Romans 14

Sidamo

← Chapter 13 Jump to: Chapter 15 →

1Ammana shaqqinoha ki'newa haadhesi ikkinnina hedosira yoo yitinoonte.

2Mitu wo'mankare ita dandaannota ammananno. Ammana kaajjinokkihu kayinni gati laalcho calla itanno.

3Wo'mankare itannohu itannokkiha mishoonke; wo'mankare itannoha Maganu haa'rinosi daafira, itannokkihu itannoha bushiishoonkesi.

4Wole soqqamaancho bushiishattohu ati ayeti? Isi uurrirono uwirono Mootichisi hajaati. Mootichu uurrisasira dandaanno daafira uurranno.

5Mitu, mitu barri wolu barrinni roore ayirrado ikkino gede asse hedanno. Wolu qole, baalunku barri taalo ikkino gede asse hedanno. Mittu mittunku, hakko garinni mayira hedinoro seekke afa hasiissannosi.

6Mitto barra wolu barrinni roorse ayirrisannohu hee'riro, Mootichu ayirrinyira yeeti. Wo'mankare itannohuno Mootichu ayirrinyira yee itanno. Itanno sagale daafirano Magano galatanno. Wo'mankare itannokkihuno Maganu ayirrinyira yee aguranno. Isino Magano galatanno.

7Ninke giddonni ayino umisira calla hee'rannohu dino; umisira calla reyannohuno dino.

8Lubbotenni hee'nummoro Mootichaho hee'neemmo; reyinummorono Mootichaho reyineemmo. Kunnira, hee'nummorono reyinummorono Mootichunnireeti.

9Konne ikkinohura, Kiristoosi reyotenni kainohu, nooriranna reyitinorira Mooticha ikkaraati.

10Ati rodookki mayira bushiishatto? Woy mayira mishatto? Mitto barra ninke wo'munku Maganu yoo barcimi albaanni uurrineemmo.

11Hakkuno, «Maganu, ‹Halaali'ya afanna, mannu baalu guluchisinni ane albaanni guluphanno; arrawu baalu ani Magano ikkoommota farci'ranno› yaanno» yine borreessinoonni garinniiti.

12Kunnira, mittu mittunku loosinke garinni Maganu albaanni shinqe xa'mammeemmo.

13Mimmitonke bushiisha agurro! Hatto assa agurre, ledo ammanaasinchi gufi're cubboho uwannokki gede qorophino.

14Mootichu Yesuusinni hee'ra'yanni, batte ikkinori nookkita seekke egennoommo. Ikkollana, mittu manchi mittoricho batte ikkino gede asse hediro, hakku isira battete.

15Sagaletenni kainohunni rodookki dadillisattoha ikkiro, baxillu noohekkita leellishatto. Kiristoosi reyinosi mancho intanni sagalenni kainohunni ba"anno gede assitooti.

16Giddo'ne danchaho yitine heddinoonni coyi mishamanno gede assitinoonte.

17Maganu Gashshooti, Qullaawu Ayyaani aanno keeraanchimmaati, keereetinna hagiirreeti ikkinnina, itunna agu haja di"ikkino.

18Kunni garinni Kiristoosira soqqamanno manchi, Magano hagiirsiisannohonna mannuno galatannosiho.

19Mannu ledo keere hee'nanni garanna mimmito dhaambanni doogo ha'rate diinaggaambo.

20Sagaletenni kainohunni Maganu loosi diigamoonke. Wo'munkuri lago diafi'rinoho. Wole manna cubboho eessitanno sagale ita kayinni so'rote.

21Ledo ammanaasine gufisannoha ikkiro, maala ita woy woyinete xajje aga, woy wole coye assano agura woyyate.

22Kunnira, kunni coyi daafira noohe amma'na atenna Maganu mereero heedho. Ammanino coye assanna wodanisi huluullamannokki manchi ba'raa'rinoho.

23Huluullamanni itanno manchi kayinni amma'natenni ikkinokki daafira, yoo yinoonniho. Amma'natenni ikkinokki coyi baalu cubboho.

← Chapter 13 Jump to: Chapter 15 →