Lamentations 2

Sidamo

← Chapter 1 Jump to: Chapter 3 →

1Kaaliiqi hanqino daafira, Tsiyooni tunsichunni beeshshi. Israeelete gaamaarre, gordu iiminni uulla qole tugi. Hanqisi barra lekkasinni kaxxannowa, Yerusaalame nafa diqaaganno.

2Kaaliiqi Yihudu qacha baala, mararikkinni gudi; aarisinni Yihudunnita kaajjado qiisho diigi; Gashshootenna gashshaanosi shollinyeho tugi.

3Lowo geeshsha hanqe, Israeelete wolqa huni; diinu dayi yannarano, sammi yee giwinsa. Hanqisi aananke giirate gede buwe, baalanka coye giire gudino.

4Isi diinu gede maxxasi, ninkera alba qo'lino; hexxinoommore baala shee gudi; hanqisino Yerusaalamete aana giirate gede buwi.

5Kaaliiqi diinu gede ikke Israeele huni; qiishosenna mootete minnase diigi; Yihudu mannira wi'lanna didatto batidhu.

6Magansidhannowa Qullaawa Mineno diige huni; diru ayyaannanna Fooliishshote Barra habbanno gede assi; hanqisinni mootenna qeesoota shollishi.

7Kaaliiqi kakkalote dargasi giwi; Qullaawa Minesino aguri. Diinuno kinchu huxxasi diigara wore aguri; ninke hagiirrunni magansi'neemmo darga, insa qeexaalunniha assidhu.

8Kaaliiqi, Tsiyoonihu kinchu huxxi, diigamanno gede murci'rino; gudisame ba"annota egensiisate, siiwotenni bikkino. Shaenna kinchu huxxi baalu mitteenni diigamino.

9Huxxu cufanna baattote woroonni waamantino; waawannansano hiiqqaqqante ubbino. Mootenna ejjeetto xa qafadante no; kunni ka'a Maganu seera dikullanni; himanaanono Kaaliiqiwiinni ajuuja diafidhanno.

10Yerusaalamete geerri xiddu uddano uddidhe, umoho buluulo giggishshidhe, sammi yite bukote aana ofoltanno. Yerusaalamete seennino haxo heeshshi yee uulla la"anno.

11Wi'late batinyinni kainohunni ille'ya jaaroortu; lubbo'yano shettote giddo no. Manni'ya ba"anni kainohunni dadillunni manii'roommo; oosonna qaaqquullu katamu dooggara dalagganno.

12Hudidhenna goo'riite amuuwinsawa higge raartanno; madaanote gede dalagge doogo baalate ubbanno; amansa anga heedheenna lubbonsa fultanno.

13Yerusaalame! Baxamootta Yerusaalame! Kunni ka'a mayeemmo? Hiitto asse sheshifachisheemmohe? Togo shetinohu horonta wolu dino; dagginohe bao lowo baari gede dannu dinoote; hexxo assi'rattari mitturino dino.

14Himanaanokki kaphonna mullicho ajuuja kultanno; qarrunni gatatta gede, cubbokki xawo difushshitino. Kultinohe sokka kaphohonna so'ronnite.

15Katamu widoonni hige sa"anno manni baalu, mishe angichunni kulannohe. «Baxamihunna gobba baala naaddu katami konneeti?» yee, umo shafanni qacifatanno.

16Diinnakki baala qacifattannohe; hinko faaccanni, «Agadhinoommo barri konneeti! Xa kune lubbotenni hee'ne la'noommo!» yitanno.

17Kaaliiqi hedinore baala assino; alba balaxe coyi'rino garinni, kune mararro nookkiha diigino. Diinu hagiidhanno gede assinohe; diinikkira wolqa ledino.

18Yerusaalame! Huxxuwakki Kaaliiqiwa higge raarto; hindiiddokkino hashshanna barra xashshimma lolakko; wi'latenna dadillunni umokki daafursi. Wi'la uurrissooti; hindiiddono illekkinni qoortoonke.

19Oosokki dooggate madde baalate, hudetenni reyitaraatina, hashsha wo'ma marro marro higge, baqqi yite Kaaliiqiwa raari. Wodanikkira noore co'o assite isira kulatenni, oosokkira maaro huucci'ri.

20Kaaliiqa'ya lai! Ninke gede assite wole qorichishoottoni? Meentu ilansanna lossi'rino ooso itona? Qeesootanna himanaano Qullaawa Mine shinona?

21Wedellunna geerru mittu garinni reyite dooggate ubbu; wedellanna aja seenne diinu bagadi gudino; hanqikki barra mararro nookkiha gorrisiisootto.

22Jilu barri gede diina'ya base baalatenni koyisse gamba assootto; hanqikki barra baotenni gate fulinohu mittuno dino; ile lossi'roommorenna baxeemmore ooso'ya shitino.

← Chapter 1 Jump to: Chapter 3 →