Lamentations 5

Sidamo

← Chapter 4 Jump to:

1Kaaliiqa! Ninke aana ikkinore qaagi; kune, shollinyenke lai!

2Iqqinke allaggu anga no; minnankera manni gobba manni hee'ranni no.

3Annuwanke diinu anga reyitu; kunnira amuuwinke gunnoota ikke gatino.

4Angeemmo waa woxunni hidhineemmo; giidhineemmo haqqeno hidhinanni hee'noommo.

5Shorritannonkeri hoodenkera no; shentoommo; fooliishshono hoongoommo.

6Godowa duuwate yine, Gibitsetenna Asoorira anga uyinoommo.

7Annuwanke cubbo loossino; xa lubbotenni dino; ninkera kayinni insa loossino cubbi iillinonke.

8Borojjunni woyyitinokkiri gadadisse gashshitinonke; angansanni gatisannonkehu mittuno dino.

9Manna shitannori katamaho gobbaanni gaangaabbanno; sagalete yine lubbonke sayinse uyinoommo.

10Hude bisonke giirtino; gogankeno booso bacci gede kolishshiishshino.

11Meentonke Tsiyooni seyantoonni; seennenke Yihudu katammara ugginoonni.

12Aja gashshaanonke amande suntoonni; cimeeyyenkeno diayirrinsoonni.

13Wedellinke borojju gede gide daahino; labballi ooso haqqe dukke gatantartanno.

14Geerru katamu waalchira songa agurtino; wedelluno faarsonsa uurrissino.

15Wodaninkenni hagiirru baino; godo'lenke yaaddote soorrantino.

16Ayirrinyinke aaninkenni ho'lino; cubbo loonsoommona, ninkera bayisibao!

17Kunninni kainohunni wodaninke dhiwamino; illenke tunsitino.

18Kuni ikkinohu, Tsiyooni Ilaali mulla ikke, yeedaala burraaqqannoha ikkino daafiraati.

19Kaaliiqa, ati kayinni hegerera mootete; gashshootikkino ilamate ilama geeshsha hee'ranno.

20Kageeshshi geeshsha mayira agurittonke? Togo assite mayira hawittonke?

21Kaaliiqa! Atewa qolinke; ninkeno hingeemmona, atewa qolinke; albi ayirrinyeno qolte haaroonsinke.

22Woy horontanni giwoottonkeni? Hanqikkirano gawalo dinoni?

← Chapter 4 Jump to: