Romans 3

Sidamo

← Chapter 2 Jump to: Chapter 4 →

1Ayihude ikkatenni daga mayinni roorranni? Barcima maricho kaa'litanno?

2Addanko, Ayihude ikka batinye doogonni roortanno. Qaru coyi kayinni, Maganu addaxxe qaalesi Ayihudete aasiiti.

3Ayihudete giddonni mitu mitu ammanama hoogguro, ammanama hoogansa Maganu ammanama gatissannoni?

4Horontanni digatissanno! «Coyi'ratto coyinni kainohunni halaalaancho ikkatto; baarigaarakki yoote darga garatto» yine borreessinoonninte gede, mannu baalunku kaphaancho ikkirono, Maganu kayinni halaalaanchoho.

5Ninke cubbi Maganu keeraanchimma leellishannoha ikkiro, ma yineemmoyya? Maganu cubbinke daafira qorichishinkero, yoosi dabbino yaateni? Konne coye coyi'reemmohu mannu hedanno garinniiti.

6Maganu horonta yoo didawisanno. Hatto assannoha ikkiro, alamete aana yoo hiitto asse yaannoyya?

7Ane kaphaanchimma Maganu halaale xawisse, lowoha ayirrinyesi leellishshannoha ikkiro, cubbaataamu gede assine anera yoo yinanniehu mayiraati?

8Mitu mitu, «Danchare afi'neemmo gede busha coye assino» yaanni rosiiseemmohu gede assite su'ma huntannoe. Insa aana yinanni yoo garaho.

9Hatto ikkiro ninke Ayihude dagatewiinni woyyineemmo coyi noonke yaateni? Horonta hatto di"ikkino! Ayihudeno ikkito daga, mannu baalu cubbaataamo ikkinota balaxe coyi'roommo.

10Maganu Qaali, «Keeraanchu mittu nafa dino;

11wodanchannohuno dino; Magano hasi'rannohuno dino.

12Baalunku Maganu doogowiinni wirri yiino; mitteenni tidhitinokkire ikkitino. Dancha coye assannohu dino; mittu manchi nafa dino.

13Busha coye coyi'rate afiinsa waammate gede fa'naminoho; arrawinsanni dogganno; suumensanni fulanno coyi, hamashshu harfi gedeeho.

14Afiinsara rumonna, qaraaro wo'mitino.

15Lekkansa manna shaate rakkannote;

16doogonsara baonna gadadu no.

17Keeru doogo diegentino.

18Magano horontanni diwaajjitanno» yaanno.

19Seeru hajajo Seeru anga galtannorira ikkitinota egenninoommo. Kunni daafira mannu ku'le gatannore hooge sammi yaanno; alame baala Maganu yoo angara higganno.

20Seeru mannu baalu cubbaataamo ikkinota leellishanno daafira, Maganu albaanni Muse Seera agadhatenni keeraawannohu dino.

21Xa kayinni Maganu mannaho Seera agadhikkinnino keeraa'manno doogo kulino. Konne coyeno, Seerunniteranna himanaanote maxaaffa giddo farci'noonni.

22Maganu Yesuusa Kiristoosa amma'nanno manna baala keereensanno. Mannu mereerono badooshshe diworanno.

23Mayira yiniro, mannu baalu cubbo loosino; Maganu uyino ayirrinyeno hoogino.

24Kunnira, mannu Kiristoosi Yesuusi loosino gatonni mulla Maganu elto callatenni keeraa'manno.

25Maganu Yesuusa Kiristoosa, cubbo agursiisate kakkalo asse uyinohu, Isi kakkalama ammaninohu gatanno gedeeti. Maganu hatto assinohu, cincasinni albi cubbo hune halaalaancho yoosi leellishara yeeti.

26Xa tenne yannara kayinni, Maganu keeraanchimmasi leellishannohu, Yesuusa amma'nitinore keereensatenniiti.

27Xa adawadhineemmo coyi noonkeni? Mitturino dinonke. Adawadhineemmokkihu mayiraati? Adawadhineemmokkihu, Seera agadhatenni ikkikkinni amma'natenni keeraamboommo daafiraati.

28Kunnira, Maganu manna keereensannohu, Seera wonshineenna ikkikkinni amma'natenni ikkinota seekkine buunxoommo.

29Woy Maganu Ayihudenniha calla ikkinoni? Dagannihano di"ikkino? Ee, Maganu wo'munkuho.

30Maganu mittoho. Isi Ayihudeno dagano amma'nansanni keereensanno.

31Hatto ikkiro amma'nate daafira yine Seera mullare assine agurreemmo yaateni? Dee'ni! Roorenka kaajjinsheemmo.

← Chapter 2 Jump to: Chapter 4 →