesiastes 4

Sidamo

← Chapter 3 Jump to: Chapter 5 →

1Xaano kalqete aana assinanni beebba afoommo; gadadantinori sheshifachishannonsaha hoogge wi'litanna laoommo. Roorre baala gadadissannonsarita ikkitinohura kaa'lannonsaha diafidhino.

2Anino, «Xa lubbotenni noorinni roore alba reyitinori ba'raadhinoreeti» yoommo.

3Wo'munkunni roore kayinni horo ilaminokkihunna kalqete aana assinanni beebba lainokkihu ba'raa'rinoho.

4Qoleno mannu halchinore afi'rate daafure loosanno gara baala laoommo; mannu hatto ikkannohu olliichosi hinaasino daafiraati. Kunino haafaho; diilallo cu'mate gedeeti.

5Anga xaaxi're ofollannohu cee'maleessu hudetenni reyanno.

6Ikkollana, lamente anganni loonsanni haafamantenni wodanu fooliishsho ledo, mitte anganni loonsoonnihu shiimu rooranno. Kunino diilallo cu'mate gedeeti.

7Xaano tenne kalqera nooha haafu coye afoommo.

8Callisi hee'rannoha mitto mancho afoommo. Ila woy rodoo diafi'rino; loosisi kulle didandiinanniho; noosi jirono illesi la'e diduubbino. «Togo daafureemmohu ayeraati? Umo'ya hagiirruwiinni mayira hooleemmo?» yee diegennino. Kunino haafaho; wottote heeshshooti.

9Loosi're dancha guma afi'rate, mitto calla ikkantenni lame ikka woyyitanno.

10Mittu uwiro mittu kayisanno. Uweenna kayisannosihu nookkihura aanne'e!

11Qiidu yannara lamu mitteenni goxxuro iibbannonsa. Callisi goxannohura hige maminni iibbannosi?

12Mittu manchi callichisi dandaannokki dano, lamu ittisa dandiitanno. Sase qiqqishonni gannoonni siiwo rakke dita'anno.

13Seejjo adhannokkihunni gowwu geerchu mootenni, busulu buxichu wedellichi woyyanno.

14Kuni wedellichi, usurunni tidhaminoha woy gashshootisi giddo buximatenni ilaminoha ikkara dandaanno.

15Tenne kalqera hee'ranno manni baalu mootete darga amadanno wedellichi hoode ha'ranna laoommo.

16Isi moohe gashshanno manni, kiiro diafi'rinoho. Isi gedensaanni daanno manni kayinni iso dijajanno. Kunino haafaho; diilallo cu'mate gedeeti.

← Chapter 3 Jump to: Chapter 5 →