Romans 5

Sidamo

← Chapter 4 Jump to: Chapter 6 →

1Kune ninke keeraanchimma ammanatenni afi'noommo daafira, Mootichinke Yesuusi Kiristoosi widoonni Maganu ledo keere hee'noommo.

2Xa tenne uurrine hee'noommo eltowa e'noommohuno iso amma'natenniiti. Maganu ayirrinye gutamate hexxonnino hagiirraamma ikkineemmo.

3Kunni callunni ikkikkinni, qarrunni cinca afi'neemmo daafira, qarranke hagiirrunni adhineemmo.

4Cincatenni fonqolo sa'nannita, fonqolo sa"atenni hexxo afi'nannita egenninoommo.

5Uyinoonninkehu Qullaawu Ayyaani widoonni Maganu baxilli wodaninkera wo'minohura, hexxo di"irraawissannonke.

6Ninke wolqa afi'noommokki waro, Maganu hedino yanna iillituta Kiristoosi ninke cubbaataammaho reyino.

7Keeraanchu daafira reyanno mancho afi'ra lowo geeshsha qarraho; miteekke danchu shaqqadu manchi daafira reyannohu hee'rannoha ikkanno.

8Ikkollana, ninke cubbaataamma ikkine hee'neenna Kiristoosi ninke daafira reyino. Kunni garinni Maganu lowo geeshsha baxannonketa leellishino.

9Keeraa'minoommohu Yesuusi Kiristoosi mundeenni ikki geeshsha, roorenka isi widoonni hinge Maganu hanqinni ganteemmo.

10Ninke Maganu diina ikkine hee'ne, Beettisi reyonni Maganu ledo araarammummoha ikkiro, Maganu ledo araarammummohu gedensaanni, Beettisi heeshshonni roorenka ganteemmo.

11Konne calla ikkikkinni, Maganu ledo araarsinonkehu Mootichinke Yesuusi Kiristoosi widoonni hinge Maganunni hagiidhineemmo.

12Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.

13Muse Seeri aamamara albaanni cubbu alamete aana no. Ikkollana, seeru nookki waro cubbo ikke dikiiramino.

14Ikkeennano Addaami gede hajajo hunte cubbo loossinokkiri aana nafa, reyo Addaaminni kayisse Muse geeshsha noo manni baalaho wolqissino. Addaami albillitte daanno Kiristoosi lawishshaati.

15Maganu elto kayinni mannu cubbi gedeeta di"ikkitino. Mittu manchi cubbinni lowo manni reyannoha ikkiro, Maganu eltonna afanshi mittu manchi Yesuusi Kiristoosi elto widoonni lowo mannira bati're aamamanno.

16Maganu afanshi mittu manchi cubbi ledo taalo di"ikkino. Mittu manchi cubbinni kainohunni yinoonni yoo qoricha abbitino; lowo manni cubbi gedensaanni dayino afanshi keeraanchimma abbanno.

17Mittu manchi cubbinni reyo mannu aana wolqissino. Mittu Yesuusi Kiristoosi widoonni Maganunnita lowo eltonna keeraanchimma afidhinori roore qeellete heeshsho heedhanno.

18Mittu Addaami cubbi qorichi yoo mannu baalu aana abbinte gede, mittu Kiristoosihu keeraanchimmate loosi manna baala qorichunni gatise heeshsho aanno.

19Mittu manchi Addaami hajajama giweenna lowo manni cubbaataamo ikkinte gede, Kiristoosi hajajamanni lowo manni keeraa'manno.

20Seeru aamama cubbu bati'ranno gede assitino; cubbu bati'rinowa kayinni Maganu elto roore batidhino.

21Kuni ikkinohuno, reyote widoonni cubbu moohinonte gede, Mootichinke Yesuusi Kiristoosi loosinni hegere heeshsho afi'rate, keeraanchimmate widoonni Maganu elto mookkaraati.

← Chapter 4 Jump to: Chapter 6 →