Lamentations 4

Sidamo

← Chapter 3 Jump to: Chapter 5 →

1Culku xummesi hoogi; filu culki danasi bai. Qullaawa Mine minnoonni kinna, doogga baalate billaallitu.

2Tsiyooni wedelli culkunni roore ayirraddaati; xa kayinni doru uduunni gede shottino.

3Hiyyeeyye nafa qaaqquullese qansidhe lossidhanno; manni'ya kayinni caacurresi mararannokki balgudi gedeeha ikkino.

4Qaaqquullensa hudenna goo'ro shitanno gede assitu; oosonsa sagale huuccidhanno; aannonsahu kayinni dino.

5Coommitinota dancha sagale ittannori, xa doogga baalate hudetenni reyitanni no. La'mite lophitinori, giggiltino sagale hasidhanni ishine hogooffanno.

6Manni'yara iillino qorichi, kaa'lote anga diriirsannohu nookkiha, hedeweelcho Kaaliiqiwiinni dirrinohu, Soddoomu qorichinni rooreho.

7Aja gashshaanonke danchuulleho; ci'muno diqasinoreeti; camote gede bilicci yitannoreetinna dhaabbatootaho.

8Xa kayinni albinsa diqillote gede kolishshi'rino; doogga baalate ubbe heedheenna, bade afannonsahu dino. Haqqu gede moolteenna, goginsa miqichu aana qa'mino.

9Gedensaanni sagale hoogge, hudetenni sununni reyitinorinni, bagadu shiinori woyyate.

10Manni'ya aana dayino qoomami, jawaata masille abbino: Qaaqquulle mararanno meenti, uminsa qaaqquulle gafe itino.

11Kaaliiqi wo'ma hanqosi wolqa facci asse agurino; Tsiyooni baatto ittanno giira qasino.

12Base baalate noori allaggu gashshaano nafa, Yerusaalamete cufanna eannohu hee'rannota diammantino.

13Ikkollana, katamaho beebbaataammu mundee duntinori, himanaanose loossino cubbinna, qeesootise assitino bunshenni kainohunni kuni coyi ikkino.

14Insa, ballootu gede dooggate raataabbanno; mundeetenni battaabbino daafira, mannu insa kisa qorophanno.

15Kunnira mannu, «Ki'ne battaabbinoonniri! Kissinoonte! Ho'le kawiinni» yaanni cancanno. Mannu haa'ra giweennansa raataabbanni, gobbatenni gobba sa'anno.

16Insa Kaaliiqi umisi billaallisino; kunni ka'a insara yee dimitii'manno. Qeesootu ayirrinye diafidhanno; geerrano naadannohu dihee'ranno.

17Afi'neemmokki kaa'lora doogo la'nanna, ille xissitinonke. Dagge kaa'litannokki gosa agadhinoommo.

18Doogo ha'ra dandiineemmokki gede, diininke illaallisanni millo ho'linonke. Dirinke goofino; goofimarchinkeno iillino.

19Iiminni dirranno allamurchinni roore, buubbe dagge shorritinonke. Ilaallate aana shorritinonke; halallitte gobbara kushe goxxe agartinonke.

20Horritannonkeri baaluwiinni gatisannoha, Kaaliiqi doorinoha, lubbonkera hexxinoommo moote qafaddino.

21Edoominna Uutsi gosa, dandiitinanni yannara hagiidhe! Oso'le! Maganunnihu hanqu finiinchi daanni noo'ne; aggine mullootu gaggabbinanni.

22Tsiyooni cubbise asale baattino; Kaaliiqi kunni ka'a qafadammoommowa diagurannonke. Edoomi! Ate kayinni Kaaliiqi qorichishannohe; cubbokkino xawo fushshanno.

← Chapter 3 Jump to: Chapter 5 →