Lamentations 1

Sidamo

Jump to: Chapter 2 →

1Mannu wo'me hee'rannoti Yerusaalame, hiitto fano gattu! Gobba gosa ayirrisseenna heedhinoti, galte shiidhino mancho gede hiitto callase gattu! Katammate giddo mootitte ikkite heedhinoti, kuneeti borojjicho ikkitino.

2Hashsha wo'ma lowo geeshsha wi'litanna, baqqaallisera hindiiddo daaddanno. Albi baxillaanose baalate giddonni, sheshifachishannosehu mittu nafa dino. Halese ikkitinori baalu badhe wodhitinose; diina ikkitinose.

3Yihudu manni lowo qarrinna borojjimmate loosi gedensaanni, gobbansanni qafadame ha'rino. Hadhe wole gosa ledo heedhino; fooliishshidhannowano diafidhino. Gadadissannonsari qarru giddo heedheenna dagge, fultannokki gede assite amaddinonsa.

4Ayyaana ayirrisate Qullaawu Minira daannohu nookki daafira, Tsiyooni doogga ca'lamaddi yitino. Katamu waalchuwa onate; qeesootise wi'litino. Seennise yaadanno; Tsiyoonino dadillu giddo no.

5Cubbise batinyinni kainohunni, Kaaliiqi shetisinose daafira, diinnase isera umo ikkitino; insara baalu coyi qiniinonsa. Oososeno diinu qafadanno gede assino.

6Yerusaalamete gaamaarre baala sa'e hadhino. Albisootise hudi'rino geedimi gede daafurtino; shorritannonsariwiinni xooqqe fulate wolqa diafidhino.

7Diigante mullicho gattino Yerusaalame, xa albi xumillese heddanni no. Diinu anga ubbu yannara mittuno kaa'linosehu dino; qeeltuserino uwase la'e oso'litino.

8Kuneeti ayiirinyise baalu sae ha'rino; mulla ikkiteenna baalunku qacifatinose; saalisenni kainohunni gurura'anni alba diphitanno; Yerusaalame tiyyi'nanni cubbinni umose boshshitino.

9Battaawase reqecci yite leeltino; ise kayinni daannose coyi daafira, bashshi nafa diassitino. Uwase jaddote; sheshifachishinosehu mittuno dino. Diinna qeeltinoena, Kaaliiqa qarra'ya lai!

10Diinu angasi diriirse, jajjase baala wolqatenni adhino; ati Kaaliiqi e'annokki gede hooloottoti maganiweelo gosa, Qullaawu Minira wolqatenni e'anna la'ino.

11Mannise baalu sagale hasi're qununa"anni no; lubbo gatisi'rate yite jajjinsa baalunni sagale soorridhanno. Kaaliiqa laie! Qarra'ya baala laie!

12Muleseenni hige sa"annohura baalaho, «Kawa higgine ane la'e! Kaaliiqi hanqi buwi yannara, anera iillino qarri geeshshihu amadinosi manchi horonta dino.

13Iiminni giira soyino; hatti giira raqqite miqicho iillitinoe. Woshshaado wore milli yaa hoolinoe; barra wo'ma dalagoommowa facci asse agurinoe.

14Loosoommo cubbo baala gamba asse usure, haxo'yara qambaru gede asse worino; duhuno ayirreennae daafuroommo. Kaaliiqi, gargadha dandeemmokkihura, diini'yara sayise uyinoe.

15Kaaliiqi wolqaataamma gaaddo'ya oso'lino; wedella'ya guddanno olanto soyino; manna'ya daankoonni gidi gede asse maniissino.

16Hindiiddo ille'yara wo'mite du'nantannohu kunniraati; sheshifachishaeranna jawaachishaera dandaannohu mittuno dino; diinu qeelinoe; manni'ya giddonnino gatinohu dino.

17Tsiyooni kaa'lo afi'rate anga fa'nitino; ikkollana sheshifachishannoseha diafidhino; Israeele, gaangaawisera noo gosa qassanno gede Kaaliiqi hajajino. Yerusaalameno insa giddo battete gede kiirantino.

18«Kaaliiqi halaalaanchoho; ani isira dihajajamoomma. Wo'mankawa heedhinoonni manni baalu macciishshe; anera iillino qarrano la'e. Ooso'ya seennunna labballu qafadante hadhino.

19Elo'ya woshshi'roomma; insa kayinni ane xagartinoe. Qeesootunna albisootu, lubbo gatisi'rate sagale hasidhanni heedhe, katamu dooggara reyitino.

20Kaaliiqa'ya ballo, shetto'ya lai! Lubbo'ya dadillu giddo no. Cubbi'yanni kainohunni wodani'ya hiiqqamino. Doogga baalate manna shinanni; gallanni mini waalchira reyo no.

21Sheshifachishannoehu dinona, shete raareemmo raare macciishshie. Anera abbootto qoomama macciishshe, diini'ya baalu hagiidhino. Ane gatisate hexxo ootto barra rakke abbi; diinna'yano ane gede shettannore assi.

22Bunshensa deerrinni yoo yiinsa; cubbi'ya baalu daafira, ane qorichishitto gede insano qorichishi. Shettotenni kainohunni uranni noommo; wodani'yano xiwamino» yoommo.

Jump to: Chapter 2 →