Ecclesiastes 6

Sidamo

← Chapter 5 Jump to: Chapter 7 →

1Kalqete aana mannaho lowo geeshsha ayirrinoha wole busha coye afoommo.

2Maganu mannaho jiro, qiniitenna ayirrinye aanno; hasiisannore mittoreno dixeisanno. Ikkollana jirosinni hagiidhanno gede kaayyo diuyinosi; isi daafurroha wolu itanno. Kunino haafaho; lowo geeshsha dadillisannoho.

3Mittu manchi 100 ooso iliro, lowo dirono hee'riro, kayinnilla wodanisi harshammi yaa hoogironna, garunni madaarama hoogiro, isinninni ama godowa kisidhinohu woyyate.

4Hakku, ama godowa kisidhinohu, mulla haafa ilame tunsicho ha'ranno; su'misino hawame gatanno.

5Arrishsho la"a hoogironna, mittoreno afa hoogiro nafa, hakko manchinni roore fooliishsho noosi.

6Hakku manchi hagiidhikkinni 2,000 diro hee'riro nafa, lamunku martuwa marte mitto darga hadhanno.

7Mannu daafurannohu kokkesiraati. Ikkollana, «Duuwoommo» diyaanno.

8Egennaamu gowwa mayinni rooranno? Buxichu hee'nanni gara afasinni maricho lexxanno?

9Kunnira, lexxate haafamantenni, noohunni hagiidha woyyate. Kunino haafaho; diilallo cu'mate gedeeti.

10Ikkannohu baalu albanni ikkanno yinoonniho; mannu ikkannoti albanni anfoonnite. Ayino jawaantetenni roorannosihu ledo yekkeeramara didandaanno.

11Coyi bati'ri deerrinni, gowwimma lexxitanno; kunino mannaho kaa'lannori dino.

12Caalu gede ikkite sa'anno yanna tenne haranchotenna, tidhitinokkite giddo mannaho woyyannore afinohu ayeti? Woy kayinni reyihu gedensaanni tenne kalqera ikkannore, mannaho kula dandaannohu ayeti?

← Chapter 5 Jump to: Chapter 7 →